Soŋɛ Nɛresɛba N Boti Ba Zamesɛ Naayinɛ Yɛla

1. To san ni mɔɔlɛ yelesoma la bo nɛreba, ba ni eŋɛ la wani? (Tooma 13:​47, 48; 16:​14, 15)

NƐREBA zo’e zo’e n yuun boi yuun kɔbesɛka n deŋɛ nɛŋa la yuun to’e Yezu yɛla mɛ soŋa ge me yuun ni bɔta ti ba dɛna a podɔleba bilam bilam. (Kaalɛ Tooma 13:​47, 48; 16:​14, 15.) Bala mea nɔɔ ti nɛreba basɛba zina beere wa puurɛ me ni pee ba san wum yelesoma la. Hali sɛba n ni zaɣesɛ Na’am yelesum la, ni ta to’e yelesum la mɛ pooren. Bem ti la nara ti to eŋɛ, to san ni seke sɛba n boti ba zamesɛ Naayinɛ yɛla la?

2. Sodeni poan ti ton eeri podɔleba la makɛ la nɛra n biseri a gaadin se’em?

² Geele makerɛ wa bisɛ. To wan ta’an dekɛ ton eeri podɔleba la makɛ la nɛra n biseri a gaadin se’em. Dia la za’a ni ka maalɛ buyina. Basɛba ta’an maalɛ kalum. Kaara la ni dekɛ la bamam yia ge a wan kelum basera ko’om ge maala zɛ’an la, la wan eŋɛ se’em ti sɛba n gee la me maalɛ soŋa. Bala mea nɔɔ, to san tɔɣɛ bo nɛra ti a bɔta yelesum la, la nari ti to eŋɛ kalam soŋɛ en ti a ta’an dɛna Krista podɔla. Ge to me wan kelum soŋera sɛba n nan ka eŋɛ pa’alɛ ti ba boti yelesum la ti ba bɔkɛ sɛla n sɔi ti la nara ti ba zamesɛ Naayinɛ yɛla. (Yon 4:​35, 36) To san ta’an ti’isɛ baŋɛ nyaa nɛra la boti yelesum la bii a ka boti, bala wan soŋɛ tɔ ti to mina ton wan soŋɛ en se’em. Basɛ ya ti to nyaa sɔsɛ ton wan eŋɛ sɛla to san seke nɛra n boti a kelese yelesum la. To me wan sɔsɛ ton wan eŋɛ se’em soŋɛ ba ti ba kɔ’ɔn nyɛta nɛŋa tɔlega.

TON WAN EŊƐ SE’EM SOŊƐ SƐBA N BOTI BA ZAMESƐ NAAYINƐ YƐLA

3. To wan eŋɛ la bem, nɛra san bɔta ti a zamesɛ Baabule la? (1 Korint 9:26)

³ To san seke nɛreba n boti yelesum la, to boti la to soŋɛ ba ti ba zamesɛ baŋɛ Yehowa ge ta’an ana du’a du’a la en. Bala la, la nari ti to ni eŋɛ kalam tɔɣɛ Baabule zamesegɔ yele ge me beem ba ti ba wa’an to zamesegɔ na.—Kaalɛ 1 Korint 9:26.

4. Bo makerɛ pa’alɛ nɛra n boti a zamesɛ Baabule bilam bilam.

⁴ Tɔɣɛ Baabule zamesegɔ yele. Nɛreba basɛba ni kɔ’ɔn sakɛ Baabule zamesegɔ la bilam bilam. Makerɛ, Alamisidaarɛ ayima ti pɔɣesa’arɛ daa keŋɛ paɛ na’am mɔɔlegɔ toroko la loe Tara Vom Somɔ Daarewoo! gɔnlɛmlɛm. Mabipɔka la n ze na’am mɔɔlegɔ toroko la zɛ’an la daa yele pɔɣesa’arɛ la ti to tari gɔnlɛmlɛm la ita la Baabule zamesegɔ zaŋa. Pɔɣesa’arɛ la daa yeti a wan bɔta zamesegɔ la ge me dekɛ a fon nɔmba bo en. Dedaarɛ nɔɔ ti pɔɣesa’arɛ la tɛɣesɛ mabipɔka la ti a soke baŋɛ se’em ma’a ti ba wan nyaŋɛ zamesɛ. Mabipɔka la daa yeti ba ta’an zamesɛ bakwai la ba’asegɔ poan ge pɔɣesa’arɛ la daa soke en yeti: “Ho tuɣum kan wa’an beere na? Mam wan bɔna.” Yiimbeere la nɔɔ ti ba daa zamesɛ. Pɔɣesa’arɛ la daa keŋɛ bakwai kaŋa ba’asegɔ zamesegɔ mɛ ge kɔ’ɔn nyɛta nɛŋa tɔlega kalam kalam.

5. To wan eŋɛ la wani baŋɛ ton wan tɔɣɛ Baabule zamesegɔ yele bo nɛra se’em ti la kɛ̃ a suure? (Bisɛ fɔɔra la.)

⁵ Yelemɛŋɛrɛ la dela, la ka nari ti to ti’isa ti nɛra woo wan to’e yelesum la kalam wuu pɔɣesa’arɛ la ti to tɔɣɛ a yele la. La ni yue mɛ ge ti basɛba nyaa sakɛ. Ge to san tara putɛsonɛ ge kelum ita pa’ala ti to ti’iseri nɛra la yele, fii fii, a ta’an ta sakɛ ti a zamesɛ. To wan ta’an tɔɣɛ Baabule zamesegɔ yele la wani bo nɛra? To geele ya mabiisi basɛba n nyaŋɛ pɔsɛ Baabule zamesegɔ zo’e zo’e n pa’alɛ ton wan ta’an eŋɛ bala se’em.

6. To wan ta’an yele la bem ti nɛra la baŋɛ ti Baabule zamesegɔ wan soŋɛ en?

⁶ Mabiisi wa yeti tisi sise’esi poan, ho san yeti ho tɔɣɛ Baabule zamesegɔ yele, la wan ana soŋa ti ho da kɔ’ɔn yele nɛra la ti la dela Baabule zamesegɔ, bii ho yele en ti hon yeti ho pa’alɛ en la Baabule. Ba yeti la wan ana soŋa ti ho tuɣum yele nɛra la ti la dela sɔsega, bii la dela sɛla n wan soŋɛ en ti a mina Baabule la. Ho san bɔta ti ya ta tɔ̃kɛ sɔsega la, ho ta’an yeti, “La dela pakerɛ la Baabule la n tari sokese’a n pakɛ to paa lebesego la” bii ho yeti, “Baabule la yeen daɣɛ pu’usegɔ gɔŋɔ ge ku me wan ta’an soŋɛ tɔ yɛla zo’e zo’e poan.” Ho ta’an le yele en ti: “Ho ta’an dekɛ mita wana fii zamesɛ sɛla n wan soŋɛ hɔ ho vom poan.” Bala wan nyana hon yele nɛra la ti ya ta’an zamesa bakwai woo, ti la da ana en wuu la dela pɛ̃regerɛ ti a zamesɛ la.

7. Wani ma’a ti basɛba yuun pɔsɛ wum yelemɛŋɛrɛ la? (1 Korint 14:​23-25)

⁷ Beem ba ti ba wa’an zamesegɔ na. La ani wuu tuntuna Paul saŋa la, nɛreba basɛba yuun wum yelemɛŋɛrɛ la se’em ma’a ti ba keŋɛ zamesegɔ la. (Kaalɛ 1 Korint 14:​23-25.) La me ani la bala zina beere wa. Nɛreba zo’e zo’e ni nyɛta la nɛŋa tɔlega kalam kalam ba san pɔsɛ kena zamesegɔ. Wani ma’a ti la nara ti to beem ba ti ba wa’an zamesegɔ na? Tara Vom Somɔ Daarewoo! gɔŋɔ la zaseŋɔ 10 la poan, ba beem Baabule zamesegɔdaana la ti a wa’an zamesegɔ na ge la ka nari ti ho gura ti ya zamesɛ ta paɛ bilam ge ti ho nyaa beem en. Ho san kɔ’ɔn pɔsɛ sɔsera la nɛra, ho ta’an beem en ti a wa’an bakwai ba’asegɔ zamesegɔ la na. Daanse’ere ho ta’an pa’alɛ en yetɔɣum la zuo n de sɛla bii Pigera Zontua Zamesegɔ la n tɔɣeri sɛla yele.

8. To wan nyaŋɛ yele nɛra la bem to san yeti to beem en ti a wa’an to zamesegɔ na? (Isaiah 54:13)

⁸ Ho san beem nɛra, pa’alɛ en tomam zamesegɔ la n boi de to’ore se’em la eŋa n puɣum mina sɛla la. Baabule zamesegɔdaana n pɔsɛ wa’an to zamesegɔ na nyɛ ton iti Pigera Zontua Zamesegɔ se’em la, soke a pa’alegɔdaana la yeti, “Pigera Zontua Zamesegɔ bisegadaana la mi nɛra woo yu’ura mɛ?” Ti mabipɔka la yele en ti to muuri mɛ ti to baŋɛ nɛra woo yu’urɛ tansugere la poan wuu to yidoma yu’ura ti to mina se’em la. Baabule zamesegɔdaana la yeti, mam n keni pu’usegɔ seko la, nɛreba zo’e zo’e ka mi taaba yu’ura. To me ta’an pa’alɛ nɛra la to zamesegɔ la n boi de to’ore se’em. (Kaalɛ Isaiah 54:13.) To ni laɣesɛ la taaba pu’usa Yehowa, zamesa a yɛla ge me kpɛmesa taaba giila. (Heb. 2:12; 10:​24, 25) Wana wa zuo la, ton tigese to zamesegɔ la se’em la soŋeri to mɛ ti to zamesa Baabule ge ka tara malema yɛla pa’asa bim. (1 Ko. 14:40) Leyɛ’ɛsa, to zamesegɔ zɛ’an la n ani se’em la basɛ ti la dɛna la naana bɔ’ɔra tɔ ti to zamesa. Ton ka dekɛ tomea pa’asɛ nalɛɣerɛ yɛla poan la zuo, to ka tɔɣeri ba yɛla. To me ka ŋmɛ̃’ɛri nɔkpe’ene la nɛreba puti’irɛ n de se’em yɛla poan. La wan ana soŋa ti ho te’ele ŋmɛ vidiyo la zuo n de Bem Ti To Ita Na’am Pu’usegɔ Deo Poan? pa’alɛ nɛra la. Ho san eŋɛ bala, a wan baŋɛ ton iti sɛla to Na’am Pu’usegɔ Deo la poan.

9-10. To san beem nɛra ti a wa’an zamesegɔ na to wan eŋɛ la wani ti dabeem kan tara en? (Bisɛ foote la.)

⁹ Sɛla n sɔi ti nɛreba ka bɔta ti ba wa’an to zamesegɔ zɛ’an la dela, ba ti’isɛ ti to wan yeti ba dɛna Yehowa Sɛɛradoma. Basɛ ti nɛra la baŋɛ ti to to’oseri saama mɛ. Bala a san bɔta, a ta’an yeen wa’ana kelese ge la me daɣɛ pɛ̃regerɛ ti a yele sɛla. Deodoma la ba kɔma ta’an wa’an to zamesegɔ la na. To ni ka yelege kɔma la ma’a pa’ala ba ge tomam la kɔma la za’a ni laɣum zĩ’a mɛ zamesa. Wana wa basɛ ti dɔɣereba la ni mina ti kɔma la ka boi dɛŋa poan ge me mina kɔma la n zameseri sɛla. (Tɛɛ. 31:12) To ka iti kɔlɛksin ge to tuɣum dɔla la Yezu n yuun pa’alɛ ti: “Ya ka yɔɔre ge te mam bɔ’ɔra ya. Bala, bo’ore ya nɛreba ge da tɛn’ɛha yɔɔrɛ yele.” (Mt. 10:8) Ho me ta’an yele en ti la daɣɛ pɛ̃regerɛ ti a yɛ lɔɣɔrɔ n eŋɛ ligeri wa’an to zamesegɔ na. Yehowa biseri la to suuren ge daɣɛ nɛra n ani se’em.—1 Sa. 16:7.

¹⁰ Nɛra san wa’an zamesegɔ na, tiregɛ la ho to’e en soŋa. Basɛ ti a baŋɛ keendoma la, la mabiisi la. A san baŋɛ ti mabiisi la nɔŋɛ nɛreba ge fabela a yele, bala wan basɛ ti a bɔta ti a lebe na. A san ka tara Baabule, basɛ ti ya laɣum bisa ho denɛ la poan. Soŋɛ en ti a bɔkɛ yetɔɣum la ti ba bɔ’ɔra la ge me pa’alɛ en ton naɛ taaba zamesa se’em.

HO SAN PƆSƐ BAABULE ZAMESEGƆ

11. Ho wan eŋɛ la wani pa’alɛ ti ho tari gilema bɔ’ɔra ho Baabule zamesegɔdaana n loe sansɛka la?

¹¹ Bem yɛla n nari ti to tɛ̃ra to san zamesa nɛra Baabule la? Mina ti ho Baabule zamesegɔdaana la ka tari nɛŋa, bala la eŋɛ pa’alɛ ti ho bo’ori en gilema. Makerɛ, hon la ho Baabule zamesegɔdaana la n loe sansɛka ti ya zamesa la, tiregɛ dɔla bala hali ya gingilega la poan nɛreba san puɣum ka dɔla saŋa. Lɛyɛ’ɛsa, la wan ana soŋa ti ho yia zamesegɔ la, ho eŋɛ de gi’a gi’a. Mabiisi basɛba n kumesɛ yeti, la ani soŋa ti ya san pɔsɛ zaseŋɔ ayina, ya tiregɛ zamesɛ de ba’asɛ kalam hali nɛra la san puɣum nɔŋɛ sɔsega. Da tɔɣera zɔ’ɔra. Basɛ ti Baabule zamesegɔdaana la tɔɣɛ sɛla n boi a suuren.—Mag. 10:19.

12. To nari ti to tɛ̃ra la bem, to san pɔsɛ zamesa nɛra Baabule la?

¹² To san pɔsɛ zamesa nɛra Baabule la, to puti’irɛ za’a dela to soŋɛ en ti a baŋɛ Yehowa la a bia Yezu ge nɔŋɛ ba. To san wan nyaŋɛ eŋɛ bala la nari ti to pa’alɛ ba Baabule la n pa’alɛ sɛla ge daɣɛ tomam mea n ti’iseri sɛla. (Tm. 10:​25, 26) Tuntuna Paul yuun eŋɛ la makesonɛ. A yuun ni san pa’ala nɛreba a ni kɔ’ɔn tɔɣera la Yezu yɛla, se’em ti Yehowa yuun tum en ti a wa’ana soŋɛ tɔ ti to baŋɛ En ge nɔŋɛ En la. (1 Ko. 2:​1, 2) Paul yuun basɛ ti la niɛ peelumi la yele n pakɛ se’em ti Yezu podɔleba tara halesoma. To wan ta’an dekɛ hala wa makɛ la salema bii salenpɛɛla bii kugasaalehe. (1 Ko. 3:​11-15) Halɛ ana wa dela sakerɛ, yɛm, bɔkerɛ, la ton wan zɔta Yehowa. (Ym. 19:​9, 10; Mag. 3:​13-15; 1 Pe. 1:7) Tɔɣesa Paul n yuun ni pa’ala se’em la ta’an soŋɛ ho Baabule zamesegɔdoma ti ba tara sakerɛ n kpe’em ge me tara bɔnsoŋa la to saazuo Sɔ la.—2 Ko. 1:24.

13. Ho san zamesa nɛra, ho wan eŋɛ la wani tara bɔkerɛ ge di’isa suure? (2 Korint 10:​4, 5) (Bisɛ foote la.)

¹³ Tɔɣesa Yezu n yuun ni pa’ala se’em la, tara bɔkerɛ ge di’isa suure. Da sɔkera en sokese’a n wan basɛ ti valum tara en. La san kpe’em bo en ti a bɔkɛ sɛla ti ho pa’ala en la, ho ta’an tɔ̃kɛ zamesegɔ la ge ti ya ta sɔsɛ de yele pooren. Da pɛ̃regɛ en ti a sakɛ sɛla ti ho pa’ala en la ge tuɣum bo en saŋa ti a ti’isɛ de yele. (Yon 16:12; Kol. 2:​6, 7) Baabule la dekɛ pumpɔreŋɔ pa’alegɔ makɛ la yɛla n nyɛ nyɛɣa nɛra suuren ti la nara ti a dekɛ a basɛ. (Kaalɛ 2 Korint 10:​4, 5.) La daɣɛ naana ti ho Baabule zamesegɔdaana basɛ eŋa en sakɛ bo yelese’a la. Bala la, soŋɛ en ti a dekɛ amea delum Yehowa. Wana wan basɛ ti la dɛna naana bo en ti a zaɣesɛ pumpɔreŋɔ pa’alegɔ.—Ym. 91:9.

SAAMA SAN WA’AN TO ZAMESEGƆ NA

14. To wan eŋɛ la wani pa’alɛ ti to nɔŋɛ sɛba n ni wa’an to zamesegɔ na la?

¹⁴ La ka pakɛ la nɛreba n ze’ele zɛ’an bii ban tari ligeri se’em, Yehowa boti la to ita nɛra woo soŋa. (Yam. 2:​1-4, 9) Bala la, to wan eŋɛ la wani pa’alɛ ti to nɔŋɛ sɛba n ni wa’an to zamesegɔ na la?

15-16. To wan eŋɛ la wani basɛ ti la ana saama buɣa buɣa ba san wa’an to zamesegɔ na?

¹⁵ Sɛla n sɔi ti nɛreba basɛba ni wa’an to zamesegɔ na la dela, ba ni bɔta ti ba baŋɛ ton iti to zamesegɔ se’em, bii nɛra n ni beem ba ti ba wa’ana. Bala la, ho san nyɛ saana zamesegɔ zɛ’an, sɔsɛ la en. Nyɔɣɛ en zɔtɔ ge da ba’ɛ tɔɣera zɔ’ɔra, la wan eŋɛ se’em ti valum kan tara en. Basɛ ti a zĩ’ire lɛm hɔ ge laɣum bisa ho Baabule la, la gɔnseko ti to zamesera la. Leyɛ’ɛsa, ti’isɛ bisɛ hon wan eŋɛ se’em basɛ ti la ana en mama. Buraa ayima n tabelɛ wa’an to Na’am Pu’usegɔ Deo na, yuun yele mabisɛka n pu’usɛ en la ti, a suure n sa’am la eŋa n yɛ yire lɔɣɔrɔ la. Mabia la yuun buɣelɛ a suure mɛ ge yele en ti tomam Yehowa Sɛɛradoma kɔ’ɔn ana mɛ wuu nɛra woo n ani se’em la. Buraa wa yuun ta muse la ko’om ge a yuun ka makɛ tamɛ mabia la n yuun yele en sɛla la. To me san ita pa’ala ti to fabeli nɛra la yele, to bisɛ soŋa ge da sɔkera en yelese’a n wan basɛ ti valum tara en bii to sɔkera en yelese’a n ka pakɛ tɔ.—1 Pe. 4:15.

¹⁶ To wan ta’an le eŋɛ sɛla basɛ ti la ana saama buɣa buɣa. Makerɛ, to san tara tuunɛ bii to bo’ori la lebesego, la nari ti to tɔɣera ti gilema bɔna bim ge da tɔɣɛ sɛla giisɛ ba pu’usegɔ yɛla bii ba sakerɛ yɛla. Da tɔɣera yelese’a n wan daam saama la bii n wan basɛ ti ba kan bɔta ti ba lebe na. (Titus 2:8; 3:2) Makerɛ, to ka boti to tɔɣera ba sakerɛ yɛla sose’ere poan ti gilema ka bɔna bim. (2 Ko. 6:3) Mabiisi n bo’ori yetɔɣum nari ti ba bisɛ bamea soŋa yele wa poan. Ba me ita pa’ala ti ba ti’iseri sɛba n daɣɛ mabiisi la yele, doose la ban wan pa’alɛ yelebɛa ase’a vuurɛ ti la niɛ peelumi ti ba ta’an bɔkɛ soŋa.

17. To san nyɛ nɛra n boti a zamesɛ Baabule la, to zugbere yele dela bem?

¹⁷ Podɔleba eere tuuma la kɔ’ɔn dɛna la atɔtɔ yele dabeserɛ woo poan. To wan kɔ’ɔn ɛɛra la “sɛba te Na’ayenɛ loe te ba tara vom sebo n ka tare ba’ahegɔ.” (Tm. 13:48) To san nyɛ ba, la ka nari ti to gu’una ti to pɔsɛ Baabule zamesegɔ la ba ge beem ba ti ba wa’an zamesegɔ na. To san ita bala, to wan soŋɛ ba ti ba wa’an “vom” sore la poan.—Mt. 7:14.