To Wan Ta’an Zamesɛ La Bem Yezu Ki’i Dabesa Pinaasi La Poan?

1-2. Se’em ma’a ti Yezu podɔleba bayi yuun yɛ’ɛsa Emmaus la, bem n yuun eŋɛ?

NISAN 16, 33 Y.B. poan ti Yezu podɔleba la suure yuun sa’am ti dabeem me tara ba. A podɔleba bayi n yuun ze’ele Yerusalem yɛ’ɛsa Emmaus. Ze’ele Yerusalem yɛ’ɛsa Emmaus dela mɛɛla 7. Ba giila n yuun kɔ’ɔsɛ se’ere n sɔi la, ba ku la Yezu, se’em ti ba yuun dɔla en la. Podɔleba la yuun tari la puti’irɛ ti Yezu wan tum yelekirisi zo’e zo’e soŋɛ Yudadoma la ge nimbaalega la dela, ba yuun ku en mɛ. Sɛla n yuun nyaa eŋɛ ti la eŋɛ ba pakerɛ.

² Buraa ayima n yuun paɛ ba zɛ’an naɛ la ba kena. Podɔleba la yuun yele buraa wa la sɛla n yuun paɛ Yezu. Ge buraa la yuun pɔsɛ yɛta ba la yelese’a ti ba kan makɛ tamɛ. “A pɔhɛ la gɔŋseto te Moses golehɛ la tara tara la nɔtɔgɔheba n me golehɛ gɔŋseto la” pa’ala ba sɛla n sɔi ti la yuun nara ti Mɛzaaya la namesɛ ge ki. Ban ta paɛ Emmaus la ti ba nyaa baŋɛ ti buraa wa dela Yezu n yuun isige kum poan la! Bisɛ podɔleba bayi wa puurɛ n wan pee se’em la ban yuun baŋɛ ti Yezu nyaa vɔi me la!—Lu. 24:​13-35.

3-4. Bem n yuun paɛ Yezu podɔleba la ge to wan zamesɛ la bem zaseŋɔ wa poan? (Tooma 1:3)

³ Yezu yuun niɛ amea pa’alɛ a podɔleba la sugumnɔɔrɛ zo’e zo’e, a ki’i dabesa pinaasi la poan. (Kaalɛ Tooma 1:3.) Yezu yuun kpemese a podɔleba la giila mɛ ti ba le tara pupeelum. Bala yuun soŋɛ podɔleba la mɛ ti ba tara pupeelum pa’ala nɛreba na’am yelesoma la, la sukpe’ene.a

⁴ To san zamesɛ baŋɛ Yezu n yuun eŋɛ sɛla a ki’i dabesa pinaasi la poan, to wan nyɛ nyuurɔ zo’e zo’e. Zaseŋɔ wa poan, to wan baŋɛ Yezu n yuun (1) kpemese a podɔleba la giila se’em, (2) eŋa n yuun soŋɛ ba ti ba ta’an bɔkɛ Gulesegɔ la vuurɛ se’em, la (3) eŋa n yuun kumesɛ ba se’em ti ba ta’an tum ba zugbere tuuma beere sa’am. Yele ana woo poan, to wan baŋɛ tomam me n wan eŋɛ se’em ta’an tɔɣesa Yezu makesonɛ la.

KPƐMESA NƐREBA GIILA

5. Beni n sɔi ti Yezu podɔleba la yuun nara giilekpeŋere?

⁵ Yezu podɔleba la yuun eeri la giilekpeŋere. Bem zuo? Basɛba yuun basɛ la ba yɛa, ba deodoma, la ba tuuma ge dɔla Yezu saŋa woo. (Mt. 19:27) Nɛreba yuun geele podɔleba basɛba ti ba dela bunbasela, ban doli Yezu la zuo. (Yon 9:22) Ban yuun sakɛ ti Yezu n de Mɛzaaya la n sɔi ti nɛreba yuun ita ba bala. (Mt. 16:16) Ge Yezu n yuun ki la, ba suure yuun sa’am mɛ ti ba giila kɔ’ɔsɛ se’ere n sɔi la, ba yuun ka mi sɛla n wan le paɛ ba.

6. Yezu yuun eŋɛ la bem eŋa n yuun isige kum poan la?

⁶ Yezu yuun ka yeti a podɔleba la ka tari sakerɛ la ba suure n sa’am la. A yuun bɔkɛ ba mɛ. Bala la, eŋa n yuun isige kum poan la, a yuun kɔ’ɔn pɔsɛ kpɛmesa la a zɔdoma wa giila. Makerɛ, a yuun niɛ amea pa’alɛ Mary Magdalene n yuun boi a yɔɔ la zɛ’an kɛla la mɛ. (Yon 20:​11, 16) A me yuun le niɛ amea pa’alɛ a podɔleba bayi la n yuun ye’esi Emmaus tiŋa la mɛ ge me yuun niɛ amea pa’alɛ tuntuna Peter. (Lu. 24:34) To wan ta’an zamesɛ la bem Yezu makesonɛ wa poan? To geele ya sɛla n yuun eŋɛ, eŋa n yuun niɛ amea pa’alɛ Mary Magdalene la.

7. Yezu yuun nyɛ Mary ti a ita la bem ge bem ti a yuun eŋɛ bo en? (Yon 20:​11-16) (Bisɛ foote la.)

⁷ Kaalɛ Yon 20:​11-16. Nisan 16 bulika ti pɔɣesi basɛba yuun keŋɛ ban laɛ Yezu zɛ’an la. (Lu. 24:​1, 10) Ayima yuun dela Mary Magdalene. Eŋa n yuun paɛ ban laɛ Yezu zɛ’an la, yɔɔ la yuun dela voore. A yuun zɔ keŋɛ ta yele la Peter la Yon, ti buraasi siyi wa zɔta yɛ’ɛsa yɔɔ la zɛ’an ti Mary me taɛ ba poore. Ban yuun nyɛ ti Yezu inya la sirum ka boi yɔɔ la poan la, ba yuun lebe kule mɛ. Ge Mary yuun yee mɛ ge kɛla. A yuun ka mi ti Yezu ze bilam mɛ bisa en. Yezu yuun baŋɛ ti eŋa n ki la zuo ti Mary kaasa. A yuun boti la a buɣelɛ a suure. Bala la, Yezu yuun niɛ amea pa’alɛ Mary mɛ ge eŋɛ sɛla ti la buɣelɛ a suure. A yuun tɔɣɛ bo en mɛ ge bo en tuunɛ. A yuun yele en ti a keŋɛ ta yele a suurɔ la ti eŋa isige kum poan.—Yon 20:​17, 18.

8. To wan ta’an tɔɣesa Yezu la wani?

⁸ To wan ta’an tɔɣesa Yezu la wani? To wan ta’an kpɛmesa to mabiisi giila ti ba kɔ’ɔn pu’usa Yehowa. Wuu Yezu la, to mabiisi la san tɔɣera yelese’a n daani ba, la nari ti to kɛlesa. To bɔkɛ lan ani ba se’em ge buɣelɛ ba suure. To geele ya mabipɔka Jocelyn yele la bisɛ. A yibega yuun nyɛ la accident ki. A yuun yeti: “Ŋmaresi zo’e zo’e poan, mam suure n yuun ba’ɛ sa’am.” Sankaŋa ti mabia la a pɔɣa beem en ti a wa’an ba yire na. Ba yuun bo en la yɔ’ɔ ti a tɔɣɛ lan ani en se’em ge me ma’ɛ bamea kelese en soŋa soŋa. Ba yuun soŋɛ en mɛ ge basɛ ti a baŋɛ ti Yehowa nɔŋɛ en mɛ. Jocelyn yeti: “La yuun ani mam wuu mam lui la ateko poan ti la ana gbareti, ti Yehowa basɛ ti mabia wa la a pɔɣa faaɛ mam basɛ. Ba yuun soŋɛ mam mɛ.” Tomam me san kɛlesa soŋa soŋa, to wan ta’an kpemese nɛreba giila. To me wan ta’an buɣelɛ ba suure ge soŋɛ ba ti ba kɔ’ɔn pu’usa Yehowa.—Arom 12:15.

SOŊƐ NƐREBA TI BA BƆKƐ NAAYINƐ YELESUM LA

9. Yezu podɔleba la yuun ka bɔkɛ la bem ge a yuun soŋɛ ba la wani?

⁹ Yezu podɔleba la yuun sakɛ bo Naayinɛ Yelesum la mɛ ge dɔla ku pa’alegɔ. (Yon 17:6) Ge ba yuun kelum ka bɔkɛ sɛla n sɔi ti ba yuun ku Yezu wuu a dela tuunfɛ’ɛsadaana. Yezu yuun mi ti a podɔleba la nɔŋɛ Yehowa mɛ ge me tara sakerɛ. Ge sɛla n yuun gee dela ba bɔkɛ Gulesegɔ la soŋa soŋa. (Lu. 9:​44, 45; Yon 20:9) Bala la, a yuun pa’alɛ ba Gulesegɔ la vuurɛ mɛ. To geele ya Yezu n yuun soŋɛ a podɔleba bayi la n yuun ye’esi Emmaus tiŋa la ti ba bɔkɛ Gulesegɔ la vuurɛ se’em.

10. Sodeni poan ti Yezu yuun soŋɛ a podɔleba la ti ba bɔkɛ ti eŋa n de Mɛzaaya la? (Luke 24:​18-27)

¹⁰ Kaalɛ Luke 24:​18-27. Tɛ̃ra ti Yezu yuun ka basɛ ti buraasi la baŋɛ ti eŋa n bala bilam bilam. A yuun tuɣum soke ba la yɛla. Beni n sɔi? La ta’an dɛna ti a yuun boti la a baŋɛ sɛla n boi ba suuren. Ba me yuun eŋɛ la bala. Ba yuun yele en yeti, bamam ti’isɛ ti Yezu n wan dɛna Israel Naba ge faaɛ ba Aromdoma la nu’usin basɛ. Buraasi la n yuun tɔɣɛ lan ani ba se’em za’a ba’asɛ la, Yezu yuun nyaa basɛ ti ba bɔkɛ ti yelese’a ti Naayinɛ basɛ ti nɔdɛ’ɛseba la tɔɣɛ biŋe la zo’e zo’e puɣum tum tuuma mɛ.b Daandindaarɛ zaanɔɔrɛ, Yezu yuun le niɛ amea pa’alɛ a podɔleba la basɛba mɛ ge pa’alɛ ba yetɔɣebiŋ’a wa vuurɛ. (Lu. 24:​33-48) To wan ta’an zamesɛ la bem yele wa poan?

11-12. (a) To wan ta’an zamesɛ la bem la Yezu n yuun doose sarɔsɛka poan pa’ala nɛreba yelemɛŋɛrɛ la? (Bisɛ fɔɔra la.) (b) Sodeni poan ti Nortey Baabule pa’alegɔdaana la yuun soŋɛ en?

¹¹ To wan ta’an tɔɣesa Yezu la wani? Yia, ho san zamesa la nɛra, ni soke en sokese’a n wan basɛ ti a tɔɣɛ lan ani en se’em. (Mag. 20:5) Ho san baŋɛ lan ani en se’em, ho nyaa ta’an pa’alɛ en Baabule gulesegɔ se’a n wan soŋɛ en. Basɛ ti amea pa’alɛ eŋa n nari ti a eŋɛ sɛla. Soke en sokese’a n wan soŋɛ en ti a ta’an ti’isɛ eŋa n kaalɛ sɛla la, la eŋa n wan tara de tuna tuuma se’em. To geele ya mabia n boi Ghana ti a yu’urɛ dɛna Nortey yele la bisɛ.

¹² Nortey yuun dela yuun 16 ge pɔsɛ zamesa Baabule la. La yuun ka yue ti a yidoma yuun pɔsɛ giisera en. Bem n yuun soŋɛ en ti a kelum zamesa Baabule la. Mabia la n zameseri en la yuun te’ele dekɛ la Matu a zuo 10 soŋɛ en ti a baŋɛ ti yaarɛ wan paɛ yelemɛŋɛrɛ Kristakɔma. Nortey yeti: “Yaarɛ la n yuun ta pɔsɛ la, bilam ti mam sakɛ ti mam nyɛ yelemɛŋɛrɛ la mɛ.” A Baabule pa’alegɔdaana la yuun le kaalɛ la Matu 10:16 bo en. Bilam yeti to ta’an lɔɣesa tomea. A yuun pa’alɛ kaalegɔ zɛ’an wa n wan soŋɛ Nortey se’em ti a doose gilema sore poan tɔɣɛ a sakerɛ yɛla bo a yidoma. Nortey n yuun ta muse ko’om ba’asɛ la, a yuun boti la a dɛna sore ŋmɛ’adaana ge a sɔ yuun boti la a keŋɛ university. A Baabule pa’alegɔdaana la yuun ka loe bo en. A yuun dekɛ la Baabule naresum yɛla soŋɛ Nortey ti a baŋɛ eŋa n wan kɔ’ɛ a puti’irɛ se’em. Bem n yuun eŋɛ? Nortey mea yuun kɔ’ɛ a puti’irɛ ti a tum la sore ŋmɛ’a tuuma la. A sɔ yuun saɛ en mɛ ti a yese a yire. Nortey geele a loore wa la wani? A yeti: “Mam yuun loe la loesonɛ.” To san soŋɛ nɛreba, ti ba ti’isa taɣesa Gulesegɔ la yele, la wan soŋɛ ba ti ba tara sakerɛ n kpe’em pu’usa Yehowa.—Ep. 3:​16-19.

SOŊƐ MABIBURAASI TI BA KUMESƐ TA’AN TUNA TANSUGERE LA POAN

13. Yezu yuun eŋɛ la wani ti Na’am mɔɔlegɔ tuuma la kelum tɔla nɛŋa, se’em ma’a ti a yuun lebe saazuo la? (Epesus 4:8)

¹³ Yezu n yuun boi tiŋa wa zuo la, a yuun kɔ’ɔn tuna dɔla la a Sɔ n pa’alɛ en se’em la. (Yon 17:4) Ge Yezu yuun ka ti’isɛ ti eŋa ma’a wan ta’an tum sɛla ti Yehowa bɔta ti a tum la. Yezu yuun dekɛ la yuuma atã la girego tum na’am mɔɔlegɔ tuuma la ge me kumesɛ nɛreba ti ba ta’an tuna bala. Yezu yuun nam a podɔleba la mɛ ge bo ba tuunɛ ti ba mɔɔla yelesoma la, pa’ala ge me bisera Yehowa nɛreba. La boi bim ti basɛba ta’an dɛna yuun 20 bɔba ge a yuun loe ba mɛ ti ba bɔna nɛŋa pa’ala ban wan tuna tuunɛ wa se’em. (Kaalɛ Epesus 4:8.) Lan yuun gee dabesa pinaasi la Yezu ki la, a yuun eŋɛ la wani kumesɛ a yelemɛŋɛrɛ podɔleba wa ti ba pee puurɛ tuna, ta’an dɛna “bo’olom” bɔ’ɔra nɛreba?

14. Yezu yuun pa’alɛ a podɔleba la bem a ki’i dabesa pinaasi la poan? (Bisɛ foote la.)

¹⁴ Yezu yuun ni doose la nɔŋerɛ sore poan ka’am a podɔleba la. Makerɛ, podɔleba la basɛba yuun tari la puti’irɛ ayi ayi, ka sakɛ ti Yezu ki mɛ ge sirum isige. Yezu yuun ka’am ba mɛ ti ba baŋɛ yelemɛŋɛrɛ la. (Lu. 24:​25-27; Yon 20:27) A yuun ka’am ba ti ba tuɣum mu’ɛ nini bisera Yehowa nɛreba ge basɛ ligebɔrɛ. (Yon 21:15) A yuun tiɛ ba ti ba da tara ban tã ita sɛla tansugere la poan la makera la basɛba me n iti sɛla. (Yon 21:​20-22) A yuun pa’alɛ ba ti ba bɔkɛ yelese’a ti ba ka bɔkɛ la ge soŋɛ ba ti ba tuɣum mu’ɛ nini mɔɔla yelesoma la. (Tm. 1:​6-8) Keendoma wan ta’an zamesɛ la bem Yezu zɛ’an?

15-16. (a) Sarɔɔ ani poan ti keendoma wan ta’an tɔɣesa Yezu? (b) Patrick yuun nyɛ nyuurɔ la wani ka’aŋɔ poan?

¹⁵ Keendoma wan ta’an tɔɣesa Yezu la wani? La nari ti ba kumesɛ mabiburaasi, la bunbilipaalesi ti ba ta’an tuna tansugere la poan.c Keendoma nari ti ba bɔkɛ ti mabiburaasi wa kan ta’an zamesɛ sɛla woo buyina. Keendoma nari ti ba doose nɔŋerɛ sore poan ka’ana ba ti ba mina ban wan siregera bamea se’em, tara sakerɛ ge me pee puurɛ soŋera mabiisi.—1 Tim. 3:1; 2 Tim. 2:2; 1 Pe. 5:5.

¹⁶ To geele ya mabia ayima yu’urɛ n de Patrick n yuun nyɛ nyuurɔ se’em ka’aŋɔ poan. Eŋa n yuun de bunbilipaalega la, a yuun san tɔɣera, a ni kɔ’ɔn nyabera mɛ ge ita nɛreba sɛla n ka ani soŋa, hali la pɔɣesi. Keema ayima yuun baŋɛ ti Patrick nari ti a tee. Bala la, a yuun ka’am en mɛ yɛm sore poan ge ka suɣɛ yelemɛŋɛrɛ la n de sɛla. Patrick yeti: “Mam puurɛ pee mɛ la eŋa n yuun ka’am mam la. La yuun ni daana mam mɛ, nɛra san nyɛ yɔ’ɔ seko ti mam bɔta tansugere la poan la. Ge mabia la ka’aŋɔ la yuun soŋɛ mam ti mam baŋɛ ti la nari ti n mu’ɛ nini ge sirege n mea tuna bɔ’ɔra mabiisi. La ka nari ti n bisa yɔ’ɔ seko ti n wan nyɛ tansugere la poan.” Patrick n yuun tiregɛ eŋɛ bala la, se’em ma’a ti a yuun dɛna yuun 23 la, a yuun nyɛ yɔ’ɔ mɛ dɛna keema.—Mag. 27:9.

17. Yezu yuun eŋɛ la wani pa’alɛ ti a nam a podɔleba la mɛ?

¹⁷ Yezu yuun bo a podɔleba la tuunɛ ti ba mɔɔlɛ yelesoma la ge me pa’ala Gulesegɔ la vuurɛ. A podɔleba la yuun ta’an ti’isa ti bamam kan nyaŋɛ tum tuunɛ wa ti Yezu dekɛ bo ba la. Ge Yezu yuun mi ti ba wan ta’an tum tuunɛ la soŋa. A yuun yele ba ti: “Wo n Sɔ la n tom mam na la, bala me te mam me tom ya.”—Yon 20:21.

18. Tansugere keendoma wan ta’an tɔɣesa Yezu la wani?

¹⁸ Keendoma wan ta’an tɔɣesa Yezu la wani? Keendoma la ni dekɛ la tuuma ase’a bo nɛreba basɛba ti la kumesɛ ba. (Flp. 2:​19-22) Makerɛ, ba ta’an yele bunbilipaalega ti a soŋɛ ti ba laɣum maalɛ Na’am Pu’usegɔ Deo la. Keendoma ta’an dekɛ tuuma bo mabiburaasi, pa’alɛ ba ban wan tum de se’em ge nyaa basɛ tuunɛ la bo ba ti ba tum, ti la pa’alɛ ti ba bisɛ nam ba mɛ. Mabia n de keema ti la ka yue yu’urɛ n de Matthew yeti, eŋa puurɛ pee mɛ la keendoma la n kumesɛ eŋa, bo en tuunɛ ge tara sakerɛ ti a wan nyaŋɛ tum de soŋa la. A yeti, “Mam san ni tum tue, ba ni ka zɛregɛ mam. Ge ba ni tuɣum soŋɛ mam mɛ ti mam mina mam wan tum tuunɛ la se’em soŋa soŋa.”d

19. La nari ti to lu suure ita la bem?

¹⁹ Yezu ki’i dabesa pinaasi la poan la, a yuun kpemese a podɔleba la giila mɛ, pa’alɛ ba ge me kumesɛ ba. Bala la, basɛ ya ti to lu to suure kɔ’ɔn tɔɣesa Yezu makesonɛ la. (1 Pe. 2:21) A wan soŋɛ tɔ ti to ta’an eŋɛ bala. A pu’ulum biŋe ti: “N wan seren bɔna la ya daarɛ woo gura teŋa wa ba’ahegɔ.”—Mt. 28:20.