Naayinɛ Nɔŋerɛ Kɔ’ɔn Bɔna La Wuusa

1-2. Bem yeledaaŋɔ n paari Kristakɔma zo’e zo’e?

MAKƐ bisɛ ti ɔɔreŋɔ n boi mɔɣerɛ tiŋasuka ti kusebekãtɛ vukera. Komi’isi la yɛɣeni ɔɔreŋɔ la mɛ. Komi’isi la ta’an pe’e ɔɔreŋɔ la keŋɛ zɛ’an sa, san daɣena ba dekɛ la ba’arɛ ba ɔɔreŋɔ la. Ba’arɛ la wan basɛ ti ɔɔreŋɔ la ze’a bɔbeyinɛ ti komi’isi la kan pɛ’ɛra ka.

² Yeletoo san paɛ hɔ ti ho ŋmibera, la ta’an ana ho wuu ho dela ɔɔreŋɔ la. Ho puti’irɛ ta’an kan bɔna bɔbeyinɛ. Ho ta’an ni tara puti’irɛ ti Yehowa nɔŋɛ ho mɛ ge soŋera hɔ, ti daarɛ deyima ti ho le ti’isa ti, Yehowa nɔɔ nyɛti yelese’a n paari ho la? (Ym. 10:1; 13:1) Daanse’ere ho zɔ ta’an ni buɣelɛ ho suure ti la ana ho mama. (Mag. 17:17; 25:11) Ge la ni ka yue ti ho le tara puti’ira ayi ayi. Hali ho ta’an ti’isa ti Yehowa tamɛ ho yele mɛ. Ho wan eŋɛ la wani ta’an ze’a kankaŋi yeletooro san paɛ hɔ? Bii ho wan eŋɛ la wani ta’an tara suure lua ti Yehowa nɔŋɛ hɔ ge me bɔta ti a soŋɛ hɔ?

3. Yooma 31:7 la 136:1 pa’alɛ tɔ Yehowa yelemɛŋɛrɛ nɔŋerɛ la wani ge beni n sɔi ti to wan ta’an yeti Yehowa n tari halɛ ana ti la gana za’a? (Bisɛ foote la.)

³ Sɛla n wan soŋɛ hɔ ti ho ta’an ze’a kankaŋi yeletooro poan dela ho tɛ̃ra Yehowa yelemɛŋɛrɛ nɔŋerɛ la yele. (Kaalɛ Yooma 31:7; 136:1.) Yelebire sɛka ti Yenɛ Gɔŋɔ la lerege yeti, “zo’ohogɔ” la vuurɛ dela nɛra n kɔ’ɔn ana tapilapi la nɛra. Yehowa n tari yelemɛŋɛrɛ nɔŋerɛ ti la ka tara makerɛ. Baabule la tɔɣɛ a yele ti, a dela “nɔŋerɛ kantɛ.” (Yɛh. 34:​6, 7) Baabule la le yeti Yehowa “perɛ mɛ la nɔŋerɛ kantɛ bɔ’ɔra sɛba woo n yi’ire” en la. (Ym. 86:5) Ti’isɛ bisɛ gulesegɔ wa n pa’alɛ sɛla: Yehowa kan makɛ tamɛ a yelemɛŋɛrɛ yamesi yele! Ho san tɛ̃ra ti Yehowa ani la tapilapi la hɔ, la wan soŋɛ hɔ ti ho ze’a kankaŋi yeletooro san paɛ hɔ.—Ym. 23:4.

TƐ̃RA TI YEHOWA NƆŊERƐ LA DELA BAABULE PA’ALEGƆ

4. Baabule pa’alegɔ ase’a dela bem ge beni n sɔi ti to sakɛ a?

⁴ Sɛla n wan le soŋɛ hɔ ti ho ze’a kankaŋi yeletooro poan dela ho tɛ̃ra ti Yehowa nɔŋerɛ la dela Baabule pa’alegɔ. Yelesum la n de “Baabule pa’alegɔ la” vuurɛ dela bem bo ho? Daanse’ere ho ti’iseri la hon yuun pɔsɛ zamesa yelese’a Baabule la poan la. Makerɛ, ho zamesɛ baŋɛ ti Naayinɛ yu’urɛ dela Yehowa, Yezu dela Naayinɛ Dayɔba’arɛ, sɛba n ki la ka mi sɛsɛla ge ti tinparɛ wa me wan ta lebege Paradiisi ti nɛresaaleba bɔna bim daarewoo. (Ym. 83:18; Pa. 9:5; Yon 3:16; Lil. 21:​3, 4) Hon yuun sakɛ pa’alegɔ wa la zuo, bala ka basɛ ti nɛra nyaŋɛ pã’asɛ hɔ. Beni n sɔi? Sɛla n sɔi la ho baŋɛ ti pa’alegɔ wa dela yelemɛŋɛrɛ. Basɛ ti to bisɛ sɛla n sɔi ti ho san tɛ̃ra ti Yehowa nɔŋerɛ dela Baabule pa’alegɔ la wan soŋɛ hɔ ti ho kan ti’isa ti Yehowa ka mi yelese’a n paari ho la.

5. Tɔɣɛ pa’alɛ nɛra n wan eŋɛ se’em ta’an zaɣesɛ pumpɔreŋɔ pa’alegɔ.

⁵ Hon yuun pɔsɛ zamesa Baabule la, bem n yuun soŋɛ hɔ ti ho zaɣesɛ pumpɔreŋɔ pa’alegɔ? Daanse’ere, ho yuun dekɛ sɛla ti ba pa’ala hɔ ho pu’usegɔ poan la makɛ la Baabule la n pa’alɛ sɛla la. To geele pa’alegɔ ayima bisɛ: To makɛ yeti ho yuun sakɛ ti Yezu n de Gaŋɛ Za’a Naayinɛ. Ge hon zameseri Baabule la, ho ni soke homea yeti, ‘Pa’alegɔ wa sirum dela yelemɛŋɛrɛ?’ Hon zamesɛ Baabule la nyɛ yelese’a la, ho baŋɛ ti lebesego la dela aayi. Ti ho nyaa zaɣesɛ pumpɔreŋɔ pa’alegɔ la ge sakɛ bo Baabule yelemɛŋɛrɛ la n de, Yezu dela “Dayɔdeeŋa,” “Na’ayenɛ Dayɔa ma’an la.” (Kol. 1:15; Yon 3:18) Yelemɛŋɛrɛ la dela, pumpɔreŋɔ pa’alegɔ ta’an ‘nyɛ nyɛɣerɛ’ ti la kpe’em bo to ti to zaɣesɛ a. (2 Ko. 10:​4, 5) Ge hon zaɣesɛ a la, ho ka le tara sakerɛ bɔ’ɔra pumpɔreŋɔ pa’alegɔ.—Flp. 3:13.

6. Beni n sɔi ti ho tara puti’irɛ ti Yehowa ‘yelemɛŋɛrɛ nɔŋerɛ’ la kɔ’ɔn bɔna la bala wuusa?

⁶ Ho wan ta’an eŋɛ bala mea nɔɔ zamesɛ baŋɛ Baabule la n pa’alɛ Yehowa nɔŋerɛ se’em. Yeletooro san paɛ hɔ ti ho ti’isa ti Yehowa ka nɔŋɛ hɔ, ho ta’an soke homea yeti, ‘Mam n ti’iseri sɛla wa dela yelemɛŋɛrɛ?’ Nyaa dekɛ hon ti’iseri sɛla la makɛ la Yehowa nɔŋerɛ la ti Yooma 136:1 tɔɣɛ de yele ti la dɛna zaseŋɔ wa zuo yelesum la. Yelebire sɛka ti ba lerege yeti, “zo’ohogɔ” la pa’alɛ la yelemɛŋɛrɛ nɔŋerɛ. Bala la, beni n sɔi ti Yehowa basɛ ti Yoomadaana la pa’alɛ A nɔŋerɛ la bala? Beni n sɔi ti ba gulesɛ yelesum la n de “a zo’ohogɔ ka tare ba’ahegɔ” sugumnɔɔrɛ 26 yuunɛ wa poan? To baŋɛ ti Yehowa yelemɛŋɛrɛ nɔŋerɛ dela Baabule pa’alegɔ, wuu Baabule pa’alegɔ se’a ti ho sakɛ la. Ho san ti’isa ti Yehowa ka nɔŋɛ hɔ bii ho ka tari vuurɛ bala daɣɛ yelemɛŋɛrɛ. Zaɣesɛ putɛ̃kaŋa wuu hon zaɣesɛ pumpɔreŋɔ pa’alegɔ se’em la!

7. Pa’alɛ gulesegɔ se’a n sirum basɛ ti ho tara puti’irɛ ti Yehowa nɔŋɛ hɔ.

⁷ Baabule la tari la yɛla zo’e zo’e n basɛ ti to baŋɛ ti Yehowa nɔŋɛ to mɛ. Makerɛ, Yezu yele a podɔleba ti: “Ya gane niiŋbibihe kekeko.” (Mt. 10:31) Yehowa mea yele a nɛreba yeti: “N wan eŋɛ te ho kpe’em, n wan tara hɔ la n yelemɛŋɛrɛ paŋa ge bɔ’ɔra hɔ nyaŋerɛ.” (Isa. 41:10) Bisɛ sɛla ti ba yele la n niɛ peelumi se’em. Yezu ka yeti, ‘Ya ta’an gana.’ Yehowa me ka yeti, ‘Daanse’ere n wan soŋɛ ya.’ Ge ba tuɣum yeti: “Ya gane,” “N wan eŋɛ te ho kpe’em.” Yele san paɛ hɔ ti ho ti’isa ti Yehowa ka nɔŋɛ hɔ, gulesegɔ ana wa kan yeen soŋɛ hɔ ti la ana ho la mama ge la wan basɛ ti ho baŋɛ ti a sirum nɔŋɛ ho mɛ. Sɛla ti gulesegɔ la yele la dela yelemɛŋɛrɛ. Ho san zusɛ Yehowa ge ti’isa taɣesa gulesegɔ ana wa, hon me wan ta’an yele yelese’a n boi 1 Yon 4:16 la. La yeti: “Tomam mɛhe mi ge nam nɔŋse’ere te Yenɛ tara bɔ’ɔra tɔ la.”a

8. Ho wan eŋɛ la wani ho san ti’isa ti Yehowa ka nɔŋɛ hɔ?

⁸ Ge saŋa ase’a la san ana ho wuu Yehowa ka nɔŋɛ hɔ, ho wan eŋɛ la wani? Dekɛ lan ani ho se’em la makɛ la hon mi sɛla la. Lan ani to se’em la ta’an tee ge Yehowa n nɔŋɛ to se’em la ka teeri. To san ka sakɛ ti Yehowa nɔŋɛ tɔ, la pa’alɛ ti to zaɣeseri la a halise’ere n di mi’a la n de a nɔŋerɛ la.—1 Yon 4:8.

TI’ISƐ BISƐ YEHOWA N “NƆŊƐ [HO]” SE’EM

9-10. Yezu yuun tɔɣeri la bem yele eŋa n yuun yeti: “Sɔ la mɛŋa me nɔŋɛ ya mɛ” ti la bɔna Yon 16:​26, 27 la? (Bisɛ foote la.)

⁹ To wan zamesɛ baŋɛ Yehowa n nɔŋɛ to se’em to san geele bisɛ Yezu n yuun yele a podɔleba la sɛla la. A yeti: “N Sɔ la mɛŋa me nɔŋɛ ya mɛ.” (Kaalɛ Yon 16:​26, 27.) Yezu yuun ka tɔɣɛ bala ti a podɔleba la puurɛ yeen pee. Kaalegɔ zɛ’ɛsi la n boi pooren la pa’alɛ ti, Yezu yuun ka tɔɣeri la lan ani a podɔleba la se’em sankaŋa. Ge a yuun pa’ali ba la sɛla n boi de to’ore n de zusega.

¹⁰ Yezu yuun yele a podɔleba la ti ba zusera dɔla eŋa yu’urɛ la poan ge daɣɛ ti ba zusera bɔ’ɔra eŋa. (Yon 16:​23, 24) La yele yuun pakɛ mɛ ti ba mina bala. Yezu kum isigeri la pooren, podɔleba la yuun ta’an ti’isa ti la nari ti ba zusa bɔ’ɔra Yezu. Sɛla n sɔi la, ba yuun mi ti Yezu dela ba zɔ. Ba yuun ta’an ti’isa ti eŋa n ba’ɛ nɔŋɛ ba la zuo, a wan kelese ba zusega ge yele a Sɔ la ti a soŋɛ ba. Ge Yezu yele ba yeti, la ka nari ti ba ti’isa bala. Beni n sɔi? Se’ere n sɔi la, a yuun yeti: “N Sɔ la mɛŋa me nɔŋɛ ya mɛ.” Yelemɛŋɛrɛ, zusega dela Baabule pa’alegɔ. Ti’isɛ bisɛ bala vuurɛ n de sɛla bɔ’ɔra hɔ: Hon zamesɛ Baabule la zuo ti ho mina Yezu ge me nɔŋɛ en. (Yon 14:21) Wuu yuun kɔbesɛka n diŋɛ nɛŋa podɔleba la, ho me ta’an yese ho suuren zusa Naayinɛ ge mina ti a “mɛŋa me nɔŋɛ [ho]” mɛ. Ho eŋɛ pa’alɛ ti ho sakɛ yelesum wa mɛ sansɛka woo ti ho zusera Yehowa.—1 Yon 5:14.

MINA YELESE’A N BASƐ TI HO TARA PUTI’IRA AYI AYI

11. Beni n sɔi ti Sitaana puurɛ wan pee to san ti’isa ti Yehowa ka nɔŋɛ tɔ?

¹¹ Beni n wan ta’an basɛ ti to ti’isa ti Yehowa ka nɔŋɛ tɔ? Ho ta’an yeti Sitaana n basɛ ti to ti’isa bala, yelemɛŋɛrɛ me fii boi bim. Saɣena la “eere kaara mɛ” ti a pã’asɛ tɔ. A puurɛ me wan pee to san pɔsɛ ti’isa ti Yehowa ka nɔŋɛ tɔ. (1 Pe. 5:8) Yehowa n nɔŋɛ to la zuo ti a dekɛ lua bunɔ la bo to ge Sitaana boti la to ti’isa ti to ka nari lua bunɔ la. (Heb. 2:9) Ge to san ti’isa ti Yehowa ka nɔŋɛ tɔ, ani puurɛ n wan pee? Sitaana. To giila san kɔ’ɔsɛ ti to basɛ Yehowa pu’usegɔ, ani puurɛ n wan pee? La dela Sitaana. Sitaana boti la to ti’isa ti Yehowa ka nɔŋɛ tɔ. To me san ti’isa ti Yehowa ka nɔŋɛ tɔ a puurɛ wan pee. La dela Sitaana ti Yehowa tuɣum ka nɔŋɛ. Sitaana ‘pã’asegɔ yɛla’ la ayima dela a kɔ’ɔn tiregera mɛ ti to ti’isa ti Yehowa zaɣesɛ to mɛ ge me ka nɔŋɛ tɔ. (Ep. 6:11) To san mina to dima la n kɔ’ɔn tiregera ti a eŋɛ sɛla la, to wan lu to suure “zagahɛ . . . sagona la.”—Yam. 4:7.

12-13. Ton ka di mi’a la ta’an basɛ ti to ti’isa ti Yehowa ka nɔŋɛ to la wani?

¹² Yele deyima n le basɛ ti to ta’an ti’isa ti Yehowa ka nɔŋɛ tɔ. La dela bem? La dela ton ka di mi’a la. (Ym. 51:5; Arom 5:12) Be’em n basɛ ti nɛresaaleba ka tara bɔnsoŋa la Naayinɛ. La me sa’am la to puti’ira, to suure la to inganɛ.

¹³ Be’em n basɛ ti to ka ita yɛla soŋa. La basɛ ti to ti’isa la sɛla n ka ani soŋa, ti putɛyiila, dabeem la nyanɛ tara tɔ. La ni ana to la bala se’em ma’a ti to tum be’em. Ton ka di mi’a la zuo, la me ta’an ana to bala ge daɣɛ Naayinɛ n naam to se’em n bala. (Arom 8:​20, 21) Wuu loore kɔba n ni sige ge ka ta’an zɔta se’em la, bala mea nɔɔ ti ton ka di mi’a la zuo to ka ta’an ita yɛla wuu Yehowa n naam tɔ se’em la. Bala n sɔi ti saŋa ase’a to ni ti’isa ti Yehowa ka nɔŋɛ to la. La san ana to bala, to tɛ̃ra ti Yehowa “kanregɛ [mɛ ge] tara a nɔbiŋere la zo’ohogɔ bɔ’ɔra sɛba woo n nɔŋɛ en ge dɔla a nɔɔrɛ.”—Ne. 1:5.

14. To san ti’isa lua bunɔ la yele, la wan soŋɛ to la wani ti to kan ti’isa ti Yehowa ka nɔŋɛ tɔ? (Arom 5:8) (Bisɛ daka la zuo n de “Gu Homea ‘Be’em Pã’asegɔ’ Yɛla Poan.”)

¹⁴ Yelemɛŋɛrɛ, saŋa ase’a to ta’an ti’isa ti la ka nari ti Yehowa nɔŋɛ tɔ. La dela yelemɛŋɛrɛ ti, to puɣum ka nara ti a nɔŋɛ tɔ. Bala n sɔi ti a nɔŋerɛ la bɔna de to’ore la. Daɣɛ tomea itisoŋɔ zuo ti Yehowa nɔŋɛ tɔ. Ge Yehowa dekɛ la lua bunɔ la bo to lan wan eŋɛ se’em ti a di sugeri bo to be’em la, sɛla n sɔi la a nɔŋɛ to mɛ. (1 Yon 4:10) Tɛ̃ra ti Yezu yuun wa’ana ti a faaɛ la be’emdoma ge daɣɛ tontɔɔdoma. (Kaalɛ Arom 5:8.) Nɛnɛra ka boi n wan ta’an eŋɛ sɛla n di mi’a. A me ka eeri ti to ita sɛla woo ti la di mi’a. To san baŋɛ ti to be’em la n basɛ ti to ti’isa ti Yehowa ka nɔŋɛ tɔ, bala wan basɛ ti to lu suure zaɣesɛ putɛ-ana.—Arom 7:​24, 25.

KƆ’ƆN TARA YELEMƐŊƐRƐ

15-16. To wan tara suure lua la bem poan, to san kelum tara yelemɛŋɛrɛ bɔ’ɔra Yehowa ge bem zuo? (2 Samuel 22:26)

¹⁵ Yehowa boti la to kɔ’ɔn “gin en kaŋkaŋe.” (Tɛɛ. 30:​19, 20) To san eŋɛ bala, to tari suure lua ti a wan tara yelemɛŋɛrɛ bɔ’ɔra tɔ. (Kaalɛ 2 Samuel 22:26.) To san tara yelemɛŋɛrɛ bɔ’ɔra Yehowa, to tari suure lua ti a wan soŋɛ tɔ ti to ta’an ŋmibe bɔŋa woo poan.

¹⁶ Wuu ton zamesɛ se’em la, to tari la yɛla zo’e zo’e ti la nara ti to kɔ’ɔn ze’a kankaŋi hali la yeletooro poan. To mi ti Yehowa nɔŋɛ to mɛ ge me wan soŋɛ tɔ. Baabule la pa’alɛ la bala. To san ti’isa ti Yehowa ka nɔŋɛ tɔ, to ti’isɛ taɣesɛ sɛla ti to mina ti la dɛna yelemɛŋɛrɛ gana tomam mea n yeen ti’isa sɛla. Basɛ ya ti to tara suure lua la Baabule yelesum la ge mina ti Yehowa yelemɛŋɛrɛ nɔŋerɛ la kɔ’ɔn bɔna la bala wuusa.