Ti’isa Wuu Yehowa La Yezu

1-2. Ton nɔŋɛ Yehowa la pa’alɛ la bem ge Yezu yuun basɛ ti la niɛ peelumi la wani?

“NƆŊƐ Na’ayenɛ ho Yenɛ la la ho suunre zan’an, la ho sea zan’an, la ho paŋa zan’an.” (Lu. 10:27) Yezu yuun mi ti nɔbiŋere wa n de ninmu’urɛ paa Moses Lɔɔ la poan. Bala, to nɔŋɛ Yehowa mɛ la to suure za’a, la sɛla woo ti to tara. Wana dela ton boti sɛla, lan ani to se’em, ton tari to paŋa tuna se’em, la ton ti’iseri se’em. Yelemɛŋɛrɛ la dela, to kan ta’an bɔkɛ Yehowa ti’isegɔ za’a. Ge to wan ta’an bɔkɛ Naayinɛ ti’isegɔ soŋa to san mina “Krista potɛn’ɛrɛ” se’ere n sɔi la Yezu ti’iseri wuu a Sɔ la.—1 Ko. 2:16

² Yezu yuun nɔŋɛ Yehowa mɛ la a puti’irɛ za’a. A yuun mi Naayinɛ n boti a eŋɛ sɛla mɛ. La boi bim ti namesegɔ wan paɛ en ge a yuun lu a suure ti a eŋɛ la bala. Yezu n yuun kɔ’ɔn bɔta ti a tum a Sɔ puti’irɛ n de sɛla la zuo, a yuun ka basɛ ti sɛla gu en.

3. Tuntuna Peter yuun zamesɛ la bem Yezu zɛ’an ge a yuun kpemese Kristakɔma giila ti ba eŋɛ la bem? (1 Peter 4:1)

³ Peter la tuntuneba la yuun nyɛ la yɔ’ɔ naɛ la Yezu bɔna ge tɔɣesa eŋa n ti’iseri se’em la. Peter n yuun gulesɛ a gɔnseko n deŋɛ nɛŋa la, a yuun kpemese Kristakɔma la giila ti ba sɛ ze’ele kankaŋi ge tara Krista puti’irɛ.a (Kaalɛ 1 Peter 4:1.) Peter n yuun yeti “sɛ ze’ele kaŋkaŋɛ” la, a yuun pa’alɛ la soogɛpa n maasum ba zaberɛ lɔɣɔrɔ ti ba keŋɛ ta zabɛ. Bala la, Kristakɔma san ti’isa wuu Yezu la, ba wan ta’an sɛ ze’ele kankaŋi zabɛ nyaŋɛ be’em, la Sitaana tingɔŋɔ la.—2 Ko. 10:​3-5; Ep. 6:12.

4. Zaseŋɔ wa wan soŋɛ to la wani ti to dɔla Peter ka’aŋɔ la?

⁴ To wan geele Yezu n yuun ti’iseri se’em, la ton wan eŋɛ se’em tɔɣesa en. To wan zamesɛ baŋɛ ton wan eŋɛ se’em (1) tɔɣesa Yehowa n ti’iseri se’em ti la soŋɛ tɔ ti to tara nɔyinɛ, (2) siregera tomea ge me (3) zusa Yehowa ta’an tara tomea soŋa soŋa.

TƆƔESA YEHOWA N TI’ISERI SE’EM

5. Saŋa kayima, Peter yuun eŋɛ la bem pa’alɛ ti a ka ti’iseri wuu Yehowa?

⁵ Geele bisɛ saŋa kayima ti Peter yuun eŋɛ pa’alɛ ti a ka ti’iseri wuu Yehowa. Yezu yuun puɣum yele a tuntuneba la ti a wan keŋɛ Yerusalem ti pu’usegɔ nɛŋadoma la nyɔkɛ en, mɛlesɛ en ge nyaa ku en. (Mt. 16:21) Peter yuun mi ti Yezu n de Mɛzaaya la n wan faaɛ Naayinɛ nɛreba la. Bala, la yuun ta’an kpe’em bo Peter ti a sakɛ ti Yehowa wan bo yɔ’ɔ ti ba ku Yezu. (Mt. 16:16) Peter yuun tari la Yezu lebe kinkɛleŋa ta yele en yeti: “N Daana, da tɛn’ɛhe [bala,] te wana kan ta’an eŋɛ hɔ.” (Mt. 16:22) Yezu la Peter yuun ka bɔkɛ taaba yele wa poan se’ere n sɔi la Peter yuun ka ti’iseri wuu Yehowa.

6. Yezu yuun eŋɛ la wani pa’alɛ ti eŋa n ti’iseri se’em la makɛ mɛ la Yehowa n ti’iseri se’em?

⁶ Yezu n yuun ti’iseri se’em la yuun kɔ’ɔn makɛ mɛ la a saazuo Sɔ la n ti’iseri se’em. Yezu yuun yele Peter yeti: “Dima wa, zɔ mam zen’en! Ho ane wo taŋa n beeŋere mam la. Ho ka tɛn’ɛhe Na’ayenɛ potɛ’nɛrɛ n bote se’em ge la de asaala potɛn’ɛrɛ te ho tɛn’ɛha.” (Mt. 16:23) Yezu yuun mi ti la dela a namesɛ ta ki ta’an tum Yehowa puti’irɛ n boti sɛla. Daanse’ere Peter yuun tari la putɛsonɛ ge Yezu yuun zaɣesɛ a ka’aŋɔ la mɛ. Peter yuun zamesɛ baŋɛ ti la nari ti a ti’isa wuu Naayinɛ la. Tomam me wan ta’an zamesɛ sɛla yele wa poan.

7. Bem ti Peter eŋɛ pooren pa’alɛ ti a boti la a ti’isa wuu Yehowa la? (Bisɛ foote.)

⁷ Pooren, Peter yuun eŋɛ pa’alɛ ti a boti la a ti’isa wuu Yehowa la. La yuun dela Yehowa saŋa ti a basɛ ti Satima la wa’ana pa’asɛ a nɛreba poan. Naayinɛ yuun yele Peter ti a mɔɔlɛ bo Kornelius, n de satina n deŋɛ dɛna Kristabia. Yudadoma la yuun ka tari sɛla ita la Satima la. La yuun nari ti Peter tee eŋa n ti’iseri se’em la ta’an mɔɔlɛ bo Satima la. Peter n yuun baŋɛ Yehowa n geele Satima la se’em la, a yuun tee la a puti’irɛ. Bala la, Kornelius n yuun yi Peter a yire la, Peter yuun “ka zagahɛ.” (Tm. 10:​28, 29) A yuun mɔɔlɛ bo la Kornelius la a yidoma ti ba muse ko’om.—Tm. 10:​21-23, 34, 35, 44-48.

8. To wan eŋɛ la wani pa’alɛ ti ton ti’iseri se’em la makɛ mɛ la Yehowa n ti’iseri se’em la? (1 Peter 3:8)

⁸ Yuuma pooren, Peter yuun kpemese Kristakɔma la giila ti ba “tara nɔyenɛ.” (Kaalɛ 1 Peter 3:8) To wan ta’an tara nɔyinɛ la taaba to san tɔɣesa Yehowa n ti’iseri se’em ti la bɔna Baabule la poan la. Makerɛ, Yezu yuun yele a pɔdɔleba ti ba dekɛ Na’am la deŋɛ nɛŋa ba vom poan. (Mt. 6:33) Bala la, ho tansugere nɛra ta’an bɔta ti a tum sore ŋmɛ’a tuuma bii tɛm woo na’am tuuma la ase’a. Ton wan tuɣum yele ni en ti a iti la yoo la, la nari ti to kpemese a giila ge soŋɛ en ti a yalegɛ a na’am tuuma la.

SIREGERA HOMEA

9-10. Yezu yuun eŋɛ la wani pa’alɛ ti a siregeri la amea paa?

⁹ Yu’unseko ti Yezu yeti a ki la, a yuun pa’alɛ Peter la tuntuneba la sirege n mea yele n pakɛ se’em. Yezu yuun puɣum tum la Peter la Yon ti ba keŋɛ ta maasum zɛsɛka ti a wan naɛ la ba di ge nyaa ki. Yele deyima ti ba yuun nara ti ba eŋɛ dela ba ɛ lapɛrega la towel ti sɛba n yeti ba di la ta’an pee ba nama ge nyaa di. Ge ba poan ani n wan sirege amea pee sɛba n gee la nama?

¹⁰ Yezu yuun ka gu’um ge eŋɛ pa’alɛ ti a siregeri la amea. La yuun eŋɛ tuntuneba la pakerɛ la ban nyɛ Yezu n tuni yamesi tuunɛ la. Yezu yuun yɛɛ la fuseko ti a yɛ basɛ yiŋa la, dekɛ towel lu a sia, dekɛ ko’om eŋɛ lapɛrega poan, nyaa pee ba nama. (Yon 13:​4, 5) Yezu yuun pee la tuntuneba 12 la nama. Wana ta’an dekɛ saŋa zo’e mɛ. Hali a yuun laɣum pee Yudas n yeti a dɔ̃rɛ en la nama mɛ. Ge Yezu yuun sirege la amea tum tuunɛ wa ba’asɛ. Yezu yuun di’ise la suure ge nyaa yeti: “Ya bɔkɛ sɛla te n kɔ’ɔn eŋɛ bo ya wa? Ya yi’ire mam te Pa’ala, la Daana. La me ane soŋa te ya yi’ira mam bala. Se’ere n sɔe la, n dela bala. Mam se’em n de ya Daana, la ya pa’ala nan kɔ’ɔn pee la ya natala bo ya mɛ wa. Dene poan, yamam me sontii ya soŋora taaba wo ya peere la taaba natala la.”—Yon 13:​12-14.

11. Peter yuun eŋɛ la bem pa’alɛ ti a siregeri la amea? (1 Peter 5:5) (Bisɛ foote la.)

¹¹ Peter yuun tɔɣesɛ la Yezu sirege n mea la. Yezu n yuun keŋɛ saazuo la, Peter yuun tibɛ la buraa ti ba dɔɣɛ en ti a dɛna kɔɔreŋɔ. (Tm. 1:​8, 9; 3:​2, 6-8) Nɛreba zo’e zo’e yuun nyɛ a yelekirega la mɛ ge paɛ a zɛ’an. (Tm. 3:11) La boi bim ti Peter yuun ze’ele la zɛ’an ti nɛreba nɔŋɛ ba na’asa ba ge Peter yuun ka sakɛ ti nɛreba la na’asɛ en. A yuun tuɣum sirege la amea ge yele nɛreba la ti ba pɛ̃ɣɛ Yehowa la Yezu. A yuun yeti: “La dela [Yezu] paŋa zuo te kɔɔrɔŋɔ wa te ya nyɛ ge mina wa ban’an wa bahɛ ge te a le tara paŋa wa.” (Tm. 3:​12-16) Gɔnseko ti Peter yuun gulesɛ bo Kristakɔma tɔɣera sirege n mea yele la tiɛ to la Yezu n yuun dekɛ towel lu a sia ge pee a tuntuneba la nama la.—Kaalɛ 1 Peter 5:5.

12. To wan eŋɛ la wani kɔ’ɔn siregera tomea wuu Peter la?

¹² To wan tɔɣesa Peter ge kɔ’ɔn siregera tomea. Tɛ̃ra ti sirege n mea yeen daɣena la nɔɔrɛ yetɔɣum. Yelesum la ti Peter lerege dɛ ti “sirege n mea” la pa’alɛ la ton biseri nyɛta tomea se’em ge me gɛɛla nɛreba se’em. To iti la som bɔ’ɔra nɛreba se’ere n sɔi la to nɔŋɛ la Yehowa la nɛreba ge daɣɛ la to boti la ba pɛ̃ɣɛ tɔ. To iti pa’ala ti to siregeri la tomea to san tuna bɔ’ɔra Yehowa la nɛreba hali nɛreba san puɣum ka pɛ̃ɣɛ tɔ.—Mt. 6:​1-4.

“TARA YA MƐHE SOŊA SOŊA”

13. To “tara [to] mɛhe soŋa soŋa” vuurɛ?

¹³ To “tara [to] mɛhe soŋa soŋa” vuurɛ? (1 Pe. 4:7) To san tara tomea soŋa soŋa, to san yeti to kɔ’ɛ puti’irɛ to wan bisɛ Yehowa puti’irɛ n de se’em yele la poan. To wan tɛ̃ra ti sɛla ka boi n pakɛ to vom poan gana tomam la Yehowa bɔŋa la. To kan zɛ̃kera tomea ge to wan tɛ̃ra ti daɣɛ sɛla woo ti to mina. To wan zusa Yehowa saŋa woo ti la pa’alɛ ti to dekɛ tomea delum en mɛ.b

14. Saŋa busebo, Peter yuun eŋɛ la bem pa’alɛ ti a ka dekɛ amea delum Yehowa?

¹⁴ Yu’unseko ti Yezu yeti a ki la, a yuun kaɣɛ a podɔleba la ti: “Yu’uŋ kona wa, ya zan’an wan zɔ yeregɛ mam zuo.” Peter yuun dekɛ la sukpe’ene lebese yeti: “Ba zan’an han ta zɔ ho zuo, mam kan malom zɔ.” Yu’unkuŋɔ Yezu yuun ka’am a podɔleba la yeti: “Da ginhi ya ge soha Yenɛ te ya da lu pa’ahegɔ poan.” (Mt. 26:​31, 33, 41) Peter yuun san kelese ka’aŋɔ wa, a wan nyɛ ni sukpe’ene tɔɣɛ yeti eŋa dela Yezu tuntuna. Ge Peter yuun tuɣum yeti eŋa ka mi Yezu, wana yuun basɛ ti a suure sa’am mɛ.—Mt. 26:​69-75.

15. Yezu yuun tari amea soŋa la wani yu’unseko ti a yeti a ki la?

¹⁵ Yezu yuun kɔ’ɔn dekɛ la amea delum Yehowa. La boi bim ti a yuun ani la kasi ge a yuun kɔ’ɔn zusa mɛ. Bala yuun bo en la sukpe’ene ti a ta’an tum Yehowa puti’irɛ n boti sɛla. (Mt. 26:​39, 42, 44; Yon 18:​4, 5) Peter yuun ka tamɛ ti Yezu yuun kɔ’ɔn zusa mɛ yu’unseko ti a yeti a ki la.

16. Peter yuun eŋɛ la bem pa’alɛ ti a tari amea soŋa? (1 Peter 4:7)

¹⁶ Pooren, Peter yuun baŋɛ ti la nari ti a kɔ’ɔn dekɛ amea delum Yehowa ge zusa en. Yezu n yuun isige kum poan la, a yuun yele Peter la tuntuneba la ti a wan bo ba zilam vo’osum la ti ba ta’an mɔɔlɛ yelesoma la. Ge Yezu yuun yele ba ti ba gura Yerusalem tiŋa poan ta paɛ se’em ma’a ti a wan dekɛ zilam vo’osum la bo ba. (Lu. 24:49; Tm 1:​4, 5) Peter yuun iti la bem ge gura? Peter la mabiisi la yuun ‘kɔ’ɔn zusa’ mɛ. (Tm. 1:​13, 14) Pooren, Peter gɔnseko n deŋɛ nɛŋa la poan, a yuun kpemese mabiisi la giila ti ba tara bamea soŋa soŋa ge zusa Yehowa. (Kaalɛ 1 Peter 4:7.) Peter yuun nyaa dekɛ amea delum la Yehowa ta’an kpɛmesa mabiisi la giila.—Ga. 2:9.

17. To san puɣum ti’isa ti to wan ta’an tum tuunɛ, bem n nari ti to kɔ’ɔn ita? (Bisɛ foote la.)

¹⁷ To san wan ta’an tara tomea soŋa, la nari ti to zusa Yehowa saŋa woo. Hali to san puɣum ti’isa ti to wan ta’an tum tuunɛ, to nari ti to kɔ’ɔn zusa Yehowa saŋa woo. Bala la, to san yeti to kɔ’ɛ puti’irɛ, to wan zusɛ Yehowa ti a soŋɛ tɔ ge mina ti eŋa n mi sɛla n ani soŋa bɔ’ɔra tɔ.

18. To wan eŋɛ la wani ta’an ti’isa wuu Yehowa la?

¹⁸ To puurɛ pee mɛ la Yehowa n basɛ ti to ta’an tɔɣesa a hala la. (Pin. 1:26) Yelemɛŋɛrɛ, to kan ta’an tɔɣesa Yehowa nima nima. (Isa. 55:9) Ge wuu Peter la, to boti la to kɔ’ɔn ti’isa wuu Yehowa la, siregera tomea ge me tara tomea soŋa soŋa.