Sɛla N Sɔi Ti Yehowa Yu’urɛ La Pakɛ Yezu

1-2. (a) Yezu yuun eŋɛ la bem yu’uŋɔ seko ti a yeti a ki la? (b) To wan sɔsɛ la soke ani zaseŋɔ wa poan?

LA YUUN dela Alamisidaarɛ zaanɔɔrɛ, Nisan 14, 33 Y.B., ti ba yuun yeti ba dɔ̃rɛ Yezu tisɛ ti ba gãkɛ en, mɛlesɛ en ge ku en. Eŋa la a yelemɛŋɛrɛ tuntuneba la nan kɔ’ɔn zi’ire la saazuo bɔ’ɔ la di ba’asɛ. Ban yuun di ba’asɛ la, Yezu yuun kpemese la a tuntuneba la giila. Ban yuun nyaa maasum ti ba yese la, ti Yezu zusɛ. Tuntuna Yon n yuun gulesɛ zusega wa biŋe ti la bɔna Yon a zuo 17.

² Zaseŋɔ wa poan, to wan baŋɛ to wan ta’an zamesɛ sɛla Yezu zusega wa poan. Eŋa n yuun yeti a ki la, a yuun fabeli la bem yele? Eŋa n yuun boi tingɔŋɔ wa zuo la, bem yele n yuun pakɛ en? Basɛ ya ti to bisɛ ya to wan eŋɛ se’em nyɛ soke ana wa lebesego.

“N BAHƐ TE BA MINA HƆ”

3. Yezu yuun tɔɣɛ Yehowa yu’urɛ la wani ge bala vuurɛ? (Yon 17:​6, 26)

³ Yezu zusega la poan, a yuun yeti: “N bahɛ te ba mina hɔ.” Yelemɛŋɛrɛ, sugumnɔɔrɛ buyi ti a yeti eŋa basɛ ti a podɔleba la baŋɛ Yehowa yu’urɛ. (Kaalɛ Yon 17:​6, 26.) Eŋa n yele sɛla wa vuurɛ? A yuun pa’alɛ ba la yu’urɛ ti ba ka tabelɛ mina? Yezu podɔleba la yuun dela Yudadoma, bala la ba yuun puɣum mina Naayinɛ yu’urɛ n de Yehowa la. Yu’urɛ wa boi Hebru Gulesegɔ la poan la tusa. Bala la, Yezu yuun ka yeen tɔɣera la Naayinɛ yu’urɛ yele ge a yuun pa’alɛ ba la yu’urɛ la vuurɛ. Yezu yuun basɛ ti ba baŋɛ la Yehowa yu’urɛ la n de sɛla, maɣesɛ wuu A puti’irɛ, a tuuma, la a hala n ani se’em ti nɛra ka boi n wan ta’an tɔɣɛ pa’alɛ bala.

4-5. (a) Bo makerɛ pa’alɛ la vuurɛ n de se’em ti ho mina nɛra soŋa? (b) Sodeni poan ti Yezu podɔleba la yuun mina Yehowa soŋa?

⁴ Makɛ bisɛ ti ho tansugere keema ayima yu’urɛ n de David ti a me dɛna dɔgeta. Ho mi en la yuuma zo’e zo’e. Daarɛ deyima ti ho bɛ̃’ɛra paa ti ba tari ho keŋɛ mabia la n tuni asibitin sɛka poan la ti a tibɛ hɔ ti ho vo’e. Nananawa, ho nyaa nɔŋɛ mabia la mɛ paa. Ba me san ni yi a yu’urɛ, ho ni tiɛ la eŋa n eŋɛ sɛla bo ho la. David kelum dɛna la ho tansugere keema ge me dɛna dɔgeta sɛka n tibɛ hɔ ti ho vo’e la.

⁵ Bala mea nɔɔ ti Yezu podɔleba la yuun puɣum mina Yehowa yu’urɛ la. Ge Yezu n yuun eŋɛ yelese’a tingɔŋɔ wa zuo la, yuun basɛ ti ba malum bɔkɛ yu’urɛ la mɛ soŋa. Beni n sɔi ti to yele bala? Sɛla n sɔi la, Yezu yuun tɔɣeseri la a Sɔ la, a yetɔɣum la a itigɔ woo poan. Bala la, tuntuneba la n yuun keleseri Yezu n pa’ali ba ge me nyɛta eŋa n iti nɛreba se’em la yuun basɛ ti ba baŋɛ la Yehowa soŋa.—Yon 14:9; 17:3.

“HO YU’URƐ PAŊA LA POAN TE HO DAA DEKƐ BO MAM”

6. Sodeni poan ti Yehowa dekɛ a yu’urɛ la bo Yezu? (Yon 17:​11, 12)

⁶ Yezu zusega la poan, a yuun zusɛ bo a podɔleba la yeti: “Gura ba soŋa ho yu’urɛ paŋa la poan te ho daa dekɛ bo mam la.” (Kaalɛ Yon 17:​11, 12.) Bala pa’alɛ ti Yezu me yu’urɛ dela Yehowa? Aayi. Yezu n yuun tɔɣeri Yehowa yu’urɛ la yele la, a yuun yeti “ho yu’urɛ.” Bala la, Yehowa yu’urɛ la daɣɛ Yezu mea yu’urɛ. Yezu yuun boti a pa’alɛ la bem, eŋa n yuun yeti Naayinɛ dekɛ a yu’urɛ la bo en mɛ la? Yia la, Yezu yuun dela Yehowa Kpãna. A yuun tari la a Sɔ yu’urɛ la ge me tara yu’urɛ la tuna tunkirisi. (Yon 5:43; 10:25) Leyɛ’ɛsa, Yezu yu’urɛ la vuurɛ dela “Yehowa n de Nyɔvore Faarɛdaana.” Sira, Naayinɛ yu’urɛ la kɔ’ɔn makɛ mɛ la Yezu yu’urɛ la.

7. Beni n sɔi ti Yezu yuun dɛna Yehowa kpãna? Bo makerɛ.

⁷ To san wan bɔkɛ sɛla n sɔi ti Yezu dɛna Yehowa kpãna, ti’isɛ makerɛ wa bisɛ. Naba ta’an tum a kpãna ti a ta tɔɣɛ bo nɛreba. Kpãna la san tɔɣera la dela naba la n tɔɣeri. Bala la, Yezu yuun san tɔɣera bɔ’ɔra nɛreba, la dela Yehowa n tɔɣeri.—Mt. 21:9; Lu. 13:35.

8. Beni n sɔi ti Yehowa yuun yeti, “Mam n tom en na” ge ti hali Yezu yuun nan ka wa’an tingɔŋɔ wa zuo na? (Yɛhega 23:​20, 21)

⁸ Baabule la yeti Yezu dela “Yelesum” la, se’ere n sɔi la, Yehowa basɛ ti eŋa n pa’ala malesi, la asaaleba sɛla ti A bɔta ti ba baŋɛ ge ita. (Yon 1:​1-3) Daanse’ere Yezu n yuun de maleka sɛka ti Yehowa yuun tum ti a bisera Israeldoma la n yuun boi goo la poan la. Eŋa n yuun yele Israeldoma la ti ba nana maleka wa la, Yehowa yuun yeti: “Mam n tom en na.”a (Kaalɛ Yɛhega 23:​20, 21.) Yehowa yele la bala, se’ere n sɔi la, Yezu dela a kpãna. Yezu ma’a me n pa’alɛ ti Yehowa iti sɛla woo la ma’a ma’a ge me dɛna zilamdaana.

“N SƆ NA’AYENƐ, . . . BAHƐ TE HO YU’URƐ N NYƐ PƐNKA”

9. Sodeni poan ti Yehowa yu’urɛ la yele yuun pakɛ Yezu? Tɔɣɛ pa’alɛ.

⁹ Wuu to puɣum sɔsɛ se’em la, Yehowa yu’urɛ la yele yuun pakɛ Yezu mɛ ge ti hali a nyaa wa’an tingɔŋɔ wa zuo na. Eŋa n yuun boi tingɔŋɔ wa zuo la, a yuun iti a yɛla woo ti la pa’alɛ ti Yehowa yu’urɛ la n pakɛ en! Yezu n yuun ta pɔ̃ra a ba’asɛ a na’am mɔɔlegɔ tuuma la, a yuun zusɛ Yehowa ti: “N Sɔ Na’ayenɛ, . . . bahɛ te ho yu’urɛ n nyɛ pɛnka.” Bilam bilam ti a Sɔ la tɔɣɛ kpe’eŋo kpe’eŋo basɛ na ti: “Mam pon bahɛ te dɛ nyɛ pɛnka ge te n me wan bahɛ dɛ te de nyɛ pɛnka le yɛ’ɛha.”—Yon 12:28.

10-11. (a) Yezu yuun na’asɛ Yehowa yu’urɛ la wani? (Bisɛ foote la.) (b) Beni n sɔi ti la nara ti to pɛ̃ɣera Yehowa yu’urɛ la ti la ana zilam?

¹⁰ Yezu me yuun na’aseri a Sɔ la yu’urɛ mɛ. Wani wani? A yuun tɔɣeri pa’ala nɛreba Yehowa n ani se’em, la yelekiresi se’a ti Yehowa tuna. Ge a yuun le eŋɛ la yɛla ase’a pa’asɛ ti la na’asɛ a Sɔ yu’urɛ la. Yezu yuun basɛ ti la niɛ peelumi ti Yehowa iti sɛla woo la tontɔɔ ge ti a yu’urɛ la me dɛna zilam.b Yezu yuun pa’alɛ a podɔleba la bala yele n pakɛ se’em a zusega la poan. A yuun yeti: “To Sɔ n boe saazuo ha, ho yu’urɛ nara pɛnka.”—Mt. 6:9.

¹¹ Beni n sɔi ti la nara ti to pɛ̃ɣera Yehowa yu’urɛ la ti la ana zilam? Sɛla n sɔi la, Sitaana n de Kolekpabɛ’a la yuun parum la yɛla bo Yehowa Naayinɛ Eden gaadin la poan. Sitaana yuun yeti Yehowa dela pumpɔrema ge me ka bɔta ti Adam la Hawa nyɛ sɛla n ani soŋa. (Pin. 3:​1-5) Sitaana yuun le yeti Yehowa n iti a yɛla se’em la daɣɛ tontɔɔ. Sitaana pumpɔreŋɔ wa zɛregeri la Yehowa yu’urɛ la. Pooren, Yob saŋa la ti Sitaana yuun yeti sɛba woo n pu’useri Yehowa la, pu’useri en la Eŋa n bo’ori ba sɛla la zuo. Pumpɔreŋɔ kuna wa pa’alɛ ti la san wuŋɛ nɛreba, ba kan le pu’usa Yehowa, se’ere n sɔi la ba sirum ka nɔŋɛ en. (Yob 1:​9-11; 2:4) La yuun wan yue mɛ ti to baŋɛ nyaa Yehowa bii Sitaana n pareni.

“MAM KA GANGƐ N KI”

12. Yezu n yuun nɔŋɛ Yehowa la zuo, a yuun sakɛ ti a eŋɛ la bem?

¹² Yezu n yuun nɔŋɛ Yehowa la zuo, a yuun tiregɛ mɛ pɛ̃ɣera Yehowa yu’urɛ la ti la ana zilam. Yezu yuun yeti: “Mam ka gangɛ n ki.” (Yon 10:​17, 18) Sira, Yezu yuun sakɛ ti a ki Yehowa yu’urɛ la zuo.c Adam la Hawa n yuun ani kasi la yuun pa la Sitaana poore ge zaɣesɛ Yehowa. Ge Yezu yuun sakɛ mɛ wa’an tingɔŋɔ wa zuo na eŋɛ pa’alɛ eŋa n nɔŋɛ Yehowa se’em. Yezu yuun nani la Yehowa sɛla woo poan. (Heb. 4:15; 5:​7-10) A yuun tari la yelemɛŋɛrɛ bɔ’ɔra en ta paɛ a kum mɛlesegɔ dɔɔ la zuo. (Heb. 12:2.) Eŋa n yuun eŋɛ bala la pa’alɛ ti a nɔŋɛ Yehowa la A yu’urɛ la mɛ.

13. Beni n sɔi ti Yezu yuun dɛna mina n wan ta’an eŋɛ pa’alɛ ti Sitaana dela pumpɔrema? (Bisɛ foote la.)

¹³ Yezu vom poan, a yuun eŋɛ pa’alɛ ti Sitaana n de pumpɔrema daɣɛ Yehowa! (Yon 8:44) Yezu mi Yehowa mɛ soŋa soŋa gana nɛra woo. Sitaana pumpɔreŋɔ la woo ti a tɔɣera giisa Yehowa la san deni la yelemɛŋɛrɛ, Yezu wan mi ni la yele. Ge Yezu yuun kelum ze’a la kankaŋi tɔɣera pɔ’ɔra Yehowa yu’urɛ la. Hali lan yuun ani wuu Yehowa tamɛ Yezu yele me la, Yezu yuun boti a ki mɛ eŋa n nɔŋɛ a Sɔ la zuo.—Mt. 27:46.d

“N ME BA’AHƐ TOONSE’ERE TE HO BO MAM TE N TOM LA”

14. Yehowa kã bo Yezu la wani la eŋa n yuun tari yelemɛŋɛrɛ la?

¹⁴ Yu’uŋɔ seko ti Yezu yuun yeti a ki la, a yuun zusɛ yeti: “N me ba’ahɛ toonse’ere te ho bo mam te n tom la.” A yuun sakɛ a suuren ti Yehowa wan kã bo en la eŋa n tari yelemɛŋɛrɛ la. (Yon 17:​4, 5) A Sɔ la me yuun eŋɛ la bala. Yehowa yuun ka basɛ ti a yee yɔɔ la poan. (Tm. 2:​23, 24) A yuun isige Yezu mɛ ge bo en kpe’eŋo n gani za’a saazuo sa. (Flp. 2:​8, 9) Pooren, Yezu yuun nyaa dela Naayinɛ Na’am la Naba. A Na’am wa wan ta’an eŋɛ la bem? Lebesego la boi la Yezu n yuun yele a podɔleba la ti ba zusa se’em la: “Ho sɔ’ɔlom wa’ana, [Yehowa] sunboolom tom teŋa wa zuo wo lan ane se’em saazuo ha la.”—Mt. 6:10.

15. Bem leyɛ’ɛsa ti Yezu wan tum?

¹⁵ Beere sa’am, Yezu wan zabɛ la Naayinɛ dindoma la ge sa’am putɔpa la Armagedon zaberɛ la poan. (Lil. 16:​14, 16; 19:​11-16) Bala pooren, a wan dekɛ Sitaana basɛ “boko kantɛ la” poan, zɛsɛka ti a wan ana wuu ki me la. (Lil. 20:​1-3) Yezu Yuun Tusere Na’am Bisega la poan, a wan basɛ ti asaala woo ana kasi ge ti suma’asum bɔna. A wan isige sɛba n ki la ge basɛ ti tinparɛ wa za’a dɛna paradiisi. Yehowa puti’irɛ wan tum tuuma!—Lil. 21:​1-4.

16. Bem n wan eŋɛ Yuun Tusere Na’am Bisega la pooren?

¹⁶ Bem n wan eŋɛ Yuun Tusere Na’am Bisega la pooren? Asaaleba kan le tuura bii tuna be’em. To kan le ɛɛra ti nɛreba 144,000 dɛna to malemadoma bii Yezu dɛna to Malema Nɛŋadaana ti to ta’an tara bɔnsoŋa la Yehowa. Adam n ta’asɛ ti kum bɔna. ‘Kum n de ki’i dima la, kan le bɔna.” Yɔɔrɔ la wan dɛna voore. Ba wan isige nɛresɛba n ki la. Nɛra woo n boi tinparɛ wa zuo wan ana kasi.—1 Ko. 15:​25, 26.

17-18. (a) Yuun Tusere Na’am Bisega la san ba’asɛ, bem n wan eŋɛ? (b) Yezu wan eŋɛ la bem, a na’am bisega la san ta pɔ̃ra ba’asegɔ? (1 Korint 15:​24, 28) (Bisɛ foote la.)

¹⁷ Bem n wan le eŋɛ Yuun Tusere Na’am Bisega la pooren? Sankaŋa la, yele n boi de to’ore n wan eŋɛ. Nɛnɛra kan le ti’isa buyi buyi ti Yehowa dela zilam ge me ita a yɛla woo tontɔɔ. Beni n sɔi? Eden gaadin la poan, Sitaana yuun yeti Yehowa dela pumpɔrema ge me ka nɔŋɛ nɛresaaleba. Kɔ’ɔn pɔsɛ sankaŋa ti sɛba n pu’useri Yehowa la eŋɛ pa’alɛ ti Yehowa bisega la n ani soŋa. Bala la, Yuun Tusere Na’am Bisega la san ta ba’asɛ, to nyaa wan pɛ̃ɣera Yehowa yu’urɛ la ti la ana zilam. Yehowa puɣum eŋɛ pa’alɛ ti a dela to saazuo Sɔ n nɔŋɛ to paa.

¹⁸ Yuun Tusere Na’am Bisega la pooren, nɛra woo wan baŋɛ ti Sitaana dela pumpɔrema. Yezu na’am bisega la san ta pɔ̃ra ba’asegɔ, a wan eŋɛ la bem? A wan tɔɣesa Sitaana ge zaɣesɛ Yehowa? Aayi! (Kaalɛ 1 Korint 15:​24, 28.) Yezu wan lebe dekɛ Na’am la bo a Sɔ. A wan sirege amea nana Yehowa bisega la. Yezu ka ani wuu Sitaana. Yezu n nɔŋɛ Yehowa la zuo, a wan sakɛ dekɛ a kpe’eŋo la za’a lebe bo Yehowa.

19. Yehowa yu’urɛ la yuun pakɛ Yezu la wani?

¹⁹ Nɔkpe’ene kai ti bala n sɔi ti Yehowa yuun bɔta ti a dekɛ A yu’urɛ la bo Yezu! A yuun eŋɛ pa’alɛ ti a tɔɣeseri la a Sɔ la nima nima ge pa’ala eŋa n ani se’em. Bala la, Yehowa yu’urɛ la yuun pakɛ Yezu la wani? La yele pakɛ en mɛ gana sɛla woo. A yuun boti a ki mɛ yu’urɛ la zuo ge me wan dekɛ sɛla woo lebe bo Yehowa a Yuun Tusere Na’am Bisega ba’asegɔ la poan. To wan ta’an tɔɣesa Yezu la wani? To wan sɔsɛ baŋɛ lebesego la zaseŋɔ seko n taɣelɛ la poan.