Vom La Na’am Tuuma Zamesegɔ Viisegɔ Gɔŋɔ

MAY 2-8

NAAYINƐ TUULUM YƐLA | 1 SAMUEL 27-29

“David N Yuun Mi Zaberɛ Se’em”

it-1-E 41

Akis

Sugumnɔɔrɛ buyi ti David yuun zɔta li’isa Saul la, a yuun zɔ ta suɣɛ la Naba Akis so’olum la poan. Yia la, ba yuun ta baŋɛ ti a dela ba dima la, David yuun pã’asɛ eŋɛ wuu a zali mɛ la ti ba ka eŋɛ en sɛsɛla ti Akis basɛ en ti a keŋɛ. (1Sa 21:10-15; Ym 34:Sup; 56:Sup) David n yuun ta lebe la lengimadoma 600 la ba deodoma n yuun doose en la, Akis yuun dekɛ la Ziklag tiŋa la bo ba ti ba kɛ̃’ɛra bilam. Yuunɛ la ŋmaresi sinaasi ti ba yuun kɛ̃’ɛra bim la, Akis yuun ti’isɛ ti David la a nɛreba la yuun kɔ’ɔn sa’ana la Yuda tisi ziti David yuun tuɣum sa’ana la Gesuridoma, Girzidoma la Amalekdoma. (1Sa 27:1-12) David yuun nyaŋɛ pã’asɛ Akis mɛ ti a basɛ ti a dɛna a gu’ura se’em ma’a ti Filistiadoma la yuun maasena ti ba ta zabɛ la Naba Saul la ge ba yuun ta maasum ba’asɛ la, Filistia nadoma la yuun pɛregɛ en mɛ ti a basɛ ti David la a nɛreba la lebe Ziklag tiŋa. (1Sa 28:2; 29:1-11) David n yuun ta dɛna naba la ge nyaa zabɛ la Gat tiŋa la, la niɛ peelum ti ba yuun ka ku Akis. A yuun vɔi mɛ ta paɛ Solomon saŋa la.​—1Na 2:39-41; bisɛ GATH.

w21.03-E 4 ¶8

Budibito​—Ya Wan Eŋɛ La Wani Ti Nɛreba Tɔresɛ Ya?

Geele yele deyima n yuun le paɛ David bisɛ. Ba yuun loe en ti a dɛna naba la, David yuun nari ti a gura yuuma zo’e zo’e ge ti ba nyaa bobe en ti a dɛna Yuda naba. (1 Sa. 16:13; 2 Sa. 2:3, 4) Sankaŋa la, beni n yuun soŋɛ en ti a ma’ɛ amea gura? Bala n tuɣum wan basɛ ni ti a giila kɔ’ɔsɛ la, David puti’irɛ yuun kɔ’ɔn bɔna la eŋa n wan ta’an eŋɛ sɛla poan. Makerɛ, eŋa n yuun zɔ ta suɣɛ Filistia tiŋa poan la, David yuun dekɛ yɔ’ɔ la zabɛ mɛ la Israel dinedoma. A yuun eŋɛ wana gu la Yuda sɔ’ɔlum la.​—1 Sa. 27:1-12.

it-2-E 245 ¶6

Pumpɔreŋɔ

La boi bim ti Baabule la zɛregɛ pumpɔreŋɔ mɛ ge bala ka pa’alɛ ti la dela pɛregerɛ ti nɛra tɔɣɛ yele bo nɛresɛba n ka nari ti ba baŋɛ la. Yezu Krista ka’am tɔ yeti: “Da dekɛ ya sɛla n de zilam bo baasi bii ya dekɛ tuulum kuga bo kuri kuri, la wan eŋɛ se’em ti ba kan nɛ a lirum ge tulege ãasum ya.” (Mt 7:6) Bala n sɔi ti saŋa ase’a Yezu yuun ka tɔɣera yɛla za’a bii lebesa sokere se’a n wan ta’an basɛ ti dɛŋa paɛ en. (Mt 15:1-6; 21:23-27; Yon 7:3-10) Bala mea nɔɔ ti Abraham, Isaak, Arahab, la Elisa yuun pã’asɛ bii ka tɔɣɛ yɛla bo nɛresɛba n ka pu’useri Yehowa la.​—Pin 12:10-19; zuo 20; 26:1-10; Yos 2:1-6; Yam 2:25; 2Na 6:11-23.

Vo’osum Poan Yɛla

w10-E 1/1 20 ¶5-6

Nɛresɛba N Ki La Wan Ta’an Soŋɛ Sɛba N Vɔi La?

Ti’isɛ de yele bisɛ. Baabule la yeti nɛra san ki “a lebe la tintɔno poan” ge ti “a puti’irɛ la ni ba’asɛ.” (Yooma 146:4) Saul la Samuel yuun mi ti Naayinɛ ka boti bakolo tuuma. Bala zuo la, Saul n yuun basɛ ti ba yese kolkpãtuuma tiŋa la poan basɛ!​—Malema 19:31.

Ti’isɛ yele la bisɛ. Samuel yuun san kelum vɔi ni mɛ, a wan sakɛ gãlum Naayinɛ lɔɔ la ge doose kolkpabɛ’a poan sɔsɛ la Saul? Yehowa yuun zaɣesɛ mɛ ka tɔɣɛ bo Saul. Bala la, kolkpabɛ’a wan ta’an pɛregɛ Gaŋɛ Za’a Naayinɛ la ti a doose Samuel n ki la poan sɔsɛ la Saul? Aayi. La niɛ peelum ti “Samuel” kaŋa wa yuun daɣɛ Naayinɛ nɔdɛ’ɛsa la. A yuun dela kolkpabɛ’a n eŋɛ amea wuu Samuel n ki la.

MAY 9-15

NAAYINƐ TUULUM YƐLA | 1 SAMUEL 30-31

“Kpeŋe Homea Yehowa Ho Naayinɛ La Poan”

w06-E 8/1 28 ¶12

Tara Zoolum Bɔ’ɔra Yehowa Ta’an Tara Pupeelum!

David n yuun tari zoolum bɔ’ɔra Yehowa la, ka yeen gu en mɛ ti a ka tuna be’em ge la yuun bo en la paŋa ti a ta’an dekɛ yɛm tum tuuma bɔŋa n kpe’em poan. Yuunɛ la ŋmaaresi sinaasi ti David la a nɛreba yuun zɔ li’isɛ Saul ta suɣɛ Ziklag tiŋa n de Filistiadoma tinkpɛŋa. (1 Samuel 27:5-7) Daarɛ deyima ti buraasi la yuun yese la, Amalekdoma zabezabereba n yuun nyɔ̃ tiŋa la ge tara ba kɔma, ba pɔɣeba, ba dusi la piisi keŋɛ. David la a nɛreba n yuun lebe na nyɛ sɛla n eŋɛ la, ba yuun kele mɛ. Ba suure yuun sa’am mɛ ti la wuna ba ti David nɛreba yuun yeti ba lobe en la kuga. La boi bim ti David suure yuun sa’am mɛ ge a giila yuun ka kɔ’ɔsɛ. (Magaha 24:10) Eŋa n yuun tari zoolum bɔ’ɔra Naayinɛ la zuo, a yuun dekɛ amea delum la Yehowa, ‘kpeŋe amea Yehowa poan.’ Naayinɛ yuun soŋɛ David la a nɛreba la mɛ ti ba dige Amalekdoma la ta to’e sɛla woo.​—1 Samuel 30:1-20.

w12-E 4/15 30 ¶14

Yehowa Gu’uri To Ti To Nyɛ La Faarɛ

David vom poan, susa’aŋɔ yɛla zo’e zo’e n yuun paɛ en. (1 Sa. 30:3-6) Zilam vo’osum la n yuun basɛ ti a gulesɛ sɛla la pa’alɛ ti Yehowa mi la ani en se’em mɛ. (Kaalɛ Yooma 34:18; 56:8.) Naayinɛ mi la ani tomam me se’em mɛ. To “suure san sa’am” bii to “giila n kɔ’ɔsɛ,” a ni ana la du’a du’a la tɔ. Wana ta’an buɣelɛ to suure wuu la yuun buɣelɛ David suure ti a yuum yeti: “Mam puurɛ wan pee me paa ho yelemɛŋɛrɛ nɔŋerɛ la poan, Se’ere n sɔi la ho nyɛ la wuni mam se’em mɛ; Ho mi mam suure n sa’am se’em mɛ.” (Ym. 31:7) Yehowa ka yeen mina la, la wuni to se’em ma’a ge a buɣeli to suure mɛ ge me kpɛmesa to giila. Sore deyima poan ti a ita bala dela Kristakɔma zamesegɔ poan.   

Vo’osum Poan Yɛla

w05-E 3/15 24 ¶8

Yia Samuel Gɔŋɔ La Yelekpina

30:23, 24. Ba yuun ku nɔɔrɛ yele wa poan se’em ti la makɛ la Kanlɛ 31:27 la, pa’alɛ ti Yehowa puurɛ pee mɛ la sɛba n tuni soŋera tansugere la. Bala la, sɛla woo ti to ita, to ita la to “suure za’a wuu [to] iti bɔ’ɔra la Yehowa la ge daɣɛ nɛreba.”​—Kolose 3:23.

MAY 16-22

NAAYINƐ TUULUM YƐLA | 2 SAMUEL 1-3

“To Zamesɛ La Bem Fabeligɔ Yuunɛ La Poan?”

w00-E 6/15 13 ¶9

Nana Sɛba N Tari Kpe’eŋo Bisera Hɔ La

David suure yuun sa’am mɛ la ba yuun mɛleseri en la? David kaasɛ bo Yehowa yeti; ‘Nɛreyaalesi n eeri ti ba ku mam.’ (Yooma 54:3) A yuun yese a suure poan zusɛ bo Yehowa yeti: “Gu mam yese sɛba n isige ti ba zabɛ la mam la nu’usin basɛ . . . Paŋadoma n zabɛ la mam ge la daɣɛ ti n tum la be’em bii n eŋɛ la kpenkpasi, O Yehowa. Mam ka tum be’em ge ti ba ita kalam kalam maasena ti ba zabɛ la mam. Mam san yi ho, isige la ho bisɛ.” (Yooma 59:1-4) La tabelɛ ana ho bala ti ho ka tum be’em ge ti nɛra n tari kpe’eŋo kɔ’ɔn daana hɔ? David yuun kɔ’ɔn tara gilema bɔ’ɔra Saul mɛ. Saul n yuun ki la, David puurɛ yuun ka pee ge a yuun tuɣum gulesɛ la fabeligɔ yuunɛ: “Saul la Yonatan n daa vɔi la, nɛreba daa nɔŋɛ ba yele mɛ, ba daa ka pɔsegɛ taaba. . . Ba daa kuresɛ gana yebehe, tara paŋa gana gbɛɣema. O Israel poyɔɔsi wa, kele ya Saul zuo.” (2 Samuel 1:23, 24) La boi bim ti Saul n yuun tue David ge bisɛ David n yuun tari gilema bɔ’ɔra mina ti Yehowa loe la se’em!   

w12-E 4/15 10 ¶8

Ba’asegɔ Dabesa Wa Poan, Nɛreba Dɔ̃ti La Taaba!

Baabule la me tɔɣɛ pa’alɛ nɛreba zo’e zo’e n yuun tari yelemɛŋɛrɛ yele mɛ. To geele ya nɛreba wa poan bayi yele ge bisɛ to wan ta’an zamesɛ sɛla. To wan pɔsɛ la buraa ayima n yuun tari yelemɛŋɛrɛ bɔ’ɔra David. Yonatan n yuun de Naba Saul dayɔkeema la n yuun wan soe ni a sɔ dɛna Israel naba​—san daɣena yele deyima zuo. Yehowa yuun loe la David ti a ta dɛna Israel naba. Yonatan yuun nam Naayinɛ n kɔ’ɛ a puti’irɛ loe se’em la mɛ. A yuun ka nyuuni bii bisɛ ti David dela a dataa. Ge Yonatan “la David suure kɛ̃ taaba mɛ” ti a biŋe nɔɔrɛ ti a wan tara yelemɛŋɛrɛ bɔ’ɔra David. Hali a yuun dekɛ la a futo, su’a, tahɔ la siganɛ bo David ti la pa’alɛ ti a na’asɛ en mɛ ti a dela naba. (1 Sa. 18:1-4) Yonatan yuun eŋɛ la sɛla woo ti a wan ta’an eŋɛ ‘kpemese David,’ hali a yuun pɔ̃sɛ la a nyuurɔ tɔɣɛ po’e David Saul nɛŋa. Yonatan yuun yele David yeti: “Hon wan dɛna Israel naba ti mam dɔla ho poore.” (1 Sa. 20:30-34; 23:16, 17) Bala la, la daɣɛ yele pakerɛ ti Yonatan n yuun ta ki la, David yuun yuum la fabeligɔ yuunɛ pa’alɛ eŋa n nɔŋɛ en se’em.​—2 Sa. 1:17, 26.

Vo’osum Poan Yɛla

it-1-E 369 ¶2

Suɔ

Nɛreba san eŋɛ nɔyinɛ ti ba tum tuunɛ ge ti ba puti’irɛ bɔna yele deyina poan, to ta’an yeti ba dela ‘suurɔ.’ Makerɛ n wana, Tyre tiŋa Naba Hiram yuun yi Naba Solomon la a suɔ, la daɣɛ ti ba yuun zuni taaba la ba de nadoma la zuo ma’a ge ba me yuun eŋɛ la nɔyinɛ ti ba laɣesɛ dɔɔrɔ la lɔɣerɔ ase’a mɛ pu’usegɔ deo la. (1Na 9:13; 5:1-12) David n yuun gulesɛ yeti, “bisɛ la ani soŋa ge za’asum se’em ti suurɔ ta’an naɛ taaba bɔna la nɔyinɛ!” la pa’alɛ ti la daɣɛ nɛreba n yeen dɛna ma yiŋa ma’a n wan ta’an basɛ ti ba dɛna suurɔ n tari suma’asum la nɔyinɛ. (Ym 133:1) Yelemɛŋɛrɛ, la dela ba yuun tari giile bɔ’ɔra taaba la n sɔi ti David yuun yi’ira Yonatan a suɔ ge daɣɛ ti ba dela ma yiŋa. (2Sa 1:26) Nɛreba sareŋɔ san dɛna buyina, hali la san puɣum dɛna sarum be’ero to wan ta’an yeti ba dela suurɔ.​—Mag 18:9.

MAY 23-29

NAAYINƐ TUULUM YƐLA | 2 SAMUEL 4-6

“Kɔ’ɔn Tara Zoolum Bɔ’ɔra Yehowa Ge Da Sa’am A Suure”

w05-E 5/15 17 ¶8

Yi’i Samuel Gɔŋɔ La Yelekpina

6:1-7. La boi bim ti David yuun tari la putɛsonɛ ge eŋa n yuun dekɛ Daka la biŋe toroko la zuo la giisɛ Naayinɛ nɔɔrɛ la mɛ bala n sɔi ti daaŋɔ yuun bɔna la. (Yɛhega 25:13, 14; Kanlɛ 4:15, 19; 7:7-9) Uzah n yuun gurɛ Daka la pa’alɛ ti, asaala putɛsonɛ kan ta’an tee Naayinɛ n boti sɛla.

w05-E 2/1 27 ¶20

Yehowa Iti La Sɛla N De Tontɔɔ Saŋa Woo

Tɛra ti Uzah yuun nari ti a tuɣum mina soŋa. Daka la yuun ze’ele bo la Yehowa. Lɔɔ la yuun pa’alɛ ti nɛreba basɛba ka tari sore ti ba kalum daka la ge me yuun basɛ ti la niɛ peelum ti sɛba n giisɛ lɔɔ la wan ki. (Kanlɛ 4:18-20; 7:89) Bala zuo la, ba wan zɛ tuulum daka la se’em la yuun dela ninmɔ’ɔrɛ yele. Uzah yuun dela Levi nɛra (ge a daɣɛ malema daana), bala a yuun nari ti a mina Lɔɔ la mɛ soŋa soŋa. Leyɛ’ɛsa, yuuma zo’e zo’e n tole la, ba yuun tari Daka la ta ze’ele la a sɔ yire la wan eŋɛ se’em ti daaŋɔ da paɛ ka. (1 Samuel 6:20–7:1) Daka la yuun boi bim paɛ yuun 70 mɛ ge ti David nyaa dekɛ ka. Bala la, kɔ’ɔn ze’ele a bunbilimen Uzah yuun mi lɔɔ la n tɔɣɛ daka la yele se’em mɛ.

w05-E 2/1 27 ¶21

Yehowa Iti La Sɛla N De Tontɔɔ Saŋa Woo

Wuu to puɣum baŋɛ se’em la, Yehowa mi sɛla n boi to suuren mɛ. Baabule n yeti Uzah yuun tum la “zɛɛsi tuuma la”, daanse’ere Yehowa yuun nyɛ la putɛbe’o a suuren ti gulesegɔ la ka tɔɣɛ de yele mɔpi. Uzah yuun dela mina n zɛkeri amea ge mi ka yaɣesa ge tuura yɛla? (Magaha 11:2) Daka la n yuun suɣɛ bɔna ba yire la, yuun basɛ ti a zuo n zɛkɛ ti a bɔta ti a eŋɛ nɛreba zɛ’an ti ba baŋɛ eŋa n de nɛrezure se’em? (Magaha 8:13) Uzah sakerɛ yuun ba’ɛ pɔ’ɛ mɛ ti a ti’isɛ ti Yehowa kan nyaŋɛ te’ele tuulum daka la n ze’ele bo A bɔŋa la? La yeen dɛna se’em to mi ti Yehowa yuun eŋɛ la sɛla n de tontɔɔ. A yuun nyɛ la sɛla Uzah suuren n sɔi ti a yuun gãkɛ en bilam bilam la.​—Magaha 21:2.

Vo’osum Poan Yɛla

w96-E 4/1 29 ¶1

Dekɛ Ho Zeero La Bo Yehowa Saŋa Woo

David n yuun de naba la, yuun tari taalɛ mɛ yele wa poan. Eŋa n yuun eŋɛ sɛla wa pa’alɛ ti hali nɛresɛba n tari bɔnsoŋa la Yehowa la ta’an tue gurebisɛ poan. Yia la, David sunsɔa yuun nyie mɛ ti dabeem tara en. (2 Samuel 6:8, 9) Eŋa n tari bɔnsoŋa la Yehowa la yuun miim mɛ. Yele dena wa poan la, a yuun ka dekɛ amea delum Yehowa la eŋa n ka doose a nɔɔrɛ la. Saŋa ase’a la me ni ta ana to la bala? Tomam me ni zɛregera Yehowa mɛ sansɛka ti to ni zaɣesɛ a nɔɔrɛ ti yele paɛ tɔ la?​—Magaha 19:3.

MAY 30–JUNE 5

NAAYINƐ TUULUM YƐLA | 2 SAMUEL 7-8

“Yehowa Biŋe La Nɔɔrɛ La David”

w10-E 4/1 20 ¶3

“Ho Na’am La Wan Ze’a Kankaŋi”

Yehowa suure yuun sukɛ mɛ la David n boti sɛla la. David pu’usegɔ n di mi’a la zuo ti Naayinɛ yuun pu’ulumbiŋe ti a wan loe nɛra David tuusum la poan ti a dɛna naba bɔna wuusa. Natan yele David Naayinɛ pu’ulumbiŋere la mɛ: “Ho yire la ho na’am la wan ze’a kankaŋi wuusa ho nɛŋan ge ti ho na’am kuka la bɔna bala wuusa.” (Kaalegɔ zɛ’an 16) Nɔbiŋere wa tɔɣeri la Ani yele​—Mina n wan ta bisera wuusa la?​—Yooma 89:20, 29, 34-36.

w10-E 4/1 20 ¶4

“Ho Na’am La Wan Ze’a Kankaŋi”

Yezu n yuun de Nazaret nɛra la dela David yaaŋa. Maleka la n yuun mɔɔli Yezu dɔɣum yele la, a yuun yeti: “Yehowa Naayinɛ wan bo en a sɔ David na’am kuka la, a wan dɛna Naba bisera Yakob yire la daarewoo ge ti a Na’am la me kan tara ba’asegɔ.” (Luke 1:32, 33) Bala la, nɔbiŋere la ti a yuun biŋe la David la, yuun tum tuuma la Yezu Krista poan. Bala zuo, a bisega wa daɣɛ la nɛresaala n loe en ge la dela Naayinɛ n pu’ulumbiŋe ti a wan dɛna naba bisera wuusa. Basɛ ya ti to tɛra ti Naayinɛ pu’ulumbiŋa woo ni sirum tum tuuma mɛ.​—Isaiah 55:10, 11.

w14-E 10/15 10 ¶14

Tara Sakerɛ N Kpe’em Na’am La Poan

Geele Yehowa n yuun yele diimi Israel Naba David sɛla David nɔbiŋere la poan. (Kaalɛ 2 Samuel 7:12, 16.) Se’em ma’a ti David yuun dɛna naba Yerusalem la ti Yehowa yuun biŋe nɔɔrɛ wa la en ti Messiah la wan ta dɛna a yaaŋa. (Luke 1:30-33) Yehowa yuun pa’alɛ wana mɔpi yaaŋa la n wan ze’ele mina tuusum poan ge nyaa basɛ ti la niɛ peelum ti David yaaŋa n “tari sore” ti a dɛna Messiah la Na’am la Naba. (Eze. 21:25-27) Yezu poan ti David na’am la “wan bɔna wuusa.” Yelemɛŋɛrɛ, David yaaŋa la wan “bɔna wuusa, a na’am kuka la me wan bɔna mam nɛŋan wuu yintule la.” (Ym. 89:34-37) Messiah bisega la kan malum sa’am ge ti a tuuma la me wan bɔna bala wuusa!

Vo’osum Poan Yɛla

it-2-E 206 ¶2

Ba’asegɔ Dabesa

Balaam Yetɔɣebiŋere. La yuun dela sansɛka ti Israeldoma yuun ta pɔ̃ra ti ba kɛ̃ Pu’ulumbiŋere Tiŋa la ti nɔdɛ’ɛsa Balaam yuun yele Moab tiŋa Naba Balak yeti: “Wa’ana ti n yele ho [Israel] nɛreba wa n wan ta eŋɛ ho nɛreba se’em beere sa’am. . . . Ŋmarebila wan ze’ele Yakob poan yese na ti na’am doore me yese Israel poan na. A wan wɔ̃rɛ Moab zuo ge wɔ̃rɛ dayɔsɛba n voole la za’a zuwama.” (Kan 24:14-17) Yia la, yetɔɣebiŋere wa n yuun tum tuuma la, “ŋmarebila” la yuun ze’ele bo la Naba David n yuun zabɛ nyaŋɛ Moabdoma la. (2Sa 8:2) La niɛ peelum ti yia la, “beere sa’am” la ti yetɔɣebiŋere wa tɔɣɛ de yele la yuun pɔsɛ la se’em ma’a ti David yuun ta dɛna naba la. Wuu David n yuun ze’ele bo Yezu n de Messiah na’am la Naba se’em la, yetɔɣebiŋere wa me tɔɣeri la se’em ma’a ti Yezu wan ta zabɛ nyaŋɛ a dinedoma la.​—Isa 9:7; Ym 2:8, 9.

JUNE 6-12

NAAYINƐ TUULUM YƐLA | 2 SAMUEL 9-10

“David Yuun Tari La Suure Poan Nɔŋerɛ”

w06-E 6/15 14 ¶6

Ɛɛ, Ho Wan Ta’an Tara Pupeelum

David yuun gulesɛ yeti, “pupeelum boi me la nɛresɛka n tari tarendoma giile.” A yuun tɔ̃kɛ yeti: “Yehowa wan faaɛ en daaŋɔ poan basɛ. Yehowa wan gu en ge basɛ ti a vɔna. A wan dɛna pupeelumdaana tingɔŋɔ wa zuo.” (Yooma 41:1, 2) David n yuun tari nɔŋerɛ la giile bɔ’ɔra Mefiboset, a zɔsoŋa Yonatan dayɔa n de wɔbega la, dela makesonɛ n pa’alɛ to wan tara tarendoma giile se’em.​—2 Samuel 9:1-13.

w05-E 5/15 17 ¶12

Yi’i Samuel Gɔŋɔ La Yelekpina

9:1, 6, 7. David yuun eŋɛ eŋa tɔɣɛ sɛla la mɛ. Tomam me nari ti to ni eŋɛ sɛla ti to tɔɣɛ la.

w02-E 2/15 14 ¶10

Ba Ŋmibe Mɛ La Yelese’a N Paɛ Ba La

Yuuma fii pooren la, Naba David yuun tari la nɔŋerɛ bɔ’ɔra Yonatan la eŋa n yuun tari itisoŋɔ bɔ’ɔra Mefiboset la. David yuun dekɛ Saul lɔɣɔrɔ la za’a bo en mɛ ge loe Ziba n yuun de Saul tuuntuna la ti a bisera va’am la. David yuun le yele Mefiboset yeti: ‘Ho wan dita la mam teebule zuo daarewoo.’ (2 Samuel 9:6-10) Nɔkpe’ene kai ti David itisoŋɔ la yuun buɣelɛ Mefiboset suure mɛ ge me soŋɛ en ti a giila ka kɔ’ɔsɛ la eŋa n de tarema la zuo. Bisɛ la de yɛm zamesegɔ se’em! Tomam me nari ti to tara itisoŋɔ bɔ’ɔra nɛresɛba ti daaŋɔ paɛ ba la.

Vo’osum Poan Yɛla

it-1-E 266

Tɛɛŋa

Diimi nɛreba zo’e zo’e n yuun boi Asia la Israeldoma la yuun bisɛ ti tɛɛŋa dela tuulum bunɔ n pa’alɛ ti nɛra sirum dela buraa. Naayinɛ lɔɔ la ti a yuun dekɛ bo Israeldoma la yuun ka bo yɔ’ɔ ti ba kɛ zonto la n boi “ba tuberɛ la ba nini tiŋasuka” ta paara ba tɛɛŋa la. (Mlm 19:27; 21:5) Yele wa yuun niɛ peelum mɛ sɛla n sɔi la baɣekaabera la yuun iti bala ti la dɛna la pu’usegɔ malema.

JUNE 13-19

NAAYINƐ TUULUM YƐLA | 2 SAMUEL 11-12

“Da Basɛ Ti Konkoma’asum Be’ero Nyaŋɛ Hɔ”

w21.06-E 17 ¶10

Ho Wan Ta’an Li’isɛ Sitaana Bɛ̃tɔ La!

Punya’anɛ n yuun basɛ ti Naba David tamɛ Yehowa n yuun bo en sɛla la, n de wuu yu’urɛ, taresum la eŋa n yuun zabɛ nyaŋɛ a dinedoma zo’e zo’e la. David puurɛ yuun pee mɛ ti a baŋɛ ti Yehowa bo’olum la “ba’ɛ zo’e gaŋɛ mɛ!” (Ym. 40:5) Ge daarɛ deyima, David yuun tamɛ sɛla ti Yehowa bo en la mɛ. Sɛla ti a yuun tara la ka seke en. La boi bim ti David yuun tari la pɔɣesi zo’e zo’e ge a yuun tari la konkoma’asum la ayima pɔɣa. Pɔka la yuun dela Bat-seba ti a sira Uria dɛna Hiti tiŋa buraa. David yuun ga’arɛ Bat-seba mɛ ti a nyɔkɛ puurɛ. David yuun eŋɛ wuu pɔɣedisa’aŋɔ la ma’a ka seke mɛ la ge nyaa basɛ ti ba ku Uria! (2 Sa. 11:2-15) Bem ti David yuun ti’isa? A yuun ti’isɛ ti Yehowa kan nyɛ en? Buraa wa n yuun de Yehowa yameŋa la, yuun tum la punya’anɛ ti wuŋerɛ yuun paɛ en. Pupeelum la dela, David yuun sakɛ ti a tue mɛ ge nyaa tee. Bisɛ a puurɛ n yuun pee se’em la Yehowa n yuun le zu’usɛ en la!​—2 Sa. 12:7-13.

w19.09-E 17 ¶15

Kɔ’ɔn Gã’ata Tiŋa Bɔ’ɔra Yehowa​​—Beni Zuo La Sore Kani Poan?

Yehowa yuun ka loe David ti a dɛna la a yizuo ma’a nɛŋadaana ge a me yuun dela Israel tiŋa la za’a nɛŋadaana. David n yuun de naba la basɛ ti a tara la kpe’eŋo zo’e zo’e. Saŋa ase’a, a yuun ni dekɛ a paŋa wa eŋɛ la yelese’a n ka nari ti la dɛna tuure paa. (2 Sa. 11:14, 15) Ge a yuun ni sirege amea mɛ ge sakɛ Yehowa tubedɔlegerɛ. David yuun ni zusɛ Yehowa mɛ, yele en sɛla woo n boi a suuren. A yuun tiregeri mɛ ti a nana Yehowa ka’aŋɔ la. (Ym. 51:1-4) Leyɛ’ɛsa, a yuun tari la siregɛ n mea nana ka’aŋɔ woo n ani soŋa daɣɛ la buraasi ma’a zɛ’an ge la pɔɣesi me. (1 Sa. 19:11, 12; 25:32, 33) David yuun nyɔɣɛ yɛm mɛ a tuure la poan ge me kɔ’ɔn basɛ ti a puti’irɛ bɔna la Yehowa pu’usegɔ poan.

w18.06-E 17 ¶7

Basɛ Ti Naayinɛ Kisa La A Naresum Yɛla La Kumesɛ Ho Putɛkeeŋa La

Pupeelum la dela, la ka nari ti to nyɔsegɛ Naayinɛ lɔɔ la ti daaŋɔ paɛ tɔ ge to nyaa nyɔɣɛ yɛm. To ta’an zamesɛ baŋɛ basɛba n yuun tue se’em Naayinɛ yetɔɣum la poan. Magaha 1:5 yeti: “Yɛmdaana keleseri mɛ ge baŋera yɛla pa’asa.” Yelemɛŋɛrɛ, to wan nyɛ pa’alegɔ n di mi’a la Naayinɛ zɛ’an to san kaala ge ti’isa taɣesa Baabule poan nɛreba yɛla. Makerɛ, ti’isɛ bisɛ wuŋerɛ n yuun paɛ Naba David se’em la eŋa n yuun ka nam Yehowa nɔɔrɛ ge tum pɔɣedisa’aŋɔ la Bat-seba la. (2 Sa. 12:7-14) To san kaala ge ti’isa taɣesa yele wa, to ta’an soke tomea yeti: ‘Naba David yuun wan eŋɛ ni la bem ta’an gu amea la susa’aŋɔ yele wa ti a yuun tum pɔɣedisa’aŋɔ la Bat-seba la? Gurebisɛ kaŋa taaba san paɛ mam, mam wan ta’an zaɣesɛ dɛ? Mam wan zɔ wuu Yosef bii mam wan eŋɛ wuu David?’ (Pin. 39:11-15) To san ti’isa be’em n wan basɛ ti wuŋerɛ paɛ to se’em la, la wan basɛ ti to lu to suure kankaŋi “yaɛ be’em.”

Vo’osum Poan Yɛla

it-1-E 590 ¶1

David

Yehowa yuun nyɛ mɛ ge me basɛ ti yelese’a woo n yuun eŋɛ la lilige. Yehowa yuun san basɛ ni ti nɛreba gãkɛ ni David la Bat-seba yele la wuu Moses Lɔɔ la n pa’alɛ se’em la, ba wan ku ni tuunfɛ’ɛsadoma bayi la za’a hali la bisɛka ti ba nan ka dɔɣɛ la. (Tɛ 5:18; 22:22) Ge Yehowa mɛŋa n yuun bisɛ yele la ge zɔ David nimbɔ̃’ɔ Na’am nɔbiŋere la zuo (2Sa 7:11-16), David mɛŋa n yuun zɔ nɛreba nimbɔ̃’ɔ la zuo (1Sa 24:4-7; dekɛ makɛ Yam 2:13) la Yehowa me n yuun nyɛ ba tee se’em la. (Ym 51:1-4) Ge ba yuun ka piɛ tubedɔlegerɛ la za’a. Yehowa yuun doose la nɔdɛ’ɛsa Natan poan yeti: “N wan basɛ ti daaŋɔ paɛ hɔ homea yire poan.”​—2Sa 12:1-12.

JUNE 20-26

NAAYINƐ TUULUM YƐLA | 2 SAMUEL 13-14

“Amnon N Yuun Ti’iseri A Ma’a Yele La Yuun Basɛ Ti Yele N Paɛ En”

it-1-E 32

Absalom

Amnon kum la. Absalom tã Tamar n yuun som se’em la zuo ti a suɔ Amnon suure yuun kɛ̃ en la. Amnon yuun parum ti eŋa bɛ̃’ɛri mɛ ge basɛ ti Tamar wa’an a yire na dɔɣɛ bo en ti a pɛregɛ en ga’arɛ. Amnon n yuun nɔŋɛ Tamar la yuun nyaa tee dɛna la diŋo ti a sa’ɛ en ti a yese. Tamar yuun aasum a saloo la n pa’alɛ ti a dela naba poyɔa n ka mi buraa la mɛ ge nyaa vaɛ tampɛɣelum yeele a zuo ti Absalom ta seke en. Absalom yuun zɛɛ yele la mɛ kalam ge yeti eŋa puɣum siisum baŋɛ ti Amnon tari la konkoma’asum la a tã la. Absalom yuun yele a tã la ti a da yele nɛra sɛsɛla ge tari en kule.​—2Sa 13:1-20.

w17.09-E 5 ¶11

Tara Nyɔkɛ N Mea

Baabule la pa’alɛ la nɛreba basɛba n yuun ka nyɔkɛ bamea ga’aregɔ yɛla poan. La me kelum pa’ala la susa’aŋɔ yelese’a n wan paɛ tɔ to san ka nyɔkera tomea. Kim yele la san paɛ nɛra, la wan ana soŋa ti a ti’isɛ taɣesɛ yɛmpɔ’ɔrɛ budibila la yele n boi Magaha 7 la. Le ti’isɛ bisɛ Amnon n yuun eŋɛ sɛla la yelese’a n yuun paɛ en. (2 Sa. 13:1, 2, 10-15, 28-32) Dɔɣereba ta’an doose deodoma pu’usegɔ poan dekɛ Baabule gulesegɔ wa ti to nan tɔɣɛ wa soŋɛ ba kɔma ti ba tara yɛm ta’an nyɔkera bamea ga’aregɔ yɛla poan.

it-1-E 33 ¶1

Absalom

Yuuma ayi n tole. La yuun dela piisi siire saŋa n de pupeelum saŋa ti Absalom yuun beem naba dayɔɔsi la, la David mea ti ba wa’ana di ge dɛ’ɛm Baal-hazor tiŋa n zaɛ wuu km 22 (mɛɛla 14) bɔna Yerusalem NNE bɔba la. A sɔ n yuun yeti eŋa kan nyaŋɛ keŋɛ la, Absalom yuun belege en mɛ ti a basɛ ti a bikeema Amnon tee soe a na’arɛ keŋɛ. (Mag 10:18) De’eŋo la poan la, Amnon n yuun “nyu daam ti a puurɛ pee la,” Absalom yuun yele a yamesi la ti ba ku en. Naba dayɔɔsi bana la yuun zɔ lebe la Yerusalem ge Absalom yuun zɔ keŋɛ la a sɔyaaba n de Syria buraa zɛ’an n boi Gesur sɔ’ɔlum la n boi Galilee Mɔɣerɛ la E bɔba la. (2Sa 13:23-38) “Su’a” la ti nɔdɛ’ɛsa Natan yuun tɔɣɛ de yele la yuun nyaa kɛ̃ David “yire mɛ” ge me wan yee bim a vom dabesa poan.​—2Sa 12:10.

Vo’osum Poan Yɛla

g04-E 12/22 8-9

Som Sɛka Yele N Pakɛ Gana Za’a

To dekɛ David Dayɔɔsi ayima n de Absalom eŋɛ makerɛ. Hali la eŋa yuun som la za’a, a yuun tari la halibe’ero. Baabule la tɔɣɛ a yele yeti: “Nananawa Israel za’a waabi poan buraa yuun ka boi ti a soŋa niɛ wuu Absalom ti ba pɛɣera en. Kɔ’ɔn ze’ele a natala ta paɛ a zuin, a zɛ’an yuun ka gbelege.” (2 Samuel 14:25) Ge Absalom zɛkɛ n mea la yuun basɛ ti a eŋɛ la kpenkpasi la a sɔ ti a fã na’am la. Hali a yuun ga’arɛ a sɔ pɔɣebɔ’ɔresi mɛ. Bala zuo la Naayinɛ sunsɔa yuun nyie Absalom mɛ ti a ki nimbaalega kum.​—2 Samuel 15:10-14; 16:13-22; 17:14; 18:9, 15.

Hon suure kɛ̃ Absalom mɛ yoi? Aayi. A yuun dela nɛreyaalega la sɛla woo ti a yuun eŋɛ la. Eŋa n yuun som se’em la yuun ka ta’an suɣɛ a zɛkɛ n mea halɛ la, la a nigum nigum tuuma la, kan bem ti la ta’an gu ti sa’aŋɔ da paɛ en. Ge Baabule la poan, nɛreba zo’e zo’e yuun boi mɛ tara yɛm la halesoma ge ba ka tɔɣɛ ba soŋa yele. La niɛ peelum ti sɛla yele n pakɛ dela suure poan soŋa la.

JUNE 27–JULY 3

NAAYINƐ TUULUM YƐLA | 2 SAMUEL 15-17

“Zɛkɛ N Mea N Yuun Basɛ Ti Absalom Eŋɛ Kpenkpasi”

it-1-E 860

Wɔ̃daana

Diimi Asia tisi poan, wɔ̃daandoma n yuun ni naɛ la naba toroko la kena, soŋera en sɛla woo poan ge me ni maasum mɔɔlɛ ti nɛreba baŋɛ ti naba keni na. (1Sa 8:11) Absalom la Adoniga yuun eŋɛ la bala bamea nɔɔ loe wɔ̃daandoma 50 ti ba bɔna ba toroto la nɛŋa ti la dɛna na’asegɔ ti la ana wuu ba tari buurɔ mɛ la ba eŋɛ kpenkpasi la.​—2Sa 15:1; 1Na 1:5; bisɛ RUNNERS.

w12-E 7/15 13 ¶5

Tuna Bɔ’ɔra Fai Bɔŋa Naayinɛ La

Baabule la poan, nɛreba zo’e zo’e yuun tari halebe’ero mɛ dekɛ sa’am basɛba me. Ba poan ayima dela Absalom, Naba David dayɔa. Absalom yuun dela buraa n som ka tara makerɛ. Ge pooren, wuu Sitaana la, zɛkɛ n mea n yuun basɛ ti a nini tɛ̃ta la a sɔ na’am la, sɛla n daɣɛ a denɛ la. Absalom n yuun boti a fã na’am la zuo, a yuun iti wuu a fabeli Israeldoma la yele mɛ la ge me parum tɔɣera ti nayire la ka fabeli nɛreba yele. Ɛɛ, wuu Kolkpabɛ’a la n yuun eŋɛ se’em Eden gaadin la poan la, Absalom yuun iti wuu eŋa soŋeri la nɛreba la ge tuɣum sa’ana a sɔ la yu’urɛ.​—2 Sa. 15:1-5.   

it-1-E 1083-1084

Hebron

Yuuma fii pooren David dayɔa Absalom yuun lebe la Hebron tiŋa nyaa ta maasena ti a fã a sɔ na’am la ge a yuun ka nyaŋɛ. (2Sa 15:7-10) Daanse’ere Hebron n tabelɛ dɛna Yuda tinkãtɛ la zuo ge me dɛna amea tiŋa la n sɔi ti Absalom yuun maasena ti a fã na’am la bilam la. Pooren, David yaaŋa Naba Arehoboam, yuun malum mɛ Hebron tiŋa mɛ. (2Ye 11:5-10) Babilondoma n yuun sa’am Yuda ge ti Yudadoma la yuun ze’ele yamenɛ poan lebena la, basɛba yuun ta kɛ̃’ɛra la Hebron tiŋa (Kiriat-arba).​—Ne 11:25.

Vo’osum Poan Yɛla

w18.08-E 6 ¶11

Hon Mi Yɛla La Za’a?

Nɛra ta’an parum yele bo to, ti wuŋerɛ paɛ tɔ la nɛreba n ka mi yele la za’a la zuo. Geele Naba David la Mefiboset yele la bisɛ. David yuun eŋɛ la itisoŋɔ bo Mefiboset ti la pa’alɛ ti a bo en la yɛri yɛri, la eŋa n yuun dekɛ a sɔyaaba Saul samanɛ la za’a bo en la. (2 Sa. 9:6, 7) Pooren, David yuun ta wum la Mefiboset yele n daɣɛ yelemɛŋɛrɛ. David yuun ka viisɛ yele la bisɛ ge to’e Mefiboset lɔɣɔrɔ la za’a. (2 Sa. 16:1-4) David n yuun ta sɔsɛ la Mefiboset la, David yuun baŋɛ ti eŋa tue mɛ ge nyaa dekɛ lɔɣɔrɔ la puregerɛ lebese bo Mefiboset. (2 Sa. 19:24-29) David yuun san ma’ɛ ni amea baŋɛ yele la za’a ge ka eŋɛ kãbi kãbi, a yuun kan tum ni ŋmɛlema tuuma wa.