Vom La Na’am Tuuma Zamesegɔ Viisegɔ Gɔŋɔ
MARCH 1-7
NAAYINƐ TUULUM YƐLA | KANLƐ 7-8
“To Zamesɛ Sɛla Israeldoma Tiiseŋɔ La Poan”
it-1-E 497 ¶3
Tansugere
Israel teŋa poan, ba yuun loe la nɛreba ti ba dɛna ba nɛŋadoma. (Ezr 10:14) Ba yuun tĩ sogorɛ la ba’asɛ la, ‘buuri nabiisi’ la yuun dekɛ ba bo’olum la mɛ ta bo. (Kan 7:1-11) Leyɛ’ɛsa, Nehemia dabesa la poan, malemadoma, Levidoma la “yizuto keendoma” la yuun ni dekɛ la daalesum di’e nu’o pa’alɛ ti ba ‘biŋe la nɔɔrɛ.’ (Ne 9:38–10:27) Israeldoma la n yuun eeri goo la poan la, nɛreba 250 n yuun naɛ la Kora la Datan la Abiram la On ti ba yuun ka nam bo Moses la Aron la, yuun dela “boraa se’ehe te Israeldoma mina ba soŋa soŋa, loohe ba te ba dɛna ba nɛŋadoma.” (Kan 16:1-3) Moses yuun loe la Israel keendoma 70 ti ba soŋɛ en ti a ta’an ziira “nɛreba la zeero la” wuu Naayinɛ n yuun pa’alɛ en se’em la. (Kan 11:16, 17, 24, 25) Malema 4:15 n yeti “keendoma” la, basɛ ti la niɛ peelum ti Israel nɛŋadoma la yuun dela buranya’asi, zuodoma, gãkereba la kpɛ’ɛndoma.—Kan 1:4, 16; Yos 23:2; 24:1.
it-2-E 796 ¶1
Areuben
Israel tiiseŋɔ la poan, Areubendoma la yuun boi la sogorɛ la S bɔba lɛm Simeon la Gad zɛ’an. Ba san bɔna sore kena, Areuben n yuun ni bɔna buuri tigesego butã la nɛŋa n de Yuda, Isakar la Zebulun. (Kan 2:10-16; 10:14-20) Ba yuun kã sogorɛ la bo Naayinɛ la, Israel buuri la yuun bo ba bo’olum la doose la bala mea nɔɔ.—Kan 7:1, 2, 10-47.
w04-E 8/1 25 ¶1
Kanlɛ Gɔŋɔ La Yelekpina
8:25, 26. La wan eŋɛ se’em ti Levidoma la ta’an tuna ba tuuma la soŋa la, ba yuun san kuregɛ la dela ba basɛ ba pɛregerɛ tuuma la. Ge ba yuun ta’an soŋɛ Levidoma la. La boi bini ti zina beere wa, Na’am mɔɔlegɔdoma ka baseri ba tuuma kuregerɛ poan ge ba wan ta’an zamesɛ sɛla naresum yele la n boi lɔɔ wa poan la. Kristabia san kan ta’an tum tuuma ase’a la eŋa n kuregɛ la zuo, a ta’an tum sɛla ti a wan nyaŋɛ.
Vo’osum Poan Yɛla
it-1-E 835
Bikeema, Dundiiŋa
Israel dayɔkeendoma la n yuun wan ta dɛna yizuo keendoma la zuo, bamam n yuun de teŋa la nɛŋadoma. Yehowa n yuun biŋe nɔbiŋere se’ere la Abraham la zuo, a bisɛ ti teŋa la za’a dela a “dayɔkeema.” (Yɛh 4:22) Yehowa n yuun faaɛ ba basɛ la zuo, a yuun bo nɔɔrɛ yeti “sɛla woo n de nɛresaaleba, bii dunhe sare sare dɔgom Israel buuri wa poan” wan dɛna la zilam lɔɣɔrɔ bɔ’ɔra en. (Yɛh 13:2) Bala la, dayɔkeendoma la yuun dela Naayinɛ denɛ.
MARCH 8-14
NAAYINƐ TUULUM YƐLA | KANLƐ 9-10
“Yehowa N Biseri A Nɛreba Se’em”
it-1-E 398 ¶3
Tiiseŋɔ
Nɛrekuuŋɔ wa n yuun laɣesɛ bamea se’em kena paara zɛ’an woo la (ti Moses yuun tɔɣɛ de yele sugumnɔɔrɛ 40 ti la bɔna Kanlɛ 33 la) yuun pa’alɛ la ba tigese bamea soŋa se’em. Sangbanɛ la san kelum yula sogorɛ la zuo, nɛreba la ni yee la ba boi zɛ’an la. Sangbanɛ la san kena, nɛreba la me doli mɛ. “Na’ayenɛ han bo ba nɔɔrɛ, ba ze’ele, te a han le bo ba nɔɔrɛ, ba keŋɛ.” (Kan 9:15-23) Ba yuun ni peebe la sanlenpeelega tentana ayi ti nɛreba la ta’an baŋɛ Yehowa nɔɔrɛ. (Kan 10:2, 5, 6) Ba yuun ni peebe la peebego n boi de to’ore ti nɛreba la baŋɛ ti la dela ba keŋɛ. Ba yuun pɔsɛ eŋɛ wana la “yuuma ayi la poan [1512 G.Y.B.], ŋmarehe seyi dabeha pihiyi daarɛ” la. Ba yuun san ni yese ti ba keŋɛ, nɔbiŋere daka la n yuun boi ba nɛŋa, ti buuri tigesego butã n diŋɛ nɛŋa la ti Yuda bɔna ba nɛŋa, nyaa taɣela Isakar la Zebulun. Gersondoma la Meraridoma la n ziiri sogorɛ la lɔɣeseto n nari ti ba zi la me taɣela. Leyɛ’ɛsa, sɛba n taɣelɛ buuri tigesego butã la dela Areuben n de nɛŋadaana taɣela Simeon la Gad. Sɛba n le taɣelɛ dela Kohatdoma n ziiri sogorɛ la lɔɣeseto n nari ti ba zi la ge ti buuri tigesego n pa’asɛ butã n de Efraim la Manase la Benyamin me taɣela. Ba’asegɔ la, sɛba n yuun de Israel buuri la za’a gu’ureba nɛŋadaana dela Dan nyaa taɣela Aser la Naptali. Bala la tigesego sebo nɛreba n yuun zo’e ge tara paŋa n yuun boi nɛreba la nɛŋan la ba pooren.—Kan 10:11-28.
w11-E 4/15 4-5
Hon Mi Naayinɛ N Pa’ali A Nɛreba Se’em?
To wan eŋɛ la wani pa’alɛ ti to puurɛ pee mɛ la Naayinɛ pa’alegɔ? Tuntuna Paul yuun yeti: “Nana ya kpɛ’ɛndoma ge eta sɛla te ba yele ya te ya eŋɛ.” (Heb. 13:17) Wana wa daɣɛ naana saŋa woo. Makerɛ n wana: Makɛ bisɛ ti ho dela Israel nɛra n boi Moses dabesa la poan. Ti’isɛ bisɛ ti ya keŋɛ zaɛ mɛ ti sangbanɛ la nyaa teke. Ku wan yue bini la wani? Dabeserɛ? Bakwai? Bii ŋmaresi? Ho ta’an ti’isa ti, ‘La nari ti n yese n lɔɣɔrɔ za’a biŋe me yoi?’ Ho ta’an yese lɔɣese’a yele n pakɛ la biŋe. Ge dabesa fii pooren la, hon eeri lɔɣɔrɔ ase’a pa’asɛ la zuo, ho le yese ho lɔɣɔrɔ la za’a biŋe mɛ. Hon yese ho lɔɣɔrɔ la ba’asɛ la ti ho nyɛ ti sangbanɛ la le kena—ti ho le vaara ho lɔɣɔrɔ la za’a! La kan dɛna naana bo ho. Ge la bala za’a la, Israeldoma la yuun nari ti ba le “pɔhɛ la kenɛ.”—Kan. 9:17-22.
To wan eŋɛ la wani Naayinɛ san bo to pa’alegɔ? To wan tiregɛ ti to dekɛ tum tuuma ‘bilam bilam’? Bii to wan kelum ita wuu to ni puɣum ita se’em la? To mi pa’alegɔ se’a ti ba nan dekɛ bo to la to wan ita Baabule zamesegɔ se’em, ta’an mɔɔla bɔ’ɔra nɛreba n tɔɣeri yetɔɣum busebo, ita deodoma pu’usegɔ saŋa woo, nana Imma’asum Yɛla Bisegadoma bii to wan tara tomea soŋa se’em laɣesegɔ poan? To me wan ta’an eŋɛ pa’alɛ ti to puurɛ pee mɛ la Naayinɛ pa’alegɔ to san kɛlesa ka’aŋɔ. To san ni yeti to kɔ’ɛ to puti’irɛ ninmɔ’ɔrɛ yele poan, to wan dekɛ tomea delum Yehowa la a tigere la ge daɣɛ tomea yɛm. Yeledaaŋɔ n ani wuu kusebekãtɛ san paara tɔ, to ɛ suka zɛ’an Yehowa tigere la poan wuu bia n eeri te’elego a dɔɣereba zɛ’an se’em la.
Vo’osum Poan Yɛla
it-1-E 199 ¶3
Laɣesegɔ
Laɣesegɔ Yele N Pakɛ Se’em. Yehowa n yuun eŋɛ maaseŋɔ ti ba dɛ’ɛna Azootole de’eŋo yuunɛ woo la basɛ ti to baŋɛ la de ninmɔ’ɔrɛ se’em ti to laɣesa taaba ta’an nyɛta nyuurɔ vo’osum poan. Burasɛka woo n ka gãlum amea ge me ka keŋɛ zɛ’an ge zaɣesɛ ti a kan de’em Azootole de’eŋo la yuun nari ti ba ku en. (Kan 9:9-14) Se’em ma’a ti Naba Hezekia yuun soolum ti ba laɣesɛ Yudadoma la Israeldoma la ti ba wa’an Yerusalem na de’em Azootole de’eŋo la, eŋa n yuun yele ba se’em n wana: “Israel buuri wa, lebe ya Na’ayenɛ . . . zen’an na. . . . Da kperɛ ya toba wo ya sɔdoma n yuun ane se’em la. Dekɛ ya mɛhe bo Na’ayenɛ, la ya kɛn a yire wa te a pee de te de wan bɔna wuuha wa poan tona bɔ’ɔra Na’ayenɛ ya Yenɛ wa, te a sunsunyiim la n taɛ wo bugum la da sige ya zuo na. . . . Ya Na’ayenɛ la dela ninbɔn’zɔrɛ la som Yenɛ. A kan bire a poore bahɛ ya, ya han wan lebe a zen’an.” (2Ye 30:6-9) Nɛra san mina fii ge ka keŋɛ la wan pa’alɛ ti a zaɣesɛ la Naayinɛ. La boi bini ti Kristakɔma ka de’eni Azootole de’eŋo la ge Paul yuun kpemese ba giila ti bamam n de Naayinɛ nɛreba la nari ti ba laɣesa taaba saŋa woo. A yuun yeti: “Bahɛ ya te to tɛnra taaba yele, ete dena wa la to soŋora taaba, tara nɔŋerɛ ge me eta sɛla n an soŋa. Da bahɛ te to tare ya eteseko te nɛreba basɛba tara ka bɔta ba lagom na la taaba la, ge ton bahɛ ya te to soŋora taaba maan pa’aha te ya nyɛ te dabahese’ere te to Daana Yesu lɛbera na la pɔnre.”—Heb 10:24, 25; bisɛ CONGREGATION.
MARCH 15-21
NAAYINƐ TUULUM YƐLA | KANLƐ 11-12
“Beni N Sɔi Ti La Ka Nara Ti To Nyɔna?”
w01-E 6/15 17 ¶20
Da Dɛna Ya Sɛba N Keleseri Ge Tamena
Kristakɔma zo’e zo’e gu bamea mɛ yalumtuuma poan. Ge la nari ti to bisɛ tomea soŋa la wan eŋɛ se’em ti to kan gɔɣena ti Naayinɛ me suure sa’am ti a zaɣesɛ tɔ. Paul ka’am tɔ ti: “La ka sone te to eta sɛla te to magahɛ to Daana Na’ayenɛ behɛ wo [Israeldoma] basɛba n eŋɛ se’em la. Bama n eŋɛ bala la, bonsɛ’doma n don ba te ba ki. La me ka le sona te ya nyɔna wo bama basɛba n eŋɛ se’em la. Bama me n eŋɛ bala la, Na’ayenɛ soŋora se’em n koore la n ko ba.” (1 Korint 10:9, 10) Israeldoma la yuun gɔɣeni mɛ la Moses la Aron—hali nyɔna Naayinɛ mea—la eŋa n yuun doose kirega sore poan bo ba manna la. (Kanlɛ 16:41; 21:5) Ba gɔɣeŋɔ la yuun ka ba’ɛ daam Yehowa paɛ ba yuun tum yalumtuuma la? Baabule la yeti bunsɛledoma n yuun ku sɛba n yuun gɔɣeni la zo’e zo’e. (Kanlɛ 21:6) Saŋa busebo poan, nɛreba n gaŋɛ 14,700 n yuun ki ba gɔɣeŋɔ la zuo. (Kanlɛ 16:49) Bala la, da basɛ ya ti to zɛɛna Yehowa n di’iseri suure la to se’em la ge me ka nana yelese’a woo ti a ita bɔ’ɔra to la.
w06-E 7/15 15 ¶7
‘Da Gɔɣena’
Bisɛ Israeldoma la n tee se’em! Yehowa n yuun faaɛ ba Egypt teŋa ge tari ba yakɛ Mɔɣɛ Mɔlega la, ba puurɛ yuun pee mɛ ti ba yuum yuuma pɛɣɛ en. (Yɛhega 15:1-21) La yuun wuni ba goo la poan ge ti dabeem tara ba la Kanaandoma la zuo, ti Naayinɛ nɛreba la ka le tara pupeelum. La yuun nari ni ti ba pɛɣera Naayinɛ la ba boi fai la, ba yuun tuɣum zɛregera en mɛ ge ti’isa ti sɛla ti a bɔ’ɔra ba la pɔ’ɛ ba mɛ. Ba gɔɣeŋɔ la yuun pa’alɛ ti ba puurɛ ka pee la yelese’a ti Yehowa ita bɔ’ɔra ba la. Bala n sɔi ti a yuun yeti: “Yuuma alɛ te toonfɛn’ɛhadoma wa wan gɔngena la mam?”—Kanlɛ 14:27; 21:5.
it-2-E 719 ¶4
Zabera
Gɔɣena. Gɔɣeŋɔ wan ta’an kɔ’ɔsɛ nɛra giila ti a suure sa’am. Israeldoma la n yuun nan kɔ’ɔn yese Egypt teŋa la, ba yuun gɔɣeni mɛ la Yehowa n loe a yamesi Moses la Aron ti ba dɛna ba nɛŋadoma la. (Yɛh 16:2, 7) Pooren ba nyɔŋa la yuun kɔ’ɔsɛ Moses giila mɛ ti a bɔta ti a ki. (Kan 11:13-15) Gɔɣeŋɔ ta’an dɛna dɛŋa bɔ’ɔra nɛra la mea. Yehowa yuun bisɛ ti nɛreba la n gɔɣeni la Moses la pa’alɛ ti ba ka nam bo la Eŋa mea bisega. (Kan 14:26-30) Ba zo’e zo’e yuun ki mɛ la ba zɛregerɛ la.
Vo’osum Poan Yɛla
it-2-E 309
Manna
Ku Ani Se’em. Manna “dela bonpeela, ana wo tiia” bii digilom la, ana lama lama dɛna yili yili wuu kugesaalega la. Ku za’asum ani me “wo seerom te ba dekɛ kiim man’aherɛ la” bii “kaam te ba dekɛ kiim ba la.” Ho san nɛɛm ba bii tɔ ba toore poan, ho ta’an duɣɛ ba bii ho dekɛ ba maalɛ boroboro.—Yɛh 16:23, 31; Kan 11:7, 8.
MARCH 22-28
NAAYINƐ TUULUM YƐLA | KANLƐ 13-14
“Sakerɛ N Basɛ Ti To Tara Sukpe’ene Se’em”
w06-E 10/1 16-17 ¶5-6
Sakerɛ La Naayinɛ Zoolum N Basɛ Ti To Tara Sukpe’ene
Ge vɛɛsereba bayi n de Yosua la Kaleb yuun kɔ’ɔn bɔta la ba kɛ̃ Pu’ulumbiŋe Teŋa la. Ba yuun yeti ba wan “vole” Kanaandoma la. “Sɛla ka boe gu’ura ba, ge Na’ayenɛ boe mɛ la tomam.” (Kanlɛ 14:9) Yosua la Kaleb yuun gberege mɛ la ba ti’iseri se’em la? Daɣɛ bala la fii me! Bamam la nɛreba la za’a yuun nyɛ Yehowa n diise Egypt yina la vi se’em mɛ Too Pia la poan la. Ba yuun le nyɛ Yehowa n yuun sa’am Faro la a lengima la se’em mɛ Mɔɣɛ Mɔlega la poan. (Yooma 136:15) La niɛ peelum ti, vɛɛsereba pia la, la sɛba n naɛ la ba la yuun ka nari ti ba zɔta dabeem. Yehowa suure yuun sa’am mɛ ti a yeti, “yuuma alɛ te ba wan zagaha kan nana mam, la mam pon tom toonkanra se’a, la yele kiri’ihe se’a te mam enŋɛ ba teŋasoka wa?”—Kanlɛ 14:11.
Yehowa yuun basɛ ti la niɛ peelum ti, nɛreba la n ka tari sakerɛ la n sɔi ti ba zɔta dabeem la. Sira, sakerɛ la sukpe’ene n kɔ’ɔn makɛ taaba se’em la n sɔi ti tuntuna Yon yuun tɔɣɛ Krista tansugere la vo’osum poan zaberɛ la ti: “Ton nam Yesu la zuo te to tana nyaŋera teŋa wa zuo yɛla la.” (1 Yon 5:4) Zina beere wa, Yehowa Sɛɛradoma n gaŋɛ tustusa ayoobe n de bunbilipaalesi la bunkureba, sɛba n tari paŋa la tarendoma n tari sakerɛ wuu Yosua la Kaleb la n basɛ ti ba ta’an mɔɔla Na’am la yelesoma la teŋgɔŋɔ wa luɣerɛ woo poan. Dinedoma ka boi n wan nyaŋɛ gu nɛrekuuŋɔ la n tari sukpe’ene tuna ba tuuma se’em la.—Arom 8:31.
Vo’osum Poan Yɛla
it-1-E 740
Teŋsɛka Ti Naayinɛ Yuun Dekɛ Bo Israeldoma La
Teŋsɛka ti Naayinɛ yuun dekɛ bo Israeldoma la yuun dela teŋsoŋa. Moses n yuun tum vɛɛsereba ti ba keŋɛ ta bisɛ Pu’ulumbiŋe Teŋa la ge dekɛ teŋa la tiwɔla ase’a wa’ana ti ba bisɛ la, ba yuun vaɛ la mu’uro, pomegranate la daam tiwɔla zuɣerɔ ti buraasi bayi dekɛ paɣelɛ dɔɔ zuo buke wa’ana! La boi bini ti dabeem n yuun tari ba, la ba ka tari sakerɛ la ge ba yuun yeti: Teŋa la “kɔ’ɔn zɔta mɛ la iilom, la seerom wo ko’om la.”—Nu 13:23, 27.
MARCH 29–APRIL 4
NAAYINƐ TUULUM YƐLA | KANLƐ 15-16
“Da Ba’ɛ Nam Homea Gaŋɛ Ta Zɛkera Homea”
w11-E 9/15 27 ¶12
Yehowa Mi Hon?
Ge Israel nɛreba n yuun boi sore zuo yea Pu’ulumbiŋe Teŋa la, Kora yuun ti’isɛ ti tuure n boi Naayinɛ n maasum a yɛla se’em la. Nɛŋadoma 250 yuun naɛ me la Kora tiregera ti ba tee yɛla. Kora la nɛŋadoma wa yuun ti’isɛ ti bamam puɣum tara la bɔnsoŋa la Yehowa. Bala ti ba yuun yele Moses ti: “Ya pon ba tuue gaŋɛ mɛ! Buuri wa zan’an ayena ayena woo dela fa’a, te Na’ayenɛ me bɔna la ba.” (Kan. 16:1-3) Bisɛ ba yuun ba’ɛ nam bamea gaŋɛ ta zɛkera bamea se’em! Moses yuun yele ba ti: “Na’ayenɛ wan pa’alɛ sɛba n de a nɛreba.” (Kaalɛ Kanlɛ 16:5.) Beere n yuun ta yilegɛ paɛ zaanɔɔrɛ la, Kora la sɛba woo n yuun naɛ la en eŋɛ kpenkpasi la yuun ki mɛ.—Kan. 16:31-35.
w11-E 9/15 27 ¶11
Yehowa Mi Hon?
To san tɔɣera se’em n yuun tari gilema bɔ’ɔra Yehowa maaseŋɔ la a pa’alegɔ, Moses la Kora kɔ’ɔn bɔna la tɔka tɔka. Ba itigɔ yuun pa’alɛ Yehowa n geele ba se’em mɛ. Kora yuun dela Kohat Levi nɛra n yuun tari yɔ’ɔ zo’e zo’e la eŋa n yuun nyɛ Yehowa n faaɛ ba se’em Mɔɣɛ Mɔlega la poan la. A laɣum soŋɛ Yehowa n yuun gãkɛ Israeldoma la n tum be’em Sinai Zoore la zɛ’an la ge le dɛna mina n biseri ti ba ziira nɔbiŋere daka la. (Yɛh. 32:26-29; Kan. 3:30, 31) A yuun ani la tapilapi la Yehowa yuuma zo’e zo’e poan ti nɛreba zo’e zo’e me geele en ti a dela nɛrezure Israel tiiseŋɔ la poan.
Vo’osum Poan Yɛla
w98-E 9/1 20 ¶1-2
Dekɛ Yelese’a N Pakɛ La Deŋɛ Nɛŋa!
Yehowa yuun geele yele la ti la dɛna la ninmɔ’ɔrɛ. ‘Pooren,’ la gulesɛ Baabule la poan ti, ‘Naayinɛ yele Moses yeti: Ba ku buraa la.’ (Kanlɛ 15:35) Beni n sɔi ti la ba’ɛ daam Yehowa suure la sɛla ti nɛra la eŋɛ la?
Nɛreba la yuun tari la dabesa ayoobe ti ba wan ta’an dekɛ maasum ba gã’aregɔ zɛ’an, ɛ dia, pee ba lɔɣɔrɔ ge pi’ise dɔɔrɔ. Dabesa ayopɔi la yuun dela ba dekɛ sɔsa vo’osum poan yɛla. La yuun daɣɛ be’em ti ba pi’ise dɔɔrɔ ge la yuun dela be’em ti ba dekɛ sansɛka ti ba wan dekɛ pu’usa Yehowa la tuna bamea tuuma. La boi bim ti Kristakɔma ka doli Moses Lɔɔ la ge yele wa ka basɛ ti to baŋɛ yelese’a n nari ti la dɛna yia to vom poan?—Filipi 1:10.
APRIL 5-11
NAAYINƐ TUULUM YƐLA | KANLƐ 17-19
“Mam N De Hom . . . Tɔntɛ”
w11-E 9/15 13 ¶9
Hon Basɛ Ti Yehowa Dɛna Ho Tɔ̃tɛ?
Ti’isɛ Levidoma la n yuun ka tari samanɛ ti la dɛna ba tɔ̃tɛ la yele bisɛ. Sɛla yele n yuun kɔ’ɔn pakɛ ba dela yelemɛŋɛrɛ pu’usegɔ. Ge ti ba ta’an nyɛ sɛla basɛ ba nɔɔren, la dela ba dekɛ bamea delum Yehowa n yeti: “Mam n de hom . . . tɔntɛ.” (Kan. 18:20) La boi bim ti to ka boi pu’usegɔ deo mɛnka poan tuna wuu malemadoma la Levidoma la n yuun tuni se’em la ge to wan ta’an tɔɣesa ba ge tara puti’irɛ ti Yehowa wan bo to sɛla n pakɛ tɔ. To kɔ’ɔn bɔna ba’asegɔ dabesa wa poan ti la ana biɣɛ biɣɛ se’em la, la dela ninmɔ’ɔrɛ ti to dekɛ tomea delum Yehowa ge mina ti a wan bo to sɛla ti to bɔta.—Lil. 13:17.
w11-E 9/15 7 ¶4
Yehowa N De Mam Tɔ̃tɛ
Levidoma tuuma wa yuun ani la wani? Yehowa yuun dekɛ la tuunɛ n di mi’a eŋɛ ba nu’usin ge yuun yeti eŋa n de ba tɔ̃tɛ gana samana ti ba wan to’e. Bamam n tuni “malema tooma Na’ayenɛ nɛŋan la” n de ba tɔ̃tɛ. (Yos. 18:7) Kanlɛ 18:20 n yele sɛla la pa’alɛ ti Naayinɛ yuun ka basɛ ti nɔŋɔ kɛ̃ ba. (Kaalɛ Kanlɛ 18:19, 21, 24.) La yuun dela ba dekɛ “Israeldoma pia porogerɛ bo’olom la bɔ’ɔra Levi buuri wa te la dɛna ba sɔ’ɔlom doohe la ban tone toon se’a Sogorɛ la poan la.” Ba yuun dela ba tɔ’ɔsa Israeldoma va’am lɔɣɔrɔ la ba dusi n dɔɣeri se’em la kɔbega poan 10 puregerɛ. Levidoma la san to’e bala, ba me wan dekɛ ba bo’olum la pia puregerɛ “n ane soŋa gana zan’an” soŋɛ malemadoma tuuma la. (Kan. 18:25-29) Malemadoma la me wan to’e “fa’a bo’olom la” za’a ti Israeldoma tari wa’an pu’usegɔ zɛ’an na ti ba bo Naayinɛ la. Malemadoma la yuun tari sakerɛ ti Yehowa n bo’ori ba ti ba ka kɔŋera sɛsɛla.
Vo’osum Poan Yɛla
g02-E 6/8 14 ¶2
Yaarum Dela Tuulum Bunɔ
Yaarum yuun kɔ’ɔn bɔna mɛ ge me tara tuulum. Bala n sɔi ti Baabule la poan, ba ni biŋe nɔɔrɛ ge yeti la dela “yaarum nɔbiŋere” ti sɛba n biŋe nɔɔrɛ la ni laɣum di la dia ti yaarum bɔna bim ti nɔbiŋere la ta’an ze’ele soŋa. (Kanlɛ 18:19) Moses Lɔɔ la poan, ba yuun ni dekɛ la yaarum pa’asɛ bo’olum poan dekɛ kaabɛ bimbine la zuo ti la pa’alɛ ti bu kɔ’ɔn di la mi’a ge me ka sa’ana.
APRIL 12-18
NAAYINƐ TUULUM YƐLA | KANLƐ 20-21
“Kɔ’ɔn Tara Sirege N Mea Yɛla San Gaŋɛ Nu’usi”
w19.02-E 12 ¶19
Tara Sirege N Mea Ti Yehowa Puurɛ Pee
Bala wan basɛ ti to kan tue. Ti’isɛ Moses yele bisɛ. Yuuma zo’e zo’e poan ti a yuun siregera amea ge ita sɛla woo ti Yehowa puurɛ pɛɛra. Ge ba yuun ta pɔ̃ra yuun 40 la ba’asegɔ goo la poan la, Moses yuun ka nyaŋɛ eŋɛ pa’alɛ ti a tari sirege n mea. A tã n yuun faaɛ en basɛ Egypt teŋa la, nyaa yuun ki mɛ ti a laɛ en Kades teŋa. Bilam ti Israeldoma la nyɔna ti bamam ka nyɛti sɛla n pakɛ ba. Sankaŋa, ti ba yuun “gaara la Moses” la ba ka nyɛ ko’om la zuo. Hali Yehowa n yuun doose Moses poan tum yelekirisi se’em la ge ti Moses me yuun bisera ba soŋa se’em la, ba yuun kelum nyɔna mɛ. Ba yuun nyɔni mɛ wuu la dela Moses n sɔi ti ba ka nyɛ ko’om n wan nyu la.—Kan. 20:1-5, 9-11.
w19.02-E 13 ¶20-21
Tara Sirege N Mea Ti Yehowa Puurɛ Pee
Sunsɔa nyiisum n yuun basɛ ti Moses ka le tara sirege n mea. Eŋa n yuun nari ni ti a tɔɣɛ bo taŋa la wuu Yehowa n yele en se’em la, Moses yuun tuɣum zɛregɛ nɛreba la mɛ ge pɛɣɛ amea. Ge nyaa ŋmɛ taŋa la sugumnɔɔrɛ buyi ti ko’om pusege na. Zɛkɛ n mea la sunsɔa nyiisum n yuun basɛ ti a yuun tue la. (Ym. 106:32, 33) Eŋa n yuun zɛkɛ amea fii wa la yuun basɛ ti a ka nyaŋɛ kɛ̃ Pu’ulumbiŋe Teŋa la.—Kan. 20:12.
To wan ta’an zamesɛ yɛla zo’e zo’e yele wa poan. Yia, la nari ti to tiregɛ tara sirege n mea saŋa woo. To san ka eŋɛ bala, to ta baŋera la ti zɛkɛ n mea halɛ n boi to suuren, bala me wan basɛ ti to tɔɣɛ ge eŋɛ sɛla n ka nari. Yi’i, tɔregɔ ta’an basɛ ti to eŋɛ buulegɔ kan ta’an tara tomea soŋa. Bala la, la nari ti to tiregɛ tara sirege n mea yɛla san ta gaŋera nu’usi.
w09-E 9/1 19 ¶5
Gãkerɛdaana N Kɔ’ɔn Mɔ’ɛ Nini La Tontɔɔ Tuuma
Yia la, Naayinɛ yuun ka yele Moses ti a tɔɣɛ bo nɛreba la kan benti la a tu ba. Yi’i, Moses la Aron yuun ka na’asɛ Naayinɛ. Naayinɛ yuun yeti, “Yamam . . . ka na’ahɛ mam se’em n de fa’a daana la.” (Kan. 20:12) Ba yuun yeti ‘tomam wan basɛ ti ko’om yese na la,’ Moses tɔɣɛ me wuu eŋa la Aron ge daɣɛ Naayinɛ n tum yelekiriga ti ba nyɛ ko’om la. N tã’a, tubedɔlegerɛ la kɔ’ɔn makɛ mɛ la sɛla n tabelɛ eŋɛ kurum. Naayinɛ yuun tabelɛ gu tubekiregadoma mɛ ti ba yuun ka nyaŋɛ kɛ̃ Kanaan teŋa la, bala mea nɔɔ ti a eŋɛ Moses la Aron. (Kanlɛ 14:22, 23) N naasi, Moses la Aron n yuun de Israel nɛŋadoma. Sɛba n tari zugbere tuunɛ la me tari la yele kãtɛ Naayinɛ nɛŋa.—Luke 12:48.
Vo’osum Poan Yɛla
w14-E 6/15 26 ¶12
Hon Geele Asaala Inbuulegɔ Wuu Yehowa N Geele De Se’em La?
Yele ana wa woo poan la, Yehowa yuun ta’an dɔlegɛ ni Aron tuberɛ bilam bilam. Ge A yuun bɔkɛ ti Aron yuun daɣɛ nɛrebi’a ge me ka ba’ɛ tue. La yuun ani wuu bɔŋa la poan bii nɛreba la n yuun basɛ ti Aron eŋɛ kɔɔl nyaa tue la. Ba yuun yele en ti a tue mɛ la, a yuun sakɛ mɛ ge laɣum soŋɛ Yehowa n gãkɛ nɛreba la se’em la. (Yɛh. 32:26; Kan. 12:11; 20:23-27) Yehowa yuun biseri la Aron n tari sakerɛ ge basɛ a be’em la se’em la. Yuun kɔbesi pooren, Aron la a yaasi yuun kelum dɛna la nɛreba ti ba mina ti ba tari la zoolum bɔ’ɔra Yehowa.—Ym. 115:10-12; 135:19, 20.
APRIL 19-25
NAAYINƐ TUULUM YƐLA | KANLƐ 22-24
“Yehowa Basɛ Ti Nɔtoo Lebege Kã’a”
bt-E 53 ¶5
Tɔɣera “Yesu Krista Yelesoma”
La yuun ani se’em yuun kɔbesɛka n deŋɛ nɛŋa la, bala mea nɔɔ ti zina beere wa ti ba mɛlesa Naayinɛ nɛreba ge ti ba kɔ’ɔn sina ge mɔɔla. Saŋa ase’a la ni ta gaŋɛ mɛ ti ba paɣera Kristakɔma sarega poan ge ti la me dɛna pɛregerɛ bɔ’ɔra basɛba ti ba loŋe tisi ase’a poan. Bala me ni soŋɛ mɛ ti ba ta’an mɔɔlɛ Na’am yelesoma la zɛ’ɛsi ase’a poan. Makerɛ, Teŋgɔŋɔ Wa Za’a Zaberɛ N Pa’asɛ II la, Yehowa Sɛɛradoma yuun nyaŋɛ tɔɣɛ yelesoma la mɛ bo nɛreba zo’e zo’e Nazi sarega deto la poan. Yuda nɛra n yuun laɣum bɔna sarega la poan la Sɛɛradoma la yeti: “Yehowa Sɛɛradoma n yuun dekɛ sukpe’ene ŋmibe sarega la poan se’em la basɛ ti mam baŋɛ ti ba tari la sakerɛ Baabule la poan, bala n sɔi ti mam me pa’asɛ ba poan la.”
it-2-E 291
Gɔɔntuuma
Ka Nam Bo Yehowa. Nɔdɛ’ɛsa Balaam yuun tum la gɔɔntuuma bɔta ti a pɔ too basɛ Israeldoma zuo ge ta’an to’e ligeri Moab Naba Balak zɛ’an ge Yehowa yuun basɛ ti yele la tulege mɛ. Tuntuna Peter gulesɛ Balaam yele ti “boŋa la yuun tɔgɛ bo en mɛ la asaala konkore go’e en a gɔɔntooma la poan te a yuun yeti a eŋɛ la.” Tuntuna la dekɛ la Greek yelebire pa·ra·phro·niʹa, tɔɣɛ Balaam gɔɔntuuma la yele ti la pa’alɛ ti a “dela zɔlegɔ.”—2Pe 2:15, 16; Kan 22:26-31.
Vo’osum Poan Yɛla
w04-E 8/1 27 ¶2
Kanlɛ Gɔŋɔ La Yelekpina
22:20-22—Beni n sɔi ti Yehowa sunsɔa yuun nyie la Balaam? Yehowa yuun yele nɔdɛ’ɛsa Balaam ti a da purɛ too basɛ Israeldoma la zuo. (Kanlɛ 22:12) Ge nɔdɛ’ɛsa la yuun sini mɛ ge naɛ la Balak nɛreba la ti ba keŋɛ ta purɛ too basɛ Israeldoma la zuo. Balaam yuun boti la a eŋɛ sɛla n wan pee Moab naba puurɛ ge ta’an nyɛ sɛla ti a bɔta la. (2 Peter 2:15, 16; Yude 11) Hali, la yuun ta dɛna pɛregerɛ bɔ’ɔra Balaam ti a kã bo Israeldoma la, a yuun kelum bɔta la a eŋɛ sɛla n wan pee naba la puurɛ nyaa yele en ti a basɛ ti Baal pɔɣesi la keŋɛ ta pã’asɛ Israel buraasi la. (Kanlɛ 31:15, 16) Bala la, sɛla n sɔi ti Naayinɛ sunsɔa yuun kɔ’ɔn nyie la nɔdɛ’ɛsa Balaam dela eŋa n yuun tari konkoma’asum la lɔɣɔrɔ la zuo.
APRIL 26–MAY 2
NAAYINƐ TUULUM YƐLA | KANLƐ 25-26
“Nɛreyiŋa Wan Ta’an Tee Sɛla?”
lvs-E 118 ¶1-2
“Zɔ Ya Yalomtuuma Poan!”
ZIM LƆBERA ni keŋɛ la zɛ’an ti a wan ta’an nyɛ zimsebo ti a bɔta la. A ni dekɛ la sakamɛrega tũ zimbaŋa la ge nyaa dekɛ basɛ ko’om poan. A ni ma’ɛ la amea gura ti zim la san paɛ dita, ti a ve’e zimbaŋa la ti la yɔɛ ziho la yia ti a nyɔkɛ.
Bala mea nɔɔ ti bɛregɔ me wan ta’an nyɔkɛ nɛreba. Makerɛ, Israeldoma n yuun ta pɔ̃ra Pu’ulumbiŋe Teŋa la ba yuun ta tiisum la Moab Bɔ̃’ɔrɔ la poan. Moab naba yuun yeti a wan bo Balaam ligeri zo’e zo’e ti a purɛ too basɛ Israeldoma la zuo. Balaam yuun nyaa maasum mɛ mina eŋa n wan eŋɛ se’em basɛ ti Israeldoma la mea eŋɛ sɛla ti too sige ba zuo. A yuun ma’ɛ la amea bisɛ bɛ̃rɛ soŋa bɛ̃rɛ ba. A yuun tum la Moab pɔɣesi ti ba keŋɛ Israeldoma tiiseŋɔ la poan ta pã’asɛ buraasi la.—Kanlɛ 22:1-7; 31:15, 16; Liligere 2:14.
lvs-E 119 ¶4
“Zɔ Ya Yalomtuuma Poan!”
Beni n sɔi ti Balaam bɛ̃rɛgɔ la yuun nyɔɣɛ Israeldoma zo’e zo’e? Ba yuun ti’iseri la bamea konkoma’asum yɛla ge tamɛ yelese’a woo ti Yehowa eŋɛ bo ba la. Naayinɛ yuun eŋɛ la yɛla zo’e zo’e bo Israeldoma la ti la nara ti ba ana tapilapi la en. A yuun puɣum faaɛ ba yese Egypt teŋa, uge ba goo la poan ge tara ba ta pɔ̃ra Pu’ulumbiŋe Teŋa la. (Hebru 3:12) La bala la za’a la, ba yuun pã’asɛ ba mɛ ti ba tum yalumtuuma. Tuntuna Paul yeti: “Da bahɛ ya te to tona yalomtooma wo bama basɛba n eŋɛ se’em” ki la.—1 Korint 10:8.
Vo’osum Poan Yɛla
it-1-E 359 ¶1-2
Beene
Daanse’ere ba yuun ni bisɛ la yɛla ayi wa ge nyaa tɔ̃rɛ samana la bo Israel buuri la: ba yuun ni ŋmɛ la gbaŋa ge bisɛ buuri la nɛreba n zuni se’em. Ba yuun ta’an ni ŋmɛ gbaŋa la zɛsɛka ti samanɛ la bɔna ti ba wan tɔ̃rɛ ku bo buuri la woo ge nyaa ni pa’alɛ zɛsɛka bii bɔbese’ere n de ba tɔ̃tɛ ti ba wan ta sɔna wuu N bii S, E bii W, nyaa dekɛ bɔ̃’ɔrɔ la zɔa zuto la za’a laɣum pa’asɛ. Yehowa n yuun basɛ ti ba ŋmɛ’ɛra gbaŋa, la wan eŋɛ se’em ti nyuure bii zaberɛ da bɔna buuri la poan. (Mag 16:33) Naayinɛ yuun ni doose la wana poan bisɛ buuri woo tɔ̃tɛ n wan dɛna se’em ti la makɛ la Yakob n yuun tɔɣɛ se’em biŋe ge nyaa ki ti la bɔna Pin’ileŋɔ 49:1-33 la.
Ba san ta ŋmɛ gbaŋa la baŋɛ buuri sɛka n wan sɔna zɛsɛka, ba nyaa ni bisɛ la ka nɛreba n zuni se’em ti ba ta’an baŋɛ ba wan bo ba zɛ’an la ti la yalegɛ paɛ se’em. “Ya ŋmɛ gbaŋa ya yizuto la woo zuo, tɔnrɛ teŋa la bo ya mɛhe, bo ya sɛba n zo’e la zo’e, ge bo sɛba n pɔ’e la me pɔ’ɛ. Te kaŋa n nyɔkɛ zen’an bo se’em, a daana tɔntɛ n bala.” (Kan 33:54) Ba san ŋmɛ gbaŋa, ba ni kɔ’ɔn sakɛ buuri la n wan zi’ire zɛ’an la mɛ ge ba ta’an tee yɛla ase’a doose la ka nɛreba n zuni se’em la zuo. Bala la, ba yuun ta baŋɛ ti Yuda buuri zɛ’an la yuun yalegɛ mɛ la, ba yuun ãaɛ zɛ’an la mɛ pa’asɛ Simeon buuri la.—Yos 19:9.