Eŋɛ Pa’alɛ Ti Ho Puurɛ Pee Mɛ La Burase’esi Ti Yehowa La Yezu Tara Ba Tuna Tigere La Poan La

1. Yezu eŋɛ la bem bo nɛresaaleba?

ASAALA ka boi n tabelɛ soŋɛ nɛreba gaŋɛ Yezu. Yezu n yuun boi tiŋa wa zuo la, a yuun doose la yelekiriga sore poan soŋɛ nɛreba. (Lu. 9:​12-17) A yuun dekɛ la bo’olum n gaŋɛ za’a n de a nyɔvore la kaabɛ bo to. (Yon 15:13) Yezu kum isigere pooren, a yuun kelum soŋera la nɛreba. Wuu eŋa n yuun biŋe nɔɔrɛ se’em la, a yuun yele Yehowa ti a dekɛ a zilam vo’osum la pa’ala tɔ ge buɣela to suure. (Yon 14:​16, 17; 16:13) Yezu doli la tansugere zamesegɔ poan kumesa tɔ ti to ta’an ɛɛra podɔleba tinparɛ wa zɛ’an woo.—Mt. 28:​18-20.

2. Bani n laɣum pa’asɛ buraasi n de “bo’olom” la poan ti Epesus 4:​7, 8 tɔɣɛ ba yele la?

² Geele bisɛ bo’olum ayima ti Yezu le dekɛ bo to. Tuntuna Paul yuun gulesɛ yeti, Yezu n yuun zom saazuo la, a yuun dekɛ la buraasi bo to ti ba dɛna “bo’olom.” (Kaalɛ Epesus 4:​7, 8.) Paul yuun tɔɣɛ pa’alɛ ti Yezu yuun dekɛ bo’olum wa bo to mɛ ti ba soŋera tigere la sarɔtɔ zo’e zo’e poan. (Ep. 1:​22, 23; 4:​11-13) Zina beere wa, keendoma soŋeredoma, keendoma, la gingilega kaarɛ bisegadoma laɣum pa’asɛ buraasi n de “bo’olum” wa poan mɛ.a Yelemɛŋɛrɛ, buraasi wa n ka di mi’a la zuo, ba tuuri mɛ. (Yam. 3:2) Ge to Daana Yezu Krista tari la buraasi wa soŋera tɔ.

3. Tɔɣɛ pa’alɛ ton wan eŋɛ se’em laɣum soŋɛ buraasi n de “bo’olom” la ti ba tuna ba tuuma la.

³ Yezu basɛ ti buraasi n de “bo’olom” wa kpɛmesa la mabiisi la giila. (Ep. 4:12) Ge to za’a ta’an soŋɛ ti ba tum ninmu’urɛ tuunɛ wa. Makerɛ: Tosɛba soŋeri mɛ ti ba mɛta Na’am Pu’usegɔ Deto. Ti basɛba me soŋera duɣera dia bɔ’ɔra tuntuneba la, da’ara lɔɣɔrɔ bɔ’ɔra ba, la yɛla ase’a. To me wan ta’an soŋɛ keendoma soŋeredoma, keendoma, la gingilega kaarɛ bisegadoma to yetɔɣum, la to itigɔ poan. Basɛ ya ti to bisɛ ton nyɛti nyuurɔ se’em ba tuunkpe’eŋo la poan. To me wan bisɛ ton wan eŋɛ se’em pa’alɛ bamam, la Yezu n dekɛ ba bo to la, ti to puurɛ pee ya.

KEENDOMA SOŊEREDOMA “SOŊERI LA NƐREBA”

4. Yuun kɔbesɛka n deŋɛ nɛŋa la, keendoma soŋeredoma yuun soŋeri nɛreba la wani?

⁴ Yuun kɔbesɛka n deŋɛ nɛŋa la, ba yuun loe la buraasi basɛba ti ba dɛna keendoma soŋeredoma. (1 Tim. 3:8) La ani wuu bamam ti Paul yuun tɔɣɛ ba yele ti ba “soŋeri la nɛreba” la. (1 Ko. 12:28) La niɛ peelumi ti keendoma soŋeredoma yuun tuni la yɛla ase’a n pakɛ paa tansugere la poan, la wan eŋɛ se’em ti keendoma la nyɛta nɛŋa pa’ala ge kaara mabiisi la bisa. Makerɛ, keendoma soŋeredoma yuun ta’an soŋɛ mɛ ti ba malum gulesɛ Naayinɛ Yelesum la bɔba ase’a bo nɛreba bii ba ɛ lɔɣɔse’a ti ba wan dekɛ gulesɛ.

5. Bem tuunɛ ti keendoma soŋeredoma tuna soŋera nɛreba?

⁵ Ti’isɛ bisɛ keendoma soŋeredoma n soŋeri nɛreba se’em ho tansugere la poan. (1 Pe. 4:10) Ba ta’an ni basɛ ti ba bisera ligeri yɛla bii zɛse’esi ti ba wan mɔɔla, bisera gɔnɔ, bisera kɔ̃a la vidiyo yɛla, tɔ’ɔsa nɛreba zamesegɔ poan bii ba soŋera maala Na’am Pu’usegɔ Deo la. Tuun ana za’a soŋeri mɛ ti yɛla kena ma’a ma’a tansugere la poan. (1 Ko. 14:40) Leyɛ’ɛsa, keendoma soŋeredoma basɛba nyɛti tuuma mɛ Vom La Na’am Tuuma Zamesegɔ poan ge me bɔ’ɔra yetɔɣum. Ba me ta’an loe keendoma soŋeredaana ti a soŋera gurup bisegadaana la. Saŋa ase’a, keendoma soŋeredaana n kumesɛ paa ni doose la keema ti ba ta kaɛ mabiisi la bisɛ.

6. Beni n sɔi ti hon puurɛ pee la keendoma soŋeredoma n ãregeri bamea tuna se’em la?

⁶ Keendoma soŋeredoma n tuni tuunse’a la soŋeri tansugere la wani? Beberlyb n de mabipɔka n ze’ele Bolivia yeti: “Mam puurɛ pee mɛ la keendoma soŋeredoma la se’ere n sɔi la, ba basɛ ti to nyɛta la nyuurɔ tansugere zamesegɔ poan. Ban tuni tuunse’a la zuo, mam ta’an yuuna, bɔ’ɔra lebesego, kɛlesa yetɔɣum ge bisera vidiyo la fɔɔra. Bamam n ni bisa ti dɛŋa ka paara mabiisi zamesegɔ poan ge me soŋera sɛba n boi videoconference poan la. Zamesegɔ la san ba’asɛ, bamam n ni deŋɛ nɛŋa pɔsɛ duusa, bisera ligeri yɛla ge me bisɛ ti mabiisi la wan nyɛ gɔnseto n nari ti ba tara. Mam puurɛ pee mɛ la ba!” Leslie n boi Colombia ti a sira dɛna tansugere keema me yeti: “Keendoma soŋeredoma la n soŋeri mam sira ti a tuna tuuma ase’a. Ba san ka boi ni, a puɣum kan tara nɛŋa. Bala la, mam puurɛ pee mɛ la ban ãregeri bamea soŋera se’em la.” Nɔkpe’ene kai ti to za’a puurɛ pee mɛ la keendoma soŋeredoma n tuni se’em la.—1 Tim. 3:13.

7. To wan eŋɛ la wani pa’alɛ ti to puurɛ pee mɛ la keendoma soŋeredoma? (Bisɛ foote la.)

⁷ La boi bim ti to puurɛ ta’an pee la keendoma soŋeredoma la ge Baabule la kpemese to giila ti to ni eŋɛ pa’alɛ ti to puurɛ pee mɛ la ba. La yeti: “Bo [ya] fara.” (Kol. 3:15) Kristofer n de keema bɔna Finland ni eŋɛ la wana pa’alɛ ti a puurɛ pee mɛ la ba. A yeti, “Mam ni gulesɛ la gɔŋɔ bii n tɛɣesɛ Baabule gulesegɔ bo keendoma soŋeredaana la ge me pa’alɛ en sore wana mɔpi poan ti a kpemese mam giila bii sɛla n sɔi ti mam puurɛ pee la a tuuma la.” Pascal la Jael n boi New Caledonia ni zusɛ mɛ bo keendoma soŋeredoma. Pascal yeti, “Dabesa ana wa, to ni zusɛ bo la keendoma soŋeredoma la, pu’usɛ Yehowa la eŋa n dekɛ ba bo to la ge me ni zusɛ ti a bɔna la ba ge soŋera ba.” Yehowa keleseri zusega ana wa mɛ, bala me basɛ ti mabiisi la nyɛta la nyuurɔ.—2 Ko. 1:11.

KEENDOMA N MU’Ɛ NINI “TONA LA YA”

8. Beni n sɔi ti Paul yuun yeti yuun kɔbesɛka n deŋɛ nɛŋa keendoma la yuun mu’ɛ la nini tuna? (1 Tesalonika 5:​12, 13)

⁸ Keendoma n yuun boi yuun kɔbesɛka n deŋɛ nɛŋa la yuun mu’ɛ la nini tuna soŋera tansugere la. (Kaalɛ 1 Tesalonika 5:​12, 13; 1 Tim. 5:17) Bamam n yuun boi tansugere la nɛŋan pa’ala ge me ni kɔ’ɛ puti’irɛ tum tuunɛ. Ba me yuun ni doose la nɔŋerɛ sore poan ka’am mabiisi la ti ba ta’an ze’a kankaŋi ba sakerɛ poan. (1 Tes. 2:​11, 12; 2 Tim. 4:2) Yelemɛŋɛrɛ, buraasi wa yuun muuri mɛ diisa ba deodoma ge ni basɛ ti bamam la Yehowa bɔŋa la ana soŋa.—1 Tim. 3:​2, 4; Titus 1:​6-9.

9. Tuun ani ti keendoma tuna zina beere wa?

⁹ Keendoma n boi zina beere wa ka tari nɛŋa. Ba mɔɔli yelesoma la mɛ. (2 Tim. 4:5) Ba ni mu’ɛ la nini tuna na’am mɔɔlegɔ tuuma la, maasena mabiisi la ti ba mɔɔla ge me ni kumesɛ tɔ ti to ta’an pa’ala ge mɔɔla soŋa soŋa. Ba tari la nimbɔ̃zore ge maala mabiisi yɛla tontɔɔ sore poan. Kristabia san tum be’em, keendoma la ni tiregɛ mɛ soŋɛ en ti eŋa la Yehowa bɔŋa la le ana soŋa. Ba me ni soŋɛ mɛ ti tansugere la ana filam. (1 Ko. 5:​12, 13; Ga. 6:1) Sɛla n gaŋɛ za’a dela, keendoma dela bisegadoma. (1 Pe. 5:​1-3) Ba bo’ori la Baabule yetɔɣum n kɛ̃’ɛri suure ge ni tiregɛ baŋɛ nɛra woo tansugere la poan ge kaara mabiisi la bisa. Keendoma basɛba soŋeri mɛ ti ba mɛta Na’am Pu’usegɔ Deto ge maala ba. Basɛba me soŋeri la laɣesegɔ yɛla, Imma’asum Yɛla Bisegadoma tuuma ge me Kaara Bisera sɛba n bɛ̃’ɛri, la tuuma ase’a. Keendoma la kɔ’ɔn mu’ɛ la nini tuna bɔ’ɔra tɔ!

10. Beni n sɔi ti to puurɛ pee la keendoma n mu’ɛ nini tuna se’em la?

¹⁰ Yehowa yuun tɔɣɛ biŋe ti keendoma la wan bisera to soŋa “te dabeem bii vuuhego kan le paara tɔ.” (Yer. 23:4) Johanna dela mabipɔka n boi Finland. A yuun baŋɛ yele wa n de yelemɛŋɛrɛ se’em mɛ a ma n yuun bɛ̃’ɛri paa la. A yeti: “La boi bim ti la yuun kpe’em bo mam mɛ ti n tɔɣɛ lan ani mam se’em bo nɛreba ge keema ayima ti mam ka ba’ɛ malum, yuun ma’ɛ amea mɛ kelese mam soŋa. A yuun naɛ la mam zusɛ mɛ ge basɛ ti n baŋɛ ti Yehowa nɔŋɛ mam mɛ. Mam ka tɛ̃ri eŋa n yuun yele sɛla wana mɔpi ge mam n tɛ̃ri sɛla dela, eŋa n yuun yele sɛla la basɛ ti putɛyiila yuun ka le tara mam. Mam mi ti Yehowa n yuun tum en ti a wa’ana soŋɛ mam sansɛka n nari poan.” Keendoma n boi ho tansugere la poan soŋɛ ho la wani?

11. To wan eŋɛ la wani ta’an eŋɛ pa’alɛ ti to puurɛ pee mɛ la keendoma la? (Bisɛ foote la.)

¹¹ Yehowa boti la to eŋɛ pa’alɛ ti to puurɛ pee ya la “toonse’ere” ti keendoma la tuna la. (1 Tes. 5:​12, 13) Henrietta n boi Finland yeti: “Keendoma la yese la ba suuren soŋera mabiisi la ge bala ka pa’alɛ ti ba tari la paŋa, la saŋa zo’e zo’e bii ba ka tari yeledaaŋɔ. Saŋa ase’a mam ni yele ba yeti: ‘Ya mu’ɛ nini mɛ ya tuuma poan. Mam yeen bɔta ti n basɛ ti ya baŋɛ la bala.’” Mabipɔka n boi Türkiyec ti a yu’urɛ dɛna Sera yeti: “Keendoma boti la to kpɛmesa ba giila ti ba ta’an tuna ba tuuma soŋa. To ta’an gulesɛ gɔŋɔ bo ba, beem ba ti to laɣum di bii naɛ la ba keŋɛ na’am mɔɔlegɔ.” Hon mi keema n muuri a tuuma poan? Bisɛ hon wan eŋɛ se’em ta’an eŋɛ pa’alɛ ti ho puurɛ pee mɛ la a tuuma la.—1 Ko. 16:18.

GINGILEGA KAARƐ BISEGADOMA KPEMESERI LA TO GIILA

12. Bani ti Yezu yuun le loe ba ti ba kpɛmesa yuun kɔbesɛka n deŋɛ nɛŋa tansuga la giila? (1 Tesalonika 2:​7, 8)

¹² Yezu Krista le dekɛ la buraasi bo to tansugere la poan, ti ba tuna tuuma ase’a. A yuun doose la keendoma la n boi Yerusalem la poan tum Paul, Barnabas la nɛreba basɛba ti ba dɛna kaarɛ bisegadoma. (Tm. 11:22) Beni n sɔi? Ti ba kpɛmesa tansuga la giila, wuu keendoma soŋeredoma la keendoma n tuni se’em la. (Tm. 15:​40, 41) Buraasi wa yuun ãregɛ la bamea, hali ni pɔ̃segɛ ba nyuurɛ la wan eŋɛ se’em ti ba ta’an tum tuunɛ wa.—Kaalɛ 1 Tesalonika 2:​7, 8.

13. Gingilega kaarɛ bisegadoma tuuma dela bem?

¹³ Gingilega kaarɛ bisegadoma kɔ’ɔn ɛɛra mɛ saŋa woo. Basɛba ni keŋɛ la mɛɛla zo’e zo’e ge nyaa paɛ tansugere la n boi zɛ’an. Bakwai woo gingilega kaarɛ bisegadaana bo’ori la yetɔɣum, kaara mabiisi la, sɔsera la sore ŋmɛ’adoma la keendoma ge maasena na’am mɔɔlegɔ sɔsega. A ni maasum la yetɔɣum ge me bisera gingilega, la tinkãtɛ laɣesegɔ. Eŋa n ni pa’ala sore ŋmɛ’adoma sukuu poan, ita laɣesegɔ n boi de to’ore bɔ’ɔra sore ŋmɛ’adoma ge me ni tuna tuuma ase’a ti tigere yile la ni dekɛ bo en.

14. Bem n basɛ ti to puurɛ pee la to gingilega kaarɛ bisegadoma n mu’ɛ nini tuna se’em la?

¹⁴ Tansugere la nyɛti nyuurɔ la wani la gingilega kaarɛ bisegadoma n tuni tuunse’a la? Mabia ayima n boi Türkiye tɔɣɛ gingilega kaarɛ bisegadoma yele ti: “Ba san ni wa’ana kaɛ tɔ, mam giila ni kpeŋe mɛ ti mam bɔta ti n soŋera mabiisi. Mam seke gingilega kaarɛ bisegadoma zo’e zo’e mɛ ge ba ayima ka boi n basɛ ti la ana mam wuu a ka tari nɛŋa n wan tɔɣɛ bo mam.” Johanna, ti to puɣum tɔɣɛ a yele la, yuun naɛ la gingilega kaarɛ bisegadaana tum na’am mɔɔlegɔ poan. Ge ba yuun ka seke nɛnɛra yire. A yeti: “Mam kan malum tamɛ daandindaarɛ. Mam keendoma bayi n ka le naɛ la mam kɛ̃’ɛra ti mam puti’irɛ ni kɔ’ɔn bɔna ba poan. Gingilega kaarɛ bisegadaana la yuun kpemese mam giila ge soŋɛ mam ti n baŋɛ ti, nananawa daanse’ere to kan ta’an naɛ la to deodoma la to zɔdoma laɣum kɛ̃’ɛra. Ge tinpaalega la poan, la wan dɛna yɔ’ɔ bo to ti to naɛ taaba bɔna wuusa.” To puurɛ pee mɛ la to gingilega kaarɛ bisegadoma la n soŋeri to se’em la.—Tm. 20:37–21:1.

15. (a) Wuu 3 Yon 5-8 n pa’alɛ se’em la, to wan eŋɛ la wani pa’alɛ ti to puurɛ pee mɛ la gingilega kaarɛ bisegadoma? (Bisɛ foote la.) (b) Beni n sɔi ti la nara ti to zu’usɛ burase’esi n tuni tuunkpe’eŋo la pɔɣeba ge to wan eŋɛ la wani ta’an eŋɛ bala? (Bisɛ daka la zuo n de “Tɛ̃ra Ba Pɔɣeba Yele.”)

¹⁵ Tuntuna Yon yuun kpemese Gaius giila ti a tɔ’ɔsa mabisɛba n ni wa’an tansugere la poan la soŋa ge “soŋɛ ba soŋse’ere taaba n wan eŋɛ Yenɛ suunre nyɛlom.” (Kaalɛ 3 Yon 5-8.) Sore deyima ti tomam me wan ta’an eŋɛ bala dela, to beem gingilega kaarɛ bisegadaana ti a wa’an to yire na di. To me ta’an naɛ la ba keŋɛ na’am mɔɔlegɔ. Leslie, ti to puɣum tɔɣɛ a yele la, eŋɛ la sɛla pa’alɛ ti a puurɛ pee mɛ la ba. A yeti: “Mam ni zusɛ ti Yehowa soŋɛ ba ti ba nyɛ yelese’a n pakɛ ba. Mam la mam sira ni gulesɛ la gɔŋɔ bo ba, pa’alɛ ban soŋɛ to se’em.” Tɛ̃ra ti gingilega kaarɛ bisegadoma daɣɛ malesi. Saŋa ase’a, ba ta’an ni bɛ̃’ɛra mɛ. Putɛyiila, la giilekɔ’ɔsegɔ me ta’an paɛ ba. Daanse’ere ho giilekpeŋere yetɔɣum bii ho bo’olum la ta’an basɛ ti gingilega kaarɛ bisegadaana baŋɛ ti Yehowa lebese la a zusega!—Mag. 12:25.

BURASE’ESI TI NAAYINƐ LA YEZU DEKƐ BO TO LA YELE PAKƐ MƐ PAA

16. Wuu Magaha 3:27 n pa’alɛ se’em la, soke ani ti mabiburaasi wan ta’an soke bamea?

¹⁶ Tingɔŋɔ wa za’a poan, burase’esi ti Naayinɛ la Yezu dekɛ bo to la yele pakɛ mɛ paa. Ho san dɛna mabiburaa n muse ko’om, ho wan ta’an soŋɛ ge kan “torɛ ho nu’o”? (Kaalɛ Magaha 3:27.) Ho dela mina n maasum ti ho dɛna keendoma soŋeredaana? Ho san dɛna keendoma soŋeredaana, hon maasum ya ti ho dɛna keema ta’an tuna la pupeelum bɔ’ɔra ho mabiisi la?d Ho wan bɔta ti ho gbe’esi homea ge ta’an gulesɛ gɔŋɔ keŋɛ Na’am Mɔɔlegɔdoma Sukuu? Sukuu la wan kumesɛ ho soŋa soŋa ti Yezu dekɛ ho tum zo’e zo’e. Ho san bisɛ ti ho ka nari, zusɛ Yehowa ti a soŋɛ hɔ. Zusɛ en ti a dekɛ a zilam vo’osum la soŋɛ hɔ ti ho ta’an tum tuunse’ere woo ti ba dekɛ bo ho la.—Lu. 11:13; Tm. 20:28.

17. Sore kani poan ti sɛba ti Yezu loe ba ti ba dɛna “bo’olum” la, pa’alɛ ti Krista Yezu n de to Naba?

¹⁷ Mabiburaasi sɛba ti Yezu loe ba ti ba dɛna “bo’olum” la, pa’alɛ ti Yezu n boi to nɛŋa ba’asegɔ dabesa wa poan. (Mat. 28:20) To puurɛ pee mɛ la ton tari Naba n tari nɔŋerɛ, bɔ’ɔra yɛri yɛri, mina sɛla n pakɛ tɔ ge me bo to mabiisi ti ba soŋera to la. Bala la, bisɛ hon wan eŋɛ se’em eŋɛ pa’alɛ ti ho puurɛ pee ya la mabiisi wa n kɔ’ɔn muura la. Da makɛ tamɛ ti ho pu’usɛ Yehowa, se’ere n sɔi la eŋa n bo’ori “sɛla woo n ane soŋa te to nyɛta la.”—Yam. 1:17.