Naayinɛ Puɣum Di Sugeri Bo To La Pɔsega Sa

Yezu lua bunɔ la ma’a n wan basɛ ti to ta’an nyɛ to be’em sugeri dia. (Ep. 1:7) Ge Baabule la yeti: ‘Naayinɛ daa tari la sugeri pɔsega sa,’ ti la pa’alɛ ti a daa puɣum di sugeri bo to mɛ ge ti Yezu nyaa dekɛ lua bunɔ la bo to. (Arom 3:25) Yehowa eŋɛ la wani di sugeri bo to ge nyaa dekɛ lua bunɔ la bo ge me kelum ita yɛla woo tontɔɔ?

Yehowa yuun pu’ulum biŋe ti a wan basɛ ti ‘yaaŋa’ wa’ana faaɛ sɛba n tari sakerɛ bɔ’ɔra eŋa ge me tara sakerɛ ti a pu’ulumbiŋ’a la wan tum la basɛ. Eŋa n yuun yele bala la, la yuun ani wuu lua bunɔ la puɣum tum tuuma mɛ la. (Pin. 3:15; 22:18) Naayinɛ yuun mi ti amea saŋa poan, a dayɔba’arɛ la wan sirum dekɛ lua bunɔ la bo. (Ga. 4:4; Heb. 10:7-10) Yezu n yuun boi tingɔŋɔ wa zuo la, Yehowa yuun bo en la kpe’eŋo ti a di sugeri bo nɛreba ge ti a nyaa dekɛ lua bunɔ la bo. Yezu yuun ta’an di sugeri bo nɛresɛba n tari sakerɛ la, se’ere n sɔi la a yuun mi ti lua bunɔ la wan duuse ba be’em la.—Mt. 9:2-6.