1 ENOK
A Yuun Naɛ Mɛ La Naayinɛ Kena
ENOK yuun kɔ’ɔn bɔna la a to’ore la nɛresɛba n yuun boi a saŋa la. Bala zuo la, saŋa ase’a la yuun ta’an ni ana en wuu a boi la a ma’a la. Eŋa ma’a ti Baabule la yuun tɔɣɛ a yele sankaŋa yeti: “Enok kenɛ mɛ la [Naayinɛ].’’ La wan eŋɛ la wani ti nɛresaala n boi tingɔŋɔ wa zuo ta’an kena la Naayinɛ? Enok yele la wan ta’an soŋɛ to la wani ti to tara sukpe’ene?
Enok yuun naɛ mɛ la yelemɛŋɛrɛ Naayinɛ la kena yɛla ayi poan. Yia, a yuun ka iti wuu nɛresɛba n yuun boi a saŋa la n yuun iti se’em la. N yi’i, a yuun iti la Naayinɛ n boti sɛla. A yuun dela Adam la Hawa dɔɣum tuusum n pa’asɛ buyopɔi. Enok saŋa la ti Adam yuun kelum vɔna mɛ ge me kuregɛ paa. (Bisɛ daka la zuo n de “Yizuo Nɛŋadoma Saŋa La Ta Paɛ Gãkerɛdoma Saŋa La.”) Kɔ’ɔn pɔsɛ se’em ma’a ti Adam la Hawa zaɣesɛ Naayinɛ nɔɔrɛ la, nɛresaaleba zo’e zo’e me ka nani Naayinɛ. Ba dayua Kain n yuun ku amea suɔ Abel. Abel n yuun de nɛresɛka n deŋɛ nɛŋa tara sakerɛ bɔ’ɔra Yehowa. Kain kɔma, la a yaasi basɛba yuun nɔŋɛ la gbiregere tuuma wuu Kain la. Hali ba yuun ta’an gana Kain. (Pin. 4:23, 24) Enok yuun tari la sukpe’ene. A yuun ka tɔɣeseri nɛreba la gbiregere tuuma la. A yuun nɔŋɛ la suma’asum. Bala me n yuun basɛ ti Naayinɛ puurɛ pee.
Yuuma zo’e zo’e poan ge ti ba nyaa dɔɣɛ Enok la, ‘nɛreba yuun pɔsɛ yi’ira la Yehowa yu’urɛ.’ (Pin. 4:26, NWT) Daanse’ere ba yuun keseri Yehowa yu’urɛ la mɛ ge tara dɛ tuna tuuma pumpɔreŋɔ pu’usegɔ poan. Enok yuun ka laɣum ita bala. A yuun nɔŋɛ Yehowa zilam yu’urɛ la mɛ ge tara gilema bɔ’ɔra dɛ. Bala la, a yuun boi la a to’ore la a saŋa la nɛreba.
Se’em ma’a ti nɛreba yuun bɔta ti ba ku Enok la, Yehowa yuun te’ele en mɛ
Enok yuun nari ti a tara la sukpe’ene paa ge ta’an tum tuunse’ere ti Yehowa dekɛ bo en ti a tum la. Naayinɛ yuun yele Enok ti a dɛna a nɔdɛ’ɛsa. Bala yuun dela tunkãtɛ. A yuun nari ti a mɔɔlɛ Naayinɛ yelesum bo tunfɛ̃’ɛsadoma. A yuun mɔɔlɛ yeti: ‘Bisɛ ya! To Daana Naayinɛ wa’an me na la a soŋereba tusa kekeko. A wa’an me na ti a gãkɛ nɛreba ge sa’am sɛbadoma woo n tuni yalumtuuma, la sɛla woo ti ba tuna la, la yetɔɣeyooro la woo ti sɛba n ka zoti Naayinɛ la tɔɣera giisa Naayinɛ la.’
Dãalɛ basɛ ti Enok yuun tɔɣɛ yetɔɣebiŋere la ti la ana wuu Yehowa puɣum gãkɛ putɔpa la me la. Bala basɛ ti la niɛ peelumi ti Enok n yuun tɔɣɛ sɛla la wan sirum tum tuuma. Enok yetɔɣum la basɛ ti to baŋɛ ti Yehowa sunsɔa yuun nyie mɛ la nɛreba la. Enok yuun yeti nɛreba la ‘ka zoti Naayinɛ’ ge me tuna ‘yalumtuuma!’ Enok n yuun mɔɔli sɛla la yuun daam nɛresɛba n yuun keleseri en la mɛ. Ge Enok yuun mɔɔli Yehowa n boti ba wum sɛla la mɛ la sukpe’ene.
Nɛreba la yuun eŋɛ Enok la wani? Baabule la ka pa’alɛ nɛreba la n yuun eŋɛ sɛla wana mɔpi. Ge lan tɔɣɛ sɛla la basɛ ti to baŋɛ ti saŋa kayima poan, Enok vom yuun boi la dɛŋa poan. Beni n sɔi ti to yele bala? Sɛla n sɔi la, Baabule la yeti Naayinɛ n yuun dekɛ en. Bem n yuun eŋɛ? Daanse’ere, tunfɛ̃’ɛsadoma la yuun yaɛ Enok mɛ. Yehowa yuun ka boti ba pɔɣelum Enok bii ku en. Bala zuo la, Yehowa yuun dekɛ a zɔsonkɔ wa vom mɛ ti a ki bãalam. Ge Yehowa wan ta isige en beere sa’am.
Ge ti Enok nyaa ki la, Yehowa yuun basɛ ti a nyɛ la sɛla n boi de to’ore. Baabule la yeti: ‘Ge ti Naayinɛ yuun dekɛ Enok la, a yuun nyɛ sɛɛra n pa’alɛ ti a pee Naayinɛ puurɛ mɛ soŋa soŋa.’ Daanse’ere, Yehowa yuun lilige pa’alɛ Enok ti a baŋɛ ti beere sa’am, a wan ta bɔna paradiisi poan tingɔŋɔ wa zuo ti suma’asum bɔna bim! Bala la, Enok yuun mi soŋa soŋa ti Yehowa nɔŋɛ en mɛ ge me kã bo en la eŋa n tari sukpe’ene, la sakerɛ la!
Kaalɛ Baabule zɛ’ɛsi wa:
Hebru 11:5, NWT
Yude 14, 15, NWT
Sɔsɛ ya sokere wa:
Enok yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Sodeni poan ti nɛreba yuun pɔsɛ sa’ana ‘Yehowa yu’urɛ la’? (Pin. 4:26; w01-E 9/15 29 ¶3)
2. Enok n yuun de Naayinɛ nɔdɛ’ɛsa n deŋɛ nɛŋa. A yuun eŋɛ la bem? A yuun eŋɛ la wani ta’an tum tunse’ere ti Yehowa dekɛ bo en la? (w01-E 9/15 31 ¶5)
3. Enok yuun eŋɛ la wani baŋɛ ti la wan nara ti a tara sukpe’ene ta’an mɔɔla? (w06-E 10/1 19 ¶13-14) Bisɛ foote A
Foote A
4. Ho wan eŋɛ la wani pa’alɛ nɛra ti a baŋɛ ti Naayinɛ yuun ka dekɛ Enok zom saazuo wuu nɛreba basɛba n ti’iseri se’em la? (Yon 3:13; Heb. 11:5, 13)
Ti’isɛ Hon Wan Dekɛ Tum Tuuma Se’em
Wani ma’a ti la yele ni pakɛ ti to mɔɔla la sukpe’ene? Enok yele la wan ta’an soŋɛ to la wani? Bisɛ foote B
Foote B
La ni ana Yehowa la wani to san pu’usa en la sukpe’ene? (Mag. 27:11; Heb. 11:5)
Ho wan eŋɛ la wani ta’an tɔɣesa Enok sukpe’ene la?
Ti’isɛ Taɣesɛ Yehowa Yele
Enok yele wa pa’alɛ mam ti Yehowa ani la wani?
Enok yele wa makɛ la Yehowa puti’irɛ la wani?
Yehowa san ta isige Enok kum poan, mam wan soke en la bem?
Zamesɛ Yɛla Pa’asɛ
Enok yele la wan soŋɛ ho la wani ti ho ta’an ŋmibe, se’em ma’a ti nɛreba tuna gbiregere tuuma?
Tɔɣesa Sɛba N Tari Sakerɛ La Ge Daɣɛ Sɛba N Ka Tari Sakerɛ—Enok, Daɣɛ Lamek (2:53)
Geele sɛla n yuun soŋɛ Enok ti a tara sakerɛ.