Zaberɛ Wan Kɔ Tingɔŋɔ Wa Za’a Poan?—⁠Baabule La Yeti Bem?

Yuum 30 n wana ti nɛreba zo’e zo’e ti’isa ti nɔyinɛ n boi tisi tiŋasuka la kɔ’ɔn ana la kankaŋi. Ge yelese’a n eŋɛ dabesa ana wa poan la pa’alɛ ti bala daɣɛ yelemɛŋɛrɛ.

“Nɛreba zo’e zo’e ti’isɛ ti Gaza zaberɛ la wan paɛ tinse’esi n lɛm bim la, se’ere n sɔi la Israel la Hezbollah pɔsɛ zabera la Lebanon border la poan.”—Reuters, January 6, 2024.
“Iran tiŋa le pɔsɛ maala la zaberɛ lɔɣɔrɔ lan wan eŋɛ se’em ti ba ta’an zabɛ. Leyɛ’ɛsa, Russia la China nyaa soŋeri la Iran. Wana pa’alɛ ti ba maasum mɛ ti ba ta’an zabɛ la tinse’esi n boi zaɣenɔya bɔba la.”—The New York Times, January 7, 2024.
“Russia kɔ’ɔn sa’ana la lɔɣɔrɔ zo’e zo’e Ukraine tiŋa, zaberɛ la zuo.”—UN Lasebaarɛ, January 11, 2024.
“China ligeri yɛla n keni soŋa, ba sogɛpa n tari paŋa, Taiwan n boti nɛra woo baŋɛ ti ba sɔ bamea, la China la Amerika tiŋa n ka tari nɔyinɛ la zuo, zaberɛ ta’an kɔ mɛ.”—The Japan Times, January 9, 2024.

Baabule la tɔɣɛ nɔyinɛ n ka boi tingɔŋɔ wa poan yele mɛ? La wan ta’asɛ zaberɛ?

Baabule la tɔɣɛ yelese’a n iti wa yele mɛ

Baabule la ka tɔɣɛ zaberɛ wana mɔpi n boi zina la yɛla biŋe. Ge la tɔɣɛ zaberɛ n kɔ’ɔn bɔna zɛ’an woo n ‘yese suma’asum tingɔŋɔ la poan’ la yele mɛ.—Liligere 6:4.

Daniel gɔŋɔ la pa’alɛ ti ‘ba’asegɔ dabesa la poan,’ tisi n tari kpe’eŋo wan zabera la taaba. Wana wa zuo, ba wan pa’alɛ bamam n tari sogɛpa se’em ge me sa’am ligeri zo’e zo’e.—Daniel 11:40, 42, 43.

Zaberɛ n boi sore

Baabule la pa’alɛ ti tingɔŋɔ wa yɛla wan ga’am la be’ero ge ti la nyaa tee ana soŋa. Yezu yuun yeti ‘mɛlesekãtɛ wan bɔna ti ka taaba nan ka tabelɛ wa’an tinparɛ wa pi’ileŋo poan.’ (Matu 24:21) ‘Mɛlesekãtɛ’ wa wan ta ba’asɛ la Armagedon zaberɛ la poan, ti ba tɔɣɛ de yele ti la dela ‘Paŋa Za’adaana la dabeserɛ kãtɛ la zaberɛ.’—Liligere 16:14, 16.

Ge Armagedon zaberɛ la wan faaɛ nɛreba ge la kan sa’am ba. Naayinɛ wan doose zaberɛ kaŋa poan yese asaala bisega za’a n ta’asɛ ti zaberɛ bɔna la. Ho san bɔta ti ho baŋɛ Armagedon n wan basɛ ti suma’asum bɔna wuusa se’em, kaalɛ zaseŋɔ yɛla wa:

“Bem N De Armagedon Zaberɛ La?”
“Armageddon Is Good News!” (Armagedon Dela Yelesonɛ!).