ZASEŊƆ 28
YUUNƐ 123 Loyally Submitting to Theocratic Order (Nana Naayinɛ Pa’alegɔ)
Hon Baŋɛ Yelemɛŋɛrɛ La?
‘Sɛ ya ze’ele soŋa soŋa ge dekɛ yelemɛŋɛrɛ siganɛ la lu ya sia.’—EP. 6:14.
YELEKPINE
To wan zamesɛ ton wan eŋɛ se’em ta’an baŋɛ yelemɛŋɛrɛ la ti to zamesɛ Yehowa zɛ’an la n boi de to’ore se’em la pumpɔreŋɔ la ti Sitaana la sɛba n giiseri to la parena la.
1. La ani hon la wani la hon baŋɛ yelemɛŋɛrɛ la?
YEHOWA nɛreba nɔŋɛ yelemɛŋɛrɛ la n boi Baabule la poan mɛ. Baabule la n basɛ ti to sakerɛ kpe’em. (Arom 10:17) To sakɛ ti Yehowa n basɛ ti Krista tansugere la dɛna ‘piilɛ n gurɛ yelemɛŋɛrɛ la.’ (1 Tim. 3:15) To ‘nani sɛba n boi to nɛŋa la mɛ.’ Bamam n pa’ali tɔ yelemɛŋɛrɛ la n boi Baabule la poan ge bɔ’ɔra to pa’alegɔ n soŋeri tɔ ti to tuna Naayinɛ n boti sɛla.—Heb. 13:17.
2. Wuu Yames 5:19 n pa’alɛ se’em la, to san baŋɛ yelemɛŋɛrɛ la ba’asɛ, bem dɛŋa n wan ta’an paɛ tɔ?
2 La boi bim ti to daa sakɛ bo yelemɛŋɛrɛ la mɛ ge nana Yehowa tigere la n pa’ali to se’em la ge to ta’an kelum buregɛ. (Kaalɛ Yames 5:19.) Sitaana ka boti ti to dekɛ tomea delum Baabule la, a me ka boti to dɔla Naayinɛ tigere la n pa’ali to sɛla la.—Ep. 4:14.
3. Beni n sɔi ti la nara ti to gurɛ yelemɛŋɛrɛ la kankaŋi? (Epesus 6:13, 14)
3 Kaalɛ Epesus 6:13, 14. La kan yue, Kolekpabɛ’a la wan pã’asɛ tisi la ti ba isige giisɛ Yehowa. (Lil. 16:13, 14) To me mi ti Sitaana wan tiregɛ ti a pã’asɛ Yehowa nɛreba. (Lil. 12:9) Bala n sɔi ti la yele pakɛ ti to kumesɛ tomea ta’an mina yelemɛŋɛrɛ, la pumpɔreŋɔ n boi to’ore to’ore se’em ge me ta’an dɔla yelemɛŋɛrɛ la. (Arom 6:17; 1 Pe. 1:22) Sɛla n wan soŋɛ tɔ ti to nyaŋɛ piɛ mɛlesekãtɛ la dela to gurɛ yelemɛŋɛrɛ la kankaŋi!
4. To wan sɔsɛ la bem zaseŋɔ wa poan?
4 Zaseŋɔ wa poan, to wan sɔsɛ hala ayi n wan ta’an soŋɛ tɔ ti to baŋɛ yelemɛŋɛrɛ la n boi Baabule la poan ge me dɔla Naayinɛ tigere la pa’alegɔ. To wan le sɔsɛ yɛla atã ti la nara ti to eŋɛ ta’an kɔ’ɔn gurɛ yelemɛŋɛrɛ la kankaŋi.
HALESE’A N WAN SOŊƐ TƆ TI TO BAŊƐ YELEMƐŊƐRƐ LA
5. To san zɔta Yehowa, la wan soŋɛ to la wani ti to baŋɛ yelemɛŋɛrɛ la?
5 Zɔta Yehowa. To san zɔta Yehowa, la vuurɛ dela to nɔŋɛ en ge da makɛ eŋɛ sɛla n wan sa’am a suure. Yehowa puurɛ san wan pee la tɔ, la dela to zamesɛ baŋɛ som la be’em n boi tɔka tɔka se’em, la yelemɛŋɛrɛ la pumpɔreŋɔ n boi tɔka tɔka se’em. (Mag. 2:3-6; Heb. 5:14) La ka nari ti to zɔta nɛra gana Yehowa se’ere n sɔi la saŋa zo’e zo’e, yelese’a n ni pɛɛra nɛreba puurɛ la sa’ani la Yehowa suure.
6. Sore kani poan ti asaala dabeem yuun basɛ ti Israel yizuo nɛŋadoma pia la yuun ka tɔɣɛ yelemɛŋɛrɛ?
6 To san zɔta nɛreba gana Naayinɛ, bala ta’an basɛ ti to buregɛ yelemɛŋɛrɛ la poan. Bisɛ yizuo nɛŋadoma 12 la n yuun eŋɛ sɛla se’em ma’a ti ba yuun keŋɛ ta viisɛ tinsɛka ti Yehowa pu’ulum biŋe ti a dekɛ bo Israeldoma la. Ba poan pia yuun zoti Kanaandoma la mɛ gana bamam n nɔŋɛ Yehowa se’em la. Ba yuun yele ba Israel tadaandoma la yeti, ‘To kan ta’an zabɛ la nɛreba la, ba kpe’em gaŋɛ to mɛ.’ (Kan. 13:27-31) La san dɛna nɛresaala puti’irɛ poan, Kanaandoma la yuun sirum tari paŋa gana Israeldoma la mɛ. Ge nɛra san yeti Israeldoma kan nyaŋɛ zabɛ nyaŋɛ ba dindoma la, la pa’alɛ ti nɛra la tamɛ Yehowa yele mɛ. Viiseriba pia la yuun nari ti ba ti’isa la Yehowa n boti ba eŋɛ sɛla. Ba yuun nari ti ba ti’isa la sɛla ti Yehowa eŋɛ bo ba ti la ka yue la. Ba yuun nari ti ba bɔkɛ ti ho san dekɛ Kanaandoma la makɛ la Yehowa n de Gaŋɛ Za’adaana la, Kanaandoma la ka tari paŋa. Yosua la Kaleb yuun boti la Yehowa puurɛ pee la ba. Ba yuun ka ani wuu viiseriba pia la n yuun ka tari sakerɛ la. Ba yuun yele nɛreba la yeti, ‘Yehowa puurɛ san pee la tɔ, a wan bɔna to nɛŋai ti to keŋɛ tiŋa la poan.’—Kan. 14:6-9.
7. To wan eŋɛ la wani ta’an zɔta Yehowa? (Bisɛ foote la.)
7 To san bɔta ti to zɔta Yehowa, la nari ti to bisɛ ton wan eŋɛ se’em ti a puurɛ pee, se’em ma’a ti to kɔ’ɛ to puti’irɛ yele poan. (Ym. 16:8) Ho san kaala Baabule la, ni soke homea yeti, ‘Mam san boi ni la yele wa poan, n wan eŋɛ ni la wani?’ Makerɛ, ti’isɛ bisɛ ti ho boi bim mɛ ge wuna Israel yizuo nɛŋadoma pia la ti ba tɔɣera ba giilekɔ’ɔsegɔ yetɔɣum la. Ho yuun wan sakɛ ni bo ba lasebaarɛ la ge basɛ ti ho paleŋa ɛ̃ɣera la nɛreba? Bii ho wan nɔŋɛ Yehowa ge bɔta ti ho eŋɛ sɛla n wan basɛ ti a puurɛ pee? Israel dɔɣepa’asɛ kaŋa yuun ka sakɛ ti Yosua la Kaleb tɔɣɛ la yelemɛŋɛrɛ. Bala zuo la, Yehowa yuun ka bo yɔ’ɔ ti Israeldoma bamam la kɛ̃ Pu’ulumbiŋere Tiŋa la poan.—Kan. 14:10, 22, 23.
Hon yuun wan sakɛ ni bo la ani? (Bisɛ kaalegɔ zɛ’an 7)
8. Halɛ deni n nari ti to tiregɛ tara ge beni n sɔi?
8 Sirege n mea. Yehowa ni niɛ yelemɛŋɛrɛ la bo la sirege n meadoma. (Mt. 11:25) To daa sakɛ mɛ sirege tomea ti ba soŋɛ tɔ ti to zamesɛ baŋɛ yelemɛŋɛrɛ la. (Tm. 8:30, 31) Ge la nari ti to bisɛ tomea soŋa ge da zɛ̃kɛ tomea. To san zɛ̃kera tomea, bala ta’an basɛ ti to pɔsɛ ti’isa ti tomam puti’irɛ zuni mɛ la Baabule naresum yɛla bii Yehowa tigere la n pa’alɛ to sɛla la.
9. To wan eŋɛ la wani kɔ’ɔn siregera tomea?
9 To san bɔta ti to kɔ’ɔn siregera tomea, la nari ti to tɛ̃ra ti to san dekɛ tomea makɛ la Yehowa, to ba’ɛ pɔ’ɛ mɛ. (Ym. 8:3, 4) To me ta’an zusɛ Yehowa ti a soŋɛ tɔ ti to siregera tomea ge nana pa’alegɔ. Yehowa wan soŋɛ tɔ ti to nana a pa’alegɔ la n boi Baabule la poan la ge dɔla a tigere la n pa’ali to sɛla la. Ho san kaala Baabule la, bisɛ yelese’a n basɛ ti la niɛ peelumi ti Yehowa nɔŋɛ sirege n mea mɛ ge a yaɛ la zɛ̃kɛ n mea, karenbaani la pa’alɛ n mea. La me nari ti ho sirege homea paa, ba san bo ho tuunɛ bii yɔ’ɔ n basɛ ti ho tara kpe’eŋo.
TO WAN EŊƐ LA WANI KƆ’ƆN GURƐ YELEMƐŊƐRƐ LA KANKAŊI?
10. Yehowa yuun doli la bani poan bɔ’ɔra a nɛreba pa’alegɔ?
10 Kɔ’ɔn dɔla Yehowa tigere la, pa’alegɔ. Diimi Israel tiŋa poan, Yehowa yuun doose la Moses la Yosua poan bɔ’ɔra A nɛreba pa’alegɔ. (Yos. 1:16, 17) Israeldoma yuun nyɛ kã’a mɛ se’em ma’a ti ba yuun ni geele nɛreba wa ti Yehowa Naayinɛ n loe ba la. Yuuma zo’e zo’e pooren, se’em ma’a ti Krista tansugere la yuun ze’ele la, tuuntuneba 12 la n yuun bo’ori mabiisi la pa’alegɔ. (Tm. 8:14, 15) Ge pooren, keendoma basɛba n yuun boi Yerusalem n yuun pa’asɛ tuuntuneba la poan. Mabiisi la n yuun doose pa’alegɔ seko ti keendoma la yuun dekɛ bo ba la yuun basɛ ti ‘tansuga la kɔ’ɔn zɛ’a la kankaŋi sakerɛ la poan ge kɔ’ɔn pa’asa dabeserɛ woo.’ (Tm. 16:4, 5) Zina beere wa, tomam me nyɛti la kã’a to san dɔla Yehowa tigere la n pa’ali to sɛla la. Ge la wan ana Yehowa la wani to san zaɣesɛ ka nana sɛba ti a loe la? To san ɛɛra ti to nyɛ sokere wa lebesego, basɛ ya ti to geele ya sɛla n yuun paɛ Israeldoma la se’em ma’a ti ba yuun yɛ’ɛsa Pu’ulumbiŋere Tiŋa la.
11. Bem n yuun paɛ Israeldoma sɛba n yuun ka nam bo Moses la? (Bisɛ foote la.)
11 Israeldoma la n yuun ye Pu’ulumbiŋere Tiŋa la, nɛrezureba basɛba yuun ka nam bo Moses ti Yehowa loe en ti a bɔna ba nɛŋa la. Ba yuun yeti, ‘Buuri wa za’a dela fa’a ti Naayinɛ me bɔna la ba ge daɣɛ Moses ma’a.’ (Kan. 16:1-3) La boi bim ti Naayinɛ nɛŋai, ‘Israel buuri la za’a’ yuun dela fa’a ge Yehowa yuun loe la Moses ti a bɔna nɛreba la nɛŋa. (Kan. 16:28) Tubekakpiregadoma wa n yuun ka nam bo Moses la, pa’alɛ ti ba yuun ka nam bo Yehowa. Ba yuun ka ti’iseri Yehowa n boti sɛla ge ba yuun ti’iseri la bamam mea n boti sɛla. Ba yuun boti la kpe’eŋo la yu’urɛ. Yehowa yuun ku tubekakpiregadoma wa mɛ la nɛresɛba n yuun pa ba poore la. (Kan. 16:30-35, 41, 49) Zina beere wa, to mi ti Yehowa puurɛ ka pee la sɛba n ka nani bɔ’ɔra a tigere la pa’alegɔ.
Hon yuun wan pa ni la ani poore? (Bisɛ kaalegɔ zɛ’an 11)
12. Beni n sɔi ti to wan ta’an dekɛ tomea delum Yehowa tigere la?
12 To ta’an dekɛ tomea delum Yehowa tigere la. La yele san ta pakɛ ti to malum demese ton bɔkɛ Baabule yelemɛŋɛrɛ la ase’a se’em, bii ton tuni to Na’am mɔɔlegɔ tuuma la se’em, Tigere Zuo Bisegadoma la ni eŋɛ teere wa mɛ ge ka gu’una. (Mag. 4:18) Sɛla n sɔi ti ba ni ita bala dela, ba boti la Yehowa puurɛ pee. Ba me ni basɛ ti Baabule la n soŋɛ ba ti ba kɔ’ɛ ba puti’irɛ. Yehowa nɛreba za’a me nari ti ba dɔla Baabule la n pa’alɛ sɛla la.
13. ‘Yelese’a n de yelemɛŋɛrɛ la’ dela bem ge la nari ti to dekɛ eŋɛ la bem?
13 ‘Basɛ ti yelese’a n de yelemɛŋɛrɛ la bɔna ho suuren.’ (2 Tim. 1:13) ‘Yelese’a n de yelemɛŋɛrɛ la’ dela Krista pa’alegɔ la n boi Baabule la poan la. (Yon 17:17) Yelese’a woo ti to sakɛ bo la ze’ele la Baabule la poan. Yehowa tigere la boti la to kɔ’ɔn gurɛ Baabule pa’alegɔ la kankaŋi. To san ita bala to wan nyɛ kã’a.
14. Bem n yuun basɛ ti Kristakɔma basɛba yuun ka le dɔla ‘yelese’a n de yelemɛŋɛrɛ la’?
14 To san ka dɔla ‘yelese’a n de yelemɛŋɛrɛ la’ bem n wan eŋɛ? Basɛ ya ti to bisɛ yele wa. Yuun kɔbesɛka n deŋɛ nɛŋa la poan, Kristakɔma basɛba yuun eeri tɔɣera la yetɔɣum n daɣɛ yelemɛŋɛrɛ ti, Yehowa dabeserɛ la paɛ mɛ. Daanse’ere, ba yuun kaalɛ la gɔŋɔ n yeti Yehowa dabeserɛ la paɛ mɛ. Ba yuun ti’isɛ ti tuuntuna Paul n gulesɛ gɔŋɔ wa. Kristakɔma basɛba n yuun boi Tesalonika yuun ka ma’ɛ bamea bisɛ yele wa soŋa ge me yuun ɛɛra tɔɣera yele wa bɔ’ɔra nɛreba. Ba yuun san tiɛ ni yelese’a ti Paul yuun bɔna ba zɛ’an ge pa’ala ba la, ba yuun kan sakɛ ni yele wa. (2 Tes. 3:1-5) Paul yuun ka’am mabiisi la ti ba da sakɛ bo sɛla woo ti ba wuna. Paul yuun tɔɣɛ la sɛla n wan soŋɛ ba beere sa’am. A yuun tɔɣɛ yele wa la yi’i Tesalonika gɔŋɔ la ki’ileŋɔ bɔba. Bilam yeti, ‘Mam mea nu’o n gulesɛ yele wa, mam Paul mea n pu’usɛ ya na. Mam n ni ba’asɛ n gɔŋɔ se’em n bala.’—2 Tes. 3:17.
15. To wan eŋɛ la wani kan sakɛ bo pumpɔreŋɔ yɛla n ani wuu dela yelemɛŋɛrɛ la? Bo makerɛ. (Bisɛ fɔɔra la.)
15 To wan zamesɛ la bem Paul n yuun gulesɛ sɛla bo Tesalonikadoma la? To san wum sɛla n ka makɛ la sɛla ti to zamesɛ Baabule la poan, bii to wum la yele n digeni inya, la nari ti to dekɛ yɛm tum tuuma. Soviet Union saŋa la, to dindoma la yuun gulesɛ la gɔŋɔ bo mabiisi la ge parum ti la ze’ele la tigere zuo la na. Gɔŋɔ la yuun yele mabiisi la basɛba ti ba yelege tara bamea tigere. La yuun ani wuu gɔŋɔ la sirum ze’ele la tigere zuo la na ge mabiisi la yuun ka basɛ ti gɔŋɔ wa pã’asɛ ba. Mabiisi la yuun baŋɛ ti gɔŋɔ la n tɔɣeri sɛla la ka makɛ la sɛla ti ba zamesɛ Baabule la poan la. Zina beere wa me, to dindoma doli la intanɛt poan bii social media poan ti ba burum to puti’irɛ, la wan eŋɛ se’em ti to da tara nɔyinɛ. La ka nari ti to tara ‘puti’ira ayi ayi.’ Ge sɛla n wan soŋɛ to dela, to ni soke tomea nyaa ton wum bii kaalɛ sɛla la makɛ la yelemɛŋɛrɛ la ti to zamesɛ la?—2 Tes. 2:2; 1 Yo. 4:1.
Da basɛ ti pumpɔreŋɔ yɛla n ani wuu dela yelemɛŋɛrɛ la pã’asɛ hɔ (Bisɛ kaalegɔ zɛ’an 15)a
16. Wuu Arom 16:17, 18 n pa’alɛ se’em la, nɛra san tɔɣera sɛla n daɣɛ yelemɛŋɛrɛ, bem n nari ti to eŋɛ?
16 Kɔ’ɔn ana tapilapi la sɛba n tari yelemɛŋɛrɛ bɔ’ɔra Yehowa la. Naayinɛ boti la to tara nɔyinɛ pu’usa en. To san gurɛ yelemɛŋɛrɛ la kankaŋi, to wan tara nɔyinɛ. Nɛra san tɔɣera sɛla n ka makɛ la yelemɛŋɛrɛ la, la ni tara la yelesego kena tansugere la poan. Bala la, Naayinɛ ka’am tɔ ti to ‘da dekɛ tomea laɣum la ba,’ se’ere n sɔi la bala ta’an basɛ ti to buregɛ yelemɛŋɛrɛ la poan.—Kaalɛ Arom 16:17, 18.
17. To san baŋɛ yelemɛŋɛrɛ la ge kɔ’ɔn gurɛ de kankaŋi, to wan nyɛ nyuurɔ la wani?
17 To san baŋɛ yelemɛŋɛrɛ la ge kɔ’ɔn gurɛ de kankaŋi, to wan tara bɔnsoŋa la Yehowa ge ti to sakerɛ me kpe’em. (Ep. 4:15, 16) To kan basɛ ti Sitaana pumpɔreŋɔ yɛla la pã’asɛ tɔ. To me wan ana du’a du’a la Yehowa, mɛlesekãtɛ la saŋa poan. Kɔ’ɔn gurɛ yelemɛŋɛrɛ la kankaŋi ‘ge suma’asum Naayinɛ la wan bɔna la hɔ.’—Flp. 4:8, 9.
YUUNƐ 122 Be Steadfast, Immovable! (Ze’a Kankaŋi, Da Miina!)
a FOOTE LA VUURƐ: Foote n pa’alɛ to mabiisi la n yuun boi Soviet Union poan, ti to dindoma yuun gulesɛ gɔŋɔ bo ba ge parum ti la ze’ele la tigere zuo la na. Zina beere wa, to dindoma ta’an doose intanɛt bii social media poan parum yɛla bo Yehowa tigere la.