Muse Ko’om Ge Da Gu’una

1. Beni n sɔi ti la nara ti ho muse ko’om?

HON nɔŋɛ Yehowa Naayinɛ, se’em n bo ho vom, la sɛla woo n ani soŋa la? Hon boti ho eŋɛ pa’alɛ ti ho nɔŋɛ en? Sore sɛka n ani soŋa ti ho wan ta’an eŋɛ pa’alɛ ti ho nɔŋɛ Yehowa dela ho kã homea bo en ge muse ko’om. Ho san eŋɛ bala, ho wan nyɛ yɔ’ɔ laɣum pa’asɛ Yehowa yizuo la poan. Bala wan basɛ ti Yehowa n de ho Sɔ, la ho Zɔ la pa’ala hɔ ge bisera hɔ, se’ere n sɔi la ho nyaa kã la homea bo en. (Ym. 73:24; Isa. 43:​1, 2) Ho san kã homea bo Yehowa ge muse ko’om ho wan ta’an ta vɔna daarewoo.—1 Pe. 3:21.

2. To wan sɔsɛ la bem zaseŋɔ wa poan?

² Daanse’ere, sɛla n gu’uri ho ti ho muse ko’om. La san dɛna bala, ho ka boi ho ma’a. Nɛreba zo’e zo’e yuun tee ba halɛ, la ba ti’isegɔ mɛ ge ta’an nyɛ yɔ’ɔ muse ko’om. Ba nyaa mu’ɛ la nini tuna Yehowa tuuma ge tara pupeelum. Ho wan ta’an zamesɛ la bem diimi nɛresɛba n yuun muse ko’om la zɛ’an? To wan sɔsɛ daaŋɔ seto n yuun paɛ ba ge bisɛ ton wan ta’an zamesɛ sɛla ba zɛ’an.

SAMARIADOMA LA YUUN MUSE KO’OM MƐ

3. Samariadoma la yuun nari ti ba eŋɛ la bem ge nyaa ta’an muse ko’om?

³ Yezu saŋa la, Samariadoma la yuun tari la bamea pu’usegɔ. Samariadoma zo’e zo’e yuun kɛ̃’ɛri la Yudea saazuo bɔba. Samariadoma la yuun san bɔta ti ba muse ko’om, la yuun nari ti ba sakɛ bo Naayinɛ Yelesum la za’a ge me zamesa ku. Samariadoma la yuun sakɛ ti gɔnseto ma’a n ze’ele Naayinɛ zɛ’an dela Pin’ileŋɔ ta paɛ Tɛɛnhegɔ gɔnɔ la, la daanse’ere Yosua gɔŋɔ la. Naayinɛ n yuun yele sɛla ti la bɔna Tɛɛnhegɔ 18:​18, 19 zuo la, Samariadoma la yuun tari puti’irɛ ti Mɛzaaya la wan wa’ana. (Yon 4:25) Samariadoma la yuun san bɔta ti ba muse ko’om, la yuun nari ti ba sakɛ ti Yezu n de pu’ulumbiŋere Mɛzaaya la. “Nɛresɛba n boe Samaria teŋkaŋa bɔba la zo’e zo’e” yuun eŋɛ la bala. (Yon 4:39) Samariadoma, la Yudadoma n yuun kɛseri taaba la zuo, Samariadoma basɛba yuun nari ti ba tee ba halɛ ta’an dɛna Kristakɔma.—Lu. 9:​52-54.

4. Wuu Tooma 8:​5, 6, 14 n yele se’em la, Samariadoma la yuun eŋɛ la wani se’em ma’a ti Filip yuun mɔɔlɛ bo ba la?

⁴ Bem n yuun soŋɛ Samariadoma la ti ba ta’an muse ko’om? Filip n yuun mɔɔlɛ “Krista se’emdaana ma’an te Yenɛ loe la yɛla bo ba” la, Samariadoma basɛba yuun “sakɛ bo Yenɛ Yelesoma la” mɛ. (Kaalɛ Tooma 8:​5, 6, 14.) La boi bim ti Filip yuun dela Yuda nɛra ge ba yuun kelese en mɛ. Daanse’ere ba yuun tiɛ la gulesegɔ ase’a n yeti Naayinɛ ka gãseri la. (Tɛɛ. 10:​17-19) Ba yuun “yu’uhɛ ba toba kelehe” Filip n tɔɣɛ Krista yele se’em mɛ ge nyaa baŋɛ ti Naayinɛ n sirum tum Filip. A yuun tuni la yelekiresi zo’e zo’e. Makerɛ, a yuun tibɛ la bã’adoma ge sa’ɛ kolekpabɛ’ɛsi.—Tm. 8:7.

5. Ho wan ta’an zamesɛ la bem Samariadoma la zɛ’an?

⁵ Samariadoma wa yuun ta’an zaɣesɛ Filip n yele ba sɛla la, sɛla n sɔi la a yuun dela Yuda nɛra. Bii ba yuun ta’an yeti bamam ka tabelɛ wum Filip n tɔɣeri sɛla la. Ge ba yuun ka eŋɛ bala. Samariadoma la n yuun baŋɛ ti Filip n pa’alɛ ba sɛla la dela yelemɛŋɛrɛ la, ba yuun ka gu’um ti ba muse ba ko’om. Baabule la yeti: “Filip n wa’an ba zen’an ba ta sakɛ la Filip yetɔgom la yɛhera la Yenɛ Sɔ’ɔlom la Yesu Krista yu’urɛ poan la. Ba me to’e ko’om soa, boraahe la pɔgɔhe.” (Tm. 8:12) Hon sakɛ ti Naayinɛ Yelesum la dela yelemɛŋɛrɛ? Hon sakɛ ti Yehowa Sɛɛradoma sirum nɔŋɛ taaba wuu Yezu n yuun yeti yelemɛŋɛrɛ Kristakɔma wan nɔŋɛ taaba se’em la? (Yon 13:35) Da zɔta dabeem ti ho muse ko’om. Tara sakerɛ ti Yehowa wan kã bo ho.

6. Ruben yele la wan ta’an soŋɛ ho la wani?

⁶ Ruben ze’ele la Germany tiŋa. A deodoma yuun dela Yehowa Sɛɛradoma. Ge eŋa n yuun de bunbilipaalega la, a yuun ka mi nyaa a sakɛ ti Naayinɛ boi bii a ka boi. Bem n yuun soŋɛ en ti a sakɛ? A yuun baŋɛ ti eŋa ka mi yɛla la soŋa, bala la a wan zamesɛ pa’asɛ. A yeti: “Mam yuun zamesɛ mɛ ta’an baŋɛ sɛla n de yelemɛŋɛrɛ. Mam yuun zamesɛ lebege lebege yɛla mɛ sugumnɔɔrɛ zo’e zo’e.” A yuun kaalɛ la gɔnseko zuo n de Is There a Creator Who Cares About You? Gɔŋɔ wa yuun soŋɛ Ruben me paa. A yuun nyaa yele amea yeti: ‘Wai! Yehowa sirum boi mɛ.’ Se’em ma’a ti Ruben yuun keŋɛ to tigere zuo la, a puurɛ yuun pee mɛ la eŋa n nyɛ to mabinɔɔrɛ la za’a n tari nɔŋerɛ se’em la. Ruben yuun lebe la Germany ge muse ko’om se’em ma’a ti a dɛna yuun 17 la. Ho san tara puti’ira ayi ayi, eŋɛ viisegɔ to tansugere gɔnɔ la poan. “Ton mi” yelemɛŋɛrɛ la soŋa se’em la ta’an soŋɛ tɔ ti to kan tara puti’ira ayi ayi. (Ep. 4:​13, 14) Ho san wuna Yehowa nɛreba n tari nɔŋerɛ la nɔyinɛ se’em tisi ase’a poan ge me nyɛta mabiisi n nɔŋɛ taaba se’em ho tansugere poan, la wan basɛ ti ho malum nɔŋɛ to mabinɔɔrɛ la za’a.

SAUL N ZE’ELE TARSUS YUUN MUSE KO’OM MƐ

7. Saul yuun nari ti a tee a puti’irɛ la wani?

⁷ Geele Saul n ze’ele Tarsus yele la bisɛ. A yuun zamesɛ Yudadoma Lɔɔ la mɛ soŋa soŋa ge me yuun dɛna nɛrezure Yuda tiŋa poan. (Ga. 1:​13, 14; Phil. 3:5) Sankaŋa la, Yudadoma zo’e zo’e yuun bisɛ ti Kristakɔma dela a yelege n meadoma. Bala yuun basɛ ti Saul eŋɛ la sunsɔa mɛlesa Kristakɔma la. A yuun tuɣum ti’isɛ ti eŋa iti la Naayinɛ n boti sɛla. (Tm. 8:3; 9:​1, 2; 26:​9-11) Saul san wan tara sakerɛ bɔ’ɔra Yezu ge muse ko’om dɛna Kristabia, la nari ti a sakɛ ti ba wan mɛlesɛ en.

8. (a) Bem n yuun soŋɛ Saul ti a ta’an muse ko’om? (b) Wuu Tooma 22:​12-16 n pa’alɛ se’em la, Ananias yuun soŋɛ Saul la wani? (Bisɛ foote la.)

⁸ Bem n yuun soŋɛ Saul ti a ta’an muse ko’om? Se’em ma’a ti Yezu yuun ze’ele saazuo tɔɣɛ bo Saul la, niɛsum n yuun nyakɛ tɔ en ti a fɔ. (Tm. 9:​3-9) Saul yuun lu la nɔɔrɛ dabesa atã. A yuun ti’isɛ taɣesɛ la sɛla n paɛ en la yele. Saul yuun sakɛ ti Yezu n de Mɛzaaya la ge me sakɛ ti Yezu podɔleba la pu’usegɔ n de yelemɛŋɛrɛ. Saul suure yuun sa’am mɛ la eŋa n yuun sakɛ ti ba ku Stepen la! (Tm. 22:20) Dabesa atã pooren, Yezu podɔla ayima yu’urɛ n de Ananias yuun keŋɛ Saul zɛ’an mɛ ta pikɛ a nini ge me kpemse a giila ti a muse ko’om ge da gu’um. (Kaalɛ Tooma 22:​12-16.) Saul yuun sirege amea mɛ, kelese Ananias ge muse ko’om.—Tm. 9:​17, 18.

9. Ho wan ta’an zamesɛ la bem Saul yele la poan?

⁹ To wan ta’an zamesɛ yɛla zo’e zo’e Saul zɛ’an. Daanse’ere, a yuun ta’an basɛ ni ti zɛkɛ n mea bii asaala dabeem gu en ti a kan muse ko’om. Ge a yuun ka eŋɛ bala. Saul yuun sirege la amea, eŋɛ teere a vom poan ta’an dɔla Krista. (Tm. 26:​14, 19) Saul yuun mi ti a san dɛna Kristabia ba wan mɛlesɛ en ge a yuun ka basɛ ti bala gu en. (Tm. 9:​15, 16; 20:​22, 23) Saul n yuun muse ko’om ba’asɛ la, a yuun kelum dekɛ amea delum la Yehowa ti a soŋɛ en ti a ta’an ŋmibe. (2 Ko. 4:​7-10) Ho san ta muse ko’om dɛna Yehowa Sɛɛradaana, nɛreba ta’an yaɛ hɔ. Tara suure lua ti Yehowa, la Krista wan soŋɛ hɔ ti ho ŋmibe.—Flp. 4:13.

10. Anna yele la wan ta’an soŋɛ ho la wani?

¹⁰ Anna deodoma dela Kurdoma n boi Eastern Europe tiŋa. Se’em ma’a ti Anna ma yuun muse ko’om la, Anna yuun dela yuuma 9 ti a sɔ me yuun bo en yɔ’ɔ ti a ta’an zamesa Baabule la. Ge se’em ma’a ti a yidoma basɛba yuun baŋɛ ti eŋa la Yehowa Sɛɛradoma n zameseri Baabule la, ba yuun pɔsɛ giisa en mɛ. Anna yidoma yuun bisɛ ti la dela nyanɛ bɔ’ɔra ba yizuo la ti a basɛ ba yaabedoma pu’usegɔ ge tee pu’usegɔ. Se’em ma’a ti Anna yuun dɛna yuun 12 la, a yuun yele a sɔ ti a bo en yɔ’ɔ ti a ta’an muse ko’om. Anna sɔ yuun boti la a baŋɛ nyaa amea n boti a muse ko’om bii nɛra n pɛ̃regeri en. A yuun yele a sɔ yeti, “Mam nɔŋɛ la Yehowa.” A sɔ yuun sakɛ mɛ. Se’em ma’a ti Anna yuun muse ko’om la, a yidoma yuun kelum daana en mɛ. A sɔyaaba yuun yele en yeti, “Ho san dɛna yalema bii ho nyuuri la sigaari, la sɔ̃ɛ hon de Yehowa Sɛɛradaana.” Anna yuun eŋɛ la wani? A yeti, “Yehowa soŋɛ mam mɛ ti mam kpe’em. Mam sɔ, la mam ma me yuun soŋɛ mam me paa.” Anna ni gulesɛ la yelese’a wana mɔpi ti Yehowa eŋɛ soŋɛ en. A ni makɛ kaalɛ sɛla ti a gulesɛ biŋe la mɛ, la wan eŋɛ se’em ti a kan tamɛ Yehowa n soŋeri en se’em la. Dabeem san tara hɔ ti nɛreba wan giisa hɔ, tɛ̃ra ti Yehowa wan soŋɛ hɔ.—Heb. 13:6.

KORNELIUS YUUN MUSE KO’OM MƐ

11. Bem yɛla n yuun ta’an basɛ ti Kornelius gu’una ti a muse ko’om?

¹¹ To wan ta’an zamesɛ ninmu’urɛ yɛla Kornelius yele la poan. A yuun dela “pɛɛntɛɛnreba kpɛ’ɛma” n biseri soogɛpa n paɛ wuu 100 Arom tiŋa. (Tm. 10:1.) Bala la, a yuun dela nɛrezure ba gingilega la poan, la soogɛpa la zɛ’an. Kornelius yuun “soŋore nahadoma” mɛ. (Tm. 10:2) Yehowa yuun tum la tuntuna Peter ti a mɔɔlɛ yelesoma la bo Kornelius. A yuun gu’um ti a kan muse ko’om la eŋa n de nɛrezure la?

12. Bem n yuun soŋɛ Kornelius ti a ta’an muse ko’om?

¹² Bem n yuun soŋɛ Kornelius ti a ta’an muse ko’om? Baabule la yeti “enŋa la a yire nɛreba woo dole Yenɛ” mɛ. Kornelius me yuun kɔ’ɔn zusera la Naayinɛ saŋa woo. (Tm. 10:2) Peter n yuun mɔɔlɛ yelesoma la bo Kornelius, la a yidoma la, ba yuun sakɛ bo Krista mɛ ge ka gu’um ti ba muse ko’om. (Tm. 10:​47, 48) Kornelius yuun kɔ’ɔn maasum mɛ ti a eŋɛ teere a vom poan ta’an naɛ la a yidoma la pu’usa Yehowa.—Yos. 24:15; Tm. 10:​24, 33.

13. Ho wan ta’an zamesɛ la bem Kornelius yele la poan?

¹³ Kornelius yuun dela nɛrezure wuu Saul la. Bala yuun ta’an gu en ti a kan dɛna Kristabia. Ge a yuun ka basɛ ti sɛla gu en. La wan nara ti ho eŋɛ teere ho vom poan ta’an muse ko’om? La san dɛna bala, Yehowa wan soŋɛ hɔ. Ho san lu ho suure ti ho tara Baabule naresum yɛla tuna tuuma, Yehowa wan kã bo ho.

14. Tsuyoshi makesonɛ la wan ta’an soŋɛ ho la wani?

¹⁴ Tsuyoshi n ze’ele Japan yuun nari ti a eŋɛ teere a tuuma poan ta’an muse ko’om. A yuun tuni la sukuu n pa’ali nɛreba ban wan maala flower zɛ’ɛta se’em Ikenobo tiŋa poan. Tsuyoshi n yuun doli sukuu nɛŋadaana la poore. Sukuu la nɛŋadaana n yuun ni kena kɔa poan maala flowers zɛ’ɛta ge laɣum malena Budda malema. Ge a san ka nyaŋɛ keŋɛ kuurɛ, a ni tum la Tsuyoshi ti a keŋɛ ta eŋɛ bala. Tsuyoshi n yuun zamesɛ baŋɛ Baabule la n pa’alɛ nɛra n ni ki ana se’em la zuo, a yuun bɔkɛ ti a san kelum ita kɔa malema, a kan ta’an muse ko’om. A yuun kɔ’ɛ a puti’irɛ ti a kan le ita Budda malema la. (2 Ko. 6:​15, 16) Tsuyoshi yuun sɔsɛ a puti’irɛ n de se’em bo a kpɛ’ɛma la mɛ. Bem n yuun eŋɛ? Tsuyoshi yuun kelum tuna sukuu la poan mɛ ge a ka le ita kɔa malema. Eŋa n yuun pɔsɛ zamesa Baabule la, la paɛ wuu yuunɛ ge ti a muse ko’om.a La yele san pakɛ ti ho eŋɛ teere ho tuuma poan lan wan eŋɛ se’em ti Naayinɛ puurɛ pee, tara sakerɛ ti a wan bisa hɔ la ho deodoma.—Ym. 127:2; Mt. 6:33.

KORINTDOMA LA YUUN MUSE KO’OM MƐ

15. Bem yɛla n yuun ta’an basɛ ti la kpe’em bo Korintdoma la ti ba muse ko’om?

¹⁵ Nɛresɛba n yuun kɛ̃’ɛri diimi Korint tiŋa yuun nɔŋɛ la lɔɣebɔrɛ ge me tuna yalumtuuma. Ba zo’e zo’e yuun tuni la yelese’a ti Naayinɛ ka bɔta. Bala la, la yuun kpe’em bo nɛresɛba n boi tiŋa la poan ti ba pu’usa Yehowa. Se’em ma’a ti tuntuna Paul yuun keŋɛ Korint tiŋa ta mɔɔlɛ Krista yelesoma la, “Korint teŋa nɛreba zo’e zo’e n wom Na’ayenɛ yɛla la daa nam de mɛ ge to’e ko’om soa.” (Tm. 18:​7-11) To Daana Yezu Krista yuun niɛ la amea pa’alɛ Paul liligere poan ge yele en yeti: “Nɛreba zo’e zo’e teŋa wa poan wa dela mam nɛreba.” Bala la, Paul yuun kɔ’ɔn mɔɔla tiŋa wa poan mɛ ti la paɛ yuunɛ, la pusuka.

16. Bem yɛla n yuun soŋɛ Korintdoma basɛba ti ba basɛ ba halebe’ero la ge muse ko’om? (2 Korint 10:​4, 5)

¹⁶ Bem n yuun soŋɛ Korintdoma la ti ba ta’an muse ko’om? (Kaalɛ 2 Korint 10:​4, 5.) Naayinɛ Yelesum la, la a zilam vo’osum la n yuun soŋɛ ba ti ba ta’an tee. (Heb. 4:12) Korintdoma sɛba n yuun sakɛ bo Krista yelesoma la yuun basɛ la daambuka, nayigum la yalumtuuma n de buraasi n gã la taaba, la pɔɣesi n gã la taaba.—1 Ko. 6:​9-11.b

17. Ho wan ta’an zamesɛ la bem Korintdoma yele la poan?

¹⁷ La boi bim ti Korintdoma basɛba yuun nari ti ba eŋɛ teere zo’e zo’e ge ba yuun ka ti’isɛ ti ba kan ta’an tee dɛna Kristakɔma. Ba yuun kɔ’ɔn tiregɛ mɛ kena sarɔɔ mika la poan ta’an ta nyɛ daarewoo vom. (Mt. 7:​13, 14) Hon kɔ’ɔn tiregera mɛ ti ho tee ge ta’an muse ko’om? Da makɛ basɛ! Zusɛ Yehowa ti a bo ho a zilam vo’osum la ti la soŋɛ hɔ ti ho da tara kunkoma’asum ti ho tum be’em.

18. Monika makesonɛ la wan ta’an soŋɛ ho la wani?

¹⁸ Monika n ze’ele Georgia, yuun tiregɛ mɛ ti a basɛ yetɔɣepɔ̃’ɔsa ge me da kɛlesa bii bisera de’enseto n ka ani soŋa, la wan eŋɛ se’em ti a ta’an muse ko’om. A yeti: “Mam n yuun de bunbilipaalega la, mam yuun zusɛ Yehowa ti a bo mam paŋa ti n ta’an tee. Yehowa yuun mi ti mam boti la n eŋɛ sɛla n ani soŋa, a me yuun ni kɔ’ɔn soŋera mam mɛ ge pa’ala mam.” Monika yuun dela yuun 16 ge muse ko’om. La nari ti ho eŋɛ teere ase’a ge ta’an pu’usa Yehowa soŋa? Kɔ’ɔn zusa Yehowa ti a bo ho paŋa ti ho ta’an tee. Yehowa wan kɔ’ɔn bɔ’ɔra tɔ a zilam vo’osum la.—Yon 3:34.

HO SAKERƐ TA’AN BASƐ TI HO NYAŊƐ YELEKÃRA

19. Bem n wan ta’an soŋɛ hɔ ti ho nyaŋɛ yelekãra seto n daani hɔ? (Bisɛ foote la.)

¹⁹ Tara suure lua ti Yehowa nɔŋɛ ho mɛ ge me bɔta ti ho pa’asɛ a yizuo la poan. La ka pakɛ la yelese’a n wan ta’an basɛ ti la kpe’em bo ho ti ho muse ko’om, tɛ̃ra ti Yehowa nɔŋɛ ho mɛ. Yezu yuun yele a podɔleba la yeti: “Ho sakerɛ han pɔ’ɛ wo biileho peka la, ho ta’an yele zoore wa yeti, Vuruge kalam keŋɛ ke, te la eŋɛ. Sɛla ka boe tɔna bo ya.” (Mt. 17:20) Yezu podɔleba la n yuun wum a yetɔɣum wa yuun nari ti ba sakerɛ kpe’em pa’asɛ, se’ere n sɔi la ba yuun nan boi la en mɛ saŋa fii wa. Ge Yezu yuun basɛ ti ba tara suure lua ti ba sakerɛ san kpe’em, Yehowa wan soŋɛ ba ti ba nyaŋɛ yelekãra seto n daani ba la. Yehowa me wan soŋɛ hɔ ti ho eŋɛ bala!

20. Diimi sa, la zina beere wa Kristakɔma sɛba yele ti to sɔsɛ zaseŋɔ wa poan kpemese ho giila la wani?

²⁰ Yɛla ase’a san gu’ura hɔ ti ho kan ta’an muse ko’om, tiregɛ eŋɛ kalam nyaŋɛ yeledaaŋɔ la. Basɛ ti diimi sa, la zina beere wa Kristakɔma makesonɛ la kpemese ho giila. Basɛ ti ba makesonɛ la soŋɛ hɔ ge kpemese ho giila ti ho kã homea bo Yehowa ge muse ko’om. Ho san muse ko’om, bala dela sɛla n gani za’a!