Ton Wan Maasum To Pɔɣedire Se’em Ti La Na’asɛ Yehowa

1-2. Yehowa boti ho pɔɣedire daarɛ ta ana la wani?

HON lɛɣeri la nɛra nyaa maasena ti ho di bii ele en? La san dɛna bala, ho puurɛ pee mɛ la yele wa! Daanse’ere ho kɔ’ɔn mu’ɛ la nini maasena yɛla gura pɔɣedire daarɛ la. Yehowa boti la ho puurɛ pee ho pɔɣedirea daarɛ la ge ti ya pɔɣedire la me bɔna bala wuusa.—Mag. 5:18; Sol. 3:11.

² La yele pakɛ mɛ ti ho na’asɛ Yehowa ho pɔɣedire daarɛ la. Beni n sɔi ti bala nara? Ho me wan eŋɛ la wani ti la ta ana bala? La boi bim ti yelese’a n boi zaseŋɔ wa poan la wan soŋɛ la buraa la pɔka n maaseni pɔɣedire ge naresum yɛla la ti to wan sɔsɛ de yele la wan soŋɛ to za’a ti to na’asɛ Yehowa, to san ta bɔna bim bii sɛba n maaseni pɔɣedire la san yele to ti to soŋɛ ba.

BENI N SƆI TI HO PƆƔEDIRE DAARƐ LA NARA TI LA NA’ASƐ YEHOWA?

3. Kristakɔma san maasena ba pɔɣedire, la nari ti ba ti’isɛ la bem yele ge beni n sɔi?

³ Kristakɔma san maasena ba pɔɣedire, la nari ti ba ni kɔ’ɛ ba puti’irɛ eŋɛ yɛla ti la makɛ la Yehowa naresum yɛla la n boi Baabule la poan. Beni n sɔi? Se’ere n sɔi la, Yehowa n basɛ ti pɔɣedire bɔna. Eŋa n yuun basɛ ti Adam la Hawa dɛna nɛra la a pɔɣa. (Pin. 1:28; 2:24) Yehowa n basɛ ti pɔɣedire bɔna la zuo, Kristakɔma n maasena ba pɔɣedire nari ti ba bisɛ ban wan eŋɛ se’em ti ba pɔɣedire daarɛ la ta na’asɛ Yehowa.

4. Bem leyɛ’ɛsa n wan basɛ ti Kristakɔma n maaseni ba pɔɣedire na’asɛ Yehowa ba pɔɣedire daarɛ la?

⁴ Ho san maasena ho pɔɣedire, ninmu’urɛ yɛla ase’a n boi ti la nara ti ho geele Yehowa puti’irɛ n de se’em ge nyaa kɔ’ɛ ho puti’irɛ. Yehowa dela ho saazuo Sɔ la ho Zɔsonkɔ. (Heb. 12:9) Ho me kɔ’ɔn bɔta la ya zɔtɔ nyɔka la kpe’em. Ho kan bɔta ti ho eŋɛ sɛla daandindaarɛ bii dabese’ere ti la daam ho Zɔ la. (Ym. 25:14) Ho san ti’isɛ yelese’a za’a ti Yehowa eŋɛ bo ho la, ho wan bɔta ti ho eŋɛ pa’alɛ ti ho puurɛ pee ya ti ho pɔɣedire daarɛ la na’asɛ en.—Ym. 116:12.

HO WAN EŊƐ LA WANI TA’AN NA’ASƐ YEHOWA?

5. Baabule la wan ta’an soŋɛ Kristakɔma la wani ti ba maasum ba pɔɣedire?

⁵ Baabule la ka pa’alɛ yɛla wana mɔpi ti Kristakɔma nara ti ba eŋɛ ba pɔɣedire daarɛ la bii ba san ta ita de’eŋo pɔɣedire daarɛ la poan. Bala la, Kristakɔma ta’an maasum ba pɔɣedire ti la makɛ la ba bɔŋa, ba malema bii ban boti la ta ana se’em. Kristakɔma me ni kɔ’ɔn tiregɛ doose la tiŋa la lɔɔ yɛla. (Mt. 22:21) Kristakɔma san maasum ba pɔɣedire ti la makɛ la Baabule naresum yɛla, la wan na’asɛ Yehowa ge me basɛ ti a puurɛ pee. Bala la, bem naresum yɛla ti la nara ti ho tɛ̃ra?

6. Nɛra la a zaba san maasena ba pɔɣedire, beni n sɔi ti la nara ti ba doose tiŋa la lɔɔ yɛla?

⁶ Doose tiŋa la lɔɔ yɛla. (Arom 13:​1, 2) Tisi zo’e zo’e poan, gɔmɛt la tari la pɔɣedire lɔɔ ti la nara ti buraa la, la pɔka la doose. Nɛra la a zaba la nari ti ba soke baŋɛ bamam tiŋa la lɔɔ n de sɛla. Ho ta’an soke keendoma la ti ba soŋɛ hɔ ti ho baŋɛ yele ana wa.b

7. Pɔɣedire dabeserɛ nari ti la ana la wani ge la wan eŋɛ la wani ta’an ana bala?

⁷ Tiregɛ basɛ ti sɛla woo keŋɛ ma’a ma’a. (1 Ko. 10:​31, 32) Basɛ ti yelese’a n wan ta ita ho pɔɣedire daarɛ la makɛ la Naayinɛ vo’osum wɔla la ge daɣɛ tingɔŋɔ wa yɛla. (Ga. 5:​19-26) Buraa la n wan ta dɛna deo zuodaana la zuo, la dela eŋa zugbere tuunɛ ti a basɛ ti sɛla woo keŋɛ soŋa pɔɣedire daarɛ la ti la na’asɛ Yehowa ge me dɛna pupeelum dabeserɛ. A wan eŋɛ la bem ti dabeserɛ la ta’an ta ana bala? De daarɛ, ba san bo Baabule yetɔɣum, la wan soŋɛ sɛba woo n keleseri la ti ba bɔkɛ ti pɔɣedire dela Yehowa bo’olum. La wan le soŋɛ sɛba n wa’ana la ti ba baŋɛ ti pɔɣedire daarɛ dela ninmu’urɛ dabeserɛ. Wana wa zuo la, la san wan ta’an, Kristakɔma zo’e zo’e n maaseni pɔɣedire ni bɔta la ba eŋɛ de la Na’am Pu’usegɔ Deo poan. Ho san bɔta ti ho eŋɛ de Na’am Pu’usegɔ Deo poan, la nari ti ho te’ele gulesɛ gɔŋɔ bo keendoma la.

8. Ya san loe ti ya eŋɛ de’eŋo pɔɣedire daarɛ la, ho wan eŋɛ la wani ti la na’asɛ Yehowa? (Arom 13:13)

⁸ Kaalɛ Arom 13:13. Ya san loe ti ya eŋɛ de’eŋo pɔɣedire daarɛ la, ho wan eŋɛ la wani ti la kan ana wuu tingɔŋɔ wa yɛla n ani se’em la? Greek yelebire la n de ‘de’enyooro’ ti ba dekɛ tum tuuma la pa’alɛ la de’eŋo seto ti nɛreba nyuura daam zɔ’ɔra ge me ni ŋmɛ yuuma ta yilegɛ beere. Ho san wan tɔ̃rɛ dãkpe’eŋo, te’ele ti’isɛ bisɛ hon wan eŋɛ se’em ti nɛreba kan nyu zɔɛ.c Ya san wan ŋmɛ yuuma, da ba’ɛ ŋmɛ̃’ɛra ya vɔɔla, lan wan eŋɛ se’em ti saama la ta’an sɔsɛ soŋa. Loe yuunsoma, la wan eŋɛ se’em ti yelese’a n boi yuuma la poan la kan daam nɛreba la.

9. Nɛra la a pɔɣa nari ti ba tɛ̃ra la bem ba san bɔta ti nɛreba tɔɣɛ ba yɛla fii bii yese vidiyodoma bii fɔɔra pɔɣedire de’eŋo poan?

⁹ Pɔɣedire de’eŋo ase’a poan, nɛra la a pɔɣa la zɔdoma, la ba yidoma ta’an ni bɔta ti ba tɔɣɛ nɛra la a pɔɣa la yɛla fii. Leyɛ’ɛsa, ba ta’an ni yɛsera nɛra la a pɔɣa la fɔɔra bii vidiyodoma bii yelese’a n wan basɛ ti nɛreba la puurɛ pee daandindaarɛ. Ge tiregɛ basɛ ti yele ana wa kpɛmesa giila. (Flp. 4:8) Soke homea yeti: ‘La wan pa’alɛ ti n bo’ori nɛreba gilema? La wan basɛ ti pɔɣedire daarɛ la tara gilema?’ Ninmu’urɛ yele n nari ti ho soke homea dela: ‘La wan na’asɛ Yehowa?’ La daɣɛ be’em ti nɛra tɔɣɛ sɛla n wan basɛ ti nɛreba la la’ara ge la ka nari ti nɛra tɔɣɛ sɛla n wan basɛ ti nɛreba ti’isa gã’aregɔ poan yɛla. (Ep. 5:3) Ya yidoma bii ya zɔdoma san wan tɔɣɛ ya yɛla fii de’eŋo la poan, basɛ ti ba baŋɛ yelese’a n nari ti ba tɔɣɛ la yelese’a n ka nari ti ba tɔɣɛ.

10. Kristakɔma san maasena pɔɣedire, beni n sɔi ti la nara ti ba ita yɛla maɣesa? (1 Yon 2:​15-17)

¹⁰ Ita yɛla maɣesa. (Kaalɛ 1 Yon 2:​15-17.) Sɛba n nɔŋɛ Yehowa ni tiregɛ ti ba eŋɛ la sɛla n wan na’asɛ Yehowa ge daɣɛ sɛla n wan basɛ ti bamam nyɛ yu’urɛ. Kristakɔma n iti yɛla maɣesa kan sa’am ligeri zo’e zo’e bii eŋɛ yɛla ti la pa’alɛ ‘bamam n tari se’em.’ Ho san eŋɛ ho pɔɣedire la naana ho wan nyɛ nyuurɔ la wani? Geele mabia ayima yu’urɛ n de Mike n ze’ele Norway yele la bisɛ. A yeti: “To yuun ka tari sama ge me ta’an kelum tuna to sore ŋmɛ’a tuuma la. To pɔɣedire la yuun dela naana ge to kelum tɛ̃ra lan yuun som se’em.” Mabipɔka Tabitha n ze’ele India yeti: “To yuun tã gĩsa mɛ. Ho san eŋɛ ho pɔɣedire naana, yɛla zo’e zo’e boi mɛ ti hon la ho sira, la ya yidoma kan ŋmɛ nɔkpe’ene de poan.”

11. Nɛra la a zaba wan yɛ ba lɔɣɔrɔ ge maalɛ bamea la wani ti la makɛ ma’a? (Bisɛ fɔɔra la.)

¹¹ Hon loe sɛla ti ho wan yɛ? Ho wan bɔta ti ho som paa daandindaarɛ. Hali Baabule saŋa la, nɛra la a zaba ni maalɛ la bamea soŋa ba pɔɣedire daarɛ la. (Isa. 61:10) La boi bim ti hon wan yɛ sɛla ho pɔɣedire daarɛ la wan bɔna de to’ore la hon ni yɛ lɔɣese’a yese keŋɛ zɛ’an ge la nari ti ho yɛ lɔɣese’a n makɛ ma’a. (1 Tim. 2:9) Da basɛ ti hon wan yɛ sɛla bii maalɛ homea se’em daandindaarɛ la yele ba’ɛ pakɛ hɔ.—1 Pe. 3:​3, 4.

12. Beni n sɔi ti nɛra la a zaba nara ti ba zaɣesɛ pɔɣedire malema se’a n ka makɛ la Baabule pa’alegɔ?

¹² Zaɣesɛ malema se’a n ka makɛ la Baabule pa’alegɔ. (Lil. 18:4) Zina beere wa, pɔɣedire malema zo’e zo’e nyaa tari la baɣa yɛla, tiim tuuma la pumpɔreŋɔ pu’usegɔ malema. Yehowa ka’am tɔ ti to kɔ’ɔn yese tomea yele ana poan. (2 Ko. 6:​14-17) Ba san ita malema ase’a ya gingilega la poan ti ho ka baŋɛ nyaa la nari bɔ’ɔra Kristakɔma bii la ka nari, eŋɛ viisegɔ baŋɛ yɛla la za’a la Baabule naresum yɛla n wan soŋɛ hɔ ti to ta’an kɔ’ɛ ho puti’irɛ soŋa.

13. Nɛra la a pɔɣa wan ta’an tɔɣesa Yehowa la wani nɛra san bo ba bo’olum?

¹³ Ya gingilega la poan, nɛreba tari yɔ’ɔ ti ba dekɛ bo’olum bo nɛra la a pɔɣa la? Laɣehɔdaana n wan bo sɛla la wan bɔna de to’ore la nasa n wan bo sɛla. Yelemɛŋɛrɛ, Baabule la kpemese Kristakɔma giila ti ba bɔ’ɔra yɛri yɛri. Bala me ni basɛ ti ba puurɛ n pee. (Mag. 11:25; Tm. 20:35) Ge to kan bɔta ti to pɛ̃regɛ saama la ti la ana wuu ba nari ti ba bo sɛla bii to zɛregɛ ba la ban ka ta’an bo sɛla zo’e la. Ton tɔɣeseri Yehowa la zuo, to puurɛ wan pee la nɛra woo n bo sɛla se’ere n sɔi la, ba bo to la ban wan ta’an bo sɛla.—2 Ko. 9:7.

HON WAN EŊƐ SE’EM TA’AN NYAŊƐ YELEDAAŊƆ

14. Daaŋɔ ani n paari Kristakɔma n maaseni pɔɣedire?

¹⁴ Ho san maasena ho pɔɣedire ti la na’asɛ Yehowa, yeledaaŋɔ wan bɔna. Makerɛ, daanse’ere la ta’an kpe’em bo ho ti ho eŋɛ pɔɣedire la naana. Charlie n ze’ele Solomon Islands yeti: “La yuun kpe’em mɛ ti to loe sɛba n wan wa’an pɔɣedire de’eŋo la na. To tari la zɔdoma zo’e zo’e. Tomam malema poan me, la nari ti ho beem nɛra woo!” Tabitha, ti to puɣum tɔɣɛ a yele la yeti: “Tomam gingilega la poan, la nari ti ho eŋɛ pɔɣedire de’eŋo la kãregɛ. La yuun yue mɛ ge ti to dɔɣereba nyaa sakɛ ti to beem nɛreba 100 ma’a.” Sarah n ze’ele India yeti: “Nɛreba zo’e zo’e ni ti’isa la ban tari ligeri zo’e se’em la nɛreba n geele ba se’em. Mam suɔ ayima n daɣɛ Sɛɛradaana yuun eŋɛ a pɔɣedire de’eŋo kãregɛ mɛ. Bala la, nɛreba yuun pɛ̃regeri mam mɛ ti la nari ti mam me eŋɛ n denɛ la bala mea nɔɔ.” Bem n wan soŋɛ hɔ ti ho ta’an maalɛ yele ana wa la yɛla ase’a me?

15. To san maasena pɔɣedire yɛla, beni n sɔi ti la nara ti to ni kɔ’ɔn zusa?

¹⁵ Ho san maasena ho pɔɣedire yɛla, ni kɔ’ɔn zusa. Ho ta’an yele Yehowa daaŋɔ la n de sɛla, la lan ani ho se’em yele la poan. (Flp. 4:​6, 7) Ho ta’an zusɛ en ti a soŋɛ hɔ ti ho kɔ’ɛ ho puti’irɛ soŋa, ta’an nyɔkera homea daaŋɔ saŋa ge me tara sukpe’ene la yele san ta pakɛ. (1 Pe. 5:7) Ho san nyɛ eŋa n lebese ho zusega la se’em, ho wan dekɛ homea delum en malum pa’asɛ. Tabitha, ti to puɣum tɔɣɛ a yele la yeti: “Mam la mam zaba la yuun fabeli mɛ ti daanse’ere tomea bii tomam la to deodoma kan bɔkɛ taaba yɛla poan. Bala la, to san ni yeti to sɔsɛ ton wan maasum to pɔɣedire la se’em, to ni zusɛ mɛ ge nyaa sɔsɛ. To yuun baŋɛ ti Yehowa n kɔ’ɔn soŋera tɔ ti to tara suma’asum la taaba.”

16-17. To san sɔsɛ gilema sore poan, la wan soŋɛ pɔɣedire maaseŋɔ la wani?

¹⁶ Tɔɣera ya la gilema bɔ’ɔra taaba la ya yidoma. (Mag. 15:22) Yan maaseni ti ya di taaba la, la wan nara ti ya kɔ’ɛ ya puti’irɛ yɛla zo’e zo’e poan. Yele ana ta’an dɛna wuu yan wan loe dabese’ere, yan wan dekɛ ligeri se’em eŋɛ pɔɣedire la, la nɛresɛba ti ya wan beem. Ya san yeti ya kɔ’ɛ ya puti’irɛ, laɣum sɔsɛ ya de yele ge bisɛ Baabule naresum yelese’a n wan ta’an soŋɛ ya. Ya me ta’an soke mabiisi n bi vo’osum poan ge tara makesonɛ. Ya san laɣum sɔsa bii ya naɛ la ya yidoma sɔsa, la nari ti ya mina guŋerɛ ge me tara bɔkerɛ. Makerɛ, ya dɔɣereba san bɔta ti ya eŋɛ sɛla ti bɔkerɛ bɔna bim, ya ta’an eŋɛ ban boti sɛla la. La dela dabeserɛ n boi de to’ore bɔ’ɔra bamam me. Ya san kan ta’an eŋɛ ban boti sɛla la, doose ya gilema sore poan basɛ ti ba bɔkɛ sɛla n sɔi ti ya kan ta’an eŋɛ bala. (Kol. 4:6) Basɛ ti ho deodoma la bɔkɛ ti ya boti la ya pɔɣedire la tara pupeelum ge me na’asɛ Yehowa.

¹⁷ La ta’an kpe’em bo ho ti ho tɔɣɛ pa’alɛ ho dɔɣereba hon boti ho eŋɛ yelese’a ge ho ta’an soŋɛ ba ti ba bɔkɛ ho puti’irɛ n de se’em. Mabia ayima n ze’ele India ti a yu’urɛ dɛna Santhosh yeti, “To yidoma yuun boti la to dekɛ Hindu malema yɛla pa’asɛ to pɔɣedire la poan. La yuun yue mɛ ge ti mam la mam zaba la nyaa ta’an tɔɣɛ pa’alɛ to deodoma la ton kɔ’ɛ to puti’irɛ se’em. To yuun sakɛ mɛ eŋɛ bamam n boti to eŋɛ yelese’a n kan giisɛ Yehowa pa’alegɔ la. Makerɛ, to yuun tee duɣɛ la disɛka ti ba bɔta la ge me ka dekɛ yuuma la wa’a pa’asɛ bim, se’ere n sɔi la ba ka malum yele aŋa.”

18. Ho wan eŋɛ la bem ta’an basɛ ti ya pɔɣedire daarɛ la keŋɛ soŋa? (1 Korint 14:40) (Bisɛ foote la.)

¹⁸ Maasum ya soŋa soŋa. Ya san maasum soŋa, tɔregɔ kan ba’ɛ paɛ ya, pɔɣedire daarɛ la. (Kaalɛ 1 Korint 14:40.) Wayne n ze’ele Taiwan yeti: “Lan yuun gee dabesa fii la to pɔɣedire daarɛ la paɛ la, to sɔsɛ mɛ la nɛresɛba n yeti ba soŋɛ to la. To yuun pa’alɛ ba ton eŋɛ maaseŋɔ se’a ge me eŋɛ itipaalegɔ bisɛ yɛla n wan keŋɛ se’em.” Dekɛ ya saŋa la tum tuuma soŋa soŋa ti la pa’alɛ ti ya tari gilema bɔ’ɔra saama la.

19. Bem n wan soŋɛ hɔ ti ho pɔɣedire la keŋɛ soŋa wuu hon boti se’em la?

¹⁹ Ya san te’ele ti’isɛ yelese’a n wan ta’an eŋɛ pɔɣedire la poan, la sɛla ti ya wan eŋɛ, la wan gu ya yeledaaŋɔ zo’e zo’e poan. (Mag. 22:3) Makerɛ, ho san bisɛ ti nɛreba zo’e zo’e ta’an wa’an ho pɔɣedire de’eŋo la ti ho ka beem ba, geele hon wan eŋɛ se’em. Basɛ ti ho yidoma sɛba n ka boi yelemɛŋɛrɛ la poan la baŋɛ ho pɔɣedire la n wan ana se’em. Ho ta’an pa’alɛ ba zaseŋɔ yele la n boi jw.org zuo n de “What Happens at a Wedding of Jehovah’s Witnesses?” Ho ta’an loe mabia n kumesɛ ti a dɛna “se’em n de pɔgɔdire de’eŋo zuodaana” ti a bisɛ ti pɔɣedire de’eŋo la keŋɛ soŋa. (Yon 2:8) Ho san tɔɣɛ pa’alɛ en hon maasum ho pɔɣedire la se’em, a wan bisɛ ti pɔɣedire la keŋɛ soŋa wuu hon boti se’em la.

20. La nari ti nɛra la a zaba tɛ̃ra la bem yele ba pɔɣedire daarɛ la?

²⁰ Ho san ti’isɛ bisɛ lan nari ti ho maasum ho pɔɣedire la se’em la, la ta’an basɛ ti tɔregɔ paɛ hɔ. Ge tɛ̃ra ti ho pɔɣedire daarɛ la dela daanyinɛ ma’a. La dela dabese’ere n de yia ti yamam yayi la wan laɣum pu’usa Yehowa la pupeelum. Tiregɛ basɛ ti ya pɔɣedire la dɛna naana ge me na’asɛ Yehowa. Dekɛ homea delum Yehowa. Ya san basɛ ti a soŋɛ ya, ya pɔɣedire la wan keŋɛ soŋa, ti pooren ya san ta ti’isa de yele, ya suure kan sa’am ge la wan dɛna la pupeelum ma’a.—Ym. 37:​3, 4.