Baabule Zamesegɔ Gɔŋɔ N Boi Ka To’ore

January 2021 poan, Tigere Zuo Bisegadoma la daa bo la lasebaarɛ ti, ba maalɛ la Baabule zamesegɔ gɔŋɔ paalega n de Tara Vom Somɔ Daarewoo!a gɔŋɔ la. La yuun ani hon la wani, la hon n yuun wum lasebaarɛ wa la? Matthew n ze’ele Canada tiŋa la yeti: “Mam puurɛ yuun pee mɛ! Ge mam puurɛ yuun le pee pa’asɛ la ban bo yetɔɣum ge dekɛ vidiyodoma pa’alɛ sɛla n sɔi ti ba maalɛ gɔŋɔ wa, la ban dekɛ ku tum tuuma bisɛ se’em. Mam yuun ani la lɛɛ gura ti n nyɛ gɔŋɔ wa ge me dekɛ ka tum tuuma.”

Tara Vom Somɔ Daarewoo! gɔŋɔ wa tee to ni doose sarɔseto poan zamesa nɛreba Baabule la mɛ. Ge daɣɛ bala ma’a n basɛ ti Tara Vom Somɔ Daarewoo! gɔŋɔ wa bɔna ku to’ore la gɔnse’a ti to daa tara zamesa nɛreba Baabule la. Ho san nyɛ Tara Vom Somɔ Daarewoo! gɔŋɔ la gurɛ ku bisɛ, ho wan baŋɛ ti ku boi la ku to’ore. Basɛ ya ti to bisɛ ban maalɛ gɔŋɔ wa se’em.

Gɔnpaalega N Boi Ka To’ore

Ba dekɛ la pipadoma n tibegɛ maalɛ ka. Bem zuo? Tara Vom Somɔ Daarewoo! gɔŋɔ la tari la fɔɔra n som n gaŋɛ kɔbeseyoobe (600). Bala la, ka fɔɔra zo’e gaŋɛ Teach Us gɔŋɔ la fɔɔra sugumnɔɔrɛ pia! Gɔŋɔ paalega wa le tari la fɔla zo’e zo’e n gã gɔnlaɣesi ase’a poan ti fɔɔra bii yɛla ka gulesɛ bim. Bala la, to san dekɛ pipadoma n ani pɛli pɛli maalɛ gɔŋɔ wa, la kan ana soŋa. Se’ere n sɔi la, la ta’an basɛ ti ho bisera nyɛta fɔɔra la, la gulesegɔ se’a n boi gɔnlaka sɛka n taɣelɛ la ge nan ka lakɛ. La wan eŋɛ se’em ti la kan eŋɛ bala la, mabiisi n tuni Wele Sɛka N Biseri Ti Ba Printira Gɔnɔ (IPD) n boi Wallkill, New York, U.S.A. la maasum eŋɛ la sɛla. Ba yuun dekɛ la pipadoma ti to tara printira gɔnɔ kalam la, printɛ sɛla ba zuo bisɛ la ani se’em. Gulesegɔ Wele la daa nyaa bisɛ loe la pipa sɛka n kan bisa nyɛta fɔɔra la, la gulesegɔ la n boi pooren la. Yelemɛŋɛrɛ, pipa sɛka ti ba loe la, eŋɛ la ligeri paa. Pipa sɛka ti to tara tuna tuuma daarewoo la san dɛna dɔla kɔbega, pipa paalega wa wan dɛna la 116. Ge la basɛ ti nɛra san kaala Tara Vom Somɔ Daarewoo! gɔŋɔ la, a kan bisera nyɛta fɔɔra se’a n boi pipa la pooren la, ti la burena a kaalegɔ.

Gɔŋɔ la pooren pipa la boi la de to’ore. Gɔnpaalega wa pooren pipa la boi la de to’ore la gɔnse’a woo ti to tara la. Se’ere n sɔi la ban dekɛ lɔɣeseto tabelɛ gɔŋɔ la pooren pipa la basɛ ti ho san guri ka, la ka sɛregeri. Bala basɛ ti foote sɛka n boi gɔŋɔ la pooren la niira mɛ. Ton dekɛ sɛla tabelɛ pipa la le soŋera ti gɔŋɔ la kan ãasum bii sa’am kalam. Ton dekɛ sɛla tabelɛ gɔŋɔ paalega wa pipadoma la eŋɛ ligeri gaŋɛ to ni dekɛ sɛla tabelɛ to gɔnɔ ase’a la sugumnɔɔrɛ bunuu. Bala la, tigere zuto zo’e zo’e laɣum soŋɛ mɛ ti to ka ba’ɛ sa’am ligeri.

Beni n sɔi ti to loe lɔɣɔse’a n eŋɛ ligeri bala maalɛ ku? Mabia ayima n tuni IPD la poan tɔɣɛ pa’alɛ yeti: “Tomam mi ti nɛreba wan dekɛ gɔŋɔ wa tum soŋa. Bala la, to boti la to maalɛ ku la wan eŋɛ se’em ti saŋa woo ku kɔ’ɔn ana paalega ge tara nimpiilum, hali to san puɣum dekɛ ku tum tuuma sugumnɔɔrɛ zo’e zo’e.” Eduardo tuni la Ɔfisi sɛka ti ba printira to gɔnɔ la, Brazil Tigere Yile la poan. A yeti: “Yehowa tigere la bisɛ ti ba maalɛ gɔŋɔ wa ti ka ana soŋa me paa. Ba dekɛ la lɔɣesoma n eŋɛ ligeri maalɛ ku. Ho san bisɛ, ku tari la nimpiilum ge me som. La niɛ peelum ti ba dekɛ to bo’olum la tum soŋa mɛ.”

To Maalɛ Gɔŋɔ La COVID-19 Bã’a La Saŋa

To pɔsɛ printɛ Tara Vom Somɔ Daarewoo! gɔŋɔ wa la March 2021 poan. Sankaŋa la, COVID-19 bã’a la daa kɔ’ɔn wi’ira mɛ bala, la daa daɣɛ naana. Se’ere n sɔi la ba daa paɣɛ Tigere Yile mɛ ge ti mabiisi la n ni wa’ana soŋɛ zɛ’an ti ba printira gɔnɔ la me kan ta’an le kena soŋera. Ba me kan ta’an yi mabiisi basɛba ti ba wa’ana laɣum tuna Tigere Yile la. Bala la, nɛresɛba n tuni zɛ’an ti ba printira gɔnɔ la daa ba’ɛ pɔ’ɛ mɛ. Gɔmɛtidoma me n daa bo lɔɔ se’a la zuo, to daa paɣɛ maɣazimdoma la ti to tara printira la mɛ ze’ele.

Yeledaaŋɔ ana wa woo poan, to eŋɛ la wani ta’an printɛ gɔŋɔ wa? Ton daa ta pɔsɛ nyaa printira la, mabiisi n boi Tigere Yile wɛla ase’a poan tuna daa dekɛ la ba saŋa fii wa’ana soŋɛ ti to printɛ gɔŋɔ la. Mabia Joel n tuni IPD poan la yeti: “Mabiisi sɛba n wa’ana soŋɛ tuuma la mu’ɛ la nini zamesɛ tuuma la soŋa ge me pee puurɛ tum dɛ soŋa soŋa ti to nyaŋɛ ba’asɛ tuunɛ wa kalam.”

Wana wa za’a poan la, to nyaŋɛ printɛ Tara Vom Somɔ Daarewoo! gɔŋɔ la mɛ paɛ tusa tusa. Ge ti to nyaŋɛ maalɛ gɔŋɔ la, la daa dela to tara lɔɣɔrɔ to’ore to’ore ge ta’an maalɛ ku. Basɛba dela, kuto n ani lama lama ti to ni gulesɛ yɛla eŋɛ ba zuo (Printing Plates), sɛla ti ba tara tabela, pipadoma, inki la sɛla n tabere. Ton yuun printɛ gɔŋɔ wa ŋmaresi sinuu poan ma’a la, to daa dekɛ la ligeri n gaŋɛ dɔla tusa tusa 2.3 [$2.3 million (U.S.)] da lɔɣɔse’a ti ba tara maala gɔŋɔ wa ma’a. Lan wan eŋɛ se’em ti to kan sa’am ligeri la, to ni bisɛ la tansuga la n boti gɔnɔ la se’em, printɛ ti la makɛ bala.

“Yɛla la n tigese gã’a se’em la tari la nimpiilum”

Gɔnpaalega wa n ani se’em la basɛ ti la ana Baabule pa’alegɔdoma la Baabule zamesegɔdoma la wani? Mabia Paul n ze’ele Australia tiŋa yeti: “Tara Vom Somɔ Daarewoo! gɔŋɔ wa zamesegɔ za’asum mɛ. Mam puurɛ ni pee mɛ mam san tara ku zamesa nɛra. Gɔŋɔ wa yɛla n tigese gã’a se’em la tari la nimpiilum ge me kɔ’ɔn basɛ ti la dɛna sɔsega. Ku tari la yelese’a n ani soŋa ti ho wan bɔta ti ho mina. Ku me tari la sokese’a n kɛ̃’ɛri suure, vidiyodoma la fɔɔra ge me ni soŋɛ se’em n zameseri la ti a loe sɛla eŋɛ. Gɔŋɔ wa yɛla n tigese gã’a se’em ti la tara nimpiilum la soŋeri mam mɛ ti n ta’an pa’ala soŋa soŋa.”

Baabule zamesegɔdaana n ze’ele Amerika tiŋa yeti: “Mam kɔ’ɔn nɔŋɛ gɔnpaalega wa mɛ. Fɔɔra la ni basɛ ti mam ni bɔkɛ yelekpina la n de se’em. Vidiyodoma la kɛ̃’ɛri la suure ge me ni kɔ’ɔn kpemese mam giila ti n ta’an dekɛ tum tuuma.” Baabule zamesegɔdaana wa zameseri la sugumnɔɔrɛ buyi bakwai woo ge me kena tansugere zamesegɔ saŋa woo.

La kelum nara mɛ ti to lerege ge printɛ Tara Vom Somɔ Daarewoo! gɔŋɔ wa yetɔɣum zo’e zo’e poan. Yelemɛŋɛrɛ, ta paɛ zina Tigere Zuo Bisegadoma la sakɛ ti to maalɛ gɔŋɔ wa yetɔɣum buuri buuri 710 poan. Ban printɛ Tara Vom Somɔ Daarewoo! gɔŋɔ la yetɔɣese’a poan la zo’e gaŋɛ ban printɛ Teach Us gɔŋɔ la yetɔɣese’a poan la 340!

To nyɛ ligeri la bɛ printɛ gɔŋɔ wa zo’e zo’e bala? La dela nɛreba n ni yese ba suuren bo ti la soŋɛ tingɔŋɔ wa za’a waabi tuuma la. Nɛreba zo’e zo’e me ni doose la donate.jw.org poan bo ta’an soŋɛ tingole wa za’a na’am tuuma la. To pu’usɛ ya la ya ni yese ya suuren bo yɛri yɛri se’em la, to suure sukɛ mɛ paa. Bala ni soŋɛ mɛ ti to nyaŋɛ maalɛ gɔnɔ la vidiyodoma ti la soŋera sɛba n boti ba tara “vom somɔ daarewoo” la.​—Yooma 22:26.