Yehowa Wan Soŋɛ Tɔ Ti To Tara Pupeelum Zo’e Zo’e

1-2. (a) Bem yɛla n paari nɛreba zo’e zo’e zina beere wa? (b) To wan sɔsɛ la bem zaseŋɔ wa poan?

NƐREBA zo’e zo’e zina beere wa iti la yɛla zo’e zo’e ti ba ta’an tara pupeelum. Hali la ban tiregeri se’em la, ba ka tari pupeelum. Nɛreba zo’e zo’e suure n sa’am ti ba ti’isa ti yɛla kan malum ana soŋa bɔ’ɔra ba. Yehowa yamesi me ta’an ti’isa bala. Ton boi “ba’ahegɔ dabeha la” zuo, to mi ti yɛla wan paara tɔ ti la “kpe’em” bo to.—2 Tim. 3:1.

² Zaseŋɔ wa poan, to wan sɔsɛ baŋɛ yelese’a n ni sa’am to pupeelum, la ton wan eŋɛ se’em le tara to pupeelum la. Yia la, basɛ ya ti to bisɛ to wan eŋɛ se’em ta’an tara yelemɛŋɛrɛ pupeelum la nyɛɛma.

ANI N BO’ORI PUPEELUM LA NYƐƐMA?

3. Naaŋɔ lɔɣɔrɔ pa’alɛ tɔ Yehowa yele la wani? (Bisɛ fɔɔra la.)

³ Yehowa kɔ’ɔn tara la pupeelum saŋa woo. A me boti la to tara pupeelum la nyɛɛma. Bala n sɔi ti a naam lɔɣɔrɔ zo’e zo’e ti la basɛ ti to tara pupeelum. Makerɛ, dusi n de’eni se’em, to tinparɛ wa som mɛ, mu’uŋɔ to’ore to’ore n boi, la dia to’ore to’ore n za’asum. Naayinɛ sirum nɔŋɛ to mɛ ge me bɔta ti to tara vom somɔ!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Yehowa eŋɛ la wani kelum tara pupeelum hali la eŋa n nyɛti nɛreba n nameseri se’em tingɔŋɔ wa zuo la? (b) Yehowa dekɛ la bem bo’olum bo to? (Yooma 16:11)

⁴ La boi bim ti Yehowa dela “Yenɛ n tare popeelom” ge a mi yelese’a n paari nɛreba ti ba namesa tingɔŋɔ wa zuo la. (1 Tim. 1:11) Ge a ka bo yɔ’ɔ ti yele ana wa sa’am a pupeelum la. A mi ti la kan yue namesegɔ kan le bɔna—eŋa mɛŋa n mi dabeserɛ la. A me di’iseri la suure ge ŋmibera gura dabese’ere ti a wan basɛ ti namesegɔ la fabelegɔ kan le bɔna. Ge Yehowa bɔkeri yelese’a n paari to la mɛ ge me bɔta ti a soŋɛ tɔ. A soŋeri to la wani? Yia la, a basɛ ti to tara la pupeelum. (Kaalɛ Yooma 16:11.) Bisɛ eŋa n dekɛ bo’olum buna wa bo a Dayua Yezu se’em.

5-6. Beni n sɔi ti Yezu tara pupeelum?

⁵ Yehowa naaŋɔ la woo poan, Yezu n tari pupeelum gana. Beni n sɔi? Se’ere n sɔi la, (1) “Krista dela Yenɛ se’em te ba ka nyɛta naanɛ,” a me ani wuu a Sɔ la, bala n sɔi ti a tara pupeelum zo’e zo’e la. (Kol. 1:15) (2) Yezu yuun naɛ la a Sɔ bɔna la saŋa zo’e zo’e ti la ka tara makerɛ. Pupeelum me ze’ele la a Sɔ la zɛ’an na.

⁶ Yezu yuun kɔ’ɔn tara pupeelum mɛ se’ere n sɔi la, a iti la a Sɔ la n boti se’em. (Mag. 8:​30, 31; Yon 8:29) Bala n sɔi ti Yehowa puurɛ pee la en la.—Mt. 3:17.

7. To wan eŋɛ la wani ta’an tara pupeelum?

⁷ Tomam me wan ta’an tara pupeelum to san ana du’a du’a la Yehowa, se’em n basɛ ti pupeelum bɔna la. To san tara saŋa zo’e zo’e zamesa Yehowa yɛla ge me tɔɣesa en, to wan tara pupeelum zo’e zo’e. To me san ita Naayinɛ n boti sɛla ge me mina ti a boti to yele, to wan tara pupeelum.a (Ym. 33:12) Ge la san dɛna ti saŋa ase’a bii daarewoo ti to ka tara pupeelum? Bala pa’alɛ ti Naayinɛ puurɛ ka pee la tɔ? Aayi! Ton ka di mi’a la zuo, saŋa ase’a wuŋerɛ, susa’aŋɔ la putɛyiila n ni paara tɔ. Yehowa bɔkɛ lan ani to se’em mɛ. (Ym. 103:14) Basɛ ya ti to bisɛ ya yelese’a n wan ta’an basɛ ti to kan tara pupeelum, la ton wan eŋɛ se’em le tara pupeelum.

DA BASƐ TI SƐLA SA’AM HO PUPEELUM

8. Yeledaaŋɔ ta’an basɛ ti la ana to la wani?

⁸ Yeledaaŋɔ san paara tɔ. Yaarɛ, yeledi’ima, nɔŋɔ, bã’asi bii kuregerɛ n paari hɔ ti la daana hɔ? Yele ta’an basɛ ti ho suure sa’am yele yele wuu ho san kan ta’an eŋɛ sɛla ti bɔŋa la tee. Baabule la basɛ ti to baŋɛ ti “suunre se’ere n sagom, koore la sea.” (Mag. 15:13) La yuun ani Babis n de tansugere keema la bala. Yuuma anaasi poan ti a keema, a ma la a sɔ ki. A yeti: “La yuun ani wuu mam boi la n ma’a la, ka le tara ŋmɛregerɛ zɛ’an. Saŋa ase’a putɛyiila n ni daana mam sɛla n sɔi la mam daa ka nyɛti nɛŋa naara la n dɔɣereba la n suɔ la sɔsa ge ti ba nyaa ki.” Bala mea nɔɔ, tomea yeledaaŋɔ ta’an basɛ ti tɔregɔ paɛ tɔ ti to giila kɔ’ɔsɛ.

9. Beni n wan soŋɛ tɔ ti to le tara pupeelum? (Yeremia 29:​4-7, 10)

⁹ Beni n wan soŋɛ tɔ ti to le tara pupeelum? To wan ta’an le tara pupeelum to suure san sukɛ la sɛla ti to tara ge ka fabela la sɛla ti to kan ta’an eŋɛ. To wan ta’an tara pupeelum la ka pakɛ la to bɔŋa la n ani se’em. Ge nɛreba zo’e zo’e ka ti’iseri bala. Makerɛ, Yehowa yuun yele Yudadoma la n yuun boi Babilon la ti ba sakɛ ti ba dela yamesi bɔna tiŋa la poan ge me tiregɛ bisɛ ba wan eŋɛ se’em ti ba vom ana soŋa. (Kaalɛ Yeremia 29:​4-7, 10.) To zamesɛ la bem? Tiregɛ bisɛ yelesoma se’a ti ho tara ge basɛ ti ho puurɛ pee la yele ana. Tɛ̃ra ti Yehowa kan tamɛ ho yele. A wan soŋɛ hɔ. (Ym. 63:7; 146:5) Effie, yuun ta lui mɛ nyaa lebege kɔɔreŋɔ, a yeti: “Yehowa la mam deodoma, la tansugere la n soŋɛ mam. Bala la, mam bisɛ ti n san basɛ ti n giila kɔ’ɔsɛ la pa’alɛ ti n nini ka tiɣɛ la sɛla ti ba eŋɛ bo mam la. Mam boti n eŋɛ pa’alɛ Yehowa la mam zɔdoma la ti mam puurɛ pee ya la ban soŋɛ mam se’em la. Bala la, mam kɔ’ɔn tiregera mɛ ti n tara pupeelum.”

10. Beni n sɔi ti to wan kelum tara pupeelum hali yeledaaŋɔ san paara tɔ?

¹⁰ Hali yeledaaŋɔ san paara tomam la to deodoma to wan ta’an kelum tara pupeelum.b (Ym. 126:5) Beni n sɔi? Sɛla n sɔi la to wan ta’an tara pupeelum la ka pakɛ la to bɔŋa la n ani se’em. Maria n de sore ŋmɛ’adaana la yeti: “Yeledaaŋɔ san paara tɔ to kelum tara la pupeelum se’ere n sɔi la, to mi Yehowa n yeti a eŋɛ sɛla bo to mɛ. Bala ka pa’alɛ ti to kan kaasa bii tɔɣera pa’ala lan ani to se’em. Ge to Sɔ la wan soŋɛ tɔ ti to kelum tara pupeelum la ka pakɛ la yelese’a n paari tɔ.” Tɛ̃ra ti la san puɣum kpe’em la se’em me, la kan ana bala wuusa. La kan yue Yehowa wan yese yelese’a woo n basɛ ti to namesa la.

11. Tuntuna Paul yele la kpemese hon giila la wani?

¹¹ To ta’an ti’isa ti yelese’a n paari to la dela Yehowa puurɛ n ka pee la tɔ. To san ti’isa bala, la nari ti to geele Yehowa yamesi ti yele ana tabelɛ paɛ ba yele bisɛ. To geele tuntuna Paul yele la bisɛ. Yezu yuun loe en ti a mɔɔlɛ yelesoma la “bo Yudoma la sɛba n dagɛ Yudoma la, la nadoma.” (Tm. 9:15) La yuun dela yɔ’ɔ kãtɛ bɔ’ɔra en! Ge yɛla yuun paari Paul mɛ. (2 Ko. 11:​23-27) Yelese’a n yuun paari Paul la pa’alɛ ti Yehowa puurɛ ka pee la en? La daɣɛ bala la fii me! Ge eŋa n yuun ŋmiberi la pa’alɛ ti Yehowa n yuun kã’ari bɔ’ɔra en. (Arom 5:​3-5) Nyaa ti’isɛ ho bɔŋa la yele bisɛ. Ho ŋmiberi mɛ ge me kelum tara sakerɛ hali la yeletooro la n paari ho la. Bala la, tara suure lua ti Yehowa puurɛ pee mɛ la hɔ.

12. Bem n wan ta’an eŋɛ, to san ka nyaŋɛ tum ton kɔ’ɛ to puti’irɛ ti to eŋɛ sɛla bo Yehowa la?

¹² To san ka nyaŋɛ tum ton boti to eŋɛ sɛla bo Yehowa. (Mag. 13:12) Nɔŋerɛ se’ere ti to tara bɔ’ɔra Yehowa la wan soŋɛ tɔ ti to ta’an loe tuunɛ tum Yehowa pu’usegɔ poan. Ge to san tiregera ti to tum tuunɛ ti to kan nyaŋɛ tum, to bɔŋa la zuo, bala ta’an basɛ ti to giila kɔ’ɔsɛ. (Mag. 17:22) Mabipɔka Holly n de sore ŋmɛ’adaana yeti: “Mam yuun boti la n keŋɛ Na’am Mɔɔlegɔdoma Sukuu, n nɔɣɛ keŋɛ tiŋa ta mɔɔlɛ bii n keŋɛ ta tum Ramapo mɛa tuuma la. Ge mam bɔŋa la yuun tee mɛ ti mam ka ta’an tum mam n kɔ’ɛ n puti’irɛ ti n tum sɛla la. Bala yuun basɛ ti mam suure sa’am mɛ. Ho san ni bɔta ti ho tum sɛla ge ka nyaŋɛ eŋɛ, bala ta’an ni basɛ ti ho giila kɔ’ɔsɛ.” La me ani nɛreba zo’e zo’e la bala.

13. To bɔŋa la san ka bo to yɔ’ɔ ti to tum zo’e bo Yehowa, to wan ta’an eŋɛ la bem?

¹³ Bem n wan soŋɛ tɔ ti to le tara pupeelum? Tɛ̃ra ti Yehowa ka eeri ti to tum zɔɛ to paŋa beene. Daɣɛ ton tum zo’e se’em n wan basɛ ti Yehowa nɔŋɛ tɔ. Yehowa boti la to tara yelemɛŋɛrɛ ge siregera tomea. (Mik. 6:8; 1 Ko. 4:2) Ton de nɛresɛba taaba to suuren la yele n pakɛ Yehowa gana ton ta’an ita sɛla. Bala la, la kan ana soŋa ti to eŋɛ sɛla zɔɛ to paŋa beene.c Ho bɔŋa la san ka bo ho yɔ’ɔ ti ho tum zo’e Yehowa pu’usegɔ poan, tiregɛ bisɛ hon wan nyaŋɛ eŋɛ sɛla. Makerɛ, ho ta’an kumesɛ bunbilipaalesi bii ho kpemese bunkureba giila. Ho ta’an keŋɛ ta kaɛ mabia bii ho yi en fon zuo bii tɛɣesɛ en kpemese a giila. Yehowa wan kã bo ho ti ho tara pupeelum ho san tiregɛ ita yele ana wa! Tɛ̃ra ti la kan yue, to wan nyɛ yɔ’ɔ zo’e zo’e pu’usa Yehowa tinpaalega la poan ti la kan tara makerɛ! Holly ti to puɣum tɔɣɛ a yele la yeti: “Mam giila san kɔ’ɔsɛ mam ni tiɛ la n mea ti ‘n wan ta vɔna daarewoo.’ Ge ti Yehowa me wan soŋɛ mam ti n ta’an eŋɛ mam boti n eŋɛ sɛla bo en la.”

14. Bem n wan ta’an le sa’am to pupeelum la?

¹⁴ To san ita tomam n boti sɛla ge ti’isa ti to wan tara pupeelum. To san ni nyɛ nɛreba intanɛt poan la ta’an ni ana to wuu ba tari la pupeelum, la ban tari lɔɣesonɔ la zuo. To ta’an pɔsɛ ti’isa ti to san ita yelese’a ti to bɔta n de wuu, to da’ari la sɛla ti to bɔta ge me kena zɛ’ɛsi to’ore to’ore, bala wan basɛ ti to tara pupeelum. La daɣɛ be’em ti to ita yele ana. Yehowa boti la to tara pupeelum la lɔɣesoma la woo ti a naam bo to la. Ge nɛreba zo’e zo’e baŋɛ ti sɛla ti ba ti’isa ti la wan basɛ ti ba tara pupeelum la tuɣum sa’ana la ba pupeelum. Eva n de sore ŋmɛ’adaana la yeti, “Ho san ti’isa la hon wan eŋɛ sɛla ti ho puurɛ pee ma’a, sɛla ka boi n wan seke ho.” Saŋa woo to san bɔta ti to eŋɛ sɛla ti to puurɛ pee, to giila wan kɔ’ɔsɛ ti to suure sa’am.

15. To wan ta’an zamesɛ la bem Naba Solomon zɛ’an?

¹⁵ To wan ta’an zamesɛ sɛla Naba Solomon zɛ’an. A yuun iti la yelese’a ti a bɔta ti la me yuun ka ba’asɛ en soŋa. A yuun kɔ’ɔn ita la yelese’a n wan basɛ ti a tara pupeelum. Makerɛ, a yuun diti la dinɔ’ɔma, kɛlesa yuunsoma ge me da’ara lɔɣɔrɔ n eŋɛ ligeri. Ge yele ana yuun ka bo en pupeelum. A yeti: “Niho ka tara bo behɛ ba’ahɛ, bii toberɛ wom ba’ahɛ kan le kelehe.” (Pa. 1:8; 2:​1-11) Nɛreba basɛba ti’isɛ ti ba san tara ligeri zo’e zo’e ge me ita bamam n boti sɛla, bala wan basɛ ti ba tara pupeelum. Ge la daɣɛ yelemɛŋɛrɛ. Yele ana kan ta’an basɛ ti to tara pupeelum.

16. To san soŋera nɛreba, bala wan basɛ ti to tara pupeelum la wani? (Bisɛ fɔɔra la.)

¹⁶ Beni n wan soŋɛ tɔ ti to le tara pupeelum? Yezu yuun pa’alɛ to ti “se’emdaana n bo’ore nɛreba tare popeelom zo’e zo’e nyana se’emdaana n kɔ’ɔn bɔta te a tɔ’ɔha nɛreba zen’en.” (Tm. 20:35) Keema ayima yu’urɛ n de Alekos yeti: “Mam ni nɔŋɛ n ita la yelepiɣesi soŋera nɛreba. Mam san soŋera nɛreba, mam ni ka ti’isa mam n boti sɛla, bala ni basɛ ti mam tara la pupeelum.” Ho wan ta’an eŋɛ la bem soŋɛ nɛreba? Makerɛ, ho san nyɛ nɛra ti a suure sa’am, ho ta’an kpemese a giila. Daanse’ere, ho kan ta’an maalɛ a yeledaaŋɔ la ge ho wan ta’an soŋɛ en. Ho san ma’ɛ homea kelese en ge tiregɛ bɔkɛ lan ani en se’em, bala wan basɛ ti la ana en mama. Tĩɛ en ti a ta’an zusɛ Yehowa pa’alɛ lan ani en se’em sɛla n sɔi la, A fabeli a yele mɛ. (Ym. 55:22; 68:19) Ho me ta’an soŋɛ en ti a baŋɛ ti Yehowa ka tamɛ a yele. (Ym. 37:28; Isa. 59:1) Ho ta’an le eŋɛ sɛla soŋɛ en, maɣesɛ wuu ho duɣɛ dia bo en bii ya ɛ kaɛ kaɛ ge lebe na. Ho ta’an naɛ la en ti ya keŋɛ na’am mɔɔlegɔ, bala wan kpemese a giila. Basɛ ti Yehowa doose ho poan kpemese nɛreba giila. Ho san tara ho saŋa la soŋera nɛreba, ho wan tara pupeelum zo’e zo’e!—Mag. 11:25.

17. To san bɔta ti to sirum tara pupeelum, la nari ti to eŋɛ la bem? (Yooma 43:4)

¹⁷ To wan sirum tara pupeelum to san ana du’a du’a la to saazuo Sɔ la. Baabule la basɛ ti to baŋɛ ti Yehowa dela to “nyeema.” (Kaalɛ Yooma 43:4.) Bala la, la ka pakɛ la yelese’a n paari tɔ, la ka nari ti to basɛ ti dabeem tara tɔ. Yehowa san dɛna to zɔsonkɔ, la pa’alɛ ti a me wan soŋɛ tɔ ti to tara pupeelum daarewoo!—Ym. 144:15.