Pigera Zontua INTANƐT TUUMA ZƐ'AN GƆNƆ ZAALEŊA
Pigera Zontua
INTANƐT TUUMA ZƐ'AN GƆNƆ ZAALEŊA
Farefare
Ɛ
  • ã
  • ɛ
  • ɛ̃
  • ɣ
  • ŋ
  • ɔ
  • ɔ̃
  • BAABULE
  • GƆNƆ
  • ZAMESEGƆ
  • w23 August gɔn. 8-13
  • Zamesɛ Sɛla Baabule Yetɔɣebiŋ’a Poan

Vidiyo ka boi kalam.

Gaafara, daaŋɔ fii n boi vidiyo la poan.

  • Zamesɛ Sɛla Baabule Yetɔɣebiŋ’a Poan
  • Pigera Zontua N Mɔɔli Yehowa Na’am La (Zamesegɔ)—2023
  • Zupiɣesi
  • Ka Taaba
  • BEM ZUO TI LA NARA TI TO ZAMESA BAABULE YETƆƔEBIŊ’A?
  • HON WAN ZAMESA BAABULE YETƆƔEBIŊ’A SE’EM
  • SƐLA N SƆI TI LA NARA TI HO BAŊƐ NADIBISI LA N DE KUTO LA YƆƔERƆ LA YELE
  • ‘SAAZUO BƆBA NABA LA’ LA ‘TIŊANƆƆRƐ BƆBA NABA LA’ YELE PAKƐ HON LA WANI?
  • KELUM ZAMESA YETƆƔEBIŊ’A YƐLA
  • Daaŋɔ N Boi Nalɛɣɛrɛ Yɛla Poan N Basɛ Ti Baabule Yetɔɣebiŋ’a Tum Tuuma
    Yelezura Zo’e Zo’e
  • Tɔɣesa Daniel Makesonɛ La
    Pigera Zontua N Mɔɔli Yehowa Na’am La (Zamesegɔ)—2023
Pigera Zontua N Mɔɔli Yehowa Na’am La (Zamesegɔ)—2023
w23 August gɔn. 8-13

Zaseŋɔ 34

Zamesɛ Sɛla Baabule Yetɔɣebiŋ’a Poan

‘Sɛba n tari bɔkerɛ la wan mina.’​—DA. 12:10.

YUUNƐ 98 The Scriptures—Inspired of God

YELEKPINAa

1. Beni n wan soŋɛ tɔ ti to ta’an tara pupeelum zamesa Baabule yetɔɣebiŋ’a?

MABIA ayima yu’urɛ n de Ben yeti, “Mam nɔŋɛ n zamesa Baabule yetɔɣebiŋ’a mɛ.” La me ani hon la bala? Bii hon bisɛ ti Baabule yetɔɣebiŋ’a ba’ɛ kpe’em mɛ ti ho bɔkɛ? Ho ta’an ti’isa ti ho san zamesa Baabule yetɔɣebiŋ’a la ka tari pupeelum ge ho san zamesɛ baŋɛ sɛla n sɔi ti Yehowa basɛ ti ba gulesɛ yetɔɣebiŋ’a la eŋɛ a Yelesum la poan, ho wan bɔta ti ho zamesɛ.

2. To wan zamesɛ la bem zaseŋɔ wa poan?

2 Zaseŋɔ wa poan, to wan baŋɛ sɛla n sɔi ti la nara ti to zamesa Baabule yetɔɣebiŋ’a la sɛla n wan ta’an soŋɛ tɔ ti to zamesa. To wan le geele yetɔɣebiŋ’a ayi n boi Daniel gɔŋɔ la poan ge bisɛ la wan soŋɛ to se’em nananawa ti to bɔkɛ a.

BEM ZUO TI LA NARA TI TO ZAMESA BAABULE YETƆƔEBIŊ’A?

3. To san wan ta’an bɔkɛ Baabule yetɔɣebiŋ’a bem n nari ti to eŋɛ?

3 To san wan ta’an bɔkɛ Baabule yetɔɣebiŋ’a, la nari ti to ɛ soŋerɛ. Geele yele wa bisɛ. Makɛ bisɛ ti ho ye la zɛ’an ti ho ka mina ge hon la se’em n ye la n mi zɛ’an la soŋa. A mi yamam n paɛ zɛ’an la sarɔtɔ la woo n ye zɛ’an la poan. Nɔkpe’ene kai ti, ho puurɛ wan pee la ho zɔ la n sakɛ doose ho keŋɛ la. Bala mea nɔɔ ti Yehowa mina ton boi sansɛka poan ge le mina yelese’a n wan ta eŋɛ beere sa’am. Bala la, to san wan ta’an bɔkɛ Baabule yetɔɣebiŋ’a, la nari to sirege tomea zusɛ Yehowa ti a soŋɛ tɔ.​—Da. 2:28; 2 Pe. 1:19, 20.

Nɛra la a pɔɣa n biseri vidiyo la zuo n de “Daniel Yuun Dela Buraa N Tari Sakerɛ.”

To san zamesa Baabule yetɔɣebiŋ’a, la wan soŋɛ tɔ ti to maasum gura yelese’a n wan ta eŋɛ beere sa’am (Bisɛ kaalegɔ zɛ’an 4)

4. Beni n sɔi ti Yehowa basɛ ti ba gulesɛ yetɔɣebiŋ’a eŋɛ Baabule la poan? (Yeremia 29:11) (Bisɛ foote la.)

4 Yehowa boti la a kɔma tara pupeelum ba vom poan wuu dɔɣereba n boti ba kɔma tara pupeelum se’em la. (Kaalɛ Yeremia 29:11.) Yehowa ka ani wuu asaala, a san ni tɔɣɛ beere sa’am yele la ni kɔ’ɔn tuna la bala nima nima. Yehowa basɛ ti ba gulesɛ yetɔɣebiŋ’a eŋɛ a Yelesum la poan ti a basɛ ti to mina la yelese’a n wan ta eŋɛ beere sa’am. (Isa. 46:10) Baabule yetɔɣebiŋ’a dela bo’olum n ze’ele to saazuo Sɔ la zɛ’an. Ge ho wan eŋɛ la wani sakɛ ti Baabule la n tɔɣɛ yelese’a biŋe la wan sirum tum tuuma?

5. Bunbilipaalesi wan ta’an zamesɛ la bem Max zi’irego poan yele la poan?

5 Nɛresɛba n ka nɔŋɛ Baabule, la to bunbilipaalesi la n ni naɛ taaba bɔna sukuu poan. Ba yetɔɣum la ba itigɔ ta’an basɛ ti to bunbilipaalesi wa tara puti’ira ayi ayi. Geele mabia ayima yu’urɛ n de Max zi’irego poan yele la bisɛ. A yeti, “Mam n yuun boi sukuu poan la, mam yuun pɔsɛ tara la puti’ira ayi ayi ti mam dɔɣereba n pa’alɛ mam sɛla la daɣɛ yelemɛŋɛrɛ ge ti Baabule la me daɣena Naayinɛ gɔŋɔ.” A dɔɣereba daa soŋɛ en la wani? A yeti, “La boi bim ti ba suure yuun sa’am mɛ ge ba yuun tɔɣɛ la mama bo mam.” Max dɔɣereba yuun dekɛ la Baabule la lebese a sokere la woo. Max mea yuun eŋɛ la sɛla pa’asɛ. A yeti, “Mam mea yuun zamesɛ la Baabule yetɔɣebiŋ’a ge naɛ la n tadaandoma tansugere la poan sɔsɛ a yele.” A yuun nyɛ la bem nyuurɔ? Max yeti, “Mam yuun nyaa sakɛ ti Baabule la dela Naayinɛ gɔŋɔ!”

6. Ho wan eŋɛ la bem ho san tara puti’ira ayi ayi ge beni n sɔi?

6 Wuu Max la, ho san pɔsɛ tara puti’ira ayi ayi ti Baabule la daɣɛ yelemɛŋɛrɛ, la ka nari ti ho basɛ ti ho suure sa’am ge tuɣum isige eŋɛ sɛla kalam. Puti’ira ayi ayi ani wuu tiŋanziim. Ho san nyɛ ge ka eŋɛ sɛla la ta’an sa’am ho tuulum lɔkɔ. Ho san wan ta’an gu ‘puti’ira ayi ayi’ n wan ta’an sa’am ho sakerɛ la, soke homea yeti, ‘Mam sakɛ Baabule la n tɔɣɛ beere sa’am yɛla se’em la?’ Ho san tara puti’ira ayi ayi, la nari ti ho zamesɛ Baabule yetɔɣebiŋ’a se’a n puɣum tum tuuma la. Ho wan eŋɛ la wani ta’an eŋɛ bala?

HON WAN ZAMESA BAABULE YETƆƔEBIŊ’A SE’EM

Mabipɔka n tari May 2020 “The Watchtower” la zamesa saazuo bɔba naba la, la tiŋanɔɔrɛ bɔba naba la yetɔɣebiŋ’a yele.

To san bɔta ti to dekɛ tomea delum Yehowa wuu Daniel la, to nari ti to sirege tomea, viisa soŋa ge tara putɛsonɛ zamesa Baabule yetɔɣebiŋ’a (Bisɛ kaalegɔ zɛ’an 7)

7. Daniel yuun eŋɛ makesonɛ la wani ta’an zamesa yetɔɣebiŋ’a la? (Daniel 12:10) (Bisɛ foote la.)

7 Daniel eŋɛ la makesonɛ la ton wan zamesa Baabule yetɔɣebiŋ’a se’em. A yuun tari la putɛsonɛ zamesa yetɔɣebiŋ’a ti a baŋɛ yelemɛŋɛrɛ la. Daniel yuun le sirege la amea ge mina ti a san nana Yehowa ge ana du’a du’a la en, a wan soŋɛ en ti a ta’an bɔkɛ yetɔɣebiŋ’a la. (Da. 2:27, 28; kaalɛ Daniel 12:10.) Daniel n yuun dekɛ amea delum Yehowa ti a soŋɛ en la pa’alɛ ti a yuun siregeri la amea. (Da. 2:18) Daniel yuun le ma’ɛ la amea zamesa soŋa soŋa. A yuun viiseri Baabule gɔnseto n yuun boi sankaŋa la mɛ. (Yer. 25:11, 12; Da. 9:2) Ho wan eŋɛ la wani ta’an tɔɣesa Daniel?

8. Beni n sɔi ti nɛreba basɛba zamesa yetɔɣebiŋ’a?

8 Tara putɛsonɛ. Hon kɔ’ɔn bɔta ti ho baŋɛ yelemɛŋɛrɛ la zuo ti ho zamesa Baabule yetɔɣebiŋ’a? San dɛna bala, Yehowa wan soŋɛ hɔ. (Yon 4:23, 24; 14:16, 17) Beni n sɔi ti nɛreba basɛba zamesa yetɔɣebiŋ’a? Basɛba ni zamesa mɛ ti ba ta’an baŋɛ sɛla n pa’alɛ ti Baabule la daɣɛ Naayinɛ gɔŋɔ. Basɛba ti’isɛ ti ba san baŋɛ ti Baabule la daɣɛ Naayinɛ gɔŋɔ bamea ta’an pa’alɛ yelese’a n de som la be’em. Ge la nari ti to tara putɛsonɛ to san zamesa yetɔɣebiŋ’a. Leyɛ’ɛsa, la nari ti to tara halɛ se’ere n wan soŋɛ tɔ ti to ta’an bɔkɛ Baabule yetɔɣebiŋ’a.

9. La nari ti to tara la haledeni ta’an bɔkɛ Baabule yetɔɣebiŋ’a? Tɔɣɛ pa’alɛ.

9 Sirege homea. Yehowa pu’ulumbiŋe ti a wan soŋɛ sirege n meadoma. (Yam. 4:6) Bala, la nari ti to zusɛ ti a soŋɛ tɔ ti to ta’an bɔkɛ Baabule yetɔɣebiŋ’a. To san tara sirege n mea to wan sakɛ Yehowa n doli sakerɛ la yɛm yameŋa la poan soŋera to se’em la. (Lu. 12:42) Yehowa dela Naayinɛ sɛka n iti a yɛla woo ma’a ma’a. Bala, yɛm boi bim ti to sakɛ ti a doli la sore deyima poan soŋera tɔ ti to bɔkera yelemɛŋɛrɛ la n boi Baabule la poan la.​—1 Ko. 14:33; Ep. 4:4-6.

10. To zamesɛ la bem Esther yele la poan?

10 Viisɛ soŋa. Pɔsɛ zamesɛ yetɔɣebiŋ’a se’a ti ho ba’ɛ nɔŋɛ. Mabipɔka ayima yu’urɛ n de Esther yuun eŋɛ la bala. A yuun boti la a zamesɛ yetɔɣebiŋ’a se’a n tɔɣeri Mɛzaaya la yele. A yeti, “Mam n yuun de yuuma 15 la ti mam yuun pɔsɛ viisa yelese’a n pa’alɛ ti ba yuun gulesɛ yetɔɣebiŋ’a wa mɛ ge ti Yezu nyaa wa’ana.” Eŋa n yuun zamesɛ Yaarom Mɔɣerɛ Gɔnkila yɛla se’em la yuun kpemese a giila mɛ. Esther yeti, “Ba yuun gulesɛ yetɔɣebiŋ’a la ase’a mɛ ge ti Yezu nyaa wa’ana. Bala la, yetɔɣebiŋ’a la nari ti la ze’ele la Naayinɛ zɛ’an. Mam yuun nari ti n kaalɛ sugumnɔɔrɛ zo’e zo’e ge nyaa bɔkɛ.” Ge a puurɛ pee mɛ la eŋa n yuun tiregɛ la. A yuun zamesɛ Baabule yetɔɣebiŋ’a soŋa soŋa mɛ ge yeti, “Mam nyaa baŋɛ ti Baabule yɛla la dela yelemɛŋɛrɛ!”

11. Beni n sɔi ti la ana soŋa ti to sakɛ ti Baabule la dela yelemɛŋɛrɛ?

11 To san nyɛ Baabule yetɔɣebiŋ’a n tum tuuma se’em la, to wan tara sakerɛ bɔ’ɔra Yehowa ge dɔla pa’alegɔ la woo ti a bɔ’ɔra to la. Leyɛ’ɛsa, la ka pakɛ la yeledaaŋɔ seto n paari to la, Baabule yetɔɣebiŋ’a soŋeri to mɛ ti to tara putɛsonɛ gura beere sa’am. Basɛ ya ti to geele yetɔɣebiŋ’a ayi n boi Daniel gɔŋɔ la poan n tum tuuma se’em. To san bɔkɛ a, la wan soŋɛ tɔ ti to ta’an kɔ’ɛ to puti’irɛ soŋa.

SƐLA N SƆI TI LA NARA TI HO BAŊƐ NADIBISI LA N DE KUTO LA YƆƔERƆ LA YELE

12. Nadibisi la n de ‘kuto la yɔɣerɔ’ la ze’ele boi la bem? (Daniel 2:41-43)

12 Kaalɛ Daniel 2:41-43. Zaaseŋɔ sɛka ti Daniel yuun pa’alɛ de vuurɛ bo Naba Nebukadnezar la dela, naba la yuun nyɛ la nadibisi n de ‘kuto la yɔɣerɔ.’ To san dekɛ yetɔɣebiŋ’a wa makɛ la yetɔɣebiŋ’a se’a n boi Daniel la liligere gɔnɔ la poan la, to wan ta’an yeti nadibisi la ze’ele boi la Anglo-America Tingɔŋɔ Kpe’eŋo la. Daniel yuun tɔɣɛ kpe’eŋo wa yele yeti ‘a sɔ’ɔlum la basɛba wan kpe’em ti basɛba me kan kpe’em.’ Beni n sɔi ti basɛba kan kpe’em? Se’ere n sɔi la nɛreba la n ze’ele bo yɔɣerɔ la ka basɛ ti a tara paŋa wuu kuto la.b

13. To zamesɛ la bem ninmɔ’ɔrɛ yɛla yetɔɣebiŋere wa poan?

13 To zamesɛ la ninmɔ’ɔrɛ yɛla zo’e zo’e wɔ̃nɛ sɛka ti Daniel yuun nyɛ la poan yele yele wuu nadibisi la. Yia la, Anglo-America Tingɔŋɔ Kpe’eŋo la eŋɛ pa’alɛ ti ka tari paŋa mɛ paa. Makerɛ, tisi siyi wa laɣum pa’asɛ la tinse’esi n yuun ta’an zabɛ nyaŋɛ Tingɔŋɔ Wa Za’a Zaberɛ I la Tingɔŋɔ Wa Za’a Zaberɛ II la poan. Ge tingɔŋɔ wa kpe’eŋo wa ka le ba’ɛ kpe’em ge wan kelum ana la bala se’ere n sɔi la, ba nɛreba la zaberi la taaba ge le zabera la gɔmɛt la. N yi’i, Anglo-America Tingɔŋɔ Kpe’eŋo la wan dɛna la ki’i kpe’eŋo n wan bisera ge ti Naayinɛ Na’am la ta sa’am asaala sɔ’ɔlum woo n boi. La boi bim ti saŋa ase’a tisi sise’esi ni giisa la Anglo-America Tingɔŋɔ Kpe’eŋo la ge ba kan tee soe en. Sɛla n sɔi ti to baŋɛ wana wa dela, ‘kuguri la’ n ze’ele bo Naayinɛ Na’am la wan wɔ̃rɛ nadibisi la n ze’ele bo Anglo-America kpe’eŋo la.​—Da. 2:34, 35, 44, 45.

14. To san bɔkɛ yetɔɣebiŋ’a la n pa’alɛ nadibisi la n de kuto la yɔɣerɔ la, la wan soŋɛ to la wani ti to ta’an kɔ’ɛ putɛsonɛ?

14 Hon sirum sakɛ ti Daniel yetɔɣebiŋ’a la n pa’alɛ nadibisi la n de kuto la yɔɣerɔ la dela yelemɛŋɛrɛ? La san dɛna bala, la wan pa’alɛ ho wan vɔna ho vom se’em. Ho kan yee ligebɔrɛ bii inganɛ lɔɣɔrɔ poan se’ere n sɔi la, la kan yue ba wan sa’am tingɔŋɔ be’o wa. (Lu. 12:16-21; 1 Yo. 2:15-17) Ho san bɔkɛ yetɔɣebiŋ’a wa, la wan soŋɛ hɔ ti ho baŋɛ lan de ninmɔ’ɔrɛ se’em ti ho mɔɔla ge pa’ala nɛreba. (Mt. 6:33; 28:18-20) Ton zamesɛ yetɔɣebiŋ’a wa ba’asɛ la soke homea yeti, ‘Mam n ni kɔ’ɛ n puti’irɛ se’em la pa’alɛ ti, mam sirum sakɛ ti la kan yue Naayinɛ na’am la wan yese asaala gɔmɛt woo?’

‘SAAZUO BƆBA NABA LA’ LA ‘TIŊANƆƆRƐ BƆBA NABA LA’ YELE PAKƐ HON LA WANI?

15. Zina, bani n de ‘saazuo bɔba la tiŋanɔɔrɛ bɔba nadoma’ la? (Daniel 11:40)

15 Kaalɛ Daniel 11:40. Daniel a zuo 11 tɔɣɛ la nadoma bayi bii kpe’eŋo bayi n zaberi la taaba ɛɛra kpe’eŋo yele. To san dekɛ yetɔɣebiŋ’a wa makɛ la Baabule yetɔɣebiŋ’a ase’a, to baŋɛ ti ‘saazuo bɔba naba la’ dela Russia la a tinbibisi la ti ‘tiŋanɔɔrɛ bɔba naba la’ dɛna Anglo-America Tingɔŋɔ Kpe’eŋo la.c

Fɔɔra: 1. Nɛra la a pɔɣa ti to puɣum nyɛ ba la ti ba dekɛ baŋa gba ba nu’usi ge ba ze la kankaŋi. To le nyɛ la Russian Zuodaana Kɛ’a Zɛ’an la Russia tiŋa map. Soogɛpa n ti’iri bugumdɔɔrɔ. 2. Mabipɔka ti to puɣum nyɛ la ze me kankaŋi. Pooren la dela Amerika tiŋa Lɔɔ Biŋere Zɛ’an la Britain la Amerika tisi mapdoma. Sɛba n ka sakɛ bo gɔmɛt la sunsɔa nyie mɛ ti soogɛpa tara ba zaberɛ lɔɣɔrɔ ti ba zabɛ la ba.

Ton baŋɛ ti ‘tiŋanɔɔrɛ bɔba naba la’ wan zabɛ la ‘saazuo bɔba naba la’ ka nari ti la basɛ ti to suure sa’am ge la tuɣum basɛ ti to sakerɛ kpe’em (Bisɛ kaalegɔ zɛ’ɛsi 16-18)

16. ‘Saazuo bɔba naba la’ iti Naayinɛ nɛreba la bem?

16 ‘Saazuo bɔba naba la’ kɔ’ɔn yaɛ Naayinɛ nɛreba mɛ. Ba ŋmɛ to mabiisi zo’e zo’e mɛ ge paɣɛ basɛba ba sakerɛ zuo. ‘Saazuo bɔba naba la’ n iti se’em la ka kɔ’ɔseri Naayinɛ nɛreba giila ge la tuɣum soŋɛ ba mɛ ti ba tara sakerɛ n kpe’em Yehowa la a Yelesum la poan. Beni n sɔi? Se’ere n sɔi la mabiisi la mi ti yaarɛ la basɛ ti yetɔɣebiŋ’a se’a n boi Daniel gɔŋɔ la poan la tuna la tuuma.d (Da. 11:41) Ton mi wana wa la wan ta’an soŋɛ tɔ ti to tara sakerɛ n kpe’em la yelemɛŋɛrɛ bɔ’ɔra Yehowa.

17. Bem yɛla n yuun paɛ Naayinɛ nɛreba n boi ‘tiŋanɔɔrɛ bɔba naba la’ sɔ’ɔlum la poan la?

17 Yuunse’a n tole la, ‘tiŋanɔɔrɛ bɔba naba la’ me yuun yaɛ Naayinɛ nɛreba mɛ. Makerɛ, Tingɔŋɔ Wa Za’a Zaberɛ I la II la poan, ba yuun paɣɛ to mabiisi zo’e zo’e mɛ ge sa’ɛ ba kɔma sukuu poan, se’ere n sɔi la ba ka dekɛ bamea pa’asɛ nalɛɣerɛ yɛla poan. Yuuma fii n tole, la kpe’em bo mabiisi n boi ‘tiŋanɔɔrɛ bɔba naba la’ sɔ’ɔlum la poan ti ba tara yelemɛŋɛrɛ yɛla ase’a poan. Makerɛ, la san paɛ ti ba di’e nu’o, la ta’an ana Kristabia wuu a pa nalɛɣerɛ party ayima poore. La boi bim ti daanse’ere a kan yese ta di’e nu’o ge a suuren, a ta’an bɔta ti nalɛɣerɛ party ayima di. Ge to san wan ta’an yese tomea nalɛɣerɛ yɛla za’a poan, la nari ti to bisɛ tomea soŋa to suuren la to puti’iren.​—Yon 15:18, 19; 18:36.

18. Beni n nari ti to eŋɛ ‘saazuo bɔba naba la’ la ‘tiŋanɔɔrɛ bɔba naba la’ n zaberi la taaba la? (Bisɛ foote la.)

18 Sɛba n ka tari sakerɛ Baabule yetɔɣebiŋ’a poan la san nyɛ ti ‘tiŋanɔɔrɛ bɔba naba la’ la ‘saazuo bɔba naba la’ zaberi la taaba, ba suure wan sa’am. (Da. 11:40) Nadoma bayi wa tari la bombedoma n wan ta’an sa’am tingɔŋɔ wa za’a. Ge to mi ti Yehowa kan sakɛ ti bala tum. (Isa. 45:18) ‘Saazuo bɔba naba la’ la ‘tiŋanɔɔrɛ bɔba naba la’ yɛla n wan basɛ ni ti to suure sa’am la, la tuɣum basɛ ti to sakerɛ kpe’em mɛ se’ere n sɔi la, la pa’alɛ ti tingɔŋɔ wa ba’asegɔ pɔ̃ri mɛ.

KELUM ZAMESA YETƆƔEBIŊ’A YƐLA

19. La nari ti to mina la bem la Baabule la n tɔɣɛ yelese’a biŋe la?

19 To ka mi Baabule yetɔɣebiŋ’a ase’a n wan tum tuuna se’em. Hali nɔdɛ’ɛsa Daniel yuun ka bɔkɛ yelese’a ti a yuun gulesɛ la za’a. (Da. 12:8, 9) Ge ton ka mi yetɔɣebiŋ’a la za’a n wan tum tuuma se’em la ka pa’alɛ ti ba kan tum tuuma. To tari suure lua ti, sansɛka n nari poan Yehowa wan soŋɛ tɔ ti to bɔkɛ yelese’a n nari ti to mina wuu eŋa n yuun eŋɛ se’em diimi sa la.​—Am 3:7.

20. La kan yue, bem Baabule yetɔɣebiŋ’a n wan tum tuuma ge bem n nari ti to kelum ita?

20 Tisi la wan ta yɛta yeti ‘suma’asum la fai bɔŋa’. (1 Tes. 5:3) La kan yue tingɔŋɔ wa gɔmɛtdoma wan zabɛ la pumpɔreŋɔ pu’usegɔ ge sa’am en. (Lil. 17:16, 17) Ba nyaa wan zabɛ la Naayinɛ nɛreba. (Eze. 38:18, 19) Yele ana wa n wan ta’asɛ Armagedon zaberɛ la. (Lil. 16:14, 16) To tari sakerɛ ti la kan yue yeledena wa wan tum. Ge sankaŋa n nan ka paɛ la, basɛ ya ti to eŋɛ pa’alɛ ti to puurɛ pee mɛ la to saazuo Sɔ la, to zamesa Baabule yetɔɣebiŋ’a ge soŋera nɛreba ti ba me ita bala.

HON TƐ̃RI?

  • Bem zuo ti la nara ti to zamesɛ Baabule yetɔɣebiŋ’a yɛla?

  • To wan zamesɛ Baabule yetɔɣebiŋ’a yɛla la wani?

  • Yetɔɣebiŋ’a ani n tɔɣɛ Anglo-America Tingɔŋɔ Kpe’eŋo, la Russia la a tinbibisi la yele n pa’alɛ ti la puɣum tum tuuma mɛ?

YUUNƐ 95 The Light Gets Brighter

a La nɔŋɛ la ana se’em me, to tari suure lua ti tingɔŋɔ wa yɛla wan tee ana soŋa beere sa’am. To san zamesɛ Baabule yetɔɣebiŋ’a la, la wan basɛ ti to tara sakerɛ. Zaseŋɔ wa wan soŋɛ tɔ ti to baŋɛ sɛla n sɔi ti la nara ti to zamesa Baabule yetɔɣebiŋ’a. To wan geele yetɔɣebiŋ’a ayi n boi Daniel gɔŋɔ la poan ge bisɛ lan wan soŋɛ to se’em to san bɔkɛ a.

b Kaalɛ zaseŋɔ yele la zuo n de “Jehovah Reveals What ‘Must Shortly Take Place,’” gɔn. 7-9, n boi June 15, 2012, The Watchtower la poan.

c Bisɛ zaseŋɔ yele la zuo n de “Who Is ‘the King of the North’ Today?,” gɔn. 3-4, n boi May 2020 The Watchtower la poan.

d Bisɛ zaseŋɔ yele la zuo n de “Who Is ‘the King of the North’ Today?,” gɔn. 7-9, n boi May 2020 The Watchtower la poan.

    Frafra Gɔnɔ (2000-2025)
    Yese
    Yu'ɛ
    • Farefare
    • Tɔ̃rɛ
    • Hon boti sɛla
    • Copyright © 2025 Watch Tower Bible and Tract Society of Pennsylvania
    • Yelese'a N Nari Ti Ho Mina
    • Suɣelum Yɛla
    • Privacy Settings
    • JW.ORG
    • Yu'ɛ
    Tɔ̃rɛ