Yizuo Nɛŋadoma Saŋa La Ta Paɛ Gãkerɛdoma Saŋa La

Bɔberɛ wa poan, to wan zamesɛ yelese’a n eŋɛ paɛ wuu yuun 2,200. Yia la, to wan sɔsɛ Enok yele. Enok saŋa la ti Adam kelum vɔna mɛ. To wan sɔsɛ yelese’a n eŋɛ Enok saŋa ta paɛ nɔdɛ’ɛsa Samuel saŋa. Samuel n yuun loe Israel yia naba. To me wan sɔsɛ nɛreba basɛba n yuun tari sukpe’ene paa yele. Nɛreba wa basɛba dela, Noah, Abraham, Sarah, Moses, Arahab, Debora, la Gideon. Basɛba yuun sakɛ doose la dɛŋa poan keŋɛ zɛ’ɛsi n zaaɛ, ti basɛba me yuun zabera “Na’ayenɛ zaberɛ.” Ba za’a yuun tari la sukpe’ene tuna ba tuuma ge me yuun nana ba Naayinɛ la ti ba nɔŋɛ la.