Hon Wan Eŋɛ Se’em Tara Pupeelum Zo’e Zo’e Na’am Mɔɔlegɔ Tuuma La Poan

1. La ani mabiisi basɛba la wani ba san mɔɔla yelesoma la bɔ’ɔra nɛreba? (Bisɛ foote la.)

TON de Yehowa nɛreba la, to mɔɔli yelesoma la bɔ’ɔra nɛreba mɛ, se’ere n sɔi la to nɔŋɛ to saazuo Sɔ la mɛ ge bɔta ti to soŋɛ nɛreba ti ba me baŋɛ en. Na’am mɔɔlegɔdoma zo’e zo’e puurɛ pee mɛ ti ba mɔɔla. Ge la kpe’em bo basɛba mɛ ti ba mɔɔla la pupeelum. Beni n sɔi? Basɛba ta’an zɔta valum ge me ti’isa ti ba ka ta’an pa’ala soŋa. La kpe’em bo basɛba mɛ ti ba paɛ nɛreba ba yɛa poan. Dabeem me tari basɛba ti daanse’ere nɛreba sunsɔa wan nyie la ba. La boi bim ti mabiisi wa nɔŋɛ Yehowa mɛ paa ge la kpe’em bo ba mɛ ti ba mɔɔlɛ yelesoma la bo nɛresɛba ti ba ka mina. Ge ban mi ti la dela ninmɔ’ɔrɛ tuunɛ la zuo, ba ni tiregɛ mɔɔla mɛ saŋa woo. Bisɛ Yehowa puurɛ n pee la ba se’em!

2. La san kpe’em bo ho ti ho tara pupeelum na’am mɔɔlegɔ tuuma la poan, beni n sɔi ti la ka nara ti ho giila kɔ’ɔsɛ?

² Saŋa ase’a, la ni kpe’em bo ho ti ho tara pupeelum na’am mɔɔlegɔ tuuma la poan? San dɛna bala, da basɛ ti ho giila kɔ’ɔsɛ. Lan ani ho se’em la ta’an pa’alɛ ti ho siregeri la homea ge ka bɔta ti nɛreba puti’irɛ ba’ɛ bɔna ho poan. La le pa’alɛ ti ho ka boti hon la nɛreba ŋmɛ’ɛra nɔkpe’ene. Nɛra me ka boi n iti som bɔ’ɔra nɛreba ge wan bɔta ti ba sunsɔa nyie la en. Ho saazuo Sɔ la bɔkɛ lan ani ho se’em mɛ soŋa soŋa ge bɔta ti a soŋɛ hɔ. (Isa. 41:13) Zaseŋɔ wa poan, to wan geele yɛla anuu n wan soŋɛ tɔ ti to ŋmibe yele ana poan. To me wan bisɛ ton wan eŋɛ se’em tara pupeelum na’am mɔɔlegɔ tuuma la poan.

BASƐ TI BAABULE LA KPEMESE HO GIILA

3. Bem n yuun soŋɛ nɔdɛ’ɛsa Yeremia ti a mɔɔlɛ bo nɛreba?

³ Kɔ’ɔn pɔsɛ diimi sa ti Naayinɛ yetɔɣum la kpemese a nɛreba giila ti ba tum tuunkpe’eŋo. Geele nɔdɛ’ɛsa Yeremia yele la bisɛ. Dabeem n yuun tari en Yehowa n yuun bo en tuunɛ la. Yeremia yuun yeti: ‘N ka mi yetɔɣum, n nan dela bia.’ (Yer. 1:6) Bem n yuun soŋɛ en ti a nyɛ sukpe’ene mɔɔlɛ? Yehowa n yuun yele en sɛla la n yuun kpemese a giila ti a nyaa yeti: ‘La diti la mam kɔ̃ba poan sa wuu bugum la, mam kan ta’an mum n nɔɔrɛ sina.’ (Yer. 20:​8, 9) La boi bim ti zɛ̃sɛka ti Yeremia yuun mɔɔlɛ la yuun basɛ ti la kpe’em bo en mɛ ge yelese’a ti a yuun nyaa ta mɔɔlɛ la yuun kpemeseri la giila.

4. To san kaala Baabule la ge ti’isa taɣesa, la ni soŋɛ to la wani? (Kolose 1:​9, 10)

⁴ Naayinɛ Yetɔɣum la n bo’ori Kristakɔma paŋa. Tuuntuna Paul n yuun gulesɛ gɔŋɔ bo Kolose tansugere la, a yuun yeti ba san zamesɛ mina Naayinɛ puti’irɛ soŋa, la wan soŋɛ ba ti ba ‘kena lan nari se’em Yehowa zɛ’an’ ge ‘wɔna tuunsoma woo biila.’ (Kaalɛ Kolose 1:​9, 10.) Na’am mɔɔlegɔ tuuma la laɣum pa’asɛ tuunsoma la poan mɛ. Bala la, to san kaala Baabule la ge ti’isa taɣesa, to sakerɛ ni kpe’em mɛ Yehowa poan ge ni bɔkɛ lan de ninmɔ’ɔrɛ se’em ti to mɔɔla a Na’am yelesoma la.

5. To wan eŋɛ la wani nyɛ nyuurɔ zo’e zo’e to san kaala ge zamesa Baabule la?

⁵ To san wan nyɛ nyuurɔ Baabule la poan, la nari to to ni ma’ɛ tomea kaala, zamesa ge ti’isa taɣesa. Da kãbela. Ho san kaalɛ gulesegɔ ti la kpe’em ti ho bɔkɛ, da kaalɛ tole. Ge tuɣum dekɛ Watch Tower Publications Index bii Yehowa Sɛɛradoma Viisegɔ Gɔŋɔ la viisɛ yɛla pa’asɛ. Ho san ma’ɛ homea zamesa, ho sakerɛ wan kpe’em ti Baabule la n yele sɛla la dela yelemɛŋɛrɛ. (1 Tes. 5:21) Ho sakerɛ san kpe’em, ho wan bɔta ti ho kɔ’ɔn mɔɔla hon zamesɛ sɛla la bɔ’ɔra nɛreba.

MAASUM SOŊA GE NYAA KEŊƐ NA’AM MƆƆLEGƆ

6. Bem zuo ti la nara ti to maasum soŋa ge nyaa keŋɛ na’am mɔɔlegɔ?

⁶ Ho san maasum soŋa ge keŋɛ na’am mɔɔlegɔ, dabeem kan tara hɔ ti ho tɔɣɛ bo nɛreba. Yezu yuun soŋɛ a podɔleba la mɛ ti ba maasum ge ti a nyaa tum ba ti ba ta mɔɔlɛ. (Lu. 10:​1-11) Ban yuun tari Yezu n pa’alɛ ba sɛla tuna tuuma la zuo, ba yuun tum la tuunsoma zo’e zo’e ti ba puurɛ pee.—Lu. 10:17.

7. To wan maasum la wani ge keŋɛ na’am mɔɔlegɔ? (Bisɛ foote la.)

⁷ To wan maasum la wani ge keŋɛ na’am mɔɔlegɔ? La nari ti to ti’isɛ bisɛ ton wan yele sɛla ge tɔɣɛ ti nɛreba bɔkɛ. La me nari ti to ti’isɛ bisɛ nɛreba n wan soke sɛla, la ton wan ta’an lebese ba se’em. Bala wan basɛ ti to san tɔɣera bɔ’ɔra nɛreba, to wan ma’ɛ tomea, la’ara mɔsi mɔsi ge eŋɛ pa’alɛ ti to nɔŋɛ ba.

8. Sodeni poan ti Kristakɔma ana wuu yɔɣɔrɔ lɔɣɔrɔ ti tuuntuna Paul yuun tɔɣɛ de yele la?

⁸ Tuuntuna Paul yuun pa’alɛ tɔ to zugbere yele n de se’em na’am mɔɔlegɔ tuuma la poan. A yuun yeti: ‘To tari la tuulum lɔkɔ wa n boi yɔɣɔrɔ lɔɣɔrɔ poan.’ (2 Ko. 4:7) Bem n de tuulum lɔkɔ wa? La dela Na’am yelesoma la n wan faaɛ nɛreba basɛ la. (2 Ko. 4:1) Bem n de yɔɣɔrɔ lɔɣɔrɔ la? Ba dela Naayinɛ yamesi n mɔɔli yelesoma la bɔ’ɔra nɛreba. Paul saŋa la, sɛba n kooseri lɔɣɔrɔ yuun tari la yɔɣɔrɔ duɣerɔ vaara ba lɔɣɔrɔ, maɣesɛ wuu dia, daam la ligeri. Bala mea nɔɔ ti Yehowa dekɛ na’am mɔɔlegɔ tuuma la eŋɛ to nu’usin. To tari suure lua ti Yehowa wan soŋɛ tɔ ti to nyɛ paŋa ta’an mɔɔlɛ yelesoma la.

ZUSƐ NAAYINƐ TI A BO HO SUKPE’ENE

9. To wan eŋɛ la wani to san zɔta dabeem ti nɛreba wan giisa tɔ? (Bisɛ foote la.)

⁹ Saŋa ase’a, to ta’an zɔta dabeem ti nɛreba wan giisa tɔ na’am mɔɔlegɔ tuuma la poan. To wan eŋɛ la wani nyaŋɛ to dabeem la? Geele tuuntuneba la n yuun zusɛ se’em ban yuun yele ba ti ba da le mɔɔlɛ la. Ba yuun ka basɛ ti dabeem sãɛ ba ti ba kan mɔɔlɛ. Ge ba yuun tuɣum zusɛ la Yehowa ti a soŋɛ ba ti ba ‘kɔ’ɔn tɔɣera a yetɔɣum la ge kan zɔta dabeem.’ Bilam bilam ti Yehowa kelese ba zusega la. (Tm. 4:​18, 29, 31) Asaala dabeem san basɛ ti la kpe’em bo to saŋa ase’a ti to mɔɔlɛ yelesoma la, tomam me nari ti to zusɛ Yehowa ti a soŋɛ tɔ. Zusɛ Yehowa ti a soŋɛ hɔ ti ho tara nɔŋerɛ zo’e zo’e bɔ’ɔra nɛreba lan wan eŋɛ se’em ti ho kan zɔta dabeem ti ho mɔɔlɛ yelesoma la bo ba.

10. Yehowa soŋeri to la wani ti to dɛna a Sɛɛradoma? (Isaiah 43:​10-12)

¹⁰ Yehowa loe to mɛ ti to dɛna a Sɛɛradoma ge yele to ti a wan soŋɛ tɔ ti to tara sukpe’ene. (Kaalɛ Isaiah 43:​10-12.) Geele sarɔtɔ tunaasi poan ti a ita bala. Yene, Yezu boi mɛ la tɔ sansɛka woo ti to mɔɔla yelesoma la. (Mt. 28:​18-20) N yi’i, Yehowa basɛ ti malesi soŋera to mɛ. (Lil. 14:6) N tã’a, Yehowa bo to la a zilam vo’osum la ti la soŋɛ tɔ ti to tɛ̃ra yelese’a ti to zamesɛ la. (Yon 14:​25, 26) N naasi, Yehowa bo to la mabiisi ti to wan na’ɛ la ba tum tuunɛ la. Yehowa n soŋeri tɔ ge bo to mabinɔɔrɛ la zuo, to wan ta’an mɔɔlɛ yelesoma la soŋa soŋa.

TARA PUTƐSONƐ GE TA’AN TƐƐRA BƆŊA WOO POAN

11. Ho wan eŋɛ la wani nyɛ nɛreba zo’e zo’e na’am mɔɔlegɔ poan? (Bisɛ foote la.)

¹¹ Hon giila n ni kɔ’ɔsɛ ho san ka nyɛ nɛreba zo’e zo’e na’am mɔɔlegɔ poan? Soke homea yeti: ‘Gingilega wa poan nɛreba wan bɔna la bɛ wana ma’a?’ (Tm. 16:13) ‘Ba keŋɛ la tuuma bii ba boi la da’a poan?’ San dɛna bala, ho san mɔɔla sarɔtɔ zuo ho wan nyɛ nɛreba zo’e zo’e? Mabia ayima yu’urɛ n de Joshua yeti, “Mam nyɛ yɔ’ɔ zo’e zo’e mɔɔlɛ mɛ da’a poan, la nɛreba n boi zɛ’an tuna.” Eŋa la a pɔɣa Bridget me baŋɛ ti ba san yi nɛreba telefon poan zaanɔɔrɛ la Alaserɛdaarɛ wuntɛɛŋa woo, ba ni bɔna la yire ti ba wan ta’an mɔɔlɛ bo ba.—Ep. 5:​15, 16.

12. To wan eŋɛ la wani baŋɛ nɛreba n sakɛ bo sɛla bii sɛla n pakɛ ba?

¹² Nɛreba puurɛ san ka pee la yelesoma la, tiregɛ la ho baŋɛ ban sakɛ bo sɛla bii sɛla n pakɛ ba. Joshua la Bridget ni dekɛ la sokese’a n boi gɔnpiɣisi la pooren tum tuuma ba pɔsega yetɔɣum poan. Makerɛ, ba ni dekɛ la gɔnpika la n de Baabule La Dela Bem Gɔŋɔ? ge soke yeti: “Nɛreba basɛba geele Baabule la ti la dela Naayinɛ gɔŋɔ, basɛba me ka sakɛ bo Baabule la. Ge hon me puti’irɛ?” Wana n ni basɛ ti ba pɔsɛ sɔsega.

13. Beni n sɔi ti to puurɛ wan ta’an pee hali to san mɔɔlɛ bo nɛreba ti ba ka kelese to? (Magaha 27:11)

¹³ Hali nɛreba san puɣum ka kelese yelesoma la, to nyaŋɛ tum to zugbere tuunɛ. Beni n sɔi? Se’ere n sɔi la to nyaŋɛ tum Yehowa la a Dayɔa la n boti to tum sɛla la, n de to di sɛɛra bo nɛreba. (Tm. 10:42) To san puɣum ka nyɛ nɛra mɔɔlɛ bo en bii ba san ka kelese to, to wan ta’an tara pupeelum sɛla n sɔi la to mi ti to eŋɛ la sɛla n wan basɛ ti to saazuo Sɔ la puurɛ pee.—Kaalɛ Magaha 27:11.

14. Bem zuo ti to puurɛ wan ta’an pee na’am mɔɔlegɔdaana san nyɛ nɛra n boti yelesoma la to gingilega la poan?

¹⁴ To puurɛ wan ta’an pee na’am mɔɔlegɔdaana san nyɛ nɛra n boti yelesoma la to gingilega la poan. Pigera Zontua la dekɛ to tuuma la makɛ mɛ la bia n bɔregɛ ti ba ɛɛra en. Nɛreba zo’e zo’e n ni laɣum ɛɛra en ti ba baŋɛ eŋa n boi zɛ’an. Ba san nyɛ bia la, daɣɛ se’em n nyɛ en la ma’a puurɛ n wan pee ge nɛresɛba n laɣum ɛ bia la za’a puurɛ me wan pee. Bala mea nɔɔ ti nɛra woo n boi tansugere la poan soŋera ti to ɛɛra podɔleba. La dela nɛra woo soŋɛ ti to mɔɔlɛ bo sɛba n boi gingilega la poan za’a. To za’a puurɛ ni pee mɛ to san nyɛ ti se’em n boti yelesoma la pɔsɛ kena zamesegɔ.

BASƐ TI HO PUTI’IRƐ BƆNA HON NƆŊƐ YEHOWA LA NƐREBA LA POAN

15. To san tara Matu 22:​37-39 la tuna tuuma, la wan soŋɛ to la wani ti to pee puurɛ tuna na’am mɔɔlegɔ tuuma la zo’e zo’e? (Bisɛ foote la.)

¹⁵ To wan ta’an pee puurɛ tuna na’am mɔɔlegɔ tuuma la zo’e zo’e to san nɔŋɛ Yehowa la nɛreba. (Kaalɛ Matu 22:​37-39.) Yeen ti’isɛ bisɛ Yehowa puurɛ n ni pee se’em a san nyɛ ti to tuni a tuuma la, la nɛreba puurɛ n wan pee se’em ba san pɔsɛ zamesa Baabule la! Le ti’isɛ bisɛ nɛresɛba n keleseri to la n wan ta nyɛ daarewoo nyɔvore se’em.—Yon 6:40; 1 Tim. 4:16.

16. To wan eŋɛ la wani basɛ ti to puurɛ pee na’am mɔɔlegɔ tuuma la poan to san ka ta’an yese ta mɔɔlɛ? Bo makerɛ.

¹⁶ La kpe’em bo ho mɛ ti ho yese ta mɔɔlɛ? San dɛna bala, basɛ ti ho puti’irɛ bɔna hon wan ta’an eŋɛ sɛla ti la pa’alɛ ti ho nɔŋɛ Yehowa la nɛreba. COVID-19 bã’a la n yuun wi’iri la, Samuel la Dania yuun ka ta’an yese ta mɔɔlɛ. Biɣi biɣi sankaŋa poan, ba yuun ni kɔ’ɔn mɔɔla la telefon poan, gulesa gɔnɔ ge zamesa nɛreba Baabule Zoom poan. Samuel yuun nyɛ la ɔberega bã’a nyaa keŋɛ asibitin ti ba ta tibɛ en. A yuun mɔɔlɛ bo nɛresɛba n yuun boi bim la mɛ. A yeti: “To san bɔna biɣi biɣi saŋa poan, to suure ta’an sa’am ti to giila kɔ’ɔsɛ ti la kpe’em bo to ti to ŋmibe. La nari ti to tara pupeelum Yehowa pu’usegɔ poan.” Sankaŋa la, Dania me yuun lu mɛ nyaa gã ka ta’an isigera ta paɛ ŋmaresi sitã. A yuun dela a zi’ire kɔɔrenɔ keekee zuo ŋmaresi siyoobe. A yeti: “Mam yuun tiregɛ ti n tum la n paŋa tɛka beene. Mam yuun nyaŋɛ mɔɔlɛ bo nɛɛsi la n yuun bisɛ mam la ge tɔɣɛ bo nɛresɛba n yuun wa’ana kaɛ mam bisɛ n yire la. Mam yuun le mɔɔlɛ yelesoma la bo dɔgeta ayima.” La boi bim ti Samuel la Dania yuun ka ta’an le mɔɔla wuu ban yuun iti se’em la ge ba yuun tum la ban wan nyaŋɛ tum se’em ti ba puurɛ pee.

17. Ho wan eŋɛ la wani nyɛ nyuurɔ zo’e zo’e ho san dekɛ yɛla anuu la tum tuuma?

¹⁷ Tiregɛ dekɛ yɛla anuu ti to sɔsɛ ba yele zaseŋɔ wa poan la za’a tum tuuma. Ba za’a ani me wuu za’asum. Zɛɛrɔ san wan za’asum la dela ho dekɛ za’asum la za’a duɣɛ zɛɛrɔ la. Bala la, to san dekɛ yɛla la za’a tum tuuma, to kan zɔta dabeem bii ti’isa ti to ka mi pa’alegɔ soŋa ge to puurɛ wan pee na’am mɔɔlegɔ tuuma la poan.