Tara Sakerɛ Ti Yehowa Nɔŋɛ Ho Mɛ

1. Beni n sɔi ti hon kã homea bo Yehowa? (Bisɛ foote la.)

HON tɛ̃ri hon yuun kã homea bo Yehowa la? Hon zamesɛ baŋɛ Yehowa ge nɔŋɛ en la n sɔi ti ho kã homea bo en. Ho daa biŋe nɔɔrɛ ti ho wan dekɛ a pu’usegɔ diŋɛ nɛŋa ho vom poan ge me nɔŋɛ en la ho suure za’a, ho sia za’a, ho puti’irɛ za’a la ho paŋa za’a. (Mr. 12:30) Sankaŋa ta paɛ zina, ho nɔŋerɛ la ti ho tara bɔ’ɔra en la kɔ’ɔn zɔ’ɔra mɛ pa’asa. Hon wan lebese la wani, nɛra san soke ho yeti, “Hon sirum nɔŋɛ Yehowa?” Hon wan yeti, “Mam nɔŋɛ en mɛ gana sɛla woo” ge kan bu’ura!

2-3. Yehowa boti to sakɛ la bem ge to wan sɔsɛ la bem zaseŋɔ wa poan? (Yeremia 31:3)

² La boi bim ti to nɔŋɛ Yehowa mɛ paa ge to ta’an kan baŋɛ Yehowa n nɔŋɛ to se’em. Daanse’ere to ta’an ti’isa ti to daɣɛ sɛsɛla ti Yehowa wan nɔŋɛ tɔ. Mabipɔka ayima ti a dɔɣereba yuun vɛ̃ɣena en yeti: “Mam nɔŋɛ Yehowa mɛ. Mam ka tari puti’ira ayi ayi la bala. Ge saŋa ase’a mam ni ti’isa ti Yehowa ka nɔŋɛ mam.” Bem n wan soŋɛ hɔ ti ho baŋɛ ti Yehowa fabeli ho yele?

³ Yehowa boti la ho tara sakerɛ ti a nɔŋɛ ho mɛ. (Kaalɛ Yeremia 31:3.) Yelemɛŋɛrɛ la dela, Yehowa boti la to zamesɛ baŋɛ en ge dɛna a zɔ. Hon kã homea ge muse ko’om la, A bo ho la tuulum bo’olum n de a yelemɛŋɛrɛ nɔŋerɛ la. Bala pa’alɛ ti a nɔŋɛ ho mɛ paa ge kan malum zaɣesɛ ho. Yehowa n tari yelemɛŋɛrɛ bɔ’ɔra a yamesi la zuo, a geele ba ti ba dela ‘tuulum lɔɣɔrɔ.’ Bala la, ho dela tuulum bɔ’ɔra en. (Ma. 3:17) Yehowa boti la ho mina ti a nɔŋɛ ho wuu eŋa n yuun nɔŋɛ tuntuna Paul se’em la. Paul n yuun tari suure lua ti Yehowa nɔŋɛ en mɛ la, a yuun yeti: “Mam mi soŋa soŋa te sɛsɛla ka boe wan ta’an bahɛ te Yesu kan nɔŋɛ tɔ. La kan de’a kum bii vom, bii Yenɛ soŋoreba bii sɛba n de zuodoma saazuo ha, bii zina wa bii sɛla n wan wa’an pooren na la, bii paŋadoma bii saazuo bii teŋa teŋa ha. Sɛsɛla ka boe teŋa wa zuo wan ta’an bahɛ te Yenɛ kan nɔŋɛ tɔ.” (Arom 8:​38, 39) Zaseŋɔ wa poan, to wan baŋɛ sɛla n sɔi ti to tara suure lua ti Yehowa nɔŋɛ tɔ, la ton wan eŋɛ se’em ta’an tara sakerɛ ti Yehowa nɔŋɛ to mɛ.

LA YELE N PAKƐ SE’EM TI TO TARA SAKERƐ TI YEHOWA NƆŊƐ TƆ

4. To wan eŋɛ la wani ta’an zaɣesɛ Sitaana bɛ̃regɔ la?

⁴ To san tara sakerɛ ti Yehowa nɔŋɛ tɔ, to wan ta’an sɛ ze’ele Saɣena la ‘pã’asegɔ yɛla poan.’ (Ep. 6:11) Sitaana boti la to basɛ Yehowa pu’usegɔ. A tiregeri mɛ ti a bisɛ eŋa n wan eŋɛ se’em ta’an eŋɛ bala. A bɛ̃regɔ ayima dela, a ni zigera ti a basɛ ti to ti’isa ti Yehowa ka nɔŋɛ tɔ. Ge bala dela pumpɔreŋɔ. Baabule la dekɛ Sitaana makɛ mɛ la gbɛɣenɛ. (1 Pe. 5:​8, 9) Gbɛɣema ni bɔta la ba nyɔkɛ duŋa la se’em ma’a ti a kan ta’an zoi. Bala mea nɔɔ, to me san ana buulegɔ, bii yeledaaŋɔ n paari tɔ nananawa bii dabeem n tari tɔ la sɛla n wan eŋɛ beere sa’am bii sɛla n tabelɛ eŋɛ to ti to suure sa’am, bala n ni basɛ ti Sitaana nyɛ yɔ’ɔ ti a zabɛ la tɔ. (Mag. 24:10) Sitaana puti’irɛ dela, a basɛ ti to ana buulegɔ ti to pisegɛ Yehowa pu’usegɔ basɛ. Ge to wan ta’an sɛ ze’ele kankaŋi “zagahɛ sagona la” to san tiregɛ bisɛ ton wan eŋɛ se’em ta’an tara sakerɛ ti Yehowa nɔŋɛ to mɛ.—Yam. 4:7.

5. Beni n sɔi ti la yele pakɛ ti to mina ti Yehowa nɔŋɛ to mɛ, ti to dɛna tuulum bɔ’ɔra en?

⁵ To san tara sakerɛ ti Yehowa nɔŋɛ tɔ, to wan ana du’a du’a la en. Beni n sɔi ti to wan ta’an yele bala. Yehowa naam tɔ ti to ta’an tara la nɔŋerɛ bɔ’ɔra nɛreba ti nɛreba me nɔŋɛ tɔ. Nɛra san nɔŋɛ tɔ to me nɔŋɛ en mɛ. Bala la, to san baŋɛ ti Yehowa nɔŋɛ to ge me bɔta to yele, to me ni tara la nɔŋerɛ zo’e zo’e bɔ’ɔra en. (1 Yo. 4:19) To san tara nɔŋerɛ zo’e zo’e bɔ’ɔra en, a mi wan tara nɔŋerɛ zo’e zo’e bɔ’ɔra tɔ. Baabule la yeti: “Vuruge ya lɛm Na’ayenɛ te a me wan vuruge lɛm ya.” (Yam. 4:8) To wan eŋɛ la bem ta’an tara sakerɛ ti Yehowa nɔŋɛ to mɛ?

BEM N WAN SOŊƐ TƆ TI TO TARA SAKERƐ TI YEHOWA NƆŊƐ TO MƐ?

6. Ho san ka sakɛ ti Yehowa nɔŋɛ hɔ, ho wan eŋɛ la wani?

⁶ Kɔ’ɔn zusa Yehowa ti a soŋɛ hɔ ti ho bɔkɛ sɛla n sɔi ti a nɔŋɛ hɔ. (Lu. 18:1; Arom 12:12) La yele san pakɛ, ho ta’an zusɛ Yehowa tabelɛ dabeserɛ woo poan ti a soŋɛ hɔ ti ho bɔkɛ lan ani ho se’em. Saŋa ase’a la ta’an ni ana ho bura ti la kpe’em bo ho ti ho sakɛ ti Yehowa nɔŋɛ hɔ. Ge tɛ̃ra ti Yehowa bɔkeri yɛla gana hon ti’iseri se’em la. (1 Yo. 3:​19, 20) Yehowa mi ho gana hon mi homea se’em la; a mi hon tari halisoma se’a la mɛ. (1 Sa. 16:7; 2 Yel. 6:30) Bala la, da gu’una ti ho yele en “ho suunre daaŋɔ zan’an” ti a soŋɛ hɔ ti ho sakɛ ti a nɔŋɛ hɔ. (Ym. 62:8) Ho san zusɛ ba’asɛ, la nari ti ho ita yele ana wa.

7-8. Yooma gɔŋɔ la basɛ ti to tara suure lua ti Yehowa nɔŋɛ to la wani?

⁷ Tara sakerɛ la Yehowa n tɔɣɛ sɛla la. Yehowa dekɛ la a zilam vo’osum la soŋɛ nɛreba ti ba gulesɛ Baabule la. Bala la, ban tɔɣɛ Yehowa yele se’em la dela yelemɛŋɛrɛ. Yooma gɔŋɔ la poan, David tɔɣɛ pa’alɛ Yehowa n fabeli to yele se’em mɛ. A yeti. “Na’ayenɛ lɛm mɛ la sɛba sunya n sagom, ge faanra sɛba sea n yehe ba mɛŋa la bahera.” (Ym. 34:18) Ho suure san sa’am ho ta’an ti’isa ti ho boi la ho ma’a. Ge Yehowa pu’ulum biŋe ti, a wan ana du’a du’a la hɔ sɛla n sɔi la, a mi ti sankaŋa la ho eeri la a soŋerɛ paa. David yuun le yeti: “Vaɛ mam nintam wa sun [talaŋa poan].” (Ym. 56:8) Ho suure san sa’am ti la wuna hɔ, Yehowa mi lan ani ho se’em. A fabeli ho yele mɛ ge me mina la wuni ho se’em. Wuu ko’om fii n boi talaŋa poan ti la dɛna tuulum bɔ’ɔra nɛra n boi pɔɣentia poan ye’a sore la, bala mea nɔɔ ti ho nintam la dɛna tuulum bɔ’ɔra Yehowa ge ti a me tɛ̃ra lan wuni ho se’em ti ho kaasa la. Yooma 139:3 yeti: “[Hon Yehowa] mi mam sɔya zan’an mɛ.” Yehowa nyɛti yelese’a woo ti ho ita la ge a puti’irɛ boi la tunsoma se’a ti ho tuna la poan. (Heb. 6:10) Beni n sɔi? Sɛla n sɔi la a puurɛ ni pee mɛ la hon tiregeri ti ho eŋɛ sɛla ti a bɔta la.a

⁸ Yehowa tari la Baabule gulesegɔ n buɣeli suure la yɛta ho ti, a fabeli ho yele mɛ ge me nɔŋɛ ho paa. Wuu ton puɣum zamesɛ baŋɛ se’em la, Sitaana kɔ’ɔn tiregera ti a basɛ ti ho ti’isa ti Yehowa ka nɔŋɛ hɔ. Bala la, ho san tara puti’ira ayi ayi ti Yehowa ka nɔŋɛ hɔ, su’use ge soke homea yeti, ‘Mam wan sakɛ bo la ani—“ponpɔrɔŋdoma naba” la bii “sakerɛ sera Yenɛ” la?’—Yon 8:44; Ym. 31:5.

9. Yehowa pu’ulum biŋe ti a wan eŋɛ la bem bo sɛba n nɔŋɛ en la? (Yɛhega 20:​5, 6)

⁹ Ti’isɛ bisɛ lan ani Yehowa se’em la sɛba n nɔŋɛ en la. Bisɛ Yehowa n yuun yele Moses la Israeldoma la sɛla. (Kaalɛ Yɛhega 20:​5, 6.) Yehowa pu’ulum biŋe ti a wan kelum tara yelemɛŋɛrɛ nɔŋerɛ bɔ’ɔra sɛba n nɔŋɛ en la. Yehowa n tari yelemɛŋɛrɛ nɔŋerɛ la zuo, to tari puti’irɛ ti a kan malum zaɣesɛ sɛba n nɔŋɛ en la. (Neh. 1:5) Saŋa ase’a ho ni bɔta la ho baŋɛ nyaa Yehowa nɔŋɛ hɔ ge la nari ti ho su’use ge soke homea yeti, ‘Mam nɔŋɛ Yehowa?’ Ho san nɔŋɛ en ge tiregera ita sɛla n wan pee a puurɛ, bala wan pa’alɛ ti a me nɔŋɛ ho mɛ paa. (Da. 9:4; 1 Ko. 8:3) Ho san ka tara puti’ira ayi ayi ti hon nɔŋɛ Yehowa, beni n sɔi ti ho wan tara puti’irɛ ayi ayi ti Yehowa ka nɔŋɛ hɔ? Tara puti’irɛ ti Yehowa nɔŋɛ ho mɛ ge me kɔ’ɔn ana tapilapi la hɔ.

10-11. Yehowa boti ho geele lua bunɔ la, la wani? (Galatia 2:20)

¹⁰ Ti’isɛ taɣesɛ lua bunɔ la yele. Yehowa n basɛ ti a Dayua wa’ana ki bo to la dela bo’olum n gani za’a. (Yon 3:16) Ge a ki bo hon? Ɛɛ! To geele ya tuntuna Paul yele la bisɛ. A yuun tum la tunbe’ero ge nyaa ta dɛna Krista bia. Hali la bala za’a, a yuun kelum nara ti a kɔ’ɔn tiregera ta’an zabera nyaŋera a inbuulegɔ la. (Arom 7:​24, 25; 1 Tim. 1:​12-14) Ge a yuun baŋɛ ti Yehowa basɛ ti a Dayua la ki bo la eŋa. (Kaalɛ Galatia 2:20.) Tɛ̃ra ti Yehowa yuun basɛ ti Paul gulesɛ yele wa eŋɛ la Baabule la poan. Sɛla woo n boi Baabule la poan la dela ka’aŋɔ bɔ’ɔra tɔ. (Arom 15:4) Paul n yele sɛla la pa’alɛ la Yehowa n boti ho geele lua bunɔ la se’em. A boti la ho tara sakerɛ ti lua bunɔ la dela bo’olum bo ho. Ho san ti’isɛ bisɛ lua bunɔ la n de tuulum se’em ti Yehowa dekɛ bo ho la, bala wan basɛ ti ho tara sakerɛ ti a nɔŋɛ ho mɛ.

¹¹ To pu’usɛ Yehowa la eŋa n basɛ ti Yezu wa’an tinparɛ wa zuo na ki bo to la. Leyɛ’ɛsa Yezu yuun wa’an tinparɛ wa zuo na ti a pa’alɛ la nɛreba Naayinɛ yɛla. (Yon 18:37) Yezu yuun le pa’alɛ to la Yehowa n nɔŋɛ to se’em.

YEZU BASƐ TI TO BAŊƐ LA YEHOWA N NƆŊƐ TO SE’EM

12. Beni n sɔi ti to wan ta’an sakɛ Yezu n tɔɣɛ Yehowa yele se’em la?

¹² Yezu n yuun boi tinparɛ wa zuo la, a yuun basɛ ti to baŋɛ Yehowa n ani se’em. (Lu. 10:22) La nari ti to sakɛ Yezu n tɔɣɛ Yehowa yele se’em la. Bem zuo? Sɛla n sɔi la Yezu yuun naɛ mɛ la a Sɔ la bɔna saazuo yuuma zo’e zo’e ge ti a nyaa wa’an tiŋa wa zuo na. (Kol. 1:15) Yezu yuun mi a Sɔ la n nɔŋɛ en se’em mɛ. A me yuun nyɛ a Sɔ la n eŋɛ pa’alɛ ti a nɔŋɛ malesi, la a yelemɛŋɛrɛ yamesi la se’em mɛ. Sodeni poan ti Yezu basɛ ti to baŋɛ ti Naayinɛ nɔŋɛ tɔ?

13. Yezu boti to mina Yehowa la wani?

¹³ Yezu boti la to mina Yehowa n sirum fabeli to yele se’em. Yelesoma gɔnɔ la poan, Yezu yeti Yehowa dela “Sɔ” ti la gaŋɛ sugumnɔɔrɛ 160. Yezu n yuun tɔɣeri bɔ’ɔra a podɔleba la, a yuun ni yeti “ya Sɔ” bii “ya Sɔ se’em n boe saazuo ha.” (Mt. 5:16; 6:26) Yezu n yuun boi saazuo la, Yehowa yamesi n boi tinparɛ wa zuo yuun yi’iri Yehowa la ‘Paŋa Za’adaana,’ ‘Gaŋɛ Za’adaana’ la ‘Naaŋɔ Za’adaana.’ Ge Yezu ni yi’ira Yehowa la to ‘Sɔ.’ Eŋa n yi’iri en bala la pa’alɛ ti Yehowa boti la a yamesi ana du’a du’a la en wuu bia n ani du’a du’a la a sɔ se’em la. Bala la, Yezu yuun pa’alɛ tɔ ti to mina ti Yehowa nɔŋɛ tɔ wuu Sɔ n nɔŋɛ a kɔma se’em la. Basɛ ya ti to bisɛ Yezu n dekɛ yelebire la n de “Sɔ” la tum tuuma se’em sugumnɔɔrɛ buyi.

14. Yezu pa’alɛ to la wani ti la niɛ peelumi ti tomam ayima ayima woo dela tuulum bɔ’ɔra to saazuo Sɔ la? (Matu 10:​29-31) (Bisɛ foote la.)

¹⁴ Yia la, basɛ ya ti to geele Yezu n tɔɣɛ sɛla ti la bɔna Matu 10:​29-31. (Kaalɛ.) Tantiita dela niiŋa n pɔ’ɛ ge me ka mina Yehowa pu’usegɔ n de sɛla bii nɔŋɛ en. Ge Yezu yeti to Sɔ la mi a yele mɛ. Niiŋa pika san dɛna tuulum bɔ’ɔra Yehowa, to ta’an tara suure lua ti a fabeli tomam woo yele mɛ, sɛla n sɔi la to nɔŋɛ en mɛ ge me pu’usa en. Yezu yuun yeti to Sɔ la mi to woo zuo zonto kãlɛ mɛ. Hali Yehowa n mi to inya lɔɣɔpiɣesi la basɛ ti to tara suure lua ti a fabeli to yele mɛ paa. Yelemɛŋɛrɛ, Yezu boti la to baŋɛ ti tomam ayima ayima woo dela tuulum bɔ’ɔra to saazuo Sɔ la.

15. Yezu n tɔɣɛ sɛla ti la bɔna Yon 6:44 la pa’alɛ hon ti ho saazuo Sɔ la ani la wani?

¹⁵ Le bisɛ Yezu n dekɛ yelebire la n de “Sɔ” la tum tuuma se’em. (Kaalɛ Yon 6:44.) Ho saazuo Sɔ la soŋɛ ho mɛ ti ho zamesɛ baŋɛ en ge me nɔŋɛ en. Beni n sɔi ti a eŋɛ bala? Sɛla n sɔi la a baŋɛ ti ho dela putɛsonɛdaana. (Tm. 13:48) Yezu n yuun tɔɣɛ sɛla ti la bɔna Yon 6:44 la, daanse’ere a yuun tɔɣeri la sɛla ti Yehowa yuun yele ti la bɔna Yeremia 31:3. Bilam, Yehowa yuun yele a nɛreba ti: “Mam ve’e ya lɛm la n mɛŋa la nɔŋerɛ.” (Yer. 31:3; dekɛ makɛ Hosea 11:4.) Ti’isɛ bisɛ yele wa vuurɛ. To saazuo Sɔ la kɔ’ɔn nyɛta ho halisoma la mɛ ti daanse’ere homea ka mina.

16. (a) Yezu pa’alɛ to la bem ge bem zuo ti la nara ti to tara sakerɛ bɔ’ɔra en? (b) Bem n wan soŋɛ hɔ ti ho ta’an baŋɛ ti Yehowa dela ho Sɔsonkɔ? (Bisɛ daka la zuo n de “Sɔ Se’em Ti To Za’a Kɔ’ɔn Ɛɛra.”)

¹⁶ Yezu yuun yeti Yehowa dela to Sɔ. A boti a pa’alɛ ti: “Yehowa daɣɛ la mam ma’a Sɔ; a me dela ya Sɔ. Mam boti n basɛ ti ya baŋɛ ti a nɔŋɛ ya mɛ ge me fabela yamam ayima ayima woo yele.” Saŋa ase’a la san ana ho wuu Yehowa ka nɔŋɛ hɔ, tɛ̃ra Yezu n tɔɣɛ sɛla la ge me tara sakerɛ bɔ’ɔra en. A yetɔɣum la dela yelemɛŋɛrɛ, a me mi to Sɔ la soŋa mɛ.—1 Pe. 2:22.

KƆ’ƆN TARA SUURE LUA TI YEHOWA NƆŊƐ HO MƐ

17. Beni n sɔi ti to kɔ’ɔn tara suure lua ti Yehowa nɔŋɛ to mɛ?

¹⁷ La nari ti to tara suure lua ti Yehowa nɔŋɛ to mɛ. Wuu ton puɣum zamesɛ sɛla la, Sitaana kɔ’ɔn zigera la a pã’asɛ hɔ ti ho basɛ Yehowa pu’usegɔ. Sitaana boti la to ana buulegɔ. Bala la, a kelum tiregera ti a basɛ ti to ti’isa ti Yehowa ka nɔŋɛ tɔ. La ka nari ti to basɛ ti Sitaana nyɛ yɔ’ɔ pã’asɛ to nyaŋɛ!—Yob 27:5.

18. Ho wan eŋɛ la wani ta’an tara sakerɛ ti Yehowa nɔŋɛ hɔ?

¹⁸ Zaseŋɔ wa poan, ho zamesɛ baŋɛ hon wan eŋɛ se’em ta’an tara suure lua ti Yehowa nɔŋɛ hɔ. Ho ta’an zusɛ en ti a soŋɛ hɔ ti ho nyɛta halise’a ti eŋa nyɛta ho poan la. Ti’isɛ taɣesɛ Baabule gulesegɔ se’a n pa’ali Yehowa n fabeli ho yele ge me nɔŋɛ ho se’em la. Tɛ̃ra ti Yehowa kɔ’ɔn nɔŋɛ la se’em n nɔŋɛ en. Da makɛ tamɛ ti Yehowa basɛ ti a Dayua la ki bo la hon. Wuu Yezu n yele se’em la, tara suure lua ti Yehowa dela ho saazuo Sɔ. Bala la, nɛra san soke ho yeti: “Hon ti’isɛ ti Yehowa nɔŋɛ hɔ?” ho wan yeti: “Ɛɛ, a nɔŋɛ mam! Mam me kɔ’ɔn tiregera la daarewoo ti n eŋɛ pa’alɛ ti mam nɔŋɛ en!”