Ani N Wan Faaɛ Nɛreba La Basɛ?—Baabule La Yeti Bem?

United Nations bo lasebaarɛ yeti:

• Kɔ’ɔn pɔsɛ October 7 ta paɛ October 23, 2023, Gaza la Israel zaberɛ la basɛ ti nɛreba n gaŋɛ 6,400 n ki ge ti nɛreba 15,200 pɔɣelum. Leyɛ’ɛsa, nɛreba tustusa n zɔ yeregɛ.

• Ta paɛ September 24, 2023, Russia la Ukraine zaberɛ la basɛ ti nɛreba 9,701 n ki ti nɛreba 17,748 me pɔɣelum Ukraine tiŋa poan.

Baabule la basɛ ti nɛresɛba ti zaberɛ la paɛ ba la tara beere sa’am puti’irɛ la wani?

Sɛla n sɔi ti to tara beere sa’am puti’irɛ

Baabule la yeti Naayinɛ wan ‘yese zaberɛ basɛ tingɔŋɔ wa zuo.’ (Yooma 46:9) A wan basɛ ti a saazuo gɔmɛt bii na’am la tee soe asaala gɔmɛtdoma za’a bisera. (Daniel 2:44) Naayinɛ Na’am la wan faaɛ nɛreba basɛ.

Bisɛ Yezu Krista n de Naayinɛ Na’am la Naba n wan eŋɛ sɛla:

• ‘A wan faaɛ sɛba n naseri ge kaasa ɛɛra soŋerɛ la basɛ, la tarendoma la se’em woo n ka tari soŋera la. A wan tara tarendoma la nasadoma giile ge faaɛ nasadoma vom basɛ. A wan faaɛ ba namesegɔ la gbiregere tuuma poan basɛ.’​—Yooma 72:12-14.

Naayinɛ Na’am la wan kɔ’ɔn yese zaberɛ n ta’asɛ gbiregere la namesegɔ la basɛ.

• ‘A wan duuse ba nintam ba nini poan basɛ, ti kum kan le bɔna, susa’aŋɔ la kaasega la induuma kan le bɔna. Yelekɛɣesi la toli ya.’​—Liligere 21:4.

La kan yue Naayinɛ Na’am la wan soe tingɔŋɔ wa bisa. Baabule la puɣum tɔɣɛ ‘zaberɛ la zaberɛ yɛla’ n boi zina beere wa yele mɛ. (Matu 24:6) Yele ana wa la yɛla ase’a sirum pa’alɛ ti to kɔ’ɔn bɔna la asaala bisega ‘ba’asegɔ dabesa la’ poan.​—2 Timoti 3:1.