Soŋɛ Fɔɔsi Ti Ba Baŋɛ Yehowa
1. Yezu yuun eŋɛ la bem pa’alɛ ti a tari giile bɔ’ɔra fɔɔsi?
1 La yuun gee dabesa fii la Yezu ki ge ti a yuun basɛ Yeriko teŋa ye’a la, fɔɔsi bayi n de zusedoma yuun nyabegɛ mɛ yeti: ‘N Daana, zɔ to ninbɔ̃’ɔ!’ La boi bim ti Yezu yuun ti’iseri la gurebisɛ la n wan paɛ en se’em la ge Yezu yuun teke yi fɔɔsi la mɛ tibɛ ba. (Matu 20:29-34) To wan eŋɛ la wani tɔɣesa Yezu n yuun tari giile bɔ’ɔra fɔɔsi la?
2. To san tu’usɛ fua to wan eŋɛ la wani ta’an di sɛɛra bo en?
2 Soŋɛ Ba: Ho san tu’usɛ fua, pa’alɛ en ho yu’urɛ ge bisɛ hon wan eŋɛ se’em soŋɛ en. Ba ka nyɛti la zuo, ho san ta seke se’em a ta’an ti’isa ti ho yeti ho eŋɛ en la sɛla. Ge ho yetɔɣum poan san basɛ ti a baŋɛ ti ho boti a yele, bala ta’an basɛ ti a puti’irɛ ga’arɛ bɔbeyinɛ. Tɛra ti fɔɔsi boi tɔka tɔka, bala mina ho wan soŋɛ en se’em. Ho san soŋɛ en ba’asɛ, ho ta’an basɛ ti a baŋɛ ti ho tari la Baabule la pa’ala nɛreba. Ho ta’an kaalɛ Yooma 146:8 bii Isaiah 35:5, 6. A san tana kaala Fɔɔsi gɔnɔ la, soke en a san bɔta Fɔɔsi gɔnɔ n wan soŋɛ en ti a ta’an zamesɛ Baabule la. Ho ta’an le ee kɔa yetɔɣum jw.org poan bo en. A san tara kompiita n wan ta’an ŋmɛ’ɛra ti a kɛlesa, la wan ana soŋa ti ho yese jw.org poan gɔnseto n de RTF (Rich Text Format) la bo en.—Bisɛ daka la n yeti: “Ho San Soŋera Fua . . .”
3. To wan eŋɛ la wani ɛɛ fɔɔsi to gingilega la poan?
3 Ɛɛ Fɔɔsi: To ka ba’a sɛkera fɔɔsi yire la yire na’am mɔɔla poan sɛla n sɔi la, ba zo’e zo’e ka boti bamam la saama sɔsera. Bala, la dela to eŋɛ ania “ɛɛ” nɛrebana tɔɣɛ bo ba. (Matu 10:11) Ho tari tuuma tadaana bii ho sukuu tadaana ti a dɛna fua? Tiregɛ tɔɣɛ bo en. Fɔɔsi sukuu san bɔna ya gingilega la poan, dekɛ Fɔɔsi gɔnɔ bo sukuu la. Hon mi nɛra ti fua bɔna ba yire? Hon mi tigere sɛba n biseri fɔɔsi bii tara yɛa ti fɔɔsi bɔna bim? Yele fua la suɔ, mina n biseri zɛ’an la bii se’em n sɔi zɛ’an la ti Yehowa Sɛɛradoma boti ba soŋɛ la fɔɔsi ge yele en ti ho wan tari Fɔɔsi gɔnɔ bii kɔa yetɔɣum na bo en. Basɛ ti a baŋɛ ti Baabule la poan, Naayinɛ pu’ulumbiŋe ti la kan yue, fɔɔnɛ kan le bɔna. Ho ta’an le dekɛ “Without It, I Would Feel Lost” vidiyo la jw.org poan pa’alɛ en fua ayima n nyɛ nyuurɔ se’em la eŋa n tari Fɔɔsi Baabule la. Ho san pa’alɛ sɛla zuo n sɔi ti ho wa’an a zɛ’an, la wan yu’ɛ sore bo ho ti ho nyɛ fɔɔsi basɛba.
4. To zamesɛ la bem yese Janet n eŋɛ sɛla wa?
4 Mabia ayima yu’urɛ n de Janet daa keŋɛ la zɛ’an ti fɔɔsi kɛ̃’ɛra ta sɔsɛ la pɔka ayima. Janet daa yele en yeti, “Yezu n yuun tibɛ fɔɔsi se’em la, pa’alɛ la sɛla ti a wan eŋɛ bo fɔɔsi beere sa’am.” Ba daa kaalɛ la sɛla n boi Liligere 21:3, 4 ti Janet pa’alɛ en Naayinɛ Na’am la n wan basɛ ti la sirum tum se’em. Ti pɔka la daa ana suram ge nyaa yeti: “mam ka tabelɛ wum ti fɔɔsi mɛ wan laɣum nyɛ wana. Nɛreba zo’e zo’e ti’isɛ ti nɛra san fɔ, la dela a mea bii a sɔyaabedoma be’em zuo n sɔi ti a fɔ la.” Janet daa pa’alɛ pɔka la n wan eŋɛ se’em nyɛ Bible Teach gɔŋɔ la, ti ba nyaa zamesa Baabule la sugumnɔɔrɛ buyi bakwai woo poan.
5. La boi bim ti to kan nyaŋɛ tibɛ fɔɔsi wuu Yezu n yuun eŋɛ se’em la ge to san tara nɔŋerɛ bɔ’ɔra ba bem nyuurɔ ti to wan nyɛ?
5 To kan ta’an tibɛ fɔɔsi wuu Yezu n yuun eŋɛ se’em la ge to wan ta’an soŋɛ fɔɔsi la sɛba ti Sitaana basɛ ti ba puti’ira bɔna lika poan la ti ba bɔkɛ Naayinɛ Yetɔɣum la. (2 Kor. 4:4) Sɛla n sɔi ti Yezu yuun tibɛ fɔɔsi bayi wa Yeriko teŋa la dela a yuun ‘zɔ la ba ninbɔ̃’ɔ.’ (Matu 20:34) To san tara nɔŋerɛ bɔ’ɔra fɔɔsi to wan bɔta ti to soŋɛ ba ti ba baŋɛ Yehowa, mina n wan yese fɔɔnɛ basɛ la.