Goo Duŋa La N Tari Zuto Toyopɔi Bɔna Liligere A Zuo 13 La Dela Bem?
Baabule la lebesego
Liligere 13:1 n tɔɣɛ goo duŋa la n tari zuto toyopɔi la ze’ele bo la tingɔŋɔ wa za’a nalɛɣerɛdoma la.
Ka tari la kpe’eŋo la paŋa la na’am kuka. Bala pa’alɛ ti ka dela nalɛɣerɛ tigere.—Liligere 13:2.
Ka biseri la ‘buuri woo la nɛreba woo la yetɔɣum woo la tisi woo’ nɛreba. Bala pa’alɛ ti ka daɣɛ tiŋa ayina ma’a gɔmɛt.—Liligere 13:7.
Ka tari la yelese’a ti goo dusi banaasi la ti Daniel 7:2-8 tɔɣɛ ba yele la tara, maɣesɛ wuu goobaa wɔ̃nɛ, saseŋa nama, gbɛɣenɛ nɔɔrɛ la iila pia. Daniel yetɔɣebiŋere la pa’alɛ ti goo dusi wa kɔ’ɔn dɛna la nadoma bii sɔ’ɔlumdoma n kɔ’ɔn sɔɔsena taaba bisera tisi. (Daniel 7:17, 23) Bala, la pa’alɛ ti Liligere a zuo 13 n tɔɣɛ goo duŋa sɛka yele la ze’ele bo la nalɛɣerɛdoma n naɛ taaba dɛna tigere.
Ka ze’ele la ‘ateko poan yɛsera na.’ Bala vuurɛ dela, nɛresaaleba zo’e zo’e n kɔ’ɔn nɔŋɛ gbiregere la n basɛ ti asaala gɔmɛtdoma bɔna.—Liligere 13:1; Isaiah 17:12, 13.
Baabule la yeti goo duŋa la yu’urɛ bii nɔmba la n de 666 dela ‘asaala nɔmba.’ (Liligere 13:17, 18) Yetɔɣum wa pa’alɛ ti Liligere a zuo 13 n tɔɣɛ goo duŋa sɛka yele la dela asaala tigere ge daɣɛ vo’osum bii kolekpabɛ’ɛsi tigere.
La boi bim ti tisi zo’e zo’e ka tari nɔyinɛ ge ba ni naɛ nɔɔrɛ mɛ ti ba zaɣesɛ Naayinɛ Na’am la ge tuɣum tara bamea kpe’eŋo. (Yooma 2:2) Ba wan naɛ taaba zabɛ la Naayinɛ zabezabereba la ti Yezu Krista dɛna ba nɛŋadaana Armagedon poan. Ba wan zabɛ sa’am tisi la za’a.—Liligere 16:14, 16; 19:19, 20.
‘Iila pia la zuto toyopɔi’
Baabule la n tɔɣɛ nɔmba ase’a yele se’em la vuurɛ boi la a to’ore. Makerɛ, bayopɔi la pia ze’ele bo la sɛla n ani muunɛ. Sɛla n wan soŋɛ tɔ ti to ta’an bɔkɛ goo duŋa la n tari ‘iila pia la zuto toyopɔi’ la ti Liligere a zuo 13 tɔɣɛ de yele la dela to geele ‘goo duŋa la wɔ̃nɛ’ ti Liligere gɔŋɔ la tɔɣɛ ka yele la. Goo duŋa wɔ̃nɛ wa dela goo duŋa mɔlega n tari zuto toyopɔi la iila pia. (Liligere 13:1, 14, 15; 17:3) Baabule la yeti goo duŋa mɔlega wa zuto toyopɔi la ze’ele bo la gɔmɛtdoma bii ‘nadoma bayopɔi.’—Liligere 17:9, 10.
Bala mea ti Liligere 13:1 n tɔɣɛ goo duŋa n tari zuto toyopɔi la ze’ele bo la gɔmɛtdoma bayopɔi. Kɔ’ɔn pɔsɛ diimi sa ta paɛ zina wa, nalɛɣerɛdoma sɛba n biseri nɛresaaleba ge me kɔ’ɔn mɔ’ɛ nini mɛlesa Naayinɛ nɛreba dela tisi ana wa—Egypt, Asiria, Babilon, Medo-Persia, Greece, Rome la Anglo-America. To san yeti iila pia la ze’ele bo la tinkãra la tinpiɣisi seto woo n sɔi bamea bisera, bala pa’alɛ ti muŋa woo n boi iilɛ woo zuo la vuurɛ dela tiŋa woo n sɔi kamea bisera ge ti tingɔŋɔ wa za’a kpe’eŋo la me bɔna bisera.