Tara Yelesoma Gɔnlɛmlɛm La Pa’ala
1. Ba gulesɛ Yelesoma Gɔnlɛmlɛm la wani?
1 Wuu to daa zamesɛ se’em July To Na’am Tuuma poan la, lɔkɔ kuyima n boi to pa’alegɔ lɔɣɔrɔ daka la poan dela Yelesoma N Ze’ele Naayinɛ Ze’an Na! Baabule kaalegɔ zɛ’ɛsi la n boi gɔŋɔ la poan la kɔ’ɔn ka gulesɛ bim. See nɛra la mɛŋa kaalɛ a Baabule poan. To gɔnɔ la a se’a ti to gulesɛ a se’em dela la soŋɛ nɛra woo a ta’an dekɛ zamesɛ ge gɔnkuna wa ti to gulesɛ ku se’em, see to soŋɛ ba ti ba bɔkɛ. Bala la, to san dekɛ gɔŋɔ wa bo nɛra, to tiregɛ eŋɛ Baabule zamesegɔ ti a baŋɛ yelesoma n boi Baabule la poan se’em.—Matu 13:44.
2. Ho san pɔsɛ seke nɛra, ho wan eŋɛ la wani dekɛ yelesoma gɔnlɛmlɛm tum tuuma?
2 Ho San Pɔsɛ: Ho ta’an yeti: “Teŋgɔŋɔ wa poan, nɛra woo ti’iseri la beere sa’am n wan ana en se’em. Ho ti’isɛ ti teŋgɔŋɔ wa yɛla wa wan malum maalɛ? [Gura ti a lebese.] Baabule la tara la yelesoma n wan ta’an soŋɛ tɔ ti to tara beere sa’am puti’irɛ. Sokere a se’a n wana ti Baabule la lebese.” Dekɛ gɔnlɛmlɛm la bo nɛra la ge basɛ ti a loe sokere ayima n boi gɔŋɔ la pooren la. Bisɛ zɛ’an ti a loe la, pa’alɛ en to iti Baabule zamesegɔ se’em yia kaalegɔ la poan. Sarɔɔ kuyima me dela ho soke sokere n kɛ̃’ɛri suure gɔŋɔ la poan ge pa’alɛ nɛra la gɔnlɛmlɛm la n wan soŋɛ en se’em ti a nyɛ lebesego Baabule la poan. Zɛ’an ti ho yeti ho sɔsɛ la san tara vidiyo jw.org poan, ho ta’an ŋmɛ ti a kelese.
3. Pa’alɛ hon wan dekɛ Yelesoma Gɔnlɛmlɛm la eŋɛ Baabule zamesegɔ se’em.
3 Ho Wan Eŋɛ Baabule Zamesegɔ Se’em: (1) Kaalɛ sokere la n gulesɛ pɔi pɔi la ti nɛra la puti’irɛ bɔna zuo yele la poan. (2) Kaalɛ kaalegɔ zɛ’an la n taɣelɛ la. (3) Kaalɛ Baabule gulesegɔ la n delege la ge mina ho wan soke nɛra la se’em ti a baŋɛ Baabule gulesegɔ la n lebese sokere la se’em. (4) Kaalegɔ zɛ’an kuyima san taɣelɛ sokere la, taɣesɛ 2 la 3. Vidiyo san bɔna tɔɣera sokere la yele ge ti ho nan ka ŋmɛ bo yidaana la, ho ta’an ŋmɛ ti a kelese sɔsega la poan. (5) Ba’asegɔ la, soke nɛra la bisɛ n wan lebese sokere la se’em bisɛ a bɔkɛ ya.
4. To wan eŋɛ la wani ta’an tara gɔŋɔ wa pa’ala soŋa?
4 Mina ho wan dekɛ gɔŋɔ wa tum tuuma se’em. Dekɛ ku tum tuuma tɛm sɛka n nari. Zamesegɔ woo poan, ni te’ele ti’isɛ mina ti ho zamesa la yele soŋa ge bisɛ ho wan dekɛ gulesegɔ la soŋɛ en se’em ti a bɔkɛ zamesegɔ la. (Maga. 15:28; Tooma 17:2, 3) Ho san kumesɛ homea ge mina gɔŋɔ wa pa’alegɔ, ho wan baŋɛ ti ku dela tuulum gɔŋɔ n wan soŋɛ hɔ ti ho ta’an pa’ala nɛreba yelemɛŋɛrɛ la soŋa!