Yelese’a Ti Ho Pɔsɛ Zamesɛ Baabule Poan La Wan Ta’an Kelum Soŋɛ Hɔ?

1. Hon yuun pɔsɛ zamesa Baabule la, la yuun tee ho vom la wani?

TON yuun pɔsɛ zamesɛ yelese’a Baabule poan la tee la to vom. To yuun zamesɛ baŋɛ ti Naayinɛ yu’urɛ dela Yehowa, bala n sɔi ti to bɔta ti to dɛna a zɔ. (Isa. 42:8) Ton yuun baŋɛ nɛra n ni ki ana se’em la, to yuun ka le ti’isa ti daanse’ere to nɛresɛba n ki la nameseri mɛ. (Pa. 9:10) Ton yuun le zamesɛ baŋɛ ti Naayinɛ yeti a wan ta basɛ ti tinparɛ wa lebege Paradiisi la, to yuun ka le fabela beere sa’am yele. To yuun nyaa tari suure lua ti to kan yeen vɔi la yuun 70 bii 80 ma’a ge to wan ta vɔna la daarewoo.—Ym. 37:29; 90:10.

2. Wuu 2 Peter 1:​12, 13 n pa’alɛ se’em la, beni n sɔi ti Kristakɔma n bi vo’osum poan nara ti ba tɛ̃ra yelese’a ti ba pɔsɛ zamesɛ la?

² La ka nari ti to tamɛ Baabule pa’alegɔ la n pakɛ to se’em la. Tuntuna Peter yuun gulesɛ a yi’i gɔŋɔ la ta bo la Kristakɔma n yuun “sɛ ze’ele soŋa soŋa yɛhera yelemɛŋɛrɛ la” poan. (Kaalɛ 2 Peter 1:​12, 13.) Ge sankaŋa la, putɔpa n yuun boi tansugere la poan bɔta ti ba pã’asɛ mabiisi la yese yelemɛŋɛrɛ la poan. (2 Pe. 2:​1-3) Peter yuun boti la a kpemese mabiisi la giila ti ba ze’a kankaŋi ta’an zaɣesɛ punpɔreŋɔ pa’alegɔ la. Bala la, a yuun tiɛ ba la pa’alegɔ yelese’a ti ba puɣum zamesɛ la. Pa’alegɔ aŋa wan soŋɛ ba ti ba tara yelemɛŋerɛ bɔ’ɔra Yehowa ta paɛ ba’asegɔ.

3. Bo makerɛ pa’alɛ sɛla n sɔi ti Kristakɔma za’a nara ti ba kɔ’ɔn ti’isa taɣesa yelese’a ti ba pɔsɛ zamesɛ Baabule poan la.

³ Hali to san puɣum pu’usɛ Yehowa yuuma zo’e zo’e, to wan ta’an kelum nyɛ nyuurɔ ton yuun pɔsɛ zamesɛ yelese’a la poan. Makerɛ: Nɛra n mi duka, la se’em n nan zameseri duka ta’an dekɛ za’asum yiŋa duɣɛ dia. Ge se’em n mi duka la ta’an dekɛ za’asum la duɣɛ dia iri iri ti ba za’asum. Bala mea nɔɔ ti sɛba n pu’usɛ Yehowa ti la yue la ta’an zamesɛ yɛla zo’e zo’e gulesegɔ yiŋa poan gana sɛba n nan pɔsɛ zamesa Baabule la. Daanse’ere to ko’om musega pooren, to bɔŋa bii ton tari yɔ’ɔ se’a Yehowa pu’usegɔ poan la tee mɛ. To san ti’isa taɣesa ton yuun zamesɛ yelese’a Baabule la poan la, to wan baŋɛ ton wan ta’an dekɛ tum tuuma se’em nananawa ti la soŋɛ tɔ. Basɛ ya ti to bisɛ sɛba n pu’usɛ Yehowa ti la yue la n wan ta’an zamesɛ sɛla Baabule pa’alegɔ yɛla atã wa poan.

YEHOWA N DE NAAŊƆDAANA LA

4. Ton mi ti Yehowa n de Naaŋɔdaana la, soŋɛ to la wani?

⁴ “Na’ayenɛ n de mɛta sɛla woo poan.” (Heb. 3:4) To mi ti Naaŋɔdaana n naam tinparɛ wa la sɛla woo n boi ka poan. Eŋa n naam tɔ, bala la a mi to mɛ soŋa soŋa. Leyɛ’ɛsa, a fabeli to yele. Eŋa n mi sɛla n wan soŋɛ tɔ. Ton mi ti Yehowa n de to Naaŋɔdaana la, basɛ ti to vom n tee ti to tara vom somɔ la beere sa’am puti’irɛ.

5. To mi la bem yele n wan soŋɛ tɔ ti to ta’an siregera tomea? (Isaiah 45:​9-12)

⁵ Ton mi ti Yehowa n de Naaŋɔdaana la pa’alɛ ti la nari ti to siregera tomea. Makerɛ, Yob yuun ka tɔɣɛ Yehowa yele soŋa. A yuun tamɛ sɛla yele n pakɛ la mɛ ge me ti’isa la amea yele, tiregera ti a eŋɛ pa’alɛ ti eŋa tari buurɔ. Ge Yehowa yuun basɛ ti a baŋɛ ti Eŋa n de Naaŋɔ Za’adaana. (Yob 38:​1-4) Bala yuun soŋɛ Yob ti a baŋɛ ti sɛla woo ti Yehowa ita dela tontɔɔ. Bala mea nɔɔ ti nɔdɛ’ɛsa Isaiah yeti: “Yɔgɔrɔ ka sokere yagombaha la te, Bene te ho yagom mam wana?”—Kaalɛ Isaiah 45:​9-12.

6. Sankani n nari ti to mina ti Yehowa yɛm, la a paŋa la ka tari makerɛ? (Bisɛ fɔɔra la.)

⁶ Nɛra san pu’usɛ Yehowa ti la yue, a ta’an ba’ɛ dekɛ amea delum sɛla ti a mina la ge tuɣum tamɛ Yehowa la Baabule la n pa’alɛ sɛla la. (Yob 37:​23, 24) Ge nɛra san ti’isa Yehowa n de Naaŋdaana ge tara yɛm la paŋa ti la ka tara makerɛ se’em la, bala wan soŋɛ en la wani? (Isa. 40:22; 55:​8, 9) La wan soŋɛ en ti a kelum siregera amea ge mina ti Yehowa puti’irɛ gani amea puti’irɛ.

7. Rahela eŋɛ la bem ta’an sakɛ teere?

⁷ Rahela, n boi Slovenia, n ti’isɛ baŋɛ a Naaŋɔdaana la yele se’em la soŋɛ en mɛ ti a sakɛ tigere la n eŋɛ teere se’a la. A yeti: “Saŋa ase’a, la ni daɣɛ naana bɔ’ɔra mam ti n sakɛ teere se’a ti sɛba n boi to nɛŋa la ni eŋɛ la. Makerɛ, hali mam n daa bisɛ 2023 Tigere Zuo Bisegadoma Lasebaarɛ #8 ba’asɛ la, la daa eŋɛ mam la pakerɛ la mam n nyɛ mabia n basɛ tɛɛŋa ge bɔ’ɔra yetɔɣum la. Bala la, mam zusɛ la Yehowa ti a soŋɛ mam ti n sakɛ teere wa.” Rahela baŋɛ ti Yehowa n de saazuo la tinparɛ wa Naaŋɔdaana la n pa’ali a tigere la soŋa soŋa. Ba san eŋɛ teere ti la kpe’em bo to ti to bɔkɛ, la wan ana soŋa ti to sirege tomea ge ti’isɛ taɣesɛ to Naaŋɔdaana la n tari yɛm la paŋa se’em.—Arom 11:​33-36.

SƐLA N SƆI TI NAAYINƐ BO YƆ’Ɔ TI NAMESEGƆ BƆNA

8. Hon zamesɛ mina sɛla n sɔi ti Naayinɛ bo yɔ’ɔ ti namesegɔ bɔna la, soŋɛ ho la wani?

⁸ Beni n sɔi ti Naayinɛ bo yɔ’ɔ ti namesegɔ bɔna? Nɛresɛba n ka mi yele wa la, sunsɔa nyie mɛ la Naayinɛ bii ba ti’isɛ ti a ka boi! (Mag. 19:3) Ge ho zamesɛ baŋɛ ti la daɣɛ Yehowa n basɛ ti to namesa ge ton de be’emdoma la zuo. Ho le zamesɛ baŋɛ ti Yehowa n di’iseri suure ge nan ka yese namesegɔ basɛ la, bo la yɔ’ɔ ti nɛreba zo’e zo’e zamesɛ baŋɛ en ta’an mina eŋa n wan yese namesegɔ basɛ se’em. (2 Pe. 3:​9, 15) Hon mi yele ana wa la buɣelɛ la ho suure ti ho ana du’a du’a la en.

9. Bɔnkani poan ti la nara ti to ti’isɛ bisɛ sɛla n sɔi ti Yehowa bo yɔ’ɔ ti namesegɔ bɔna?

⁹ To bɔkɛ sɛla n sɔi ti to nara ti to di’isa suure ge gura se’em ma’a ti Yehowa wan ta yese namesegɔ basɛ. Ge to nɛra san ki bii sɛla n eŋɛ tomea bii to yire nɛra, bii ba eŋɛ to la sɛla n ka ani soŋa, to sunsɔa ta’an ni nyie ti to ti’isa ti Yehowa ba’ɛ yuura mɛ la eŋa n yeti a wan yese namesegɔ basɛ la. (Hab. 1:​2, 3) Yele ana san paara tɔ, la wan ana soŋa ti to ti’isa taɣesa sɛla n sɔi ti Yehowa bo yɔ’ɔ ti namesegɔ paara tontɔɔdoma.a (Ym. 34:19) To me ta’an ti’isɛ taɣesɛ Yehowa puti’irɛ la n de a wan yese namesegɔ basɛ la, ti la soŋɛ tɔ.

10. Anne eŋɛ la bem ta’an ŋmibe a ma kum la poan?

¹⁰ Ton mi sɛla n sɔi ti to namesa la, soŋeri to mɛ ti to ta’an ŋmibera. Anne, n boi Mayotte, n de tinpika n boi Indian Ocean la yeti: “Mam suure n yuun sa’am mam ma n yuun ki yuuma fii n tole la. Ge mam yuun ni tiisa n mea ti daɣɛ Yehowa n ta’asɛ ti to namesa. Yehowa inya n kɔ’ɔn kita ti a yese namesego woo basɛ ge isige to nɛresɛba n ki la. Mam n ti’iseri taɣesa yele ana wa la, n soŋeri mam ti mam tara suma’asum ti la ka tara makerɛ.”

11. Ton mi sɛla n sɔi ti Yehowa bo yɔ’ɔ ti namesegɔ bɔna la soŋeri to la wani ti to kɔ’ɔn mɔɔla?

¹¹ Ton mi sɛla n sɔi ti Naayinɛ bo yɔ’ɔ ti namesegɔ bɔna la kpemeseri la to giila ti to kɔ’ɔn mɔɔla. Peter n yuun tɔɣeri pa’ala sɛla n sɔi ti Yehowa di’isa suure ti nɛreba basɛ ba be’em ge nyɛ faarɛ la, a yuun yeti: ‘Ya ti’isɛ bisɛ nɛresɛba taaba ti ya nara ti ya dɛna. Ya vɔna tuulum vom ge kaabɛ yamea bo Naayinɛ.’ (2 Pe. 3:11) Yelese’ere n laɣum pa’asɛ ti to wan ita ti la pa’alɛ ti to ‘kaabɛ tomea bo Naayinɛ’ dela na’am mɔɔlegɔ tuuma la. Wuu to Sɔ Yehowa n ani se’em la, to nɔŋɛ la nɛreba. To boti la to ta naɛ la ba bɔna Naayinɛ tinpaalega la poan. Yehowa di’iseri la suure ge bɔ’ɔra nɛresɛba n boi ho gingilega la poan yɔ’ɔ ti ba laɣum pu’usa en. Bisɛ lan de yɔ’ɔ kãtɛ se’em ti to dɛna Naayinɛ tuntuneba tadaandoma n soŋeri nɛreba ti ba zamesɛ baŋɛ en ge ti ba’asegɔ la nyaa paɛ!—1 Ko. 3:9.

TO BOI LA “TEŊA BA’AHEGƆ DABEHA LA” POAN

12. Hon zamesɛ baŋɛ ti to boi la “teŋa ba’ahegɔ dabeha la” poan la soŋɛ ho la wani?

¹² Baabule la tɔɣɛ pa’alɛ nɛreba n wan tara halese’a “teŋa ba’ahegɔ dabeha la” poan. (2 Tim. 3:​1-5) Ton nyɛti nɛreba n iti yelese’a to gingilega la poan la pa’alɛ ti Baabule la n yele sɛla la dela yelemɛŋɛrɛ. To nyɛti nɛreba hala n gaam be’ero se’em mɛ. Bala basɛ ti to sirum sakɛ to suuren ti Baabule yelesum la dela yelemɛŋɛrɛ.—2 Tim. 3:​13-15.

13. Wuu Yezu makerɛ la n boi Luke 12:​15-21 n pa’alɛ se’em la, to wan ta’an soke tomea la bem?

¹³ Ton mi ti to boi la ba’asegɔ dabesa la poan la soŋeri to mɛ ti to basɛ ti to puti’irɛ bɔna yelese’a n pakɛ la poan. Yezu makerɛ la n boi Luke 12:​15-21 (Kaalɛ) basɛ ti to baŋɛ la yelese’a n pakɛ la. Beni n sɔi ti ba yuun yeti buntata la dela “gɔɔŋɔ”? La daɣɛ la buraa la n de buntata la zuo ge eŋa n ka mi yelese’a n pakɛ la zuo. A laɣesɛ la ‘lɔɣɔrɔ biŋe amea ge a daɣɛ buntata Naayinɛ nɛŋan.’ Beni n sɔi ti bala yele pakɛ? Naayinɛ yele buraa la yeti: “Yu’uŋkona wa n wan bahɛ hɔ te ho ki.” Zina beere wa ti tingɔŋɔ wa kɔ’ɔn pɔ̃ra ba’asegɔ la, to ta’an soke tomea yeti: ‘Mam puti’irɛ n boi yelese’a poan la pa’alɛ ti bem yɛla n pakɛ mam? Bem ti mam bɔta ti n kɔma ta eŋɛ beere sa’am? Mam tari n paŋa, n saŋa la n nutatum laɣesa la lɔɣɔrɔ biŋera bɔ’ɔra n mea bii mam laɣeseri a biŋera la saazuo?’

14. Miki yele la soŋɛ tɔ ti to baŋɛ ti la yele pakɛ la wani ti to tɛ̃ra ti to boi la ba’asegɔ dabesa la poan?

¹⁴ Ton mi ti to boi la ba’asegɔ dabesa la poan la soŋeri to mɛ ti to mina to wan kɔ’ɛ to puti’irɛ se’em yɛla poan. Bala n yuun soŋɛ mabipɔka Miki. A yeti: “Mam n yuun ba’asɛ high sukuu la, mam yuun kɔ’ɔn bɔta la tunse’a n wan basɛ ti n zamesɛ dusi yɛla. Mam me yuun boti la n tum tɛm woo sore ŋmɛ’a tuuma la ge me keŋɛ zɛ’an n eeri soŋerɛ ta mɔɔlɛ. Mabiisi basɛba n boi mam tansugere la poan yuun yele mam yeti, n ti’isɛ bisɛ nyaa n wan ta’an tuna gɔmena tuuma ge kelum tuna sore ŋmɛ’a tuuma la bii keŋɛ zɛ’an n eeri soŋerɛ. Ba yuun le yele mam ti n tɛ̃ra ti tingɔŋɔ wa kɔ’ɔn pɔ̃ra la ba’asegɔ ge tinpaalega la poan, n wan ta vɔna wuusa ta’an zamesɛ dusi zo’e zo’e yɛla. Mam yuun dekɛ la saŋa fii keŋɛ sukuu. Bala yuun basɛ ti mam nyɛ la tuuma ta’an bisera n mea ge kelum tuna sore ŋmɛ’a tuuma la nyaa ta keŋɛ Ecuador ta soŋɛ na’am mɔɔlegɔ tuuma la.” Miki la a sira nyaa tuni la kaarɛ tuuma tinkaŋa poan.

15. Beni n sɔi ti la ka nara ti to gɛ̃ nɛreba basɛ? Bo makerɛ. (Bisɛ fɔɔra la.)

¹⁵ La ka nari ti to basɛ ti to giila kɔ’ɔsɛ nɛreba san zaɣesɛ yelesoma la. Nɛreba ta’an tee. To geele ya Yezu suɔ Yames yele bisɛ. A yuun nyɛ Yezu n zo’e se’em ta dɛna Mɛzaaya ge me pa’ala nɛreba ti la ka tara makerɛ. Ge yuuma zo’e zo’e ti Yames yuun ka sakɛ doose Yezu. Yezu n yuun ta isige a kum poan la ti a suɔ la nyaa dɛna a podɔla, mu’ɛ nini tuna na’am mɔɔlegɔ tuuma la!b (Yon 7:5; Ga. 2:9) Bala la, da gɛ̃ ho suurɔ sɛba n nan ka boti yelemɛŋɛrɛ la bii sɛba n ka boti ba kelese na’am yelesoma la basɛ. Tɛ̃ra ti to boi la ba’asegɔ dabesa la poan, bala la na’am mɔɔlegɔ la dela atɔtɔ yele. Hon tɔɣeri sɛla bɔ’ɔra ba zina wa la ta’an ta tee ba puti’irɛ beere sa’am, hali la ta’an ta dɛna mɛlesekãtɛ la poan.c

KƆ’ƆN BASƐ TI HO PUURƐ PEE LA YEHOWA TIISEGƆ YƐLA LA

16. Yehowa tiisegɔ yɛla la soŋeri hon la wani? (Bisɛ daka la zuo n de “Dekɛ Baabule Pa’alegɔ Soŋɛ Nɛreba.”)

¹⁶ Baabule pa’alegɔ yɛla ase’a, ba guleseri ba bɔ’ɔra la nɛresɛba n ka mi Baabule yɛla soŋa. Makerɛ, ba maasum Baabule yetɔɣedɔɔ, zaseŋɔ yɛla ase’a, vidiyodoma la magazines ase’a n boi jw.org bo la nɛresɛba n daɣɛ Yehowa Sɛɛradoma. Hali la bala, tomam me kelum nyɛta la nyuurɔ lɔɣetuna poan. La basɛ ti to tara la nɔŋerɛ zo’e zo’e bɔ’ɔra Yehowa, tara sakerɛ bɔ’ɔra Baabule la ge me soŋera tɔ ti to pa’ala nɛreba Baabule yɛla soŋa.—Ym. 19:7.

17. Bɔnkani poan ti la wan nara ti ho ti’isɛ taɣesɛ hon pɔsɛ zamesɛ yelese’a Baabule poan la?

¹⁷ Tomam Yehowa Sɛɛradoma puurɛ n ni pee ba san malum demese to Baabule pa’alegɔ yɛla ase’a. Ge to puurɛ me pee mɛ la Baabule poan yelese’a ti to pɔsɛ zamesɛ la. To san zamesa yele ana wa, la wan kelum soŋera tɔ. Tigere la san tee yɛla ase’a ti to ti’isa ti tomam n puɣum ita yelese’a la makɛ ya, la wan ana soŋa ti to tɛ̃ra ti Yehowa n de to Naaŋɔdaana tara yɛm la paŋa la n pa’ali tigere la. Wuŋerɛ san paara tomam bii to yire nɛra, to wan di’isa suure ge tɛ̃ra sɛla n sɔi ti Yehowa bo yɔ’ɔ ti namesegɔ bɔna. To me san ti’isa ton wan eŋɛ yelese’a to vom poan, to wan tɛ̃ra ti to boi la ba’asegɔ dabesa la poan ti la kan yue tingɔŋɔ wa wan sa’am. Basɛ ya ti Yehowa tiisegɔ yɛla la soŋɛ tɔ ti to tara yɛm ge kelum pu’usa en ta paɛ ba’asegɔ.