Yele Tansugere Keendoma Ti Ba Soŋɛ Hɔ

1. Yehowa eŋɛ la bem pa’alɛ ti a yamesi dela tuulum bɔ’ɔra en?

YEHOWA nɔŋɛ sɛba woo n pu’useri en la mɛ ge me fabela ba yele wuu dunkeena n fabeli a piisi yele se’em la. A basɛ ti a Dayɔba’arɛ la n ki faɛ ba ge me loe keendoma ti ba bisera ba. (Tm. 20:28) Naayinɛ boti la keendoma la bisera a yamesi la soŋa soŋa. Keendoma la doli la Yezu pa’alegɔ, kpɛmesa ba giila ge me soŋera ba ti ba kɔ’ɔn tara sakerɛ pu’usa Yehowa.—Isa. 32:​1, 2.

2. Bani ti Yehowa fabela ba yele? (Ezekiel 34:​15, 16)

² Yehowa nɔŋɛ a yamesi woo mɛ ge a ni kɔ’ɔn fabela la sɛba n nameseri la yele. Yehowa ni doose la keendoma la poan soŋɛ a yamesi sɛba n ni ta ana buulegɔ la. (Kaalɛ Ezekiel 34:​15, 16.) Ge a boti la tomea ni yele ti ba soŋɛ tɔ. Naayinɛ ka yeen bɔta la to ni zusera en ti a soŋera to ma’a ge a boti la to me ni yele “duŋkeema la pa’aleba” n boi tansugere la poan la ti ba soŋɛ tɔ.—Ep. 4:​11, 12.

3. To wan nyɛ nyuurɔ la wani to san bisɛ keendoma la tuuma n ani se’em la?

³ Zaseŋɔ wa poan, to wan zamesɛ baŋɛ Yehowa n doli keendoma la poan soŋera sɛba n ani buulegɔ la se’em. To wan nyɛ soke ana wa lebesego: Sankani ti la nara ti to yele keendoma la ti ba soŋɛ tɔ? Beni n sɔi ti la nara ti to eŋɛ bala? Ge keendoma la soŋeri to la wani? Daanse’ere tomam la Yehowa bɔŋa la kpe’em mɛ nananawa ti to ka ɛɛra soŋerɛ keendoma la zɛ’an. Ge zamesegɔ wa wan soŋɛ tɔ ti to puurɛ pee la Yehowa n tari keendoma la tuna tuuma se’em ge me soŋɛ tɔ ti to mina to wan eŋɛ se’em to san ta ɛɛra soŋerɛ ba zɛ’an.

SANKANI TI LA NARA TI TO YELE KEENDOMA TI BA SOŊƐ TƆ?

4. To eŋɛ la wani baŋɛ ti Yames 5:​14-16, 19, 20 tɔɣeri la sɛba n ani buulegɔ Yehowa pu’usegɔ poan la yele? (Bisɛ fɔɔra la.)

⁴ Podɔla Yames tɔɣɛ pa’alɛ Yehowa n doli keendoma la poan soŋera to se’em. Yames yeti: “Nɛra han bɔna ya poan te ban’ahe tara en, a daana yi lagaŋɔ zuodoma te ba wa’ana.” (Kaalɛ Yames 5:​14-16, 19, 20.) Yames tɔɣɛ pa’alɛ la nɛra la Yehowa bɔŋa n sa’am ti a bɔta ti a malum tara bɔnsoŋa la en. Yames yeti, mina n bɛ̃’ɛri la dela a yi keendoma ti ba soŋɛ en ge daɣɛ dɔgeta. Leyɛ’ɛsa, Yames tɔɣɛ pa’alɛ ti bã’ara la wan nyɛ tibegɔ, ba san di sugeri bo en. Bã’ara san bɔta ti a bã’a la basɛ, la dela a keŋɛ dɔgeta zɛ’an ta yele en a bã’a la n ani se’em ge me nam dɔgeta la n wan pa’alɛ en sɛla la. Bala mea nɔɔ, tomam me san bɔta ti to le ana tapilapi la Yehowa, la nari ti to yele keendoma, pa’alɛ ba lan ani to se’em ge nyaa dekɛ ka’aŋɔ la ti ba doose Baabule poan ka’am to la tum tuuma.

5. To wan eŋɛ la wani baŋɛ ti to ma’ari mɛ vo’osum poan?

⁵ Yames a zuo 5 poan, Yames kpemese to giila ti to san ɛɛra soŋerɛ ti to sakerɛ kpe’em, la dela to yele keendoma la. La yele pakɛ mɛ ti to te’ele ɛ soŋerɛ ba zɛ’an ti tomam la Yehowa bɔŋa la da sa’am! La ka nari ti to pã’asa tomesi. Baabule la kaɣɛ tɔ ti to san ka bisɛ tomea soŋa to ta’an ti’isa ti Yehowa nam to mɛ ge ti la daɣɛ bala. (Yam. 1:22) Diimi Kristakɔma basɛba n yuun boi Sardis yuun ti’iseri la bala ge Yezu yuun basɛ ti ba baŋɛ ti ba ka iti sɛla ti Yehowa bɔta. (Lil. 3:​1, 2) To wan eŋɛ la wani ta’an baŋɛ ti to tari bɔnsoŋa la Yehowa? Sore deyima dela to bisɛ ton yuun muuri se’em to ko’om musega saŋa la ge dekɛ makɛ la ton ani se’em nananawa. (Lil. 2:​4, 5) To wan ta’an soke tomea yeti: ‘Mam nɔŋɛ n kaala Baabule ge ti’isa taɣesa wuu mam yuun iti se’em la? Mam ni maasum la wu’ula wu’ula kena zamesegɔ ge me vi’ira zamesegɔ ase’a? Mam ka le tulegera na’am mɔɔlegɔ tuuma la poan? Mam kɔ’ɔn ti’isa la ligeri bii lɔɣɔbɔrɛ ma’a yele nananawa?’ Lebesego la san dɛna ɛɛ, la pa’alɛ ti tomam la Yehowa bɔŋa la ka kpe’em wuu lan yuun ani se’em la. To me san ka maalɛ yele la, la ta’an gaam be’ero. Tomea san ka ta’an maalɛ yele la bii to eŋɛ la sɛla tue Yehowa, la nari ti to yele keendoma la ti ba soŋɛ tɔ.

6. Sɛba n tum be’em la nari ti ba eŋɛ la bem?

⁶ Be’em ase’a n boi ti nɛra san tum a ge ka tee, ba wan yese en tansugere la poan. To san tum be’em aŋa taaba, la nari ti to yele keendoma la ti ba soŋɛ tɔ. (1 Ko. 5:​11-13) Nɛra san tum be’em, amea kan ta’an maalɛ yele la ti eŋa la Yehowa bɔŋa le ana soŋa. A san bɔta ti Yehowa di sugeri bo en doose lua bunɔ la poan, la nari ti a eŋɛ ‘pa’alɛ ti a sirum tee a puti’irɛ.’ (Tm. 26:20) Ton wan ta’an eŋɛ bala se’em dela, to san tum be’em to yele keendoma la.

7. Keendoma la nari ti ba le soŋɛ la bani?

⁷ Keendoma la ka yeen soŋera la sɛba n tum be’em ma’a ge ba me soŋeri la sɛba n ma’a vo’osum poan. (Tm. 20:35) Makerɛ, dabeem ta’an tara hɔ ti ho ti’isa ti ho kan ta’an zabɛ nyaŋɛ ho konkoma’asum be’ero. La ta’an kpe’em bo ho ti ho zabɛ nyaŋɛ konkoma’asum be’ero, la san dɛna ti ho daa buɣeri la daam, bisera yalum fɔɔra ge me tuna yalumtuuma ge nyaa ta baŋɛ yelemɛŋɛrɛ la. Da ti’isa ti hon ma’a wan ta’an zabɛ nyaŋɛ. Ho san yele keema, a wan kelese ho ge soŋɛ hɔ ti ho baŋɛ ti ho wan ta’an eŋɛ sɛla pee Yehowa puurɛ. (Pa. 4:12) Ho giila san kɔ’ɔsɛ la hon kelum tara konkoma’asum be’ero la zuo, keema la wan soŋɛ hɔ. Bala pa’alɛ ti ho siregeri la homea ge bɔta ti Yehowa puurɛ pee la hɔ.—1 Ko. 10:12.

8. Be’em kuni taaba ti la nara ti to yele keendoma la?

⁸ La ka nari ti to yele sɛla woo ti to tue bo keendoma la. To makɛ yeti, ho sunsɔa n nyie ti ho tɔɣɛ mabia sɛla n ka nari. Hon wan tuɣum tɔɣɛ bo keema la, dekɛ Yezu ka’aŋɔ la tum tuuma ti suma’asum bɔna hon la ho mabia la tiŋasuka. (Mt. 5:​23, 24) Ho ta’an dekɛ to gɔnɔ la zamesɛ baŋɛ hon wan ta’an dɛna nɛremama, di’isa suure ge nyɔkera homea se’em. Ge ho san ka nyaŋɛ maalɛ yele la, ho ta’an yele keema ti a soŋɛ hɔ. Tuntuna Paul n yuun gulesɛ gɔŋɔ bo Filipidoma la, a yuun yele la keema ayima ti a soŋɛ Euodia la Sintike ti ba maalɛ ba yele la. Tansugere keema me wan ta’an soŋɛ ho la bala mea nɔɔ.—Flp. 4:​2, 3.

BENI N SƆI TI LA NARA TI TO YELE KEENDOMA TI BA SOŊƐ TƆ?

9. Beni n sɔi ti la ka nara ti to zɔta valum ti to yele keendoma la ti ba soŋɛ tɔ? (Magaha 28:13)

⁹ La nari ti to tara sakerɛ la sukpe’ene ta’an yele keendoma la ti ba soŋɛ tɔ, to san tum be’em bii to san mina ti to kan ta’an zabɛ nyaŋɛ to inbuulegɔ. La ka nari ti to zɔta valum ti to yele keendoma la. Bem zuo? Sɛla n sɔi la, Yehowa n loe keendoma la ti ba soŋɛ tɔ ti to tara bɔnsoŋa la en. Bala la, to san yele keendoma la, la pa’alɛ ti to dekɛ tomea delum la Yehowa ge me nana en. To le ita pa’ala ti to boti la a soŋɛ tɔ ti to ta’an ita sɛla n ani soŋa. (Ym. 94:18) To tari suure lua ti Yehowa wan di sugeri bo to, to san yele keendoma la be’em sebo ti to tum ge me basɛ be’em tuuma.—Kaalɛ Magaha 28:13.

10. Bem n wan paɛ tɔ, to san tiregera ti to suɣɛ to be’em?

¹⁰ To san yele keendoma la be’em se’ere ti to tum, Yehowa wan di sugeri bo to ge basɛ ti to le tara bɔnsoŋa la en. Ge to san ka yele keendoma la ge tara suɣera, la wan basɛ ti wuŋerɛ zo’e zo’e paɛ tɔ. Makerɛ, Naba David yuun tum la be’em ge dekɛ suɣɛ. Pooren, la yuun wuŋɛ en mɛ ti putɛyiila yuun paɛ en se’ere n sɔi la, eŋa la Yehowa bɔŋa la yuun sa’am mɛ. (Ym. 32:​3-5) To san bɛ̃’ɛra ge ka ɛ tibegɔ kalam la ni wuna to mɛ. Bala mea nɔɔ ti to san tum be’em ge ka yele keendoma la kalam, la wan sa’am tomam la Yehowa bɔŋa la. Yehowa ka boti bala paɛ tɔ. Bala n sɔi ti a yele to ti to ni yele keendoma la kalam ti ba soŋɛ tɔ ti to le tara bɔnsoŋa la en.—Isa. 1:​5, 6, 18.

11. Bem n wan le eŋɛ, to san tara be’em suɣera?

¹¹ To san ka yele keendoma to be’em la, la ni basɛ ti wuŋerɛ paɛ la basɛba me. La ta’an basɛ ti Yehowa kan dekɛ a zilam vo’osum la za’a soŋɛ tansugere la. La me ta’an sa’am suma’asum la n boi tansugere la poan la. (Ep. 4:30) Bala mea nɔɔ, to san baŋɛ ti mabia tum la be’em, la nari ti to kpemese a giila ti a yele keendoma la ti ba soŋɛ en.a To san gura en ta paɛ beense’ere ti a ka yele keendoma la, ton tari yelemɛŋɛrɛ bɔ’ɔra Yehowa la zuo la nari ti to yele ba. To me san ka eŋɛ bala, to tum la be’em giisɛ Yehowa. (Yɛh. 5:1) Ton nɔŋɛ Yehowa la zuo, to san nyɛ ti nɛra tum be’em, to wan yele keendoma la. To san eŋɛ bala, la ni basɛ ti tansugere la ana la filam ge me ni soŋɛ mabia la n tum be’em la ti a le tara bɔnsoŋa la Yehowa.

KEENDOMA LA SOŊERI TO LA WANI?

12. Keendoma ni eŋɛ la wani ta’an soŋɛ nɛra n ma’ɛ vo’osum poan?

¹² Baabule la yele keendoma ti ba soŋɛ sɛba n ma’ɛ vo’osum poan la ti ba le tara bɔnsoŋa la Yehowa. (1 Tes. 5:14) Ho san tum be’em, keendoma la ta’an soke ho yɛla ti ba baŋɛ sɛla n boi ho suuren, la lan ani ho se’em. (Mag. 20:5) La ta’an kpe’em bo ho ti ho tɔɣɛ pa’alɛ keendoma la lan ani ho se’em. Daanse’ere valum ta’an tara hɔ ti ho yele ba sɛla n eŋɛ la. Ge ho san yele keendoma la sɛla woo, bala wan basɛ ti ba ta’an soŋɛ hɔ. Da zɔta dabeem ti ho yetɔɣum la wan ana wuu ho “tɔgɔri ge ka tɛn’ɛha” mɛ la. (Yob 6:3) Keendoma la kan eŋɛ kalam ti ba gãkɛ hɔ ge ba wan ma’ɛ bamea kelese soŋa soŋa ta’an bɔkɛ yele la za’a ge nyaa ka’am hɔ. (Mag. 18:13) Keendoma la mi ti la ni dekɛ la saŋa zo’e zo’e ge ti ho nyaa ta’an soŋɛ nɛra. Bala la, saŋa ase’a la wan nara ti ba seke ho sugumnɔɔrɛ zo’e zo’e ta’an soŋɛ hɔ.

13. Keendoma la san naɛ la to zusɛ ge dekɛ Baabule gulesegɔ ka’am tɔ, la wan soŋɛ to la wani? (Bisɛ fɔɔra la.)

¹³ Ho san yele keendoma la, ba kan zɛregɛ hɔ. Ba wan naɛ la ho zusɛ. Yehowa wan kelese ba zusega la se’ere n sɔi la, la “tare la toolom.” La wan eŋɛ ho pakerɛ ti, ba zusega la wan kpemese ho giila ge buɣelɛ ho suure. Keendoma la wan soŋɛ hɔ doose la ban wan “sɔn [ho] la kaam” Yehowa yu’urɛ poan. (Yam. 5:​14-16) “Kaam” buna ze’ele bo la Naayinɛ Yelesum la. Keendoma la wan naɛ la ho sɔsɛ Baabule gulesegɔ n wan buɣelɛ ho suure ge soŋɛ hɔ ti ho le tara bɔnsoŋa la Yehowa. (Isa. 57:18) Gulesegɔ la ti ba wan dekɛ soŋɛ ho la, wan bo ho paŋa ti ho tuna sɛla n ani soŋa. Keendoma la wan soŋɛ hɔ ti ho wum Yehowa n yeti: “Sore n wana, nya dole ya dɛ.”—Isa. 30:21.

14. Wuu Galatia 6:1 n pa’alɛ se’em la, keendoma ni soŋɛ nɛra n “tue” la wani? (Bisɛ fɔɔra la.)

¹⁴ Kaalɛ Galatia 6:1. Kristabia n “tue” ka vɔi a vom ti la makɛ la Yehowa pa’alegɔ. Tuure wa ta’an dɛna ti a ka kɔ’ɛ a puti’irɛ soŋa bii a tum la be’em giisɛ Yehowa lɔɔ la. Keendoma la n nɔŋɛ mabia la zuo, ba wan ‘tiregɛ demese nɛra kaŋa wa la sumama.’ Greek yelebire la ti ba lerege ti ‘demese’ la me le pa’alɛ la nɛra na’arɛ bii a nu’o n kɔ ti dɔgeta pɔ̃bɛ ti la bi’ɛ se’em la. Dɔgeta ni ma’ɛ la amea pɔbɛ nɛra na’arɛ bii nu’o n kɔ ti la da ba’ɛ wuna en. Bala mea nɔɔ, keendoma la san yeti ba demese nɛra n tue, ba ni ka bɔta ti ba basɛ ti wuŋerɛ paɛ en ge ba ni tiregɛ mɛ ka’am en mama sore poan. Baabule la ka’am keendoma ti ba “tara [ba] mɛhe soŋa soŋa.” Ba san tara Baabule la dɛmesera nɛra, ba tɛ̃ra ti ban ka di mi’a la zuo, ba me ta’an tue. Bala wan basɛ ti ba bisera bamea soŋa kan ti’isa ti bamam nyani se’em ti ba tiregera ti ba soŋɛ en la. Ba wan tuɣum sirege bamea ge eŋɛ pa’alɛ ti ba tari nimbɔzore.—1 Pe. 3:8.

15. Yele san daana tɔ to wan eŋɛ la wani?

¹⁵ To wan ta’an dekɛ tomea delum keendoma la. Yehowa kumesɛ keendoma la ti ba mina ti la ka nari ti ba tɔɣera mabiisi suɣelum yɛla bɔ’ɔra nɛreba. Leyɛ’ɛsa, ba ni dekɛ la Baabule la ka’am mabiisi ge daɣɛ bamea puti’irɛ. Ba me ni soŋera to mɛ ti to ta’an ŋmibera to yeledaaŋɔ poan. (Mag. 11:13; Ga. 6:2) Ba hala, la ba mi’ilum boi la to’ore to’ore ge to wan ta’an tɔɣɛ to yeledaaŋɔ la bo ba se’em sa’am. La ka nari ti to ɛɛra kaara sɔkera keendoma la ti to wum tomam n boti sɛla la. To san ita bala, la wan ana wuu nɛresɛba n boti ba wuna sɛla ti ba “mɛhe bɔta” la ge zaɣesɛ Naayinɛ Yelesum la n de “pa’aleseko n ane soŋa” la. (2 Tim. 4:3) To san tɔɣɛ to yele bo keema, a ta’an bɔta ti a baŋɛ nyaa to tɔɣɛ bo keendoma basɛba ge bamam me yeti bem. Keema la n sirege amea la zuo, a me ta’an tɔɣɛ bo keema ayima ti a soŋɛ en.—Mag. 13:10.

TO ZUGBERE YELE

16. To zugbere yele dela bem?

¹⁶ La boi bim ti keendoma la n ka’ani tɔ ge me soŋera tɔ ti to maala to yɛla ge ba ka pɛ̃regeri tɔ ti to eŋɛ sɛla n nari. La dela tomea zugbere yele ti to nana Naayinɛ. Yelese’a woo ti to ita la, tomea n wan eŋɛ kãlɛ bo Naayinɛ. Naayinɛ wan soŋɛ tɔ ti to tara birikinte ta’an kɔ’ɛ to puti’irɛ soŋa sɛla woo poan. (Arom. 14:12) Bala n sɔi ti keendoma ni ka pɛ̃regɛ tɔ ti to eŋɛ sɛla ge ba ni dekɛ la Baabule la soŋɛ tɔ ti to bɔkɛ Yehowa puti’irɛ n de sɛla yele la poan ta’an kɔ’ɛ to puti’irɛ soŋa. To san dekɛ ban pa’alɛ to sɛla Baabule la poan la tum tuuma, to wan ti’isa ge ita yɛla wuu Yehowa la, bala wan basɛ ti to ta’an kɔ’ɛ to puti’irɛ soŋa.—Heb. 5:14.

17. Yehowa boti to eŋɛ la bem?

¹⁷ Bisɛ lan de yɔ’ɔ kãtɛ se’em la tomam n de Yehowa piisi la! Yehowa tum la Yezu n de “duŋkeensoŋa” la ti a wa’ana ki faaɛ tɔ, la wan eŋɛ se’em ti to ta’an ta vɔna daarewoo. (Yon 10:11) Yehowa me dekɛ la keendoma la bo to ti ba bisera tɔ to tansuga la poan wuu eŋa n pu’ulum biŋe ti: “N wan bo ya duŋkeema sɛba n tare mam mɛŋa suunre la, te ba tara yam la bɔkerɛ ugura ya.” (Yer. 3:15) To san bisɛ ti to ani la buulegɔ vo’osum poan, la ka nari ti to gu’um ti to yele keendoma la ti ba soŋɛ tɔ. To san eŋɛ bala, to wan nyɛ Yehowa n doli keendoma la poan soŋera to se’em.