Ho Wan Eŋɛ La Bem Pa’alɛ Ti Ho Puurɛ Pee Ya La Lua Bunɔ La?

1-2. Lua bunɔ la kɛ̃ to suure ti to bɔta ti to eŋɛ la bem ge bem zuo? (2 Korint 5:​14, 15) (Bisɛ foote la.)

YIRE san tabelɛ lu dĩ ho ti nɛra faaɛ hɔ basɛ ho puurɛ kan pee la nɛra la? Hali ba san faaɛ nɛreba basɛba pa’asɛ homea poan ho wan bɔta ti ho eŋɛ pa’alɛ ti ho puurɛ pee ya.

² Wuu zaseŋɔ seko n tole la n pa’alɛ se’em la, to kan ta’an faaɛ tomea be’em poan. Ge Yehowa n eŋɛ sɛla n wana: A dekɛ la a Dayua la bo to ti to (1) ta’an nyɛ to be’em sugeri dia, (2) ta’an tara beere sa’am puti’irɛ ti to wan ta ana kasi (3) ti to le tara bɔnsoŋa la Naayinɛ. Lua bunɔ la zuo ti to tara puti’irɛ ti to wan ta vɔna daarewoo tinpaalega la poan. Yezu yuun eŋɛ pa’alɛ ti a tari la nɔŋerɛ zo’e zo’e bɔ’ɔra nɛreba bala n sɔi ti a yuun ki bo to la. A yuun nɔŋɛ nɛreba mɛ ge ti ba nyaa dɔɣɛ en tinparɛ wa zuo. (Mag. 8:​30, 31) Tuntuna Paul yeti, ‘Krista nɔŋerɛ la n kɛ̃ to suure.’ (Kaalɛ 2 Korint 5:​14, 15.) Bala vuurɛ dela to eŋɛ pa’alɛ ti to puurɛ pee ya la Yezu nɔŋerɛ la ge me da malum tamɛ eŋa n eŋɛ sɛla bo to la.

3. Hon wan eŋɛ se’em pa’alɛ ti ho puurɛ pee ya la lua bunɔ la ta’an bɔna de to’ore la basɛba, beni n sɔi?

³ Ho wan eŋɛ la bem pa’alɛ ti ho puurɛ pee ya la lua bunɔ la? Ho lebesego la ta’an bɔna de to’ore la basɛba. To makɛ yeti nɛreba batã n yeti ba keŋɛ tiŋa ayima ge ze’ele tisi to’ore to’ore. Ba sarɔtɔ la wan bɔna la to’ore to’ore. Bala mea nɔɔ, “sarɔseko” ti ho wan eŋɛ pa’alɛ ti ho puurɛ pee ya la lua bunɔ la wan pa’alɛ la hon la Yehowa bɔŋa la n ani se’em nananawa. Bala la, zaseŋɔ wa wan tɔɣɛ la nɛreba sugumnɔɔrɛ butã yele: (1) Baabule zamesegɔdoma, (2) sɛba n muse ko’om, la (3) mabiisi sɛba n buregɛ la.

BAABULE ZAMESEGƆDOMA

4. La ani Yehowa la wani la sɛba n de Baabule zamesegɔdoma la?

⁴ Ho san zamesa Baaabule la, geele yele wa bisɛ: Hon keleseri yelesoma la se’em la pa’alɛ ti ho laɣum pa’asɛ la nɛresɛba ti Yehowa soŋera ba ti ba dɛna a zɔdoma la. (Yon 6:44;Tm. 13:48) ‘Na’ayenɛ magaheri la nɛreba suure bisa.’ Bala pa’alɛ ti a nyɛti hon tiregeri se’em ti ho zamesɛ baŋɛ a yele. A puurɛ me pee mɛ la hon iti teere se’em ti ho ta’an dɔla a pa’alegɔ la. (Mag. 17:3; 27:11) Lua bunɔ la n wan soŋɛ hɔ ti ho ta’an dɛna Yehowa zɔ. (Arom 5:​10, 11) Da makɛ tamɛ yele wa.

5. Baabule zamesegɔdoma wan ta’an dekɛ ka’aŋɔ la n boi Filipi 3:16 tum tuuma la wani?

⁵ Ho san dɛna Baabule zamesegɔdaana ho wan eŋɛ la wani pa’alɛ ti ho puurɛ pee ya la lua bunɔ la? Sore deyima poan ti ho wan ta’an eŋɛ bala dela ho dekɛ tuntuna Paul n yuun ka’am Filipidoma se’em la tum tuuma. A yeti: ‘Wuu to nyɛ nɛŋa tɔlega paɛ zɛ’an la, basɛ ya ti to kɔ’ɔn kena ma’a ma’a sore dena poan.’ (Flp. 3:16) Baabule ayima lerege kaalegɔ zɛ’an wa yeti: “Nananawa, la nari ti to kɔ’ɔn tɔ tontɔɔ kena ye’a zɛ’an ti to ye’a la.” Wuu ka’aŋɔ la n pa’alɛ se’em la, hon boi nyɔvore sore la zuo, da basɛ ti sɛla gu ho.—Mt. 7:14; Lu. 9:62.

6. Baabule zamesegɔdoma wan eŋɛ la wani, la san kpe’em bo ba ti ba basɛ yɛla ase’a? (Tɛɛnhegɔ 30:​11-14) (Bisɛ foote la.)

⁶ La san kpe’em bo ho ti ho dekɛ hon nan zamesɛ sɛla Baabule la poan tum tuuma, ho wan eŋɛ la wani? Viisɛ baŋɛ yele la soŋa ge zusɛ Yehowa ti a soŋɛ hɔ ti ho bɔkɛ. (Ym. 86:11) La san kelum kpe’em bo ho ti ho bɔkɛ pa’alegɔ la, ho ta’an nan basɛ yele la ge kɔ’ɔn zamesa Baabule la. Ge la me san kpe’em bo ho ti ho basɛ sɛla ti Naayinɛ ka bɔta, ho wan eŋɛ la wani? Tɛ̃ra ti Yehowa kan sakɛ yele to ti to eŋɛ sɛla n wan zɔɛ to paŋa. Ho wan ta’an dɔla a pa’alegɔ la. (Kaalɛ Tɛɛnhegɔ 30:​11-14.) Yehowa yeti a wan soŋɛ hɔ. (Isa. 41:​10, 13; 1 Ko. 10:13) Bala la, da pisegɛ basɛ. Da ti’isa ho daaŋɔ la yele la ge tuɣum basɛ ti ho puurɛ pee la Yehowa n eŋɛ sɛla bo ho la, yele yele wuu lua bunɔ la. Ho nɔŋerɛ la ti ho tara bɔ’ɔra Yehowa la san zɔ’ɔra ho wan baŋɛ ti “A nɔɔrɛ la me te a dekɛ bo to la ka kpe’em bo to.”—1 Yo. 5:3.a

7. Kɔnsɛba ti ba uge ba yelemɛŋɛrɛ la poan la wan ta’an ti’isɛ taɣesɛ la bem yele?

⁷ Yamam sɛba ti ba uge ba yelemɛŋɛrɛ la poan la me wan ta’an eŋɛ la wani vurege du Yehowa? Ya me dela Baabule zamesegɔdoma. Yelemɛŋɛrɛ, ya dela ya dɔɣereba yia Baabule zamesegɔdoma. Baabule la yeti: “Vuruge ya lɛm Na’ayenɛ te a me wan vuruge lɛm ya.” (Yam. 4:8; 1 Yel. 28:9) Ho san ita yelese’a n wan basɛ ti ho vurege du Yehowa, a me wan vurege du ho. La daɣɛ ti ho dɔɣereba n uge ho yelemɛŋɛrɛ la poan n sɔi ti Yehowa bɔta ho yele. Ge sɛla n sɔi ti a nɔŋɛ ho yele la dela a boti la ho vurege lɛm en ta’an dɛna a zɔ. Beni n wan basɛ ti ho ta’an dɛna Yehowa zɔ? La dela lua bunɔ la. La ka nari ti ho tamɛ de yele. (Arom 5:​1, 2) Bala la, ho san ta yeti ho keŋɛ yuunɛ wa Yezu Kum Tiirɛ la, ti’isɛ taɣesɛ Yezu la Yehowa n eŋɛ yelese’a bo ho. Basɛ ti putɛkaŋa soŋɛ hɔ ti ho eŋɛ pa’alɛ ti ho puurɛ pee ya la lua bunɔ la ti Yehowa doose a Dayua poan dekɛ bo ho la.b

SƐBA N MUSE KO’OM

8. Sɛba n muse ko’om la eŋɛ la wani pa’alɛ ti ba tari sakerɛ lua bunɔ la poan?

⁸ Ho san muse ko’om, ho puɣum eŋɛ la yɛla zo’e zo’e pa’alɛ ti ho tari sakerɛ lua bunɔ la poan. Makerɛ, ho eŋɛ la teere ta’an ana du’a du’a la Yehowa ge me nana a pa’alegɔ. Ho nam Yezu n bo nɔɔrɛ ti to ɛ podɔleba ge me tɔɣera ho sakerɛ yɛla bɔ’ɔra nɛreba. Ho kã homea bo la Yehowa ge muse ko’om. Yaarɛ tabelɛ paɛ hɔ la hon pu’useri Yehowa la zuo? (2 Tim. 3:12) Hon tari sakerɛ ge ŋmibera se’em la pa’alɛ ti ho nɔŋɛ la Yehowa. La me pa’alɛ ti ho puurɛ pee ya la lua bunɔ la ti a doose a Dayua poan dekɛ bo ho la.—Heb. 12:​2, 3.

9. Kristakɔma n muse ko’om nari ti ba tɛ̃ra ti bem daaŋɔ n wan ta’an paɛ ba?

⁹ Kristakɔma n muse ko’om nari ti ba mina yelese’a n wan ta’an paɛ ba. La ta’an ana to wuu lua bunɔ la yele ka le ba’ɛ pakɛ tɔ. La wan eŋɛ la wani ta’an eŋɛ bala? Geele yuun kɔbesɛka n deŋɛ nɛŋa Kristakɔma n yuun boi Epesus yele la bisɛ. Yezu yuun pɛɣɛ ba mɛ la ban ŋmiberi se’em la. Ge a yuun yele ba yeti, “yele dena wa te mam tara la ya. De dela ya ka nɔŋɛ mam nananawa wo yan daa nɔŋɛ mam se’em yia la.” (Lil. 2:​3, 4) Yezu n yuun yele sɛla wa pa’alɛ ti Kristabia ta’an pɔsɛ ita yɛla ase’a ge ka le pu’usa Naayinɛ la a suure za’a. Nɛrekaŋa taaba ta’an zusa, kena zamesegɔ, kena na’am mɔɔlegɔ ge a suure za’a ka boi bim. Bala pa’alɛ ti a nɔŋerɛ la ma’ari mɛ. Ho wan eŋɛ la wani ho san bisɛ ti hon yuun tari nɔŋerɛ se’em bɔ’ɔra Yehowa la nyaa ma’ari mɛ?

10. Ho wan eŋɛ la wani dekɛ Paul n yuun yele Timoti sɛla la tum tuuma? (1 Timoti 4:​13, 15)

¹⁰ Tuntuna Paul yuun yele Timoti ti a dekɛ pu’usegɔ n di mi’a bo Yehowa ge me basɛ ti a suure za’a bɔna bim. (Kaalɛ 1 Timoti 4:​13, 15.) Wuu Paul n yele se’em la, tiregɛ ti’isɛ bisɛ hon wan eŋɛ se’em ta’an tara pu’usegɔ n di mi’a bɔ’ɔra Yehowa. (Arom 12:11) Makerɛ, ho ta’an nyɛ nɛŋa maasum soŋa ge nyaa keŋɛ zamesegɔ. Bala wan soŋɛ hɔ ti ho kɛlesa soŋa zamesegɔ poan. Bii ho san eŋɛ homea zamesegɔ ba’asɛ, ho ta’an ni keŋɛ zɛ’an n ani siim ta ti’isɛ taɣesɛ sɛla ti ho kaalɛ la. Wuu hon ni maala bugum ti ba dita se’em la, bala mea nɔɔ ti ho san dekɛ yele ana tum tuuma la wan basɛ ti ho puurɛ pee la lua bunɔ la, la yelese’a ti Yehowa eŋɛ bo to la. Leyɛ’ɛsa, la san ta gee bakwai fii la Tiirɛ Dia la paɛ, ho ta’an dekɛ bakwai aŋa ti’isɛ taɣesɛ Yehowa n iti yelese’a bɔ’ɔra a yamesi. Nɔkpe’ene kai ti bala wan soŋɛ hɔ ti ho puurɛ pee la lua bunɔ la ge ti hon la Yehowa zɔtɔ la ana kankaŋi.

11-12. Hon tari nɔŋerɛ se’em bɔ’ɔra Yehowa la san ta ma’ara, bala pa’alɛ ti Naayinɛ vo’osum la ka boi la hɔ? Tɔɣɛ pa’alɛ. (Bisɛ foote la.)

¹¹ Ho san baŋɛ ti ho ka kpeŋe homea pu’usa Yehowa wuu hon boti se’em la, da basɛ ti ho giila kɔ’ɔsɛ ti ho ti’isa ti Naayinɛ vo’osum la ka boi ho poan. Tɛ̃ra tuntuna Paul n yuun gulesɛ sɛla bo Korintdoma pa’ala a na’am mɔɔlegɔ tuuma la. A yeti: ‘Hali n san ita sɛla ge ti n inya ka kpeŋe,’ “mam tone la toonse’ere te Yenɛ dekɛ eŋɛ n nu’uhe te n tom.” (1 Ko. 9:17) Paul yele wa pa’alɛ to la bem?

¹² Paul giila yuun ta’an ni kɔ’ɔsɛ ti a ka bɔta ti a mɔɔlɛ. Ge la bala za’a, a yuun ni kelum mɔɔla mɛ la ka pakɛ la yelese’a n ni kɔ’ɔsɛ a giila la. Ho me ta’an kɔ’ɛ ho puti’irɛ eŋɛ bala. Ita yelese’a n ani soŋa hali ho giila san puɣum kɔ’ɔsɛ. Bala la, zusɛ Naayinɛ ta’an “tara paŋa la kunkoma’asum ta’an tuna.” (Flp. 2:13) Kɔ’ɔn ita yelese’a n wan basɛ ti ho ana du’a du’a la Yehowa. Tara suure lua ti fii fii, ho wan ta tara nɔŋerɛ zo’e zo’e bɔ’ɔra Yehowa.

13. To wan eŋɛ la wani ta’an viisɛ tomea baŋɛ nyaa to boi “Yesu sore dɔlɔga la poan”?

¹³ La ani soŋa ti saŋa ase’a to ni viisɛ tomea bisɛ nyaa to vɔi to vom ti la makɛ la sɛla ti Paul yele ti la bɔna 2 Korint 13:5 la: La yeti, “Magahɛ ya, ya mɛhe behɛ nya ya sɛ ze’ele soŋa soŋa ya bɔŋa Yesu sore dɔlɔga la poan.” Makerɛ, to ta’an soke tomea yeti: ‘Mam basɛ ti Naayinɛ Na’am la dɛna yia n vom poan?’ (Mt. 6:33) ‘Mam n loe yelese’a dɛ’ɛna la pa’alɛ ti n kiseri be’em?’ (Ym. 97:10) ‘Mam n iti se’em la pa’alɛ ti mam basɛ ti suma’asum la nɔyinɛ bɔna to mabiisi la tiŋasuka?’ (Ep. 4:​2, 3) Tiirɛ Dia saŋa la dela sansɛka n ani soŋa ti to wan ta’an ti’isɛ yele ana wa. To san ti’isɛ bisɛ Yehowa la Yezu n eŋɛ sɛla bo to la, bala wan basɛ ti to eŋɛ pa’alɛ ti to puurɛ pee ya. To me wan vɔna bɔ’ɔra la Krista ge daɣɛ tomea wuu Paul n yele se’em la.c

PIISI SƐBA N BUREGƐ LA

14. Bem n wan ta’an basɛ ti Kristakɔma basɛba buregɛ?

¹⁴ To mabiisi basɛba pu’usɛ Yehowa la yuuma zo’e zo’e ge saŋa ase’a ba ni ka le kena zamesegɔ. Bem zuo? Basɛba basɛ ti “teŋa wa zuo yɛla” n gu’ura ba. (Lu. 21:34) Mabia itigɔ bii a yetɔɣum ta’an basɛ ti basɛba giila kɔ’ɔsɛ. (Yam. 3:2) Basɛba me ni tum la be’em ge ka bɔta ti ba yele ti ba soŋɛ ba. Lan yeen dɛna se’em, ho wan eŋɛ la wani ho san buregɛ? Ho suure n kɛ̃ lua bunɔ la se’em la wan basɛ ti ho bɔta ti ho eŋɛ la bem?

15. Yehowa eŋɛ la bem pa’alɛ ti a nɔŋɛ pisɛba n buregɛ la? (Ezekiel 34:​11, 12, 16)

¹⁵ Ti’isɛ bisɛ lan ani Yehowa se’em la sɛba n buregɛ la. A ka gɛ̃ ba basɛ. A kɔ’ɔn ɛɛra sɛba n buregɛ la mɛ. A biseri ba ge soŋera ba la wan eŋɛ se’em ti ba lebe la a zɛ’an na. (Kaalɛ Ezekiel 34:​11, 12, 16.) Hon ti’isɛ ti Yehowa me iti la bala mea bɔ’ɔra hɔ? Hon zameseri sɛla wa pa’alɛ ti ho boti la ho tum sɛla n ani soŋa. Yehowa daa nyɛ la yelesoma ho poan ge ve’e ho pa’asɛ a nɛreba poan. A kelum nyɛta ho la bala mea nɔɔ ge bɔta ti ho lebe tansugere la poan na.

16. Beni n wan ta’an soŋɛ peseko n buregɛ la ti a lebe Yehowa zɛ’an na? (Bisɛ foote la.)

¹⁶ Gɔnlɛmlɛm la zuo n de Return to Jehovah la tari la yelesum n kpeŋeri giila. La yeti: “Tɛ̃ra ti Yehowa boi mɛ la hɔ la hon lebe a zɛ’an na la. A wan soŋɛ hɔ ti ho ta’an ŋmibe putɛyiila poan ge soŋɛ hɔ ti ho sunsɔa ka le isigera kalam kalam. A me wan basɛ ti ho tara suma’asum la putɛkeeŋa n ani fa’a. Yele ana wa za’a wan basɛ ti la dɛna naana bo ho ti ho le naɛ la ho mabiisi la pu’usa Yehowa.” Tɛ̃ra ti keendoma la kɔ’ɔn ana lɛɛ ti ba soŋɛ hɔ. Keendoma la ani wuu ‘suka zɛ’an ti sabeo ka fɔ̃bera.’ (Isa. 32:2) Ho puurɛ n pee la lua bunɔ la zuo, ho ta’an soke homea yeti, ‘N wan eŋɛ la bem nananawa ta’an lebe Yehowa zɛ’an na?’ (Isa. 1:18; 1 Pe. 2:25) Makerɛ, ho wan bɔta ti ho keŋɛ zamesegɔ Na’am Pu’usegɔ Deo la poan? Ho ta’an yele keema ayima ge basɛ ti a baŋɛ ti ho boti la soŋerɛ ti ho lebe Yehowa zɛ’an na. A ta’an yele mabia ti a zamesɛ ho Baabule la. Tara suure lua ti Yehowa wan soŋɛ hɔ la hon tiregeri ti ho lebe a zɛ’an na la. A me wan kã bo ho la hon eŋɛ pa’alɛ ti ho puurɛ pee mɛ la lua bunɔ la.

HO WAN EŊƐ LA BEM?

17-18. Ho wan dekɛ ho saŋa la tum soŋa soŋa la wani ge ti yuunɛ wa Tiirɛ Dia la nyaa paɛ?

¹⁷ Yezu yeti Yehowa basɛ ti eŋa wa’ana ki mɛ “te se’em woo n nam [eŋa], kan sagom, ge a wan tara la vom n ka tare ba’ahegɔ.” (Yon 3:16) Yehowa doose la lua bunɔ la poan faaɛ to be’em la kum poan basɛ. La ka nari ti to ita wuu to puurɛ ka pee la lua bunɔ la. (Arom 3:​23, 24; 2 Ko. 6:1) La san ta gee fii la Tiirɛ Dia la paɛ, sankaŋa dela yɔ’ɔ bɔ’ɔra tɔ ti to ti’isɛ taɣesɛ Yehowa la Yezu n nɔŋɛ to se’em. Bala wan soŋɛ tɔ ti to ta’an eŋɛ pa’alɛ ti to puurɛ pee ya.

¹⁸ Lua bunɔ la wan basɛ ti ho eŋɛ la bem? Daanse’ere hon wan lebese de se’em la wan bɔna la de to’ore la nɛreba basɛba n wan yele se’em. Tara suure lua ti Yehowa wan kã bo ho la hon tiregɛ naɛ la mabiisi tusa tusa pu’usa en la. Tɛ̃ra ti “nɛresɛba n diŋɛ vɔna la da eta sɛla te bama mɛhe bɔta. Ge ba bɔna bo eŋa Krista.”—2 Ko. 5:15.