Pigera Zontua INTANƐT TUUMA ZƐ'AN GƆNƆ ZAALEŊA
Pigera Zontua
INTANƐT TUUMA ZƐ'AN GƆNƆ ZAALEŊA
Farefare
Ɛ
  • ã
  • ɛ
  • ɛ̃
  • ɣ
  • ŋ
  • ɔ
  • ɔ̃
  • BAABULE
  • GƆNƆ
  • ZAMESEGƆ
  • w24 January gɔn. 8-14
  • Hon Maasum Gura Yuunɛ Wa Ninmɔ’ɔrɛ Dabeserɛ La?

Vidiyo ka boi kalam.

Gaafara, daaŋɔ fii n boi vidiyo la poan.

  • Hon Maasum Gura Yuunɛ Wa Ninmɔ’ɔrɛ Dabeserɛ La?
  • Pigera Zontua N Mɔɔli Yehowa Na’am La (Zamesegɔ)—2024
  • Zupiɣesi
  • Ka Taaba
  • TO WAN EŊƐ LA WANI MAASUM TOMEA GURA TIIRƐ DIA LA?
  • SOŊƐ NƐREBA TI BA NYƐ NYUURƆ
  • SOŊƐ SƐBA N MA’Ɛ LA
  • Yehowa Nɔŋerɛ La N Soŋeri To Se’em
    Pigera Zontua N Mɔɔli Yehowa Na’am La—2025
  • Lua Bunɔ La Pa’alɛ To La Bem?
    Pigera Zontua N Mɔɔli Yehowa Na’am La—2025
  • Yehowa Ni Kã Bo To Mɛ To San Ni Tiregɛ Eŋɛ Tiirɛ Dia La
    Pigera Zontua N Mɔɔli Yehowa Na’am La (Zamesegɔ)—2023
  • Hon Wan Ta’an Eŋɛ Sɛla Tiirɛ Dia Saŋa La
    Tomam Kristakɔma Vom La To Na’am Tuuma—Zamesegɔ Gɔŋɔ—2023
Bisɛ Ase'a Pa'asɛ
Pigera Zontua N Mɔɔli Yehowa Na’am La (Zamesegɔ)—2024
w24 January gɔn. 8-14

ZASEŊƆ 2

YUUNƐ 19 The Lord’s Evening Meal (Daana La Zaanɔɔrɛ Dia)

Hon Maasum Gura Yuunɛ Wa Poan Ninmɔ’ɔrɛ Dabeserɛ La?

‘Kɔ’ɔn ita ya wana la ya tɛ̃ra n yele.’—LU. 22:19.

YELEKPINE

Geele bisɛ sɛla n sɔi ti Tiirɛ Dia la yele pakɛ, ton wan eŋɛ se’em ta’an maasum tomea gura ge me soŋɛ nɛreba ti ba laɣum keŋɛ.

1. Beni n sɔi ti Yezu kum Tiirɛ la dɛna ninmɔ’ɔrɛ dabeserɛ bɔ’ɔra tɔ yuunɛ la poan? (Luke 22:​19, 20)

KRISTA kum Tiirɛ dabeserɛ la dela ninmɔ’ɔrɛ dabeserɛ bɔ’ɔra Yehowa yamesi yuunɛ la poan. Yele dena wa ma’a ti Yezu yele a podɔleba la ti ba tɛ̃ra la ba ita. (Kaalɛ Luke 22:​19, 20.) Yɛla zo’e zo’e n sɔi ti to ni kɔ’ɔn gura Yezu kum tiirɛ dabeserɛ la. Basɛ ya ti to geele ya basɛba bisɛ.

2. Bem zuo ti to ni maasum gura Tiirɛ Dia la?

2 Tiirɛ Dia la soŋeri to mɛ ti to ti’isa taɣesa lua bunɔ la n tari nyuurɔ se’em bɔ’ɔra tɔ. La tiiseri to mɛ ti to mina ton wan eŋɛ se’em pa’alɛ ti to puurɛ pee mɛ la Yezu kum la. (2 Ko. 5:​14, 15) La me ni bo to la yɔ’ɔ ti tomam la mabiisi la ‘kpɛmesa taaba giila.’ (Arom 1:12) Yuunɛ woo, sɛba n ma’ɛ la ni wa’an me na, hali basɛba ni le lebe Yehowa zɛ’an me na, ton ni to’e ba soŋa la zuo. Nɛreba zo’e zo’e n ni wum ge nyɛ yelese’a la ni bɔta ti ba zamesɛ Baabule la mɛ. Nɔkpe’ene kai ti, Yezu kum la dela ninmɔ’ɔrɛ bɔ’ɔra tɔ!

3. Tiirɛ Dia la basɛ ti tomam la to mabinɔɔrɛ la za’a tara nɔyinɛ la wani? (Bisɛ foote la.)

3 To me ni kɔ’ɔn maasum gura Tiirɛ Dia la se’ere n sɔi la, la basɛ ti tomam la to mabinɔɔrɛ la za’a tara la nɔyinɛ. Tingɔŋɔ wa za’a poan, Yehowa Sɛɛradoma ni laɣesɛ la zaanɔɔrɛ eŋɛ Tiirɛ Dia la. To za’a ni kelese la yetɔɣum n pa’alɛ lua bunɔ la n tari nyuurɔ se’em. Daandendaarɛ, to ni yuum la yuuma bayi, dekɛ boroboro la daam la kaɛ bo nɛreba la ge me kelese zusega sugumnɔɔrɛ bunaasi, laɣum sakɛ “amen.” Daayinɛ poan, tansuga la woo n boi tingɔŋɔ wa zuo ni eŋɛ la wana mea nɔɔ. Bisɛ Yehowa la Yezu puurɛ n wan pee se’em ti ba nyɛ ti to za’a laɣum tara la nɔyinɛ na’asa ba!

Fɔɔra: Tiirɛ Dia daarɛ la ti mabiisi n boi tingɔŋɔ wa za’a poan maasena ti ba keŋɛ ge basɛba puɣum pɔsɛ. 1. Puerto Rico tiŋa ti deodoma bɔna bim bisera Bulika Pu’usegɔ. 2. Italy tiŋa ti nɛra la a pɔɣa dekɛ tiirɛ dia beeŋo gɔŋɔ la bɔ’ɔra buraa ayima. 3. Kenya tiŋa ti mabiisi bayi kaala gulesegɔ bɔ’ɔra buraa ayima. 4. Georgia tiŋa ti pɔka la a bipugela bisera vidiyo la zuo n de “Ton Wan Maalɛ Tiirɛ Dia Boroboro La Se’em” ge dɔla vidiyo pa’alegɔ la maala Tiirɛ Dia Boroboro la. 5. India tiŋa ti mabiisi bɔna bim duusa Na’am Pu’usegɔ Deo ge maasena Tiirɛ Dia lɔɣɔrɔ la biŋera teebule zuo. 6. Thailand tiŋa ti saana wa’an Na’am Pu’usegɔ Deo la na ti mabia to’e saana la soŋa soŋa. 7. Japan tiŋa ti mabia dekɛ boroboro la n ka tari mi’isum bɔ’ɔra pɔka Tiirɛ Dia daarɛ la.

Tiirɛ Dia la basɛ ti to mabinɔɔrɛ la za’a tara la nɔyinɛ (Bisɛ kaalegɔ zɛ’an 3)f


4. To wan sɔsɛ la bem zaseŋɔ wa poan?

4 Zaseŋɔ wa poan, to wan sɔsɛ soke ana wa: To wan eŋɛ la wani maasum tomea gura Tiirɛ Dia la? To wan eŋɛ la wani ta’an soŋɛ nɛreba ti ba nyɛ nyuurɔ de poan? To me wan eŋɛ la wani soŋɛ nɛresɛba n ma’ɛ la? To san nyɛ soke ana wa lebesego, la wan soŋɛ tɔ ti to maasum gura ninmɔ’ɔrɛ dabeserɛ wa.

TO WAN EŊƐ LA WANI MAASUM TOMEA GURA TIIRƐ DIA LA?

5. (a) Beni n sɔi ti la nara ti to ti’isa taɣesa lua bunɔ la yele? (Yooma 49:​7, 8) (b) Hon zamesɛ la bem vidiyo la zuo n de Beni N Sɔi Ti Yezu Yuun Ki la poan?

5 Ninmɔ’ɔrɛ yele ti to wan ta’an eŋɛ maasum tomea gura Tiirɛ Dia la dela to ti’isa taɣesa Yezu Krista lua bunɔ la n tari tuulum bɔ’ɔra to se’em. Sɛla ka boi ni ti to wan ta’an eŋɛ faaɛ tomesi be’em la kum poan basɛ. (Kaalɛ Yooma 49:​7, 8; bisɛ vidiyo la zuo n de Beni N Sɔi Ti Yezu Yuun Ki?)a Yehowa yuun eŋɛ la sanɛ basɛ ti a Dayɔa ki faaɛ to basɛ. Yehowa la Yezu za’a yuun dekɛ la bɔnsoŋa sɛka ti ba tara la taaba la basɛ. (Arom 6:23) To san ti’isa taɣesa Yehowa la Yezu n eŋɛ sɛla bo to la, bala wan basɛ ti to puurɛ pee la lua bunɔ la. To wan geele yɛla fii n yuun basɛ ti la kpe’em bo Yehowa la Yezu ge ti ba kelum eŋɛ bo to. Ge yia la, lua bunɔ la dela bem?

6. Lua bunɔ la dela bem?

6 Lua bunɔ la dela Yezu n yuun dekɛ a vom la yɔ to’e nɛresaaleba la. Ba yuun naam yia buraa Adam ti a ana la kasi. Eŋa n yuun tum be’em la, a yuun koŋe daarewoo nyɔvore la mɛ ta ta la a kɔma za’a. Lan wan eŋɛ se’em ti to ta’an le nyɛ sɛla n yuun piɛ Adam nu’usin la, Yezu yuun dekɛ la a vom la n ani kasi la ki faaɛ to basɛ. Yezu n yuun boi tinparɛ wa zuo la, ‘a yuun ka tum be’em la fii me bii pumpɔreŋɔ ze’ele a nɔɔren na.’ (1 Pe. 2:22) Yezu n yuun ki la, a yuun ani la kasi wuu Adam n yuun ani se’em ge nyaa tum be’em la. Bala la, Yezu n yuun ki la, a yuun eŋɛ bala ti a yɔ to’e la sɛla n yuun piɛ Adam nu’usin la.—1 Ko. 15:45; 1 Tim. 2:6.

7. Bem yɛla n yuun paɛ Yezu eŋa n yuun boi tinparɛ wa zuo la?

7 Yezu n yuun boi tinparɛ wa zuo la, a yuun kɔ’ɔn nana Yehowa mɛ sɛla woo poan hali lan yuun kpe’em bo en la. La boi bim ti Yezu yuun ani la kasi ge eŋa n yuun de bia la, a yuun kɔ’ɔn nana a dɔɣereba n daɣɛ kasi la mɛ. (Lu. 2:51) Eŋa n yuun de bunbilipaalega la, a yuun ze’ele la kankaŋi zaɣesɛ a tadaandoma pɛregerɛ n wan ta’an basɛ ni ti a kan nana a dɔɣereba la Yehowa. Yezu n yuun de bunkutɛ la, a yuun ŋmibe la yelese’a ti Sitaana Kolekpabɛ’a la yuun tara paara en la, hali la Sitaana n yuun yele en yeti a da tara yelemɛŋɛrɛ bɔ’ɔra Naayinɛ la. (Mt. 4:​1-11) Sitaana yuun boti la Yezu tum be’em lan wan eŋɛ se’em ti a kan ta’an yɔ lua bunɔ la.

8. Gurebisɛ ani ti Yezu yuun le ŋmibe a poan?

8 Yezu n yuun tuni a na’am mɔɔlegɔ tuuma tinparɛ wa zuo la, a yuun ŋmibe la yɛla zo’e zo’e poan. A dindoma yuun yaɛ en mɛ ge zeɣera ti ba ku en. (Lu. 4:​28, 29; 13:31) La me yuun dela a di’isa suure la a podɔleba la tuure yɛla. (Mr. 9:​33, 34) Ban yuun gakeri en la, ba yuun mɛleseri en mɛ ge ɛregera en. Ba yuun nyaa namesɛ en mɛ ti a ki nimbaalega kum. (Heb. 12:​1-3) A yuun nari ti a ŋmibe a ba’asegɔ gurebisɛ poan a ma’a se’ere n sɔi la Yehowa yuun ka te’ele en.b—Mt. 27:46.

9. La ani to la wani la Yezu n yuun ki faaɛ to la? (1 Peter 1:8)

9 La niɛ peelumi ti, la yuun wuŋɛ Yezu mɛ ge ti a nyaŋɛ yɔ lua bunɔ la. To san ti’isa Yezu n yuun eŋɛ se’em ta’an yɔ lua bunɔ la bo to la, la basɛ ti to tara la nɔŋerɛ paa bɔ’ɔra en.—Kaalɛ 1 Peter 1:8.

10. Lua bunɔ la yuun basɛ ti la wuŋɛ Yehowa la wani?

10 Yehowa yuun dekɛ la bem basɛ, ti Yezu ta’an yɔ lua bunɔ la bo to? Yehowa la Yezu yuun naɛ taaba bɔna mɛ wuu sɔ la a bia n boi se’em la. (Mag. 8:30) Yeen ti’isɛ bisɛ Yehowa n yuun nyɛ Yezu ti namesegɔ zo’e zo’e paara en tinparɛ wa zuo la. Nɔkpe’ene kai ti, la yuun wuŋɛ Yehowa mɛ la eŋa n yuun nyɛ a Dayɔa la ti ba zɛregɛ en, zaɣesɛ en ge mɛlesɛ en la.

11. Bo makerɛ pa’alɛ lan yuun ani Yehowa se’em eŋa n yuun nyɛ Yezu ti a kiira la.

11 Dɔɣera bia san ki, a mi lan ani en se’em mɛ. To tari sakerɛ kum isigere la poan ge to nɛra san ki la ni kelum wuna to mɛ. Makerɛ wa soŋɛ tɔ ti to bɔkɛ lan yuun ani Yehowa se’em eŋa n yuun biseri a Dayɔba’arɛ wa ti a namesɛ ta ki yuun 33 Y.B poan la.c—Mt. 3:17.

12. To wan ta’an eŋɛ la bem ge ti Tiirɛ Dia la nyaa paɛ?

12 Nananawa ta paɛ Tiirɛ Dia la, ho kan bɔta ti ho tiregɛ dekɛ lua bunɔ la eŋɛ homea zamesegɔ bii Deodoma Pu’usegɔ? Dekɛ Yehowa Sɛɛradoma Viisegɔ Gɔŋɔ la (la san bɔna ho yetɔɣum poan) bii Baabule gɔnseko woo n boi ta’an viisɛ yɛla pa’asɛ.d Leyɛ’ɛsa, tiregɛ dekɛ Tiirɛ Dia Baabule kaalegɔ maaseŋɔ la n boi Tomam Kristakɔma Vom La To Na’am Tuuma Zamesegɔ Gɔŋɔ la poan tum tuuma. Tiirɛ Dia dabeserɛ la san paɛ, tiregɛ bisɛ Bulika Pu’usegɔ la n boi de to’ore la pa’asɛ. To san maasum tomea soŋa Tiirɛ Dia dabeserɛ la, to wan ta’an soŋɛ nɛreba ti ba me nyɛ nyuurɔ.—Ezr. 7:10.

Viisegɔ Yɛla

Ho san viisa lua bunɔ la yɛla, ho ta’an ɛɛra ti ho baŋɛ soke ana wa lebesego:

  • Beni n sɔi ti lua bunɔ la yele pakɛ? Beni n sɔi ti Yehowa yuun ka di sugeri bo Adam la Hawa?

  • Beni n sɔi ti Yezu yuun dɛna mina n nari ti a wa’an tinparɛ wa zuo na ki Faaɛ tɔ?

  • Lua bunɔ la tari la bem kã’a bɔ’ɔra tɔ nananawa?

  • Lua bunɔ la wan basɛ ti to ta nyɛ la bem nyuurɔ beere sa’am?

SOŊƐ NƐREBA TI BA NYƐ NYUURƆ

13. Bem n nari ti to eŋɛ yia ta’an soŋɛ nɛreba ti ba nyɛ nyuurɔ Tiirɛ Dia la poan?

13 To wan eŋɛ la wani soŋɛ nɛreba ti ba nyɛ nyuurɔ Tiirɛ Dia la poan? Yia la, to beem ba. Leyɛ’ɛsa, to ta’an beem nɛresɛba ti to ni seke ba na’am mɔɔlegɔ poan la ge me gulesɛ nɛresɛba ti to mina ba la yu’ura ta’an beem ba. Ba ta’an dɛna to suurɔ, to tuuntuneba tadaandoma, to sukuu tadaandoma la nɛreba basɛba me. Hali to san ka tara beeŋo gɔŋɔ la ti ba printɛ la zo’e, to ta’an doose elektrɔnik poan dekɛ bo ba. La ta’an eŋɛ to pakerɛ la nɛresɛba n wan wa’ana la!—Pa. 11:6.

14. Tɔɣɛ pa’alɛ ho san dekɛ beeŋo gɔŋɔ la boi nɛra lan ni ana en se’em.

14 Ho san beem nɛra, a wan bɔta ti a wa’ana. Daarɛ deyima, la daa eŋɛ mabipɔka ayima ti a sira daɣɛ Yehowa Sɛɛradaana la pakerɛ la eŋa n daa yele en yeti eŋa kɔ’ɔn maasena mɛ ti a keŋɛ Tiirɛ Dia la. Beni n sɔi ti la daa eŋɛ en pakerɛ? Sɛla n sɔi la yuuma zo’e zo’e ti a ni yele a sira ti ba keŋɛ ge a ni zaɣesɛ mɛ. Beni n tee a puti’irɛ? Sira la yeti keema ti eŋa mina n dekɛ beeŋo gɔŋɔ la bo en. A sira la n keŋɛ la, a ka le vi Tiirɛ Dia yuuma zo’e zo’e poan.

15. Bem ti la nara ti to tɛ̃ra to san bɛɛna nɛreba ti ba wa’an Tiirɛ Dia la na?

15 Tɛ̃ra ti, ton ni beem nɛresɛba la ta’an tara sokere yele yele wuu ba san nan ka tabelɛ wa’an to zamesegɔ na. Bala la, to ta’an ti’isɛ bisɛ sokese’a ti ba wan soke ge maasum tomea. (Kol. 4:6) Makerɛ, basɛba ta’an ti’isa ti: ‘Ba wan eŋɛ la bem?’ ‘La wan ba’asɛ la wani ma’a?’ ‘Bem lɔɣɔrɔ ti to wan yɛ?’ ‘La dela ho yɔ sɛla?’ ‘Ba wan eŋɛ kɔlɛksin bim?’ To san beem nɛra ti a wa’an Tiirɛ Dia la na, to ta’an soke en yeti, “Hon tari sokere?” ge nyaa lebese en sokese’a woo ti a tara. To ta’an le dekɛ vidiyodoma zuo n de Tɛra Yezu Kum La, la Bem Ti To Ita Na’am Pu’usegɔ Deo Poan? soŋɛ nɛra la ti a bɔkɛ ton iti to zamesegɔ se’em. Tara Vom Somɔ Daarewoo! gɔŋɔ la zaseŋɔ 28 tari la yɛla zo’e zo’e ti to wan ta’an dekɛ soŋɛ nɛra la.

16. Soke ani ti sɛba n ni keŋɛ Tiirɛ Dia la ta’an tara?

16 Sɛba ti to beem ba la san wa’an Tiirɛ Dia la na, ba ta’an le tara sokere mɛ. Ba ta’an ti’isa ti beni n sɔi ti nɛnɛra ka obe boroboro la ge ka nyu daam la bii beni n sɔi ti nɛreba fii obe boroboro la ge nyu daam la. Ba ta’an le bɔta ti ba baŋɛ lan nari ti ba ita Tiirɛ Dia la sugumnɔɔrɛ se’em. Ba me ta’an le bɔta ti ba baŋɛ nyaa Yehowa Sɛɛradoma zamesegɔ za’a dela buyina. La boi bim ti ba ta’an tɔɣɛ yele ana yetɔɣum la poan ge saama la ta’an bɔta ti ba tɔɣɛ pa’alɛ ba ti ba bɔkɛ yɛla pa’asɛ. Zaseŋɔ yele la n boi jw.org la zuo n de “Beni N Sɔi Ti Yehowa Sɛɛradoma N Iti Daana Zaanɔɔrɛ Dia La Se’em La Bɔna De To’ore La Pu’usegɔdoma?” wan ta’an soŋɛ tɔ ti to lebese ba sokere la. To boti to tiregɛ bisɛ ton wan eŋɛ sɛla ta’an soŋɛ sɛba n de ‘putɛsonɛdoma’ la ti ba nyɛ nyuurɔ ge ti Tiirɛ Dia la nyaa paɛ, Tiirɛ Dia la poan la Tiirɛ Dia la san ta ba’asɛ.—Tm. 13:48.

SOŊƐ SƐBA N MA’Ɛ LA

17. Keendoma wan eŋɛ la wani ta’an soŋɛ sɛba n ma’ɛ la? (Ezekiel 34:​12, 16)

17 Tiirɛ Dia saŋa la, keendoma wan eŋɛ la wani ta’an soŋɛ sɛba n ma’ɛ la? Eŋɛ ya pa’alɛ ti ya tɛ̃ri ba yele. (Kaalɛ Ezekiel 34:​12, 16.) Ge ti Tiirɛ Dia la nyaa paɛ la, tiregɛ ya yi ba. Basɛ ya ti ba baŋɛ ti ya nɔŋɛ ba mɛ ge bɔta ti ya soŋɛ ba. Beem ya ba ti ba wa’an Tiirɛ Dia la na. Ba me san wa’ana, to’e ya ba soŋa. Tiirɛ Dia la san ba’asɛ, kelum keni ya ba zɛ’an ge bisɛ yan wan eŋɛ se’em ta’an soŋɛ ba ti ba lebe Yehowa zɛ’an na.—1 Pe. 2:25.

18. To za’a wan ta’an soŋɛ sɛba n ma’ɛ la wani? (Arom 12:10)

18 Nɛra woo n boi tansugere la poan ta’an soŋɛ sɛba n ma’ɛ ge ni wa’an Tiirɛ Dia la. Wani wani? To san tara nɔŋerɛ, itisoŋɔ la gilema bɔ’ɔra ba. (Kaalɛ Arom 12:10.) Tɛ̃ra ti la ta’an kpe’em bo ba mɛ ti ba le pɔsɛ kena zamesegɔ. Daanse’ere dabeem n tari ba ti ba kan to’e ba soŋa.e Bala la, da soke ba sokese’a n wan diisi ba vi bii ho tɔɣera yetɔɣese’a n wan sa’am ba suure. (1 Tes. 5:11) Nɛrebana wa dela to mabiisi. To puurɛ pee mɛ ti to le naɛ la ba pu’usa!—Ym. 119:176; Tm. 20:35.

Fɔɔra: 1. Mabia n ma’ɛ n tari a yuuma gɔnkɛka la Baabule ge nyaa su’usa ka bɔta ti a kɛ̃ Na’am Pu’usegɔ Deo la poan. A ze mɛ ge bisera mabiisi n nan kɛ̃’ɛri Na’am Pu’usegɔ Deo la poan. 2. Pooren, mabia la n ma’ɛ la puurɛ mɛ ti a sɔsa la mabia Na’am Pu’usegɔ Deo la poan.

Mabiisi La Eŋɛ La Wani?

“Valum n yuun tari mam ti n keŋɛ Na’am Pu’usegɔ Deon. Mam yuun ti’isɛ la mabiisi la n wan to’e mam se’em. Mabipɔka ayima n kuregɛ n boi tansugere la poan paɛ yuun 30 la daa yele mam yeti ‘N Bia, Zaarɛ!’ Bala yuun kɛ̃ mam suure mɛ. La yuun ani mam wuu n naɛ la n deodoma bɔna.”—JAVIER.

“Mam yuun kɛ̃ Na’am Pu’usegɔ Deo la poan ta zi’a la pooren kuka la, lan wan eŋɛ se’em ti nɛra kan nyɛ mam. Ge mabiisi zo’e zo’e yuun baŋɛ mam mɛ sɛla n sɔi la, ba yuun nyɛti mam n yuun keni zamesegɔ se’em mam bunbilimen. Ba yuun bo mam la zaarɛ ge kɔkɛ mam ti mam suure ana mama. La yuun ani mam wuu n naɛ la n deodoma bɔna.”—MARCO.

19. To wan nyɛ la bem kã’a to san tɛ̃ra Yezu kum la?

19 To puurɛ pee mɛ la Yezu n yele to ti to tɛ̃ra a kum yuunɛ woo la ge me bɔkɛ sɛla n sɔi ti la yele pakɛ. To san keŋɛ Tiirɛ Dia la, la wan soŋɛ tomam mea la nɛreba, sarɔtɔ zo’e zo’e poan. (Isa. 48:​17, 18) To wan nɔŋɛ Yehowa la Yezu malum pa’asɛ. To iti pa’ala ti to puurɛ pee mɛ la ban eŋɛ sɛla bo to la. Bala wan basɛ ti tomam la mabiisi bɔŋa ana kankaŋi. Basɛ ya ti to za’a waabi soŋɛ nɛreba ti ba nyɛ kãsebo ti lua bunɔ la tara la. Basɛ ya ti to tiregɛ ya bisɛ ton wan eŋɛ se’em ta’an maasum gura yuunɛ wa Tiirɛ Dia la n de ninmɔ’ɔrɛ dabeserɛ yuunɛ wa poan la!

Tiirɛ Dia la san dɛna Alaserɛdaarɛ wuu lan ani se’em 2024 la, tansugere zamesegɔ kan bɔna bakwai la ba’asegɔ poan. Bala zuo, bakwai sɛka n keni na la zaseŋɔ yele ka boi.

TO WAN EŊƐ LA WANI TA’AN . . .

  • maasum tomea gura Tiirɛ Dia la?

  • soŋɛ nɛreba ti ba nyɛ nyuurɔ de poan?

  • soŋɛ sɛba n ma’ɛ la?

YUUNƐ 18 Grateful for the Ransom (To Puurɛ Pee Mɛ La Lua Bunɔ La)

a Ho san bɔta ti ho nyɛ zaseŋɔ yɛla la vidiyodoma n boi zaseŋɔ wa poan, keŋɛ jw.org ta gulesɛ zuo yele la eŋɛ ɛ bɔberɛ la.

b Bisɛ zaseŋɔ yele la zuo n de “Questions From Readers” (Sokese’a Ti Sɛba N Kaali La Sɔkera) n boi April 2021 The Watchtower la poan.

c Bisɛ gɔŋɔ la zuo n de Draw Close to Jehovah, a zuo 23, kz. 8-9.

d Bisɛ daka la zuo n de “Viisegɔ Yɛla.”

e Bisɛ fɔɔra la, la daka la zuo n de “Mabiisi La Eŋɛ La Wani?” Mabia n ma’ɛ ti la kpe’em bo en ti a kɛ̃ Na’am Pu’usegɔ Deon ge a nyaŋɛ a dabeem la mɛ. Ba toe en la soŋa ti a puurɛ pee.

f FOOTE LA VUURƐ:Yehowa yamesi n ni ita Tiirɛ Dia la tingɔŋɔ wa zɛ’an kayima la, zɛ’ɛsi ase’a tingɔŋɔ wa poan me, basɛba ni maasena mɛ ti ba eŋɛ.

    Frafra Gɔnɔ (2000-2025)
    Yese
    Yu'ɛ
    • Farefare
    • Tɔ̃rɛ
    • Hon boti sɛla
    • Copyright © 2025 Watch Tower Bible and Tract Society of Pennsylvania
    • Yelese'a N Nari Ti Ho Mina
    • Suɣelum Yɛla
    • Privacy Settings
    • JW.ORG
    • Yu'ɛ
    Tɔ̃rɛ