ZASEŊƆ 56
Basɛ Ti Nɔyinɛ Bɔna Tansugere La Poan
To san naɛ to mabiisi bɔna, la ni ana to wuu Naba David n yuun yele se’em la: “Bisɛ la ani soŋa ge za’asum se’em ti suurɔ ta’an naɛ taaba bɔna la nɔyinɛ!” (Yooma 133:1) To nɔyinɛ la yeen ka di’e me na bɔna. To za’a waabi tiregeri mɛ ti to basɛ ti nɔyinɛ bɔna.
1. Bem n basɛ ti Naayinɛ nɛreba bɔna ba to’ore?
Ho san keŋɛ tansugere zamesegɔ tiŋa kayima poan, ho wan nyɛ ti ho ka bɔkeri ba yetɔɣum la ge la wan kelum ana ho wuu hon la ho deodoma n boi la. Beni n sɔi? Se’ere n sɔi la gɔnseto ti to tara zamesa Baabule la dela buyina zɛ’an woo. To kɔ’ɔn tiregera mɛ ti to tara nɔŋerɛ bɔ’ɔra taaba. La ka pakɛ la to kɛ̃’ɛri zɛ’an, to za’a waabi ‘yi’iri la Yehowa yu’urɛ ge me pu’usa en la nɔyinɛ.’—Zepania 3:9, tiŋanɔɔrɛ yelesum.
2. Ho wan eŋɛ la wani ti nɔyinɛ bɔna tansugere la poan?
“Nɔŋɛ ya taaba paa ze’ele ya suuren.” (1 Peter 1:22) Ho wan dekɛ ka’aŋɔ wa tum tuuma la wani? Da bisera nɛreba n tuuri se’em la ge tuɣum bisa ba halesoma la. Da kɔ’ɔn naɛ la ho tadaandoma bii sɛba n nɔŋɛ yelese’a ti hon bɔta la ma’a sɔsera ge tuɣum ni tiregɛ naɛ la to mabiisi n boi to’ore to’ore la sɔsera ta’an baŋɛ ba soŋa. To me nari ti to tiregɛ mɛ ge da nɛ’ɛsa nɛreba hali la to puti’irɛ poan.—Kaalɛ 1 Peter 2:17.a
3. Hon la ho mabia san nyɛ nɔkpe’ene, hon wan eŋɛ la wani?
To za’a waabi tari la nɔyinɛ ge to ka di mi’a. Saŋa ase’a to ta’an ni eŋɛ sɛla ti la daam to mabia. Bala la, Naayinɛ Yetɔɣum la yele to ti to “kɔ’ɔn . . . dita sugeri bɔ’ɔra taaba” ge le tɔ̃kɛ yeti: “Wuu Yehowa n di sugeri bo ya zaŋa se’em la, yamam me nari ti ya ita bala.” (Kaalɛ Kolose 3:13.) To sa’am Yehowa suure mɛ ti la ka tara kãlɛ ge a kelum dita sugeri bɔ’ɔra to mɛ. Bala la, a boti la to me dita sugeri bɔ’ɔra to mabiisi. Ho san baŋɛ ti ho eŋɛ la sɛla ti la daam nɛra, tiregɛ la ho basɛ ti ya maalɛ yele la.—Kaalɛ Matu 5:23, 24.b
VIISƐ PA’ASƐ
Bisɛ hon wan ta’an eŋɛ se’em laɣum basɛ ti nɔyinɛ la suma’asum bɔna tansugere la poan.
Hon wan eŋɛ la bem ta’an basɛ ti suma’asum bɔna?
4. Da nɛ’ɛsa nɛreba
To boti la to nɔŋɛ to mabiisi la za’a. Ge la ta’an kpe’em bo to ti to naɛ la nɛra n boi a to’ore laɣum bɔna soŋa soŋa. Bem n wan ta’an soŋɛ? Kaalɛ Tooma 10:34, 35 ge nyaa sɔsɛ sokere ana wa:
Yehowa boti la nɛra woo ti ba dɛna a Sɛɛradoma. Putɛdena wa wan basɛ ti ho ta’an tɔɣesa Naayinɛ la wani kan nɛ’ɛsa buuri sɛba n daɣɛ ho tiŋa nɛreba la?
Nɛreba nɛ’ɛsi taaba la wani yamam gingilega la poan ti hon kan bɔta ti ho dekɛ homea pa’asɛ bim?
Kaalɛ 2 Korint 6:11-13 ge nyaa sɔsɛ sokere wa:
Hon ti’isɛ ti ho wan eŋɛ la wani ta’an tara nɔŋerɛ bɔ’ɔra to mabiisi la za’a?
5. Dita sugeri bɔ’ɔra nɛreba ge me bɔta suma’asum
La boi bim ti Yehowa kan makɛ ɛɛra to sugeri dia ge a diti sugeri bɔ’ɔra to mɛ. Kaalɛ Yooma 86:5 ge nyaa sɔsɛ sokere ana wa:
Yehowa sugeri dia la zo’e paɛ la wani?
Beni n sɔi ti hon puurɛ pee la Yehowa n diti sugeri la?
Yele ani poan n ni basɛ ti la kpe’em bo to ti to tara suma’asum la nɛreba?
To wan eŋɛ la wani ta’an tɔɣesa Yehowa ge tara nɔyinɛ la to mabiisi? Kaalɛ Magaha 19:11 ge nyaa sɔsɛ sokere wa:
Nɛra san basɛ ti ho sunsɔa nyie, ho wan eŋɛ la bem ti yele la maalɛ?
Saŋa ase’a, to ta’an tue to mabia. La san ta eŋɛ bala, to wan eŋɛ la bem? Ŋmɛ VIDIYO la ge nyaa sɔsɛ sokere wa:
Vidiyo la poan la, mabipɔka la eŋɛ la bem ta’an basɛ ti suma’asum bɔna?
6. Bisera ho mabiisi halesoma la
To san naɛ la to mabiisi sɔsa, to wan baŋɛ ba inbuulegɔ la ba paŋa beene. To wan eŋɛ la wani ti’isa ba halesoma la yele? Ŋmɛ VIDIYO la ge nyaa sɔsɛ sokere wa:
Bem n wan soŋɛ hɔ ti ho ta’an bisera ho mabiisi la halesoma la?
Yehowa kɔ’ɔn bisera la to halesoma la. Kaalɛ 2 Yelebiŋ’a 16:9a ge nyaa sɔsɛ sokere wa:
La ani hon la wani la hon baŋɛ ti Yehowa kɔ’ɔn bisera la ho halesoma la?
Hali diamond n tari nimpiilum se’em la, bɔba ase’a ka ani soŋa ge ku kelum tara tuulum mɛ. Bala mea nɔɔ ti to mabiisi la za’a ka ana kasi ge ba tari tuulum mɛ bɔ’ɔra Yehowa
NƐREBA BASƐBA YETI: “Nɛra san ɛɛra ti mam di sugeri bo en, see ti a tiregɛ belum mam.”
Beni n sɔi ti to wan bɔta ti to dita sugeri bɔ’ɔra nɛreba?
YELEKPINE
Ho san dita sugeri ge tara nɔŋerɛ bɔ’ɔra mabiisi la za’a waabi, bala wan basɛ ti nɔyinɛ bɔna tansugere la poan.
Tiisegɔ Sokere
Ho wan eŋɛ la wani kan nɛ’ɛsera nɛreba?
Hon la mabia san nyɛ nɔkpe’ene, hon wan eŋɛ la bem?
Beni n sɔi ti hon wan bɔta ti ho tɔɣesa Yehowa n diti sugeri bɔ’ɔra nɛreba se’em la?
Ɛ BISƐ
Zamesɛ baŋɛ Yezu maɣesa la ayima n wan ta’an soŋɛ to se’em ti to kan nɛ’ɛsa nɛreba.
La nari ti to belum nɛra ti tomam tue mɛ, to san bisɛ ti tomam ka tue?
“Gaafara Ni Basɛ Ti Suma’asum Bɔna Mɛ” (The Watchtower, November 1, 2002)
Bisɛ mabiisi basɛba n eŋɛ seʼem ka gãsera nɛreba.
Bisɛ hon wan eŋɛ se’em ta’an maalɛ yelese’a ti hon la ho mabiisi la tara la ti la da sa’am suma’asum la n boi tansugere la poan la.
“Doose Nɔŋerɛ Sore Poan Maalɛ Nɔkpɛ’ɛma” (The Watchtower, May 2016)
a Ki’ileŋɔ Yelesum 6 pa’alɛ la nɔŋerɛ n soŋeri Kristakɔma ti ba ka tara bã’asi lamesa taaba se’em.
b Ki’ileŋɔ Yelesum 7 pa’alɛ la to wan eŋɛ se’em maalɛ leebego la kootin yɛla.