Tɔɣesa Yehowa N Siregeri Amea Se’em La

1. Bem n basɛ ti hon puurɛ pee la Yehowa n siregeri amea se’em la?

TO SAN bisɛ nɛresɛba n tari kpe’eŋo zina beere wa, hon wan ta’an yeti ba siregeri bamea? La daɣɛ bala la fii me. Ge Yehowa n de paŋa za’adaana la siregeri la amea. (Ym. 113:​5-8) Nɛra ka boi n siregeri amea wuu Yehowa. A ka zɛkeri amea la fii me. Zaseŋɔ wa poan, to wan geele Yehowa hala anaasi, la ba ayima ayima woo n pa’alɛ Yehowa n siregeri amea se’em. To wan le bisɛ Yezu n yuun tɔɣesɛ a Sɔ sirege a mea se’em la. Yele ana wa wan soŋɛ tɔ ti to ana du’a du’a la Yehowa ge me kɔ’ɔn siregera tomea wuu Yehowa la.

YEHOWA BOTI LA TO LƐNA EN

2. Yooma 62:8 pa’alɛ tɔ Yehowa yele la wani? (Bisɛ foote.)

² La daɣɛ naana ti ho ta’an lɛna sɛba n zɛkeri bamea. Nɛresɛba n zɛkeri bamea ka iti nɛreba soŋa se’ere n sɔi la ba ti’isɛ ti bamam nyani nɛreba. Yehowa ka ani bala la fii me! To saazuo Sɔ la n siregeri amea la zuo, a bo to la yɔ’ɔ ti to zusa en. A boti la to ni yele en sɛla woo n daani tɔ. (Kaalɛ Yooma 62:8.) Wuu sɔ n ni bɔta ti a wum yelese’a n daani a kɔma se’em la, Yehowa me kɔ’ɔn ana la lɛɛ ti a kelese a yamesi zusega. Yelemɛŋɛrɛ, a yuun basɛ ti ba gulesɛ a yamesi zusega zo’e zo’e eŋɛ Baabule la poan. Bala pa’alɛ ti Yehowa boti la to zusa en. (Yos. 10:​12-14; 1 Sa. 1:​10-18) Ge saŋa ase’a to tuure yɛla la ta’an ni basɛ ti to ti’isa ti to kan ta’an zusa Yehowa.

3. To eŋɛ la wani baŋɛ ti Yehowa boti la to zusa en saŋa woo?

³ To wan ta’an zusɛ Yehowa hali la san ana to wuu a ka nɔŋɛ tɔ. Beni n sɔi ti to wan ta’an yele bala? Biyaalega makerɛ la poan, Yezu dekɛ Yehowa makɛ me la sɔ ti a bia tue en zo’e zo’e ge ti’isa ti a sɔ la kan le to’e en. Sɔ la yuun eŋɛ la wani eŋa n yuun nyɛ ti a bia la lebe kula na la? Yezu yuun yeti sɔ la n nyɛ a dayua la, ti a zɔ “to’ohɛ bo en zaarɛ ge kɔkɛ en.” (Lu. 15:​17-20) Yehowa ani wuu sɔ wa. To suure san sa’am la to tuure yɛla bii putɛyiila n tari tɔ ti to zusɛ en, a ni kɔ’ɔn ma’ɛ la amea kɛlesa tɔ. (Fab. 3:​19, 20) Yehowa tari to giile mɛ wuu sɔ la n zɔ tu’usɛ a bia la. A ni buɣelɛ la to suure ge me basɛ ti to tara suure lua ti a nɔŋɛ to mɛ. (Isa. 57:15) Yehowa ni zɔ “to’ohɛ” to la wani zina beere wa? A ni doose la keendoma la, to deodoma, la to zɔdoma sɛba n nɔŋɛ en la poan ita bala. (Yam. 5:​14, 15) Yehowa n boti to lɛna en la zuo ti a ita yele ana bɔ’ɔra tɔ.

4. Yezu yuun eŋɛ la bem pa’alɛ ti a boti la nɛreba lɛna en?

⁴ Yezu tɔɣeseri la a Sɔ. Yezu siregeri la amea wuu a Sɔ la. Bala n sɔi ti eŋa n yuun boi tiŋa wa zuo la, nɛreba bɔta ti ba lɛna en. Dabeem yuun ka tari ba ti ba soke en yɛla. (Mr. 4:​10, 11) Bala zuo la, a san ni yele ba ti ba pa’alɛ ba puti’irɛ n de se’em yele poan, ba ni kɔ’ɔn tɔɣɛ la lan ani ba se’em. (Mt. 16:​13-16) Ba me san ni tue, ba paleŋa ni ka ɛ̃ɣera ti Yezu sunsɔa wan nyie ti a zɛregɛ ba. Ba yuun mi ti Yezu di’iseri la suure, tara nimbɔzore ge me ita som. (Mt. 17:​24-27) Yezu n yuun tɔɣesɛ a Sɔ la nima nima la zuo, a podɔleba la yuun baŋɛ Yehowa la soŋa. (Yon 14:9) Yezu itigɔ yuun basɛ ti a podɔleba la baŋɛ ti Yehowa siregeri la amea ge me bɔta ti ba ana du’a du’a la en. Ba yuun le baŋɛ ti Yehowa ka ani wuu pu’usegɔ nɛŋadoma la n zɛkeri bamea ge vɛɣena nɛreba la.

5. To san siregera tomea, beni n sɔi ti la kan kpe’em bo nɛreba ti ba lɛna tɔ?

⁵ To wan eŋɛ la wani ta’an tɔɣesa Yehowa? To san siregera tomea, la kan kpe’em bo nɛreba ti ba lɛna tɔ. To san ka siregera tomea, to nini wan pɔsɛ tɛ̃ta la basɛba, ti’isa ti to nyani ba ge me kan di sugeri bo ba, ba san eŋɛ sɛla ti la daam tɔ. To san ita bala, nɛreba kan bɔta ti ba lɛna tɔ. Ge to san siregera tomea, to wan ita nɛreba soŋa, di’isa suure la ba ge me dita sugeri bɔ’ɔra ba. To san ita bala, nɛreba wan bɔta ti ba lɛna tɔ. (Kol. 3:​12-14) Keendoma nari ti ba tiregɛ ta’an basɛ ti mabiisi la lɛna ba. Ba san wan ta’an ita bala, la dela ba naɛ la mabiisi la bɔna saŋa woo. Ba wan tiregɛ kena zamesegɔ Na’am Pu’usegɔ Deo la poan ge daɣɛ ti saŋa woo ba ita zamesegɔ la videoconferencing poan. Ba bɔŋa la san wan bo yɔ’ɔ, ba ta’an naɛ la mabiisi la yire la yire na’am mɔɔlegɔ tuuma la poan. Bala wan basɛ ti mabiisi la mina keendoma la soŋa soŋa ge ti la me kan kpe’em bo ba ti ba sɔsɛ la keendoma la.

YEHOWA TARI LA BƆKERƐ

6-7. Bem n pa’alɛ ti Yehowa ta’an ni tee a puti’irɛ a yamesi san zusɛ en?

⁶ Nɛresɛba n zɛkeri bamea la ni ti’isa ti bamam n mi sɛla woo, bala la yele ka pakɛ ti ba ni tee ba puti’irɛ. Ge Yehowa n mi sɛla woo la ka ani bala! Eŋa n siregeri amea la zuo, a ni ma’ɛ la amea kelese nɛreba puti’irɛ n de se’em. Hali saŋa ase’a a ta’an ni tee a puti’irɛ yele poan. Makerɛ, Miriam la Aaron yuun laɣum nyɔna la ba suɔ Moses. Ban yuun eŋɛ sɛla wa yuun ka nari se’ere n sɔi la Moses yuun dela Yehowa nɔdɛ’ɛsa. Bala pa’alɛ ti Miriam yuun tuɣum ka nam la Yehowa. Bala zuo la, Yehowa sunsɔa n yuun nyie la Miriam ti a basɛ ti a ŋma kunkom. Ge Aaron n yuun belum Moses ti a soŋɛ Miriam la, Moses yuun belum la Yehowa ti a tibɛ en. Yehowa wan eŋɛ la wani? Yehowa san zɛkeri ni amea, a kan tee a puti’irɛ ge A yuun ka eŋɛ bala! Yehowa n siregeri amea la zuo, a yuun tibɛ Miriam mɛ.—Kan. 12:​1-15.

⁷ Yehowa n yuun eŋɛ sɛla bo Naba Hezekia la pa’alɛ ti a siregeri la amea. Yehowa yuun tum la a nɔdɛ’ɛsa ti a keŋɛ ta yele naba wa ti a wan ki. Hezekia yuun kaasɛ mɛ paa belum Yehowa ti a tibɛ en. Yehowa yuun zɔ la a nimbu’ɔ ge dekɛ yuun 15 pa’asɛ naba wa vom dabesa poan. (2 Na. 20:​1, 5, 6) Yehowa sirum tari asaaleba giile. Eŋa n siregeri amea la zuo, a kɔ’ɔn bɔta la a kɛlesa tɔ.

8. Bem n pa’alɛ ti Yezu tari bɔkerɛ? (Mark 3:​1-6)

⁸ Yezu tɔɣeseri la a Sɔ. Yezu n yuun boi tiŋa wa zuo la, a yuun dekɛ la yɔ’ɔ woo eŋɛ sɛla n ani soŋa bo nɛreba. Makerɛ, a yuun tibɛ la nɛreba Vo’osegɔ Daarɛ la. Pu’usegɔ nɛŋadoma la yuun ti’isɛ ti la ka nari ni ti a eŋɛ bala ge Yezu yuun tari la nɛreba giile ge me bɔkera ba. (Kaalɛ Mark 3:​1-6.) Yezu n de tansugere la nɛŋadaana la kelum tara bɔkerɛ la giile bɔ’ɔra to mɛ zina beere wa. Makerɛ, nɛra san tum be’em a ni di’isa suure la en mɛ ge me ni bo en yɔ’ɔ ti a ta’an tee.—Lil. 2:​2-5.

9. To wan eŋɛ la bem pa’alɛ ti to tari bɔkerɛ? (Bisɛ fɔɔra la.)

⁹ To wan eŋɛ la wani ta’an tɔɣesa Yehowa? La nari ti to tɔɣesa Yehowa ta’an tara bɔkerɛ to ti’isegɔ la to itigɔ poan. (Yam. 3:17) Makerɛ, dɔɣereba n tɔɣeseri Yehowa kan bɔta ti ba kɔma ita yelese’a ti ba kan ta’an eŋɛ. Yakob eŋɛ la makesonɛ yele wa poan ti la bɔna Pin’ileŋɔ 33:​12-14. Dɔɣereba san siregera bamea ge me tara bɔkerɛ, ba kan tara ba kɔma la makera taaba. Keendoma me nari ti ba tara bɔkerɛ. Makerɛ, keema kan pɛ̃regɛ a tadaandoma ti ba doose eŋa puti’irɛ ge a wan tuɣum sakɛ la keendoma la zo’e zo’e n kɔ’ɛ ba puti’irɛ se’em la. (1 Tim. 3:​2, 3) To san ni ka bɔkɛ nɛreba puti’irɛ, la wan ana soŋa ti to ni soke ba baŋɛ sɛla n sɔi ti bamam ti’isa bala. (Arom 14:1) To za’a waabi n boi tansugere la poan nari ti to ‘basɛ ti nɛra woo baŋɛ ti to tari bɔkerɛ.’—Flp. 4:5.

YEHOWA DI’ISERI LA SUURE

10. Yehowa eŋɛ la bem pa’alɛ ti a di’iseri la suure?

¹⁰ Nɛresɛba n zɛkeri bamea ka boti nɛreba gu’una ba. Ba ka di’iseri suure la fii me. Yehowa ka ani bala. Eŋa n di’iseri suure gana nɛra woo! Makerɛ, Noah saŋa la, Yehowa yuun yeti eŋa wan gura ta paɛ yuun 120 ge nyaa sa’am tunfɛ’ɛsadoma la. (Pin. 6:3) Sankaŋa poan la, Noah yuun wan ta’an uge a kɔma la ge me kpa daka la ti ba za’a ta’an nyɛ faarɛ. Pooren, Abraham n yuun ta sɔkera Sodom la Gomora sa’aŋɔ la yele la, Yehowa yuun ma’ɛ la amea kelese en. La san deni se’em n zɛkeri amea, a wan yele ni ti, ‘Hon dela ani sɔkera mam yɛla!’ Ge Yehowa n siregeri amea la zuo, a yuun di’ise la suure la Abraham.—Pin. 18:​20-33.

11. Wuu 2 Peter 3:9 n yele se’em la, beni n sɔi ti Yehowa di’isa suure zina beere wa?

¹¹ Zina beere wa, Yehowa kelum di’isa la suure. A kɔ’ɔn gura la a dabeserɛ la paɛ ti a sa’am tingɔŋɔ wa. Beni n sɔi ti a di’isa suure bala? “Se’ere n sɔe la, a ka bote se’em sagom. Ge a bote la nɛra woo tee a potɛn’ɛrɛ a be’emtooma poan.” (Kaalɛ 2 Peter 3:9.) Yeen ti’isɛ yele wa bisɛ: Yehowa n di’iseri suure la zuo, nɛreba zo’e zo’e nyaa dela a zɔdoma. To me tari puti’irɛ ti nɛrɛba zo’e zo’e wan ta’an kelum dɛna a zɔdoma. Ge Yehowa kan di’isa suure bala wuusa. Yehowa nɔŋɛ nɛreba mɛ ge a kan bo ba yɔ’ɔ ti ba ita bamam n boti se’em. A kan basɛ ti tunfɛ’ɛsadoma la bɔna wuusa.—Hab. 2:3.

12. Yezu iti la bem ti la pa’alɛ ti a tɔɣeseri la Yehowa n di’iseri suure se’em la?

¹² Yezu tɔɣeseri la a Sɔ. Yuuma zo’e zo’e n wana ti Yezu kɔ’ɔn tɔɣesa Yehowa ge di’isa suure. Yezu nyɛ Sitaana n parum yɛla bo Yehowa la a yamesi se’em. (Pin. 3:​4, 5; Yob 1:11; Lil. 12:10) Yezu nyɛti nɛreba n le namesa mɛ. Yeen ti’isɛ bisɛ a inya n kiti se’em ti “a sagom Sagona la tooma”! (1 Yo. 3:8) Bem zuo ti Yezu ta’an di’isa suure gura sansɛka ti Yehowa wan bo en yɔ’ɔ ti a sa’am Kolekpabɛ’a la za’a za’a? Yele deyima dela Yezu siregeri la amea. A mi ti Yehowa ma’a n tari yɔ’ɔ ti a pa’alɛ sansɛka ti saŋa la wan wa’ana.—Tm. 1:7.

13. Yezu yuun di’iseri suure la a tuntuneba la wani ge beni n sɔi ti a yuun ita bala?

¹³ Yezu n yuun boi tiŋa wa zuo la, a yuun di’iseri la suure la a tuntuneba la. Makerɛ, saŋa woo ti tuntuneba la yuun ni kɔ’ɔn ŋmɛ̃’ɛra nɔkpe’ene ti ba baŋɛ se’em n gani la, Yezu yuun ka gɛ̃ ba basɛ. A yuun kɔ’ɔn di’isa la suure la ba. (Lu. 9:46; 22:​24-27) A yuun tari sakerɛ ti ba wan ba’asum tee. Hon tabelɛ tue yele yinɛ sugumnɔɔrɛ zo’e zo’e? La san dɛna bala, ho puurɛ pee mɛ la hon tari Naba n siregeri amea ge me di’isa suure la!

14. Bem n wan soŋɛ tɔ ti to ta’an di’isa suure?

¹⁴ To wan eŋɛ la wani ta’an tɔɣesa Yehowa? To san wan ta’an ti’isa ge ita yɛla wuu Yehowa, la nari ti to tara “Krista potɛn’ɛrɛ” la. (1 Ko. 2:16) Bem n wan soŋɛ tɔ ti to ta’an ti’isa wuu Krista? Sɛla n wan soŋɛ to dela to kaala Yezu vom yɛla n boi Baabule la poan la. To san kaalɛ ba’asɛ, la nari ti to ti’isɛ taɣesɛ baŋɛ sɛla n sɔi ti Yezu yuun ita a yɛla bala. To me nari ti to zusɛ Yehowa ti a soŋɛ tɔ ti to ta’an siregera tomea ge di’isa suure wuu Yezu la. To san ti’isa wuu Krista, to wan tɔɣesa la Yehowa ta’an di’isa suure la tomea, la nɛreba.—Mt. 18:​26-30, 35.

YEHOWA NYƐTI SƐBA N SIREGERI BAMEA LA

15. Bo makerɛ pa’alɛ ti Yehowa nɔŋɛ nɛresɛba n siregeri bamea la. (Yooma 138:6)

¹⁵ Kaalɛ Yooma 138:6. Yeen ti’isɛ yele wa bisɛ: Yehowa n de Gaŋɛ Za’adaana sɔna saazuo la tinparɛ wa puurɛ pee mɛ la sɛba n siregeri bamea la! Nɛreba zo’e zo’e boi mɛ ti nɛreba basɛba yuun ka bisɛ nam ba ge Yehowa yuun bisɛ nam ba mɛ. To ta’an kan mina basɛba ge Yehowa gulesɛ ba yɛla eŋɛ Baabule la poan mɛ. Makerɛ, Debora yuun tari la yelemɛŋɛrɛ tuna bɔ’ɔra Isaak la Yakob yidoma yuuma n paɛ 125! La boi bim ti to ka mi pɔka wa yɛla zo’e zo’e ge Yehowa yuun basɛ ti Moses gulesɛ la pɔka wa yɛla fii ti la pa’alɛ eŋa n yuun nɔŋɛ en se’em. (Pin. 24:59; 35:8) Yuuma zo’e zo’e pooren, Yehowa yuun loe la David n de dunkeena ti a ta dɛna Israel tiŋa naba. (2 Sa. 22:​1, 36) Ban yuun dɔɣɛ Yezu ba’asɛ la, la yuun ka yue ti Naayinɛ na’asɛ dunkeema basɛba ge basɛ ti malesi keŋɛ ta yele ba ti ba dɔɣɛ Mɛzaaya la Betlehem tiŋa. (Lu. 2:​8-11) Yosef la Mary me n yuun tari Yezu wa’an pu’usegɔ yire la poan na la, Yehowa yuun na’asɛ la Simeon la Anna n de bunkureba la ti ba nyɛ a Dayua la. (Lu. 2:​25-30, 36-38) Yelemɛŋɛrɛ, la boi bim ti ‘Naayinɛ boi la zuin sa ge a biseri tarumdoma mɛ’!

16. Yezu yuun iti nɛreba la wani ti la pa’alɛ ti a tɔɣeseri la a Sɔ?

¹⁶ Yezu tɔɣeseri la a Sɔ. Wuu a Sɔ la, Yezu yuun na’aseri sɛba n siregeri bamea mɛ. A yuun pa’alɛ la “yiremɔhe” Naayinɛ Na’am la yɛla. (Tm. 4:13; Mt. 11:25) Yezu yuun tibɛ bã’adoma mɛ. A yuun ni tibɛ ba mɛ ti ba baŋɛ ti a na’asɛ ba. (Lu. 5:13) Yu’unseko ti ba yuun yeti ba nyɔkɛ Yezu la, a yuun eŋɛ amea wuu yameŋa la pee a tuntuneba la nama. (Yon 13:5) Ge ti a nyaa keŋɛ saazuo la, a yuun bo a podɔleba la za’a la tuunɛ, ti tomam me pa’asɛ bim, ti to soŋɛ nɛreba ti ba ta’an ta vɔna wuusa.—Mt. 28:​19, 20.

17. To wan eŋɛ la bem ti la pa’alɛ ti to na’aseri nɛreba? (Bisɛ foote la.)

¹⁷ To wan eŋɛ la wani ta’an tɔɣesa Yehowa? To san mɔɔla yelesoma la bɔ’ɔra nɛra woo la ka pakɛ la ban ze’ele zɛ’an bii ban keŋɛ sukuu paɛ beense’ere, la pa’alɛ ti to nɔŋɛ ba ge me na’asa ba. La ka pakɛ la ton tari yɔ’ɔsebo bii ton tã sɛla ita, to san geele to mabiisi la ti ba gani tɔ, la pa’alɛ ti to nɔŋɛ ba ge me na’asa ba. (Flp. 2:3) To san siregera tomea ge me kɔ’ɔn ‘deŋɛ nɛŋa’ bɔ’ɔra taaba na’asegɔ yele ana wa la yɛla ase’a me poan, Yehowa puurɛ wan pee.—Arom 12:10; Zep. 3:12.

18. Beni n sɔi ti hon bɔta ti ho tɔɣesa Yehowa n siregeri amea se’em la?

¹⁸ To san tiregɛ tɔɣesa to saazuo Sɔ la n tari nɔŋerɛ la, nɛreba wan lɛna tɔ, to wan tara bɔkerɛ ge me di’isa suure paa. To me wan na’asera nɛreba wuu Yehowa n iti nɛreba se’em la. Tɛ̃ra ti, to san tiregɛ la to paŋa za’a ti to tɔɣesa Yehowa n siregeri amea se’em la, to wan dɛna tuulum bɔ’ɔra en!—Isa. 43:4.