ZASEŊƆ 28
Eŋɛ Pa’alɛ Ti Ho Puurɛ Pee Ya La Sɛla Ti Yehowa La Yezu Eŋɛ Bo Ho La
La ni ana hon la wani, ho zɔ san bo ho sɛla n ani soŋa? Nɔkpe’ene kai ti la ni basɛ ti ho puurɛ pee mɛ ti ho bɔta ti ho basɛ ti ho zɔ la baŋɛ ti ho puurɛ pee ya la a bo’olum la. Yehowa la Yezu bo to la bo’olum sebo n gaŋɛ za’a. Bo’olum la dela bem ge to wan eŋɛ la wani pa’alɛ ti to puurɛ pee ya la bo’olum la?
1. Sarɔɔ kuyima dela bem ti to wan eŋɛ pa’alɛ ti to puurɛ pee ya la sɛla ti Naayinɛ la Krista eŋɛ bo to la?
Baabule la biŋe nɔɔrɛ ti, “se’em woo n tari sakerɛ bɔ’ɔra [Yezu]” wan ta’an vɔna daarewoo. (Yon 3:16) Nɛra n tari sakerɛ vuurɛ? La ganɛ ti ho yeen nam bo Yezu. La nari ti to me dekɛ to sakerɛ la eŋɛ pa’alɛ doose la yelese’a ti to lɔɔsa la yelese’a ti to ita. (Yames 2:17) To san tara to sakerɛ la tuna tuuma doose la to iti sɛla ge tɔɣera sɛla, la wan basɛ ti tomam la Yezu la a Sɔ Yehowa zɔtɔ nyɔka la kpe’em.—Kaalɛ Yon 14:21.
2. Bem yele itigɔ n boi de tɔka soŋera tɔ ti to ita pa’ala ti to puurɛ pee ya la sɛla ti Yehowa la Yezu eŋɛ bo to la?
Zaanɔɔrɛ la ge ti Yezu nyaa ki la a yuun yele a podɔleba la sarɔɔ kuyima ti ba wan eŋɛ pa’alɛ ti ba puurɛ pee ya la a kum la. A yuun tari la malema n boi de to’ore na ti Baabule la yi’ira ti, ‘Daana Zaanɔɔrɛ Dia la’ ti la kelum dɛna Krista Kum Tiirɛ la. (1 Korint 11:20) Yezu n yuun pi’ilum bu ti a tuuntuneba la yelemɛŋɛrɛ Kristakɔma za’a wan tɛ̃ra ti a yuun dekɛ la a vom la ki bo to. Malema kana ti Yezu yuun yeti: “Kɔ’ɔn ita ya wana la ya tɛra n yele.” (Luke 22:19) Ho san ni keŋɛ Kum Tiirɛ malema wa, ho iti mɛ pa’ala ti ho puurɛ pee mɛ la nɔŋerɛ n karegɛ ti Yehowa la Yezu tara bɔ’ɔra to la.
VIISƐ PA’ASƐ
Viisɛ pa’asɛ baŋɛ sarɔseto ti ho wan doose eŋɛ pa’alɛ ti ho puurɛ pee mɛ la nɔŋerɛ kãtɛ la, ti Yehowa la Yezu tara bɔ’ɔra to la. Geele bisɛ Krista Kum Tiirɛ la n de ninmɔ’ɔrɛ se’em.
3. Ho puurɛ san pee, ho wan isige tum
Makɛ bisɛ ti ko’om n tari ho yea ti nɛra faaɛ ho basɛ. Ho wan ta’an kɔ’ɔn tamɛ nɛra wa n eŋɛ sɛla bo ho wa yele? Bii ho wan ɛɛra la sarɔseko ti ho wan eŋɛ pa’alɛ ti ho puurɛ pee ya la eŋa n eŋɛ sɛla bo ho la?
To vom boi la Yehowa nu’usin. Kaalɛ 1 Yon 4:8-10 ge nyaa sɔsɛ sokere ana wa:
Beni n sɔi ti Yezu kum la dɛna bo’olum n boi ka to’ore?
La ani hon la wani la Yehowa la Yezu n eŋɛ sɛla bo ho la?
To wan eŋɛ la wani pa’alɛ ti to puurɛ pee ya la sɛla ti Yehowa la Yezu eŋɛ bo to la? Kaalɛ 2 Korint 5:15 la 1 Yon 4:11; 5:3. Ho san kaalɛ Baabule gulesegɔ la woo ba’asɛ, sɔsɛ sokere wa:
Wuu gulesegɔ la n yele se’em la, to wan ta’an eŋɛ la wani pa’alɛ ti to puurɛ pee ya?
4. Tɔɣesa Yezu
Sarɔɔ kuyima me ti to wan eŋɛ pa’alɛ ti to puurɛ pee ya dela to tɔɣeseri Yezu. Kaalɛ 1 Peter 2:21 ge nyaa sɔsɛ sokere wa:
Sarɔkuni poan ti ho wan ta’an dɔla Yezu nataka soŋa soŋa?
Yezu yuun nɔŋɛ Naayinɛ Yetɔɣum la mɛ, mɔɔla yelesoma la ge soŋera nɛreba
5. Kena Krista Kum Tiirɛ la
Ho san ɛɛra ho baŋɛ sɛla n yuun eŋɛ to Daana Zaanɔɔrɛ Dia yia malema la poan, kaalɛ Luke 22:14, 19, 20 ge nyaa sɔsɛ sokere ana wa:
Bem n yuun eŋɛ to Daana Zaanɔɔrɛ Dia la poan?
Boroboro la daam la ze’ele bo la bem?—Bisɛ a kaalegɔ zɛ’ɛsi 19 la 20.
Yezu puti’irɛ yuun dela a podɔleba la ita Daana Zaanɔɔrɛ Dia malema la buyina ma’a yuunɛ woo poan tiira a kum la yele. Bala zuo, Yehowa Sɛɛradoma ni laɣesɛ taaba la yuunɛ woo tiira Krista kum wuu eŋa n yuun yele se’em la. Ho san bɔta ti ho zamesɛ baŋɛ laɣesegɔ wa n de ninmɔ’ɔrɛ se’em, ŋmɛ VIDIYO la ge nyaa sɔsɛ sokere wa:
Ba iti la bem Kum Tiirɛ Dia malema la poan?
Boroboro la daam la dela malema lɔɣɔrɔ. Boroboro la ze’ele bo la Yezu nɛresaala iŋa la ani kasi la ti a dekɛ ki bo to la. Daam la me ze’ele bo la a ziim la
NƐREBA BASƐBA YETI: “Hon nari ti ho eŋɛ sɛla za’a nyɛ faarɛ dela ho yeen sakɛ bo Yezu.”
Ho wan eŋɛ la wani ta’an dekɛ Yon 3:16 la Yames 2:17 pa’alɛ ti ho nari ti ho eŋɛ sɛla n gani bala?
YELEKPINE
To iti pa’ala ti to puurɛ pee ya la sɛla ti Yezu eŋɛ bo to la doose la to tari sakerɛ a poan ge me kena a Kum Tiirɛ malema la.
Tiisegɔ Sokere
Ho tara sakerɛ Yezu poan vuurɛ?
Ho wan eŋɛ la wani pa’alɛ ti ho puurɛ pee ya la sɛla ti Yehowa la Yezu eŋɛ bo ho la?
Beni n sɔi ti la dɛna ninmɔ’ɔrɛ ti to kena Krista Kum Tiirɛ malema la?
Ɛ BISƐ
Krista kum la kpemese to giila ti to eŋɛ la bem?
Zamesɛ sakerɛ yele pa’asɛ la to wan eŋɛ se’em tara dɛ tuna tuuma.
“Tara Sakerɛ Yehowa Puʼulumbiŋa La Poan” (The Watchtower, October 2016)
Zi’irego poan yele la zuo n de “Mam Bisɛ Ti Mam Vom Nyaa Ani La Soŋa Ge Me Ana Filam” la poan, bisɛ pɔka ayima n zamesɛ baŋɛ Krista kum la yele la, n tee a vom se’em.
“Baabule La Teeri Nɛreba Vom Mɛ” (The Watchtower, August 1, 2011)
Geele bisɛ sɛla n sɔi ti nɛreba fii wa dita Tiirɛ malema dia la.