Sokese’a Ti Sɛba N Kaali La Sɔkera

Bem “potɛn’ɛrɛ” ti Yehowa wan dekɛ eŋɛ tisi la suuren beere sa’am?

Liligere 17:​16, 17 tɔɣɛ mɛlesekãtɛ la n wan pɔsɛ se’em la ti: “Ila pia la, la bonsilimasio la te ho nyɛ la wan yaɛ yaloma la. Ba wan dekɛ sɛla woo te a tara ge bahɛ en beele. Ba me wan obe a iŋa la ge nyɔ en la bugum. Se’ere n sɔe la, Yenɛ n bahɛ te ba potɛn’ɛra kɔ’ɔn tɛn’ɛha bɔta la ba tom Yenɛ potɛn’ɛrɛ n bote se’em. Ba ete dena wa yɛhera la ban tone la nɔyenɛ ge bɔ’ɔra bonsilimasio la ba paŋa te a sɔna behera la.” Sansɛka n tole la, to gɔnɔ la daa yeti “potɛn’ɛrɛ” la ti Yehowa wan dekɛ eŋɛ tisi la suuren dela ba wan sa’am pumpɔreŋɔ pu’usegɔ.

Ge teere n boi. “Potɛn’ɛrɛ” la ti Yehowa wan dekɛ eŋɛ tisi la suuren la dela ba wan ‘dekɛ ba na’am la bo goo duŋa la.’ To san bɔta ti to bɔkɛ yele wa n tum tuuma se’em, la dela to geele soke ana wa.

Bani ti ba tɔɣɛ ba yele yetɔɣebiŋere wa poan? “Yaloma la” yu’urɛ ayima me dela ‘Babilon Kãtɛ La’; eŋa n ze’ele bo tingɔŋɔ wa za’a pumpɔreŋɔ pu’usegɔ. ‘Goo duŋa n pɔresɛ la’ ze’ele bo la tingɔŋɔ wa suma’asum tigere la n yuun pɔsɛ yuun 1919 ti ku yu’urɛ dɛna League of Nations. Ba nyaa yi’iri ku la United Nations. (Lil. 17:​3-5) “Ila pia la” ze’ele bo la gɔmɛt kpe’eŋo woo n laɣum soŋera goo duŋa la.

Yaloma la, la goo duŋa n pɔresɛ la som taaba la wani? Yaloma la puɣum “zin’an” la goo duŋa la zuo, kã’ara bɔ’ɔra goo duŋa la ge tiregera ti a tee a puti’irɛ ge sɔna en bisa.

Bem n wan paɛ yaloma la? Goo duŋa la, la iila pia n soŋeri en la “wan yaɛ yaloma la.” Ba sunsɔa n nyie la en la zuo, ba wan vaɛ a lɔɣɔrɔ la ge basɛ ti nɛra woo baŋɛ eŋa n de putɔa se’em. Ba nyaa wan sa’am en ti la pa’alɛ ti la dela Yehowa gãkerɛ. (Lil. 17:1; 18:8) Bala wan basɛ ti pumpɔreŋɔ pu’usegɔ kan le bɔna. Ge ti bala nyaa eŋɛ la, Yehowa wan basɛ ti tisi la eŋɛ sɛla n ka tabelɛ tum asaala bisega poan.

Yehowa wan basɛ ti tisi la eŋɛ la bem? A wan dekɛ a “potɛn’ɛrɛ” la eŋɛ iila pia la suuren ti ba “dekɛ ba paŋa, la ba sɔ’ɔlom bo [goo duŋa n pɔresɛ la]” n de United Nations. (Lil. 17:13) Ti’isɛ bisɛ bala vuurɛ n de sɛla. Asaala gɔmɛt wan yeen dekɛ ba kpe’eŋo la ba paŋa la bo goo duŋa la? Aayi! Yetɔɣebiŋere la pa’alɛ ti Naayinɛ mea n wan basɛ ti ba tee ba puti’irɛ eŋɛ bala. (Mag. 21:1; dekɛ makɛ Isaiah 44:28.) Ba wan ita bala la fii fii? Aayi! La niɛ peelumi ti la wan eŋɛ la kalam. Bala poan ti goo duŋa la nyaa wan sa’am pumpɔreŋɔ pu’usegɔ tiga woo ti la dɛna Yehowa gãkerɛ bɔ’ɔra ba.

Bem n nyaa wan eŋɛ beere sa’am? To da ti’isa ti gɔmɛtdoma la soŋeri United Nations la fii fii. Sɛla ti to ti’isa ti la wan eŋɛ dela: Yehowa wan dekɛ a puti’irɛ eŋɛ tisi la suuren ti ba dekɛ ba paŋa la bo goo duŋa la. La me wan eŋɛ la kalam. Ba san eŋɛ bala, to mi ti mɛlesekãtɛ la yeti la pɔsɛ mɛ n bala. Ton nan guri sankaŋa la, “bahɛ ya te to maahom ya mɛ ge tara to mɛhe soŋa soŋa” se’ere n sɔi la, yele wa kan yue ge tum!—1 Tes. 5:6