2 NOAH
A Yuun Zɛregɛ Tingɔŋɔ La Mɛ
ENOK n yuun ki la, yɛla yuun gaam la be’ero tingɔŋɔ wa zuo. Bem n yuun eŋɛ? Malesi basɛba yuun eŋɛ la kpenkpasi la Naayinɛ. Kolekpabɛ’ɛsi wa yuun boti la ba gã’arɛ la pɔɣesi. Bala la, ba yuun sige la tingɔŋɔ wa zuo na, lebege nɛreba ge di pɔɣeba. Ba kɔma la yuun dela nɛrewaɣela. Ba yuun daɣelum mɛ, nɔŋɛ gbiregere tuuma ge me tara putoo. Ba itigɔ wa yuun basɛ ti nɛreba me tuna la tunfɛ̃’ɛsa. Naayinɛ yuun naam nɛreba ti ba vom ana la soŋa ge nɛreba n yuun tuni putotuuma la zuo, la yuun basɛ ti ba vom sa’am mɛ. Ge Enok yaaŋa ayima n yuun boi a to’ore. A yu’urɛ dela Noah.
Noah me yuun dela tontɔɔdaana wuu Enok la. Baabule la yeti: ‘Noah yuun keni mɛ la yelemɛŋɛrɛ Naayinɛ la.’ Pooren, a yuun di la pɔɣa, dɔɣɛ kɔma batã. Eŋa la a pɔɣa la yuun pa’alɛ ba kɔma la mɛ ti ba nana Yehowa. Wana wa yuun basɛ ti Noah la a deodoma bɔna la ba to’ore la ba saŋa la nɛreba.
Daarɛ deyima ti Yehowa yele Noah ti a wan sa’am nɛrebe’ero la woo n boi tingɔŋɔ la zuo la. Ge Yehowa yuun boti la a faaɛ Noah basɛ. A yuun yele Noah ti a kpa daka kãtɛ, la wan eŋɛ se’em ti a ta’an faaɛ nɛresondoma basɛ. Yehowa yuun yeti Kokemɔ wan sa’am tingɔŋɔ la. Noah me ka tabelɛ nyɛ ti ko’om libe tingɔŋɔ wa za’a wuu Yehowa n yele se’em la. Leyɛ’ɛsa, Noah yuun ka tabelɛ kpa daka n kãregɛ bala. Ge a yuun dekɛ la amea delum Yehowa ge pɔsɛ kpa’ara daka la.
Nɛreba yuun yaɛ Noah la a deodoma me paa la bamam n yuun mɔɔli yelese’a ge tuna tunsɛka la
Noah la a deodoma yuun nari ti ba tara la sukpe’ene ge ta’an tum tuunɛ wa. Nɛreba zo’e zo’e yuun iti ba la sia sia. Basɛba yuun ta’an ɛɛra ti ba gu ba ti ba da tum tuunɛ la. Kolekpabɛ’ɛsi la me yuun tari la paŋa ge vuusera nɛreba. Ba kɔma la n de nɛrewaɣela la, me yuun nɔŋɛ la ba mugesa nɛreba. Ge Noah la a pɔɣa, la a dayɔɔsi batã, la bamam me pɔɣeba la yuun kɔ’ɔn mu’ɛ la nini kpa’ara daka la. Ba yuun dela nɛreba banii. Daanse’ere, ba yuun dekɛ la yuun 50 kpa daka la ba’asɛ.
Sankaŋa za’a la, Noah yuun le tuna la tuunɛ pa’asɛ. Baabule la yeti Noah yuun “mɔɔle [la] yelemɛŋɛrɛ yetɔgom la.” Noah n yuun de yidaana la zuo, eŋa n yuun deŋɛ nɛŋa kaɣɛ nɛreba la ti kokemɔ n ye na. A me yuun soŋɛ a deodoma mɛ ti ba ta’an mɔɔla bɔ’ɔra nɛreba la ge nɛnɛra yuun ka kelese en. Hali Noah yizuo nɛreba zo’e zo’e yuun ka kelese en. Nɛreba la yuun ka boti ba basɛ ba tunfɛ̃’ɛsa la. Noah sakerɛ la yuun basɛ ti a bɔna la a to’ore la a saŋa la nɛreba. Baabule la tɔɣɛ Noah yele yeti a sakerɛ zuo “te a yeti teŋa wa zuo nɛreba tue mɛ.”
Noah la a deodoma la yuun ta kpa daka la ba’asɛ mɛ. Ba yuun nyaa tari la dia la ko’om, la sɛla woo n wan ta pakɛ bamam la dusi la kɛ̃’ɛra daka la poan. Pooren ti sɛla eŋɛ ti la dɛna yelepakerɛ. Dusi buuri buuri n de bundɔɔrɔ, la bunnya’asi za’a n yuun kɔ’ɔn kena kɛ̃’ɛra daka la poan! Dusi wa bayi bayi n yuun “lagom doohe kɛn daka deo la poan.”
Naayinɛ yuun yele Noah ti a maasum tari a deodoma kɛ̃ daka la poan, sɛla n sɔi la saa la wan pɔsɛ nia la dabesa ayopɔi daarɛ. Daanse’ere, Noah la a deodoma yuun nyaa mu’ɛ la nini ti ba dekɛ lɔɣɔse’a n gee la kɛ̃ daka la poan. Nɛreba la yuun ta’an le ita ba sia sia pa’asa. Ge Noah la a deodoma la n yuun tari sɛla woo kɛ̃ daka la poan la, Yehowa mea n yuun paɣɛ daka la. Daanse’ere, kuleŋa la n yuun paɣɛ la yuun ta’an basɛ ti nɛresɛba n iti ba sia sia la go’e la siim. Ti saa la nyaa pɔsɛ niira! Ko’om la yuun kɔ’ɔn pa’asa la bala dabesa 40 ta paɛ se’em ma’a ti zɔya la za’a libe. Yehowa yuun sa’am tunfɛ̃’ɛsadoma la mɛ.
Noah la a deodoma yuun boi la daka la poan gaŋɛ yuunɛ ti daaŋɔ ka paɛ ba. Sankaŋa la, ko’om la yuun nyaa sigeri mɛ fii fii. Daarɛ deyima, daka la yuun ta teke la zoore zuo. Pooren ti Yehowa nyaa yele Noah yeti a ta’an yese daka la poan. Se’em ma’a ti Noah la a deodoma yuun ze’ele daka la poan yese na la, ba yuun eŋɛ la kãabegɔ bo Yehowa, sɛla n sɔi la eŋa n faaɛ ba basɛ. Yehowa yuun yeti eŋa kan le basɛ ti sakaŋa taaba ni leyɛ’ɛsa. A yuun dekɛ la gumatia tahɔ ti la dɛna dãalesum n pa’alɛ ti eŋa n yele sɛla la wan tum.
Nɛresɛba woo n vɔi zina beere wa dela Noah yaasi. Bala la, to puurɛ pee mɛ la eŋa la a deodoma n yuun tari sukpe’ene ta’an bɔna ba to’ore sankaŋa la!
Kaalɛ Baabule zɛ’ɛsi wa:
Sɔsɛ ya sokere wa:
Noah yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Nɛreba vom yuun ani la wani ge ti Kokemɔ la nyaa wa’ana? (w02-E 3/1 5 ¶3–6 ¶4)
2. Wani ma’a ti Naayinɛ yuun yele Noah ti a kpa daka la? Wani ma’a ti Naayinɛ yuun yele Noah sansɛka wana mɔpi ti Kokemɔ la wan pɔsɛ? (w12-E 4/15 23 ¶5-8)
3. Beni n sɔi ti to sakɛ ti Kokemɔ la yuun sirum wa’an me na? (ijwbq-E zaseŋɔ 156 ¶2-5, daka) Bisɛ foote A
Historic Collection/Alamy Stock Photo
Foote A: India solene ayima yeti buraa n yuun maalɛ ɔɔreŋɔ ti a ta’an pĩɛ kokemɔ n yuun libe tingɔŋɔ wa. Ko’om la n yuun ta kɛ̃ɛsɛ za’a la, a yuun eŋɛ la kaabegɔ ge nyaa dɛna nɛresaala woo yaaba
4. Kokemɔ la pooren la, la yuun gaŋɛ yuun kɔbega ti sɛla eŋɛ. Bem n yuun eŋɛ ge bala yuun ta’an daam Noah la wani? (it-E “Noah” No. 1 ¶12) Bisɛ foote B
Foote B
Ti’isɛ Hon Wan Dekɛ Tum Tuuma Se’em
Tomam saŋa wa wɔ̃ni Noah saŋa la wani? (Mt. 24:36-39)
Noah yele la pa’alɛ hon ti la yele pakɛ la wani ti ho . . .
ni maasum soŋa soŋa tum tuunɛ? Bisɛ foote D
Foote D
tuna kpe’eŋo kpe’eŋo? Bisɛ foote E
Foote E
di’isa suure? Bisɛ foote Ɛ
Foote Ɛ
Ho wan eŋɛ la wani ta’an tɔɣesa Noah sukpe’ene la?
Ti’isɛ Taɣesɛ Yehowa Yele
Noah yele wa pa’alɛ mam ti Yehowa ani la wani?
Noah yele wa makɛ la Yehowa puti’irɛ la wani?
Yehowa san ta isige Noah kum poan, mam wan soke en la bem?
Zamesɛ Yɛla Pa’asɛ
Bisɛ sɔ n tiregeri se’em ti a tɔɣesɛ Noah makesonɛ la.
Tɔɣesa Sɛba N Tari Sakerɛ La Ge Daɣɛ Sɛba N Ka Tari Sakerɛ—Noah, Daɣɛ A Saŋa La Nɛreba (2:57)
Soŋɛ ho kɔma ti ba ta’an zamesɛ yɛla Noah yele la poan.