Ho Wan Ta’an Tara Sukpe’ene!

1-3. Yezu yuun yele a podɔleba la yeti: “Ihege ya te to keŋɛ.” Beni n sɔi ti bala pa’alɛ ti a yuun tari la sukpe’ene?

“IHEGE ya te to keŋɛ.” Nɛra n tari sukpe’ene paa n tabelɛ tɔɣɛ yele ana wa. Beni n sɔi ti to wan ta’an yeti a yuun tari la sukpe’ene? To geele ya se’em n yuun tɔɣɛ yele wa, la sɛla n sɔi ti a yuun yele bala.—Mt. 26:46.

² Yezu Krista n yuun tɔɣɛ yele wa bo a podɔleba. A yuun puɣum tɔɣɛ yele wa bo ba mɛ. (Yon 14:31) Ge pooren denɛ la yuun boi la de to’ore. A yuun boi la Getsemane gaadin la poan. La yuun dela yu’uŋɔ. Yezu me yuun mi ti nɛrekuuŋɔ n ye na ti ba daam en. Sɛla n wan paɛ en la wan kpe’em bo en paa. Nɛra ka boi ti yele denɛ taaba tabelɛ paɛ en kurum. Yezu me yuun mi ti la wan nara ti a ŋmibe de poan a ma’a.

³ Yezu yuun ka tiregɛ ti a li’isɛ daaŋɔ la n wan paɛ en la. A yuun wan ta’an yele ni malesi ti ba sige na soŋɛ en ge a yuun ka eŋɛ bala. (Mt. 26:53) A yuun tuɣum yele a podɔleba la yeti: “Ihege ya te to keŋɛ.” Yezu yuun mi ti nɛrekuuŋɔ la wan nyɔkɛ en, mɛlesɛ en ge nyaa ku en. Ge beni n sɔi ti a yuun bɔta ti a namesɛ ta ki? Se’ere n sɔi la, a yuun nɔŋɛ la a Sɔ la, la a podɔleba la.

4-5. Nɛra n tari sukpe’ene wuu Yezu vuurɛ dela bem ge beni n sɔi ti bala yele pakɛ?

⁴ Nɔkpe’ene kai ti Yezu Krista n de se’em n tari sukpe’ene gana za’a. Hon dela Yezu podɔla? La san dɛna bala, hon me tari la sukpe’ene. Yelemɛŋɛrɛ Kristakɔma nari ti ba tara sukpe’ene. To boi la biɣi biɣi saŋa poan. To vom me ta’an ta bɔna dɛŋa poan. Bala, la yele pakɛ mɛ paa ti to tara sukpe’ene nananawa.

⁵ Nɛra wan eŋɛ la wani tara sukpe’ene wuu Yezu la? Nɛreba basɛba ti’isɛ ti, ho san tara sukpe’ene, la vuurɛ dela ho ka zoti dabeem bii dɛŋa. Ho me ka ti’iseri ti daaŋɔ wan ta’an paɛ hɔ. Basɛba me ti’isɛ ti la vuurɛ dela hon iti gbire gbire ti nɛreba baŋɛ ti hon kpe’em mɛ. (Ym. 11:5) Yezu n yuun tari sukpe’ene se’em la ka ani bala! Nɛra n tari sukpe’ene wuu Yezu la tiregeri mɛ ita Naayinɛ n boti sɛla, hali dabeem san tara en bii la san puɣum kpe’em bo en.

Ho Wan Ta’an Tara Sukpe’ene Wuu Yezu!

6. Yezu yele la wan ta’an buɣelɛ to suure la wani, to san ti’isa ti to ka tari sukpe’ene?

⁶ Daanse’ere ho ta’an ti’isa ti daaŋɔ san paɛ hɔ, ho kan ta’an tara sukpe’ene wuu Yezu la. La san ana ho bala, tɛ̃ra ti Yezu bɔkɛ lan ani ho se’em. Wuu a Sɔ la, Yezu ka eeri ti to eŋɛ yelese’a n gaŋɛ to paŋa. (Ym. 103:14; Yon 14:9) Makerɛ, Yezu la a tuntuneba la n yuun boi Getsemane gaadin la poan la, Yezu yuun yele ba ti ba pigera ge ba yuun kelum gisa mɛ. Hali la bala za’a, a yuun yele ba ti: “Ya sɛɛhe bote som ge ya iŋhe ka tare paŋa.” Bala yuun buɣelɛ la ba suure. (Mt. 26:41) A yuun mi ti ba ka di mi’a. Hon bisɛ wa, a ka mi ti hon me ka di mi’a?

7-8. Yezu eŋɛ la bem pa’alɛ ti a bisɛ nam a podɔleba?

⁷ Yezu me yuun bisɛ nam a podɔleba la mɛ. Yezu yuun yele ba ti: ‘Tari ya sukpe’ene ge mam puɣum nyaŋɛ ba.’ Bisɛ yele wa n yuun basɛ ti la ana ba buɣa buɣa se’em! (Yon 16:33) Yezu yuun mi ti ba wan ta’an tɔɣesa en. Ba me yuun sirum eŋɛ la bala. Saŋa zo’e zo’e ti Yezu yuun ni yele nɛreba ti ba tara sukpe’ene. Makerɛ, a yuun yele kɔɔreŋɔ ayima la bala ge nyaa buɣelɛ a suure ti a di sugeri bo en. (Mt. 9:2) Saŋa kayima me, a yuun tibɛ la pɔka n bɛ̃’ɛri paa. Bala pooren, a yuun yele pɔka la ti a tara sukpe’ene. (Mt. 9:22) Kusebego n yuun vukeri ti dabeem yuun sãɛ a podɔleba la, a yuun yele ba ti ba tara sukpe’ene. Bala yuun buɣelɛ la ba suure. (Mt. 14:27) Leyɛ’ɛsa, nɛreba basɛba sunsɔa n yuun nyie la tuntuna Paul ti ba bɔta ti ba ku en la, Yezu yuun yele Paul ti a tara sukpe’ene. Sankaŋa ti Yezu lebe la saazuo.—Tm. 23:​9-11.

⁸ Zina beere wa, Yezu boti la ho me ‘tara sukpe’ene’! A mi ti ho wan nyaŋɛ eŋɛ bala. Yehowa bo ho yelese’a woo n wan soŋɛ hɔ ti ho tara sukpe’ene.

Baabule La Wan Ta’an Soŋɛ To La Wani Ti To Tara Sukpe’ene?

9. Baabule la wan ta’an soŋɛ to la wani ti to tara sukpe’ene?

⁹ Yɛla zo’e zo’e n boi Baabule la poan pa’alɛ ti Yehowa wan ta’an soŋɛ tɔ ti to tara sukpe’ene. Buraasi, la pɔɣesi yuuma n boi to’ore to’ore, ti ba bɔŋa me bɔna tɔka tɔka yɛla n boi bim. Ba za’a yuun dela asaaleba “wo tomam n de se’em wa.” (Yam. 5:17) Bamam me yuun ka di mi’a, wuu tomam la. Ba yuun tari inbũulegɔ mɛ. Yeledaaŋɔ to’ore to’ore n yuun paari ba, wuu tomam la. Basɛba me vom yuun boi la dɛŋa poan. Ge la bala za’a, wuu Yezu la, ba yuun nyaŋɛ ŋmibe yele aŋa poan mɛ. Ba yuun tari la sukpe’ene. To san kaala ba yɛla, la wan kpemese to giila ti tomam me tara sukpe’ene.

10-11. Gɔŋɔ wa wan soŋɛ hɔ ti ho ta’an eŋɛ la bem ge ho wan ta’an zamesa gɔŋɔ wa la wani? (Bisɛ daka la zuo n de “Hon Wan Ta’an Tara Gɔŋɔ Wa Ita Homea Zamesegɔ Bii Deodoma Pu’usegɔ Se’em.”)

¹⁰ Gɔŋɔ wa wan soŋɛ hɔ ti ho tara sukpe’ene. Ku tari la zuto 54. Zuo woo wan pa’alɛ hɔ Yehowa n yuun soŋɛ nɛreba n ka di mi’a se’em ti ba tara sukpe’ene. Bala la, kaalɛ ba yɛla ge viisɛ ba ayima ayima woo yele pa’asɛ. Ho san ita bala, ho wan baŋɛ Baabule poan nɛreba wa soŋa soŋa.

¹¹ Nɛreba wa n yuun tari sukpe’ene se’em la, wan soŋɛ hɔ ti ho me tara sukpe’ene ta’an ŋmibera “ba’ahegɔ dabeha” wa poan. (2 Tim. 3:1) Dabeserɛ woo, tɛ̃ra Yehowa n yeti ho sɛla wa. A yeti: “N kan malom bahɛ ho, bii n zagahɛ ho.” Bala la, ho wan ta’an tara sukpe’ene ge me yeti, “Na’ayenɛ n soŋore mam, mam kan zɔta dabeem.”—Heb. 13:​5, 6.