Vom La Na’am Tuuma Zamesegɔ Viisegɔ Gɔŋɔ
© 2025 Watch Tower Bible and Tract Society of Pennsylvania
SEPTEMBER 1-7
NAAYINƐ TUULUM YƐLA MAGAHA 29
Zaɣesɛ Malema Yɛla N Ka Makɛ La Baabule Pa’alegɔ
wp16.06 6, daka
Liligere N Pa’alɛ Sɛba N Boi Saazuo
Kolekpatuuma n basɛ ti dabeem tara nɛreba zo’e zo’e ti la ana wuu ba paɣɛ ba me la. Ba ni dekɛ bamea delum la yelese’a n de wuu bãsi, nutuusi, la sãberɛ ti la gu’ura ba. La ka nari ti ho ita bala. Baabule la basɛ ti to tara suure lua ti: “Na’ayenɛ nini behere mɛ zen’an woo teŋparɛ wa zuo te a te’ele sɛba n dekɛ ba sunya zan’an bo en.” (2 Yelebiŋ’a 16:9) Yehowa Naayinɛ n tari paŋa gana Sitaana la wan gu to, to san dekɛ tomea delum En.
La nari ti ho zamesɛ sɛla ti Yehowa bɔta ge tara tuna tuuma ti a ta’an te’ele ho. Makerɛ, yuun kɔbesɛka n deŋɛ nɛŋa la, Kristakɔma n yuun boi Epesus la yuun laɣesɛ gɔnse’a woo ti ba tara tuna tiimtuuma la mɛ ge nyɔ̃ ba. (Tooma 19:19, 20) Bala mea nɔɔ, ho san bɔta ti Naayinɛ te’ele ho, la nari ti ho sa’am bãsi, nutuusi, sãberɛ, gɔnɔ, la lɔɣese’a woo ti ba tara tuna kolekpatuuma.
w19.04 17 ¶13
Da Dekɛ Homea Pa’asɛ Kuurɛ Malema N Ka Makɛ La Baabule Pa’alegɔ
13 Ho san ka bɔkɛ malema ase’a, zusɛ Yehowa ti a bo ho yɛm ge me tara sakerɛ ti a wan soŋɛ hɔ. (Kaalɛ Yames 1:5.) Eŋɛ viisegɔ tigere la gɔnɔ poan. La san nara, yele ho tansugere keendoma la. Ba kan yele ho hon nari ti ho eŋɛ sɛla ge ba wan pa’alɛ hɔ Baabule naresum yɛla wuu ton sɔseri sɛla wa. Ho san ita yele ana, kumesɛ ho ‘puti’irɛ’ ti la soŋɛ hɔ ti ho ta’an “yɛleha sɛla n an soŋa la sɛla n de be’em.”—Heb. 5:14.
w18.11 11 ¶12
‘Mam Wan Bɔna Ho Yelemɛŋɛrɛ La Poan’
12 Malema yɛla n ka makɛ la Baabule pa’alegɔ. To yidoma, tuuma tadaandoma, la sukuu tadaandoma ta’an tiregera ti to dekɛ tomea pa’asɛ ba malema yɛla poan. Ba san pɛ̃regɛ tɔ ti to dekɛ tomea pa’asɛ malema, la de’eŋo se’a ti Yehowa ka bɔta poan, to wan eŋɛ la wani zaɣesɛ? Sɛla n wan soŋɛ tɔ dela to tɛ̃ra Yehowa n geele yele aŋa se’em. To san viisɛ tigere la gɔnɔ la poan baŋɛ de’eŋo ana n pɔsɛ se’em, la wan soŋɛ tɔ. To san ti’isa taɣesa Baabule la n pa’alɛ sɛla n sɔi ti to ka dekɛ tomea pa’asɛ de’eŋo aŋa poan, la wan basɛ ti to tara suure lua ti to iti la “sɛla n ete [Daana la] suunre nyɛlom.” (Ep. 5:10) To san dekɛ tomea delum Yehowa la a Yelesum la, la wan te’ele to ti to kan zɔta nɛreba “dabeem.”—Mag. 29:25.
Vo’osum Poan Yɛla
w17.10 9 ¶11
‘Basɛ Ti Ya Nɔŋerɛ La Dɛna Yelemɛŋɛrɛ Ya Itigɔ Poan’
11 Yese ho suure poan pɛɣɛ nɛreba. Yɔ’ɔseko woo ti ho nyɛ, pɛɣɛ ba. To za’a mi ti to san pɛɣera taaba, la dela sɛla ‘n ani soŋa ge kpɛmesa giila.’ (Epesus 4:29) Ge la nari ti to bisɛ tomea soŋa ti ton wan yele sɛla la dɛna yelemɛŋɛrɛ ge daɣena pã’asegɔ. San daɣena bala, la wan pa’alɛ ti to pã’aseri la nɛreba bii ton tari yɔ’ɔ ti to ka’am nɛreba la, to ka tari tuna soŋa. (Magaha 29:5) To san pɛɣɛ nɛra ge kaɛ a poore ta zɛregɛ en, la pa’alɛ ti to dela nigum nigumdoma. Tuntuna Paul yuun tari la suure poan nɔŋerɛ. Eŋa n yuun gulesɛ gɔŋɔ bo Korint mabiisi la, a yuun pɛɣɛ ba mɛ la ba tunsoma la. (1 Korint 11:2) Ge se’em ma’a ti la yuun nara ti a ka’am ba la, a yuun ma’ɛ amea mɛ pa’alɛ ba sɛla n sɔi ti la nara ti a eŋɛ bala.—1 Korint 11:20-22.
SEPTEMBER 8-14
NAAYINƐ TUULUM YƐLA MAGAHA 30
‘Da Basɛ Ti N Dɛna Nasa Bii Buntata’
w18.01 24-25 ¶10-12
Nɔŋerɛ Deni N Bo’ori Pupeelum?
10 Yelemɛŋɛrɛ la dela, nɛra woo boti ligeri mɛ se’ere n sɔi la, la wan ta’an gu to yɛla ase’a poan. (Pa. 7:12) Ge nɛra san tara ligeri fii ge nyɛta yelese’a n pakɛ en, bala ma’a wan ta’an basɛ ti a tara pupeelum? Ɛɛ! (Kaalɛ Pa’ala 5:12.) Yake dayua Agur gulesɛ yeti: “Da bahɛ te en dɛna [nasa] bii en dɛna [buntata] ta ba gaŋɛ. Bo mam sɛla n wan sekɛ mam.” To wan ta’an bɔkɛ sɛla n sɔi ti a yuun ka bɔta ti a ba’ɛ dɛna nasa la. A tɔɣɛ pa’alɛ ti a ka boti bala basɛ ti a ta zu, sɛla n sɔi la, la wan sa’am Naayinɛ suure. Ge beni n sɔi ti a yuun zusɛ ti a da ba’ɛ dɛna buntata? A yuun yeti: “Mam [ta’an] tara zo’e gaŋɛ ge ka le mina hɔ, ge yeti, ane n de Na’ayenɛ?’” (Mag. 30:8, 9) Daanse’ere ho mi nɛresɛba n dekɛ bamea delum ba taresum gana Naayinɛ.
11 Sɛba n nɔŋɛ ligeri kan ta’an basɛ ti Naayinɛ puurɛ pee. Yezu yuun yeti: “Nɛra kan ta’an tona bɔ’ɔra kpɛ’ɛndoma bayi. A wan yaɛ ayema ge nɔŋɛ ayema bii a wan bahɛ ayema ge tona bɔ’ɔra ayema la. Ya kan ta’an dɔla Yenɛ la Ligiri zan’an.” Yezu yuun pɔsɛ a yetɔɣum la yeti: “Da dekɛ ya lɔgɔrɔ biŋe teŋa wa zuo bo ya mɛhe te bonmɔgɔla la teŋa zeem wan sagom ba bii nayigehe me wan kɔ kɛn zun. Ge biŋe ya ya lɔgɔrɔ bo ya mehe saazuo ha, zen’an te bonmɔgɔla la teŋa zeem ka nyaŋɛ sagom bii nayigehe ka nyaŋɛ kɔ kɛn zun.”—Mt. 6:19, 20, 24.
12 Nɛreba zo’e zo’e baŋɛ ti ba san basɛ ti ba vom ana naana, la basɛ ti ba tara la pupeelum ge me nyɛta saŋa zo’e zo’e tuna bɔ’ɔra Yehowa. Jack n kɛ̃’ɛri United States yuun koose la a yikãtɛ, la a company, se’ere n sɔi la a yuun mi ti la wan bo en yɔ’ɔ ti a naɛ la a pɔɣa tuna tɛm woo na’am tuuma la. A yeti: “La yuun kpe’em mɛ ti to koose to yisonɛ, la to tuuma. Yuunse’a n tole la, tuuma yɛla zuo mam ni ta paara yire la ti n ani la bura. Mam pɔɣa n de tɛm woo sore ŋmɛ’adaana la yuun ni tara la pupeelum saŋa woo. A yuun ni yeti, ‘Mam tuni bɔ’ɔra la Yehowa!’ Nananawa ti mam me tuna tɛm woo na’am tuuma la, tomam toyi la za’a tuni bɔ’ɔra la Yehowa.”
w87 5/15 30 ¶8
Ho San Zɔta Yehowa Ho Wan Tara Pupeelum
◆ 30:15, 16—Maɣesa wa vuurɛ?
Maɣesa wa pa’alɛ la nɛra n bɛ n ka malum tiɣera se’em. Wuu dindiirɔ n nyuuri ziim ge ka tiɣera se’em la, bala mea nɔɔ ti nɛra n bɛ ni kɔ’ɔn bɔta ligeri bii kpe’eŋo. Yɔɔ ka malum tiɣera la kum ti kondɔɣerɛ ‘kaasera’ ɛɛra kɔma. (Pin’ileŋɔ 30:1) Saa san puɣum ni la se’em me warɛ saŋa, tiŋa la ni kelum ku’ɛ mɛ. Bugum ka diti gãsera. Nɛra n bɛ ani la bala. Ge sɛba n tari Naayinɛ puti’irɛ ka ti’iseri ba ma’a yele.
w11 6/1 10 ¶4
Hon Wan Eŋɛ Se’em Basɛ Ti Ho Vom Makɛ La Hon Tari Sɛla
Laɣesɛ ligeri ge nyaa da sɛla. Nɛreba basɛba ta’an ti’isa ti la ka le nara ti ho laɣesɛ ligeri ge nyaa da sɛla. Ge la ani soŋa ti ho laɣesɛ ligeri ge nyaa da sɛla se’ere n sɔi la, la wan gu ho sama poan. La me wan gu ho ti ho kan da sɛla ge ta yɔ dɔɣelega. Baabule la pa’alɛ ti guure tari la “yam” se’ere n sɔi la ba ni “gbɛ’ɛra ba dia dia kɛ’a saŋa kɛn’ɛra” gura beere sa’am.—Magaha 6:6-8; 30:24, 25.
Kelum Dɛna Yehowa Saana Wuusa!
18 La wan ana soŋa ti to viisɛ tomea bisɛ to puti’irɛ n de se’em ligeri yɛla poan. Soke homea yeti: ‘Saŋa woo mam ni kɔ’ɔn ti’isa la ligeri yele la mam wan da sɛla? Mam san peŋe ligeri, mam ni gu’una mɛ ka bɔta ti n yɔ ge ti’isa ti nɛra la ka eeri ligeri la kalam? Mam n tari ligeri la basɛ ti mam ba’ɛ bisɛ nam la n mea ge ka bɔ’ɔra yɛri yɛri? Mam ni ti’isa ti mabisɛba n tari ligeri la taresum la ka nɔŋɛ Yehowa? Buntateba n de mam zɔdoma?’ La dela yɔ’ɔ kãtɛ ti to dɛna Yehowa saama. To san ka nɔŋɛ ligeri, to wan ta’an kelum dɛna a saama. To san ita bala, Yehowa kan malum zaɣesɛ tɔ!—Kaalɛ Hebru 13:5.
Vo’osum Poan Yɛla
w09 4/15 17 ¶11-13
Naaŋɔ Lɔɣɔrɔ N Basɛ Ti To Baŋɛ Yehowa Yɛm
11 Saalɛ dela duŋa n pɔ’ɛ ge to wan ta’an zamesɛ ninmɔ’ɔrɛ yɛla a zɛ’an. (Kaalɛ Magaha 30:26.) A wɔ̃ni la sɔ’ɔŋa n kãregɛ ge a tuba ani la gira, la kilega ge ti a nama me ana gira. Duŋa wa n pɔ’ɛ wa kɛ̃’ɛri la tasi poan. Saalɛ nini n nyɛti soŋa la gu’uri en mɛ. Yoɣero n boi tasi la poan la me gu’uri en mɛ ti dusi kan ta’an nyɔkɛ en obe. Naayinɛ n naam saalɛ se’em ti ba naɛ taaba bɔna la gu’uri ba mɛ ge ti ɔɔrɔ me ka kɛ̃’ɛra ba.
12 To wan ta’an zamesɛ la bem saalɛ zɛ’an? Yia, daalɛ basɛ ti a ni bisɛ la amea soŋa ti dɛŋa da paɛ en. A nini la n nyɛti zãara la zuo, a ni nyɛ dunse’a n wan ta’an nyɔkɛ en obe la mɛ. A me ni lɛm la zɛ’an ti yoɣero bɔna lan wan eŋɛ se’em ti a ta’an zɔ suɣɛ bim ge fãɛ amea basɛ. Bala mea nɔɔ ti la nara ti tomam me bisera yɛla soŋa ta’an baŋɛ dɛŋa se’a n boi Sitaana tingɔŋɔ wa poan. Tuntuna Peter ka’am Kristakɔma yeti: “De ya sɛba n wan maahom ya mɛhe, ge me tara ya mɛhe soŋa soŋa. Te ya diŋdaana se’em n de Sagona la eere kaara mɛ wo gbegenɛ n nyɛ nɛreba tanha te a ko se’em la.” (1 Pe. 5:8) Yezu n yuun boi tingɔŋɔ wa zuo la, a yuun kɔ’ɔn pigera mɛ ti Sitaana ka nyaŋɛ sa’am a birikinte la. (Mt. 4:1-11) Yezu eŋɛ la makesonɛ bo a podɔleba!
13 Sore deyima ti to wan ta’an pigera dela to kumesa tomea vo’osum poan ti Yehowa ta’an te’ele to. La nari ti to kɔ’ɔn zamesa Baabule la ge kena tansugere zamesegɔ. (Lu. 4:4; Heb. 10:24, 25) Leyɛ’ɛsa, wuu saalɛ n ni naɛ la a taaba bɔna ti la ana soŋa se’em la, bala mea nɔɔ ti to san ana tapilapi la to mabiisi, la wan basɛ ti to ‘kpɛmesa taaba giila.’ (Arom 1:12) To san ita yelese’a n wan basɛ ti Yehowa gu’ura tɔ, la pa’alɛ ti to sakɛ yoomadaana David n yuun yele sɛla la. A yuun yeti: “Na’ayenɛ de mam taŋa la mam soka zen’an la mam faanra. Mam Yenɛ de mam taŋa, mam soka zen’an.”—Ym. 18:2.
SEPTEMBER 15-21
NAAYINƐ TUULUM YƐLA MAGAHA 31
Ton Zamesɛ Sɛla, La Ma N Ka’am A Bia Se’em
w11 2/1 19 ¶7-8
Pa’ala Ho Kɔma Ban Wan Tara Sarensoŋɔ Se’em
Tɔɣɛ gã’aregɔ yele bo ho kɔma. Ka’aŋɔ ani soŋa mɛ. (1 Korint 6:18; Yames 1:14, 15) Ge Baabule la pa’alɛ ti gã’aregɔ dela bo’olum n ze’ele Naayinɛ zɛ’an na ge daɣɛ Sitaana bɛ̃regɔ. (Magaha 5:18, 19; Solomon Gɔŋɔ 1:2) Ho san yele ho kɔma dɛŋa se’a n boi gã’aregɔ yɛla poan ma’a, la ta’an basɛ ti ba ti’isa ti Baabule la tɔɣɛ giisɛ de mɛ. Pugela ayima n boi France ti a yu’urɛ dɛna Corrina yeti, “Mam dɔɣereba yuun ni kɔ’ɔn tɔɣera la yalumtuuma n ka ani soŋa se’em. Bala yuun basɛ ti mam ti’isa ti gã’aregɔ ka ani soŋa.”
Tɔɣɛ gã’aregɔ yɛla za’a pa’alɛ ho kɔma. Pɔka ayima n boi Mexico ti a yu’urɛ dɛna Nadia yeti, “Sɛla ti mam kɔ’ɔn yɛta n kɔma la dela, gã’aregɔ ani soŋa mɛ ge ti Yehowa dekɛ bo nɛresaaleba ti ba puurɛ pee. Ge la nari ti la dɛna la pɔɣedire poan ma’a. Ton wan dekɛ tum tuuma se’em la ta’an basɛ ti to puurɛ pee bii to suure sa’am.”
ijwhf zaseŋɔ 4 ¶11-13
Tɔɣɛ Daam Yele Bo Ho Kɔma
Deŋɛ nɛŋa tɔɣɛ de yele bo bia la. Mabia ayima n boi Britain ti a yu’urɛ dɛna Mark yeti, “Kɔma ta’an kan mina daam n ani se’em. Mam yuun soke n bia n de yuuma anii nyaa la ani soŋa ti ho nyu daam bii la ka ani soŋa? Mam n yuun ka yi en ti n yeen soke en yɛla la, yuun basɛ ti a tɔɣɛ la sɛla n boi a suuren.”
Ho san tɔɣera daam yele tabela bɔ’ɔra ho kɔma, la wan soŋɛ ba. Bisɛ ho bia la yuuma n zuni se’em ge naɛ la en sɔsɛ daam n wan ta’an basɛ ti daaŋɔ se’a paɛ en. Basɛ ti a baŋɛ ti a san nyu daam ge tukera loore, a ta’an nyɛ accident bii a san nyu daam, la ta’an basɛ ti a ta tum yalumtuuma.
Eŋɛ makesonɛ bo en. Kɔma ani wuu sosoo ti ho ni dekɛ basɛ ko’om poan ti la nyu se’em la. Ba ni tɔɣesa la nɛresɛba n naɛ la ba bɔna. Ba viisɛ baŋɛ ti kɔma ni tɔɣesa la ba dɔɣereba paa. Wana pa’alɛ ti putɛyiila san tara hɔ ti ho nyu daam, ho bia la me ta’an ti’isa ti putɛyiila san tara en, la nari ti a me nyu daam. Bala la, eŋɛ makesonɛ bo en. Bisɛ homea soŋa daam nyua poan.
g17.6 9 ¶5
Pa’ala Ho Kɔma Ti Ba Siregera Bamea
Kpemese ho bia giila ti a bɔ’ɔra. Basɛ ti ho bia la baŋɛ ti “se’emdaana n bo’ore nɛreba tare popeelom zo’e zo’e nyana se’emdaana n kɔ’ɔn bɔta te a tɔ’ɔha nɛreba zen’en.” (Tm. 20:35) Wani wani? Ho ta’an naɛ la ho bia la gulesɛ nɛresɛba n eeri soŋerɛ yu’ura maɣesɛ wuu sɛba n de ho di da’a bo ba, dekɛ ba keŋɛ zɛ’an bii maalɛ ba lɔkɔ n sa’am bo ba. Basɛ ti ho bia la dɔla hɔ se’em ma’a ti ho soŋera nɛreba la. Basɛ ti ho bia la baŋɛ ho puurɛ n pee se’em la hon soŋɛ sɛba n eeri soŋerɛ la. Bala wan pa’alɛ ti ho tari la ho makesonɛ pa’ala ho bia la eŋa n wan siregera amea se’em.—Baabule naresum yele: Lu. 6:38.
Vo’osum Poan Yɛla
w23 05 22¶6
Basɛ Ti ‘Yehowa Bugum Zɛleŋa La’ Dita
6 Mary yuun tari la bɔnsoŋa la Yehowa. A sakerɛ la yuun kpe’em mɛ. A yuun mi Baabule yɛla mɛ soŋa. (Bisɛ Luke 1:46 zamesegɔ yelesum la.) A me yuun tari saŋa mɛ ti’isa taɣesa sɛla ti a zamesa la. (Lu. 2:19, 51) Nɔkpe’eni kai ti Mary n yuun bĩ vo’osum poan la n sɔi ti a dɛna pɔɣesonkɔ la. Zina beere wa, pɔɣeba zo’e zo’e kɔ’ɔn tiregera mɛ ti ba tɔɣesa Mary. Makerɛ, mabipɔka ayima yu’urɛ n de Emiko yeti: “Mam n yuun de nɛreyone la, mam yuun nyɛti nɛŋa zamesa mɛ soŋa. Ge mam yuun ta ele la, mam yuun baŋɛ ti mam sira n ni zusa bɔ’ɔra tɔ ge me basɛ ti to ita to deodoma pu’usegɔ. Mam nyaa yuun dekɛ la n mea delum en ge ka ita n mea zamesegɔ. Mam yuun nyaa baŋɛ ti la dela mam mea tara bɔnsoŋa la Yehowa. Bala la, mam ni ɛ la saŋa zusera Naayinɛ, kaala Baabule la ge ti’isa taɣesa a yelesum la.” (Ga. 6:5) Pɔɣeba, ya san kelum basɛ ti yamam la Yehowa bɔŋa la kpe’em ya sireba wan pɛɣɛ ya ge tara nɔŋerɛ bɔ’ɔra ya.—Maga. 31:30.
SEPTEMBER 22-28
NAAYINƐ TUULUM YƐLA PA’ALA 1-2
Kɔ’ɔn Kumesa Dɔɣepa’asɛ Sɛka N Taɣelɛ La
w17.01 27-28 ¶3-4
“Behɛ Sɛba N De Yelemɛŋɛrɛdoma, La Ho Pa’alɛ Ba”
3 To zo’e zo’e nɔŋɛ tunse’a ti to tuna la mɛ ge bɔta ti to tuna dɛ wuusa. Ge nimbaalega la dela, kɔ’ɔn pɔsɛ Adam saŋa ta paɛ zina, nɛreba kuregeri mɛ ge kiira, ti ba me dɔɣera basɛba. (Pa. 1:4) Wana basɛ ti yɛla kpe’em mɛ bo yelemɛŋɛrɛ Kristakɔma. Tunse’a ti Yehowa nɛreba tuna la kɔ’ɔn yalegera mɛ pa’asa. Wana zuo la, la yele pakɛ mɛ ti to tara elektronik lɔɣɔrɔ tuna tuuma. Ba me kɔ’ɔn tɛɛra lɔɣɔrɔ wa mɛ. La ta’an kpe’em bo sɛba n kuregɛ la ti ba tara elektronik lɔɣɔrɔ wa tuna tuuma. (Lu. 5:39) Ba san puɣum mina ban tari lɔɣɔrɔ wa tuna tuuma se’em, bunbilipaalesi tari paŋa gana ba mɛ. (Mag. 20:29) Bala, la nari ti sɛba n kuregɛ la kumesɛ bunbilipaalesi ge bo ba tuuma. Bala wan pa’alɛ ti ba nɔŋɛ ba mɛ.—Kaalɛ Yooma 71:18.
4 Saŋa ase’a, la ta’an kpe’em bo sɛba n tari yɔ’ɔ tuna tansugere la poan ti ba bo bunbilipaalesi la tuunɛ. Basɛba zoti la dabeem ti yɔ’ɔ sɛka ti ba tara la wan piɛ ba. Basɛba me ti’isɛ ti bunbilipaalesi la ta’an kan tum tuunɛ la wuu bamam la. Basɛba me ti’isɛ ti bamam ka tari nɛŋa n wan kumesɛ ba. Bala mea ti la nara ti bunbilipaalesi di’isa suure ba san nan ka bo ba tuunɛ.
Vo’osum Poan Yɛla
Baabule La N Tɔɣɛ Tuuma La Ligeri Yɛla Se’em
Naayinɛ boti la to tara pupeelum to tuuma poan. Baabule la yeti “sɛla ka boi n ani soŋa bɔ’ɔra nɛra gana ti a . . . tara pupeelum a tuun kpe’eŋo la poan.” (Pa’ala 2:24) Yehowa tuni mɛ paa. To san tɔɣesa en ge yee inya tuna a puurɛ wan pee mɛ, ti tomam me suure sukɛ.
Tuuma dela ninmɔ’ɔrɛ yele. Ge to kan malum basɛ ti to tuuma yele pakɛ tɔ gana Yehowa pu’usegɔ. (Yon 6:27) A biŋe nɔɔrɛ ti to san dekɛ eŋa yɛla deŋɛ nɛŋa to vom poan a me wan bisera tɔ inganɛ poan.
SEPTEMBER 29–OCTOBER 5
NAAYINƐ TUULUM YƐLA PA’ALA 3-4
Basɛ Ti Ho Pɔɣedire Ana Kankaŋi
ijwhf zaseŋɔ 10 ¶2-8
Hon Wan Tara Elektronik Lɔɣɔrɔ Tuna Se’em
● Ho san tara elektronik lɔɣɔrɔ tuna soŋa, la wan basɛ ti ho pɔɣedire ana soŋa. Makerɛ, sireba la pɔɣeba basɛba ni tara elektronik lɔɣɔrɔ sɔsera la taaba ba san ka bɔna yire.
“Ho san ni tɛɣesi ho pɔɣa bii ho sira ti ‘Mam nɔŋɛ ho mɛ’ bii ‘Mam miss ho mɛ,’ la ni ana la soŋa.”—Jonathan.
● Ho san ka tara elektronik lɔɣɔrɔ tuna soŋa, la wan ta’an basɛ ti ho pɔɣedire sa’am. Makerɛ, nɛreba basɛba ni kɔ’ɔn di’isa la ba fon saŋa woo. Bala ni basɛ ti ba ka nyɛta nɛŋa bɔ’ɔra ba luɣerɛ kpɛ’ɛsi.
“Mam mi ti saŋa ase’a mam sira ta’an ni bɔta ti a sɔsɛ la mam mɛ ge mam n ni di’isa n fon la zuo a ni ka ta’an eŋɛ bala.”—Julissa.
● Nɛreba basɛba yeti, bamam wan ta’an naɛ la ba luɣerɛ kpɛ’ɛsi sɔsera soŋa ge kelum tɛɣesera. Sherry Turkle n zamesɛ nɛreba yɛla yeti, “la daɣɛ yelemɛŋɛrɛ ti nɛra wan ta’an dekɛ yɛla tã taaba tum.” La niɛ peelumi ti nɛreba n ti’iseri ti ba wan ta’an dekɛ yɛla tã taaba tum la daɣɛ yelesonɛ. A le yeti, “ho san dekɛ yɛla tã taaba tuna, ba se’em sa’am ka boi ti ho wan nyaŋɛ tum de soŋa.”
“Mam la mam sira san sɔsera, mam puurɛ ni pee mɛ ge to san sɔsera ti a kelum di’isa fon bii ita yɛla ase’a, mam puurɛ ni ka pee. Wana ni basɛ ti la ana mam wuu mam yele ka pakɛ me la.”—Sarah.
Yelekpine: Hon tari elektronik lɔɣɔrɔ tuna se’em la ta’an basɛ ti ho pɔɣedire ana soŋa bii la sa’am.
Basɛ Ti ‘Yehowa Bugum Zɛleŋa La’ Dita
12 Nɛra la a pɔɣa wan eŋɛ la wani ta’an tɔɣesa Akpela la Priska? Ti’isɛ bisɛ yelese’a ti hon la ho pɔɣa wan ta’an tum. Tuuma ase’a boi ti hon la ho pɔɣa wan ta’an laɣum tum? Makerɛ, Akpela la Priska yuun ni naɛ taaba mɛ mɔɔla. Hon la ho luɣerɛ kpɛ’a iti bala saŋa woo? Akpela la Priska yuun le naɛ taaba tuna mɛ. La ta’an dɛna ti hon la ho pɔɣa ka tuni tuun yinɛ ge ya wan ta’an naɛ taaba tuna yire tuuma? (Pa. 4:9) Ya san soŋɛ taaba tum tuunɛ, la basɛ ti ya tara la nɔyinɛ. Ya me ta’an ni dekɛ yɔ’ɔ kaŋa sɔsa. Robert n di Linda la gaŋɛ yuun 50. A yeti: “Yelemɛŋɛrɛ, to ka nyɛti saŋa zo’e zo’e sɔsera ge dɛ’ɛna. Ge mam san pɛɛra laasi, to ni kɔ’ɔn sɔsa mɛ, mam me san bɔna to gaadin la poan kɔɔra ti a ni wa’ana soŋera mam, mam puurɛ ni pee mɛ. To san naɛ taaba tuna to tari nɔyinɛ mɛ. To nɔŋerɛ la me ni kɔ’ɔn zɔ’ɔra mɛ pa’asa.”
13 Ge tɛ̃ra ti nɛra la a pɔɣa san naɛ taaba tuna la ka pa’alɛ ti ba tari nɔyinɛ mɛ. Mabipɔka ayima n boi Brazil yeti: “Nananawa ti yɛla zo’e zo’e bɔna ti ho wan nyaŋɛ ita la, la ka kpe’em ti to ti’isa ti ton naɛ taaba bɔna yire ayina poan la zuo, to sɔseri mɛ n bala. Mam baŋɛ ti ton yeen naɛ taaba bɔna la ma’a ka seke. La nari ti to nyɛta nɛŋa bɔ’ɔra taaba soŋa soŋa.” Bisɛ Bruno la a pɔɣa Tays n tiregɛ nyɛta nɛŋa bɔ’ɔra taaba soŋa soŋa se’em. A yeti: “To san ni nyɛ nɛŋa ti to zi’ire sɔsɛ, to ni dekɛ to fondoma la biŋe la kinkɛleŋa ge sɔsa la pupeelum.”
14 La ta’an dɛna ti ya puti’irɛ boi la to’ore to’ore bii daanse’ere ya sɔsega kɔ’ɔn dɛna la zaberɛ. La san dɛna bala, ho wan eŋɛ la wani? Geele bugum sebo ti to puɣum tɔɣɛ de yele la bisɛ. La ni kɔ’ɔn ka pɔsɛ mɛ dita zɔ’ɔra. La wan nara ti ho dekɛ buntuuta pa’asɛ bim ti la nyaŋɛ dita zɔ’ɔra. Bala la, ya ta’an pɔsɛ nyɛta nɛŋa fii bɔ’ɔra taaba dabeserɛ woo poan. Ni bisɛ ya tuunse’a ti ya wan tuna la pupeelum ge daɣɛ tuunse’a n wan basɛ ti ya ŋmɛ nɔkpe’ene. (Yam. 3:18) Ya san ita bala, fii fii ya wan nyɛ ti nɔŋerɛ sɛka ti ya tara bɔ’ɔra taaba la wan kpe’em.
Basɛ Ti ‘Yehowa Bugum Zɛleŋa La’ Dita
3 Nɛra la a pɔɣa san bɔta ti ba basɛ ti ‘Yehowa bugum zɛleŋa la’ kɔ’ɔn dita, la nari ti ba tara bɔnsoŋa la Yehowa. Bɔnsoŋa wa wan soŋɛ ba pɔɣedire la wani? Nɛra la a pɔɣa san tara bɔnsoŋa la ba saazuo Sɔ la, ba wan eŋɛ kalam dekɛ a ka’aŋɔ la tum tuuma. Bala wan soŋɛ ba ti ba ta’an maalɛ yelese’a n wan ta’an sa’am ba nɔŋerɛ la. (Kaalɛ Pa’ala 4:12.) Sɛba n tari bɔnsoŋa la Yehowa la tiregeri mɛ tɔɣesa en ge me tara a hala la n de wuu itisoŋɔ, sugeri la sudi’isego tuna tuuma. (Epe. 4:32–5:1) Nɛra la a pɔɣa san tara hala ana, la wan basɛ ti nɔŋerɛ bɔna. Mabipɔka ayima yu’urɛ n de Lena n ele ti la gaŋɛ yuun 25 yeti, “La dela naana ti ho tara nɔŋerɛ la gilema bɔ’ɔra nɛra n bĩ vo’osum poan.”
Vo’osum Poan Yɛla
it “Nɔŋerɛ” ¶39
Nɔŋerɛ
“Nɔŋerɛ saŋa.” Yehowa ka nɔŋɛ sɛba ti a bisɛ ti ba ka nari bii sɛba n kɔ’ɔn tuna be’em la. Naayinɛ nɔŋɛ nɛra woo mɛ san daɣena ba eŋɛ pa’alɛ ti ba yaɛ en. Sankaŋa ti Naayinɛ nyaa ni ka le nɔŋɛ ba. Yehowa Naayinɛ la Yezu Krista nɔŋɛ la tontɔɔ tuuma ge yaɛ putotuuma. (Ym 45:7; Heb 1:9) La ka nari ti to nɔŋɛ sɛba n kɔ’ɔn mina fii ge yaɛ yelemɛŋɛrɛ Naayinɛ la. Yelemɛŋɛrɛ la dela, nyuurɔ kan bɔna bim to san nɔŋɛ nɛresɛba n yaɛ Naayinɛ la, se’ere n sɔi la bala puɣum kan basɛ ti ba tee. (Ym 139:21, 22; Isa 26:10) Bala zuo, Naayinɛ yaɛ ba mɛ ge tara saŋa ti a wan sa’am ba.—Ym 21:8, 9; Pa 3:1, 8.
OCTOBER 6-12
NAAYINƐ TUULUM YƐLA PA’ALA 5-6
Ton Iti Se’em Pa’ala Ti To Tari Gilema Zo’e Zo’e Bɔ’ɔra To Naayinɛ La
w08 8/15 15-16 ¶17-18
Na’asa Yehowa Ti La Pa’alɛ Ti Ho Bo’ori En Gilema
17 La nari ti to tara gilema n boi de to’ore bɔ’ɔra Yehowa to san pu’usa en. Pa’ala 5:1 yeti, “Ho han wa’an Yenɛ yire na sigehe ho mɛŋa.” Yehowa yuun yele Moses la Yosua ti ba pirege ba taɣera ban yuun boi zilam zɛ’an la. (Yɛh. 3:5; Yos. 5:15) Ba yuun eŋɛ wana wa pa’alɛ ti ba tari la gilema bɔ’ɔra Naayinɛ. Israel malemadoma la yuun nari ti ba sɛɣelɛ la kuregeresi “te ba [da ze’a beele].” (Yɛh. 28:42, 43) Wana wan basɛ ti ba kan ze’a beele ba san kaabera. Malemadoma yizuo la poan nɛra woo yuun nari ti a dɔla Yehowa n pa’alɛ sɛla la, ti la pa’alɛ ti ba bo’ori en gilema.
18 Bala la, la nari ti to na’asa Yehowa ti la pa’alɛ ti to bo’ori en gilema. Nɛreba san wan bɔ’ɔra to gilema, la nari ti to bɔ’ɔra gilema. La ka nari ti to yeen ita wuu to bo’ori la gilema la bii to bisɛ nɛra n yɛ a lɔɣɔrɔ se’em ge nyaa bo en gilema. La daɣɛ nɛreba yeen baŋɛ ti to bo’ori gilema ge la nari ti la ze’ele la to suuren. (1 Sa. 16:7; Mag. 21:2) La nari ti to halɛ, to itigɔ la tomam la nɛreba bɔŋa pa’alɛ ti to bo’ori gilema. Hali, ton geele tomea se’em nari ti la pa’alɛ ti to bo’ori gilema. Yelemɛŋɛrɛ la dela, la nari ti la niɛ peelumi to yetɔɣum la to itigɔ poan ti to bo’ori gilema saŋa woo. To tari tuntuna Paul n yuun yele sɛla la tuna tuuma to sareŋɔ, to itigɔ, la ton yɛɛri to lɔɣɔrɔ ge maala tomea se’em. A yuun yeti: “To ka bote se’em ta yeti enŋa nyɛ tuure to toonɛ wa poan. Bala, to zegere mɛ te to da eŋɛ yelese’ere n wan dɛna daaŋɔ bo se’em. Ge te ton wan eŋɛ se’em dela la sɛla woo te to eta, to bote to pa’alɛ mɛ te to dela Na’ayenɛ yamehe.” (2 Ko. 6:3, 4) To iti pa’ala ti ‘to Fãara la pa’alegɔ tari la ninpiilum.’—Titus 2:10.
w09 11/15 11 ¶21
Zamesa Baabule La Ta’an Zusa Soŋa Soŋa
21 Yezu zusega yuun pa’alɛ ti a tari la sakerɛ bɔ’ɔra Naayinɛ. Ge ti Yezu isige Lazarus la, a yuun ‘gorege la saazuo yeti, N Sɔ, n po’ohɛ hɔ la hon kelehe mam wa. N pon mina te daarɛ woo ho kelehere mam mɛ.’ (Yon 11:41, 42) Hon zusega pa’alɛ ti hon bo’ori gilema ge me tara sakerɛ wuu Yezu la? Zamesɛ Yezu zusega la baŋɛ ton wan bɔ’ɔra gilema se’em. A zusega la tɔɣeri la ton wan basɛ ti Yehowa yu’urɛ la ana filam, Naayinɛ Na’am la n wan wa’ana, la a puti’irɛ n de sɛla n wan tum tuuma. (Mt. 6:9, 10) Geele homea zusega bisɛ. Hon ni zusa se’em la pa’alɛ ti Yehowa Na’am, a puti’irɛ n de sɛla, la a yu’urɛ la n wan ana filam la yele pakɛ hɔ? Ho zusega nari ti la ana la bala.
w17.04 6 ¶12
‘Hon Biŋe Nɔɔrɛ Se’em La, Tum Dɛ’
12 Ko’om musega nan dela pɔsega. Bala pooren, la nari ti to kɔ’ɔn basɛ ti to vom makɛ la ton kã tomea ti to wan tara yelemɛŋɛrɛ pu’usa Naayinɛ la. Bala la, to ta’an soke tomea yeti: ‘Mam n muse ko’om daarɛ, mam nyɛ nɛŋa tɔlega la wani Yehowa pu’usegɔ poan? Mam kelum pu’usa Yehowa la n suure za’a? (Kol. 3:23) Mam kɔ’ɔn zusa, kaala Baabule la ge kena tansugere zamesegɔ, la na’am mɔɔlegɔ saŋa woo? Bii mam inya ka le kpeŋe ti n kelum ita yele ana wa?’ Tuntuna Peter tɔɣɛ pa’alɛ ti to san ka bɔta ti to ma’ɛ Yehowa pu’usegɔ poan la nari to kɔ’ɔn tara sakerɛ pa’asa to mi’ilum la to ŋmibega poan ge me tuna bɔ’ɔra Naayinɛ.—Kaalɛ 2 Peter 1:5-8.
Vo’osum Poan Yɛla
Nɛra San Eŋɛ Ho Sɛla N Ka Ani Soŋa, Ho Wan Eŋɛ La Wani Ta’an Ŋmibe?
1 YEZU yuun bo la makerɛ pa’alɛ pɔkuurɛ n yuun yele gãkerɛdaana ti a soŋɛ en, se’ere n sɔi la nɛra n eŋɛ en sɛla n ka ani soŋa. Yezu podɔleba la yuun bɔkɛ pɔka wa yele la mɛ, se’ere n sɔi la sankaŋa nɛreba yuun iti ba tadaandoma la sɛla n ka ani soŋa. (Lu. 18:1-5) Tomam me wan ta’an bɔkɛ lan yuun ani pɔka wa se’em se’ere n sɔi la zina beere wa, nɛreba me iti to la sɛla n ka ani soŋa.
2 Tingɔŋɔ wa poan, nɛreba nɛɛseri la taaba, ka ita taaba soŋa ge me kɔ’ɔn ti’isa ba ma’a yele. Bala zuo, la daɣɛ pakerɛ ba san eŋɛ to sɛla n ka ani soŋa. (Pa. 5:8) Ge sɛla n wan ta’an daam to paa dela, mabia san eŋɛ to sɛla n ka ani soŋa. To mabiisi la ka ani wuu nɛresɛba n giiseri to la. Ba yeen ka di la mi’a. To wan ta’an zamesɛ sɛla Yezu n yuun eŋɛ se’em, se’em ma’a ti sɛba n giiseri en la yuun eŋɛ en sɛla n ka ani soŋa la. To san di’isa suure la nɛresɛba n yaɛ to la, la yi nari ti to di’isa suure la to mabiisi gana bala! Nɛra bii to mabia san eŋɛ to sɛla n ka ani soŋa, la ni ana Yehowa la wani? A fabeli to yele?
OCTOBER 13-19
NAAYINƐ TUULUM YƐLA PA’ALA 7-8
“Keŋɛ Koorɛ Yire”
it ‘Kaasega’¶9
Kaasega
Kaasega Saŋa. Pa’ala 3:1, 4 yeti “kɛlega saŋa boe mɛ, te la’a saŋa bɔna. Kaahega saŋa boe mɛ, te wa’a saŋa bɔna.” Asaaleba n kɔ’ɔn kiira la zuo, yɛmdoma sunya boi la “koorɛ yire “ gana nyɛlum zɛ’an. (Pa 7:2, 4; dekɛ makɛ Mag 14:13.) Bala la, yɛmdaana ni dekɛ yɔ’ɔ la mɛ buɣelɛ nɛreba suure gana eŋa n wan keŋɛ zɛ’an ti nyɛlum bɔna. Wana wa soŋeri en mɛ ti a mina ti eŋa me wan ki ge me basɛ ti a tara halesoma pu’usa a Naaŋɔdaana la.
w19.06 23 ¶15
Buɣela Sɛba Sunya N Sa’am La
15 William, ti a pɔɣa ki yuuma n tole la yeti: “Mam puurɛ ni pee mɛ se’em ma’a ti nɛreba tɔɣera mam pɔɣa yele la; bala ni basɛ ti mam baŋɛ ti ba yuun nɔŋɛ en mɛ ge bɔ’ɔra en gilema. Ba itigɔ la soŋeri mam mɛ paa. Bala basɛ ti la ana mam la mama se’ere n sɔi la mam yuun nɔŋɛ en mɛ ge ti to me yuun laɣum ita sɛla woo.” Pɔkuurɛ ayima yu’urɛ n de Bianca yeti: “Nɛra san naɛ la mam zusɛ ge kaalɛ gulesegɔ bo mam, bala ni buɣelɛ la mam suure. Sɛla me n soŋeri mam dela, ba san tɔɣera mam sira yele bii ba kɛlesa mam ti n tɔɣera a yele.”
w17.07 16 ¶16
“Kɛla La Sɛba N Kele”
16 Da makɛ ti’isɛ ti la yele ka pakɛ ti ho naɛ la Kristabia suure n sa’am zusɛ bii ho zusɛ bo en. Daanse’ere bɔŋa la n ani se’em la zuo, la ta’an kpe’em bo ho ti ho naɛ la en zusɛ ge ho san puɣum kaasa ge kelum ŋmibe naɛ la en zusɛ, la wan buɣelɛ a suure. Dalene yeti, “Saŋa ase’a mabipɔɣesi san wa’ana ti ba kpemese mam giila, mam ni soke ba bisɛ nyaa ba wan bɔta ti ba naɛ la mam zusɛ? Ba san pɔsɛ zusa, saŋa zo’e zo’e ba ni ka mina bamam n wan yele sɛla. Ge ba san tiregɛ, ba zusega la ni kɛ̃’ɛra la suure paa. Ba sakerɛ n kpe’em, ba nɔŋerɛ, la ban ti’iseri mam yele se’em la kpemese la mam giila.”
w17.07 16 ¶17-19
“Kɛla La Sɛba N Kele”
17 Nɛrawoo la a suure n ni sa’am ti la ana en se’em. Nɛra san koŋe a yire nɛra, a zɔdoma la a yidoma ni bɔna la en mɛ dabesa fii ge ni lebe ba tuuma poan. Da buɣelɛ a suure sankaŋa ma’a ge kelum kena kaara en. “Zɔ dela se’em n tare nɔŋere saŋa woo, te sɔɔnrɔ mɛ soŋora taaba yɛla poan.” (Mag. 17:17) Mabiisi nari ti ba buɣelɛ se’em suure n sa’am la, la ka pakɛ la lan wan yue paɛ se’em.—Kaalɛ 1 Tesalonika 3:7.
18 Tɛ̃ra ti se’em nɛra n ki la ta’an tiɛ sɛla ti la basɛ ti a suure sa’am. Yele ana ta’an dɛna wuu daanse’ere daarɛ ti nɛra la ki, yooma, fɔɔra, ban yuun iti yelese’a, sɛla nyuuŋo, kɔ̃a, bii saŋa wana mɔpi yuunɛ la poan ta’an basɛ ti nɛra suure sa’am. Nɛra luɣerɛ kpɛ’a san ki, a ni ita la yɛla ase’a a ma’a, maɣesɛ wuu eŋa n wan kena laɣesegɔ bii Tiirɛ Dia. Yele ana ta’an basɛ ti a suure sa’am. Mabia ayima pɔɣa n yuun ki yeti, “Mam yuun mi ti daanse’ere daarɛ ti mam di en la san paɛ mam suure wan sa’am. La me yuun sirum ani mam la bala. Ge mabiisi la yuun eŋɛ la maaseŋɔ beem mam la n zɔdoma sɛba n lɛm mam paa ti to zi’ire di ge sɔsɛ. Ba yuun eŋɛ wana wa lan wan eŋɛ se’em ti n kan bɔna n ma’a.”
19 Tɛ̃ra ti, se’em suure n sa’am la ka yeen ɛɛra la subuɣelegɔ saŋa n boi de to’ore ma’a. Junia yeti, “Saŋa zo’e zo’e, mabiisi san ni soŋɛ hɔ ge kpemese ho giila ge ka gura saŋa n boi de to’ore ma’a, la ni ana la soŋa. Bamam n ni kpemese ho giila se’em la ni basɛ ti la ana ho la lama lama.” Yelemɛŋɛrɛ la dela, to kan ta’an yese nɛra la susa’aŋɔ la za’a basɛ ge to san ita yɛla ase’a soŋera en, la wan buɣelɛ a suure. (1 Yon 3:18) Gaby yeti: “Mam puurɛ pee mɛ la Yehowa n doose keendoma la poan soŋɛ mam n yeledaaŋɔ la za’a poan la. La basɛ ti la ana mam wuu Yehowa n kɔkɛ mam la.”
Vo’osum Poan Yɛla
‘Wana Ti Ba Wan Baŋɛ Ti Ya Dela Mam Podɔleba’
18 Saŋa ase’a, la ni nara mɛ ti to naɛ la to mabia la n tue to la maalɛ yele la. Ge ti to nyaa sɔsɛ la en la, to ta’an soke tomea yeti: ‘Mam mi yele la za’a?’ (Mag. 18:13) ‘La wan ta’an dɛna ti a ka mi mɛ ge eŋɛ?’ (Pa. 7:20) ‘Mam tabelɛ tue nɛra bala?’ (Pa. 7:21, 22) ‘N san naɛ la nɛra la sɔsɛ, la wan basɛ ti yele la malum gaŋɛ nu’usi?’ (Kaalɛ Magaha 26:20.) To san ti’isa soke ana wa yele, ton tari nɔŋerɛ bɔ’ɔra to mabiisi la wan basɛ ti to tamɛ de yele.
OCTOBER 20-26
NAAYINƐ TUULUM YƐLA PA’ALA 9-10
Tara Putɛsonɛ Ho Yeledaaŋɔ La Poan
w13 8/15 14 ¶20-21
Da Makɛ “Zabera La Na’ayenɛ”
20 Baŋɛ ho yeledaaŋɔ la n ze’ele zɛ’an. Beni n sɔi ti la nara ti to eŋɛ bala? Yele la dela, la ta’an dɛna la tomea n ta’asɛ yeledaaŋɔ la. San dɛna bala, la nari ti to sakɛ ti tomea n ta’asɛ. (Ga. 6:7) Da nyɔ̃na Yehowa. Beni n sɔi ti yɛm ka bɔna bim ti to ita bala? Geele makerɛ wa bisɛ: Ba ta’an maalɛ loore ti la zɔta paa. Ge ti’isɛ bisɛ ti dɔleba la zɔ loore la mɛ gaŋɛ nyaa paɛ zɛ’an ti la nara ti a gɔlegɛ ge ka ma’ɛ amea, nyaa nyɛ accident. La nari ti a nyɔ̃na se’em n maalɛ loore la ti eŋa n ta’asɛ accident la? Aayi, a kan eŋɛ bala. Bala mea nɔɔ ti Yehowa naam tɔ ge bo to yɔ’ɔ ti to ita ton boti sɛla. Ge a me kelum bo to la pa’alegɔ n wan soŋɛ tɔ ti to kɔ’ɛ to puti’irɛ soŋa. Bala la, beni n sɔi ti to wan nyɔ̃na to Naaŋɔdaana la, la tomea tuure?
21 Yelemɛŋɛrɛ, la daɣɛ to tuure la n ta’asɛ to yeledaaŋɔ la woo. ‘Saŋa la yeledi’ima’ ni ta’an basɛ ti yɛla ase’a paɛ tɔ. (Pa. 9:11) Ge da makɛ tamɛ ti la dela Sitaana Kolekpabɛ’a la n basɛ ti putotuuma bɔna. (1 Yo. 5:19; Lil. 12:9) Eŋa n de to dima ge daɣɛ Yehowa!—1 Pe. 5:8.
w19.09 5 ¶10
Sɛba N Siregeri Bamea Tari La Tuulum Bɔ’ɔra Yehowa
10 Sirege n mea wan ta’an soŋɛ tɔ ti to ŋmibera yeledaaŋɔ poan. Yelemɛŋɛrɛ la dela, yɛla ase’a ta’an ita to vom poan ti to bisɛ ti yɛla ka keni soŋa bii la ka nari ti la pa’ɛ tɔ. Yɛmdaana Naba Solomon yuun yeti: “Mam nyɛ yamehe n ban yiri, te nabiihe kena teŋa wo yamehe la.” (Pa. 10:7) Daɣɛ saŋa woo ti ba pɛɣera sɛba n mɔɔri. Ge saŋa ase’a ba tuɣum ni pɛɣera la sɛba n ka mɔɔri la. Hali la bala la, Solomon yuun yeti yɛm boi bim ti to basɛ ti ton tari sɛla la seke to gana ton wan ti’isa yelese’a n ka pakɛ daana tomea. (Pa. 6:9) To san siregera tomea, to wan sakɛ yelese’a n iti to vom poan la ge daɣɛ to ti’isa ti yɛla ana wuu tomam n boti ni se’em la.
w11 10/15 8 ¶1-2
Yelese’a N Bo’ori Ho Pupeelum La Tari Nyuurɔ?
BAABULE la basɛ ti to baŋɛ ti Yehowa ka yeen bɔta ti to vɔna ge a boti la to tara pupeelum to vom poan. Makerɛ, Yooma 104:14, 15 yeti, Yehowa n basɛ ti “dia zɛ’ɛta teŋa mea yɛhera na, daam n bo’ore nɛra suunre nyeema, kaam n sɔnra nɛŋa yakara, boom n wan bahɛ te a vɔna.” Yelemɛŋɛrɛ, Yehowa n basɛ ti dia maala ge me bɔ’ɔra tɔ kaam la daam. ‘Daam basɛ ti to tara la pupeelum.’ Ge to san ka nyuura daam to wan kelum vɔna. (Pa. 9:7; 10:19) Yehowa boti la to tara ‘pupeelum.’—Tm. 14:16, 17.
2 Bala la, la daɣɛ be’em ti to ni ɛ saŋa “behɛ niihe n ɛngere,” la “mɔpuuro” bii to ita yɛla ase’a n wan bɔ’ɔra to pupeelum. (Mt. 6:26, 28; Ym. 8:3, 4) Vom dela ‘bo’olum n ze’ele Naayinɛ zɛ’an na.’ (Pa. 3:12, 13) To san geele to vo’osego saŋa la ti la dela bo’olum, la wan basɛ ti to tara tuna tuuma sore sɛka poan n wan basɛ ti Se’em n bo to la puurɛ pee.
Vo’osum Poan Yɛla
it “Yelebibisi, Yusa’aŋɔ”
Yelebibisi, Yusa’aŋɔ
Yelebibisi ta’an sa’am nɛra yu’urɛ ge tari daaŋɔ paɛ se’em n sa’am nɛra yu’urɛ la. Yɛm boi yelese’a n boi Pa’ala 10:12-14 la poan. La yeti: “Gerego mɛŋa nɔɔrɛ n sagone en. Gerego han pɔhɛ, a yetɔgom la dela gɔɔnɛ, ta lebege yetɔgɔpɔn’ɔha, nya ta ba’aha la yelese’a n ka tare vɔnrɛ. Gerego malom tɔgɔra mɛ.”
Yelebibisi ase’a ta’an kan ba’ɛ dɛna daaŋɔ (la boi bim ti la ta’an sa’am nɛra la yu’urɛ) ge yusa’aŋɔ ni kɔ’ɔn daam nɛra la mɛ ge me basɛ ti yelesego bɔna. La ta’an dɛna ti ho ka mi ge eŋɛ bii ho kɔ’ɔn mina mɛ fii. La yeen dɛna se’em, se’em n sa’ani nɛreba yu’ura ka tari bɔnsoŋa la Yehowa, se’ere n sɔi la Naayinɛ yaɛ ‘se’em n sa’ani suurɔ tiŋasuka.’ (Mag 6:16-19) Greek yelesum la ti ba lerege dɛ ti ‘se’em n sa’ani nɛreba yu’ura la’ dela di·aʹbo·los. Baabule la poan yelesum wa ze’ele bo la Sitaana “Kolekpabɛ’a la,” se’em n sa’ani Naayinɛ yu’urɛ la. (Yon 8:44; Lil 12:9, 10; Pin 3:2-5) Wana wa basɛ ti to baŋɛ la se’em n pɔsɛ sa’am nɛra yu’urɛ yi’a.
OCTOBER 27–NOVEMBER 2
NAAYINƐ TUULUM YƐLA PA’ALA 11-12
Tara Imma’asum Ti Ho Puurɛ Pee
g 3/15 13 ¶6-7
Kusebego La Wuntɛɛŋa Tiberi To Mɛ
Wuntɛɛŋa kuuri la bunvɔɔsi n bo’ori bã’asi. Journal of Hospital Infection gɔŋɔ la tɔɣɛ pa’alɛ ti “wuntɛɛŋa kuuri bunvɔɔsi zo’e zo’e n bo’ori bã’asi mɛ.”
Ho wan eŋɛ la wani ta’an nyɛ nyuurɔ wuntɛɛŋa la kusebego poan? Ho ta’an yese yiŋa ta ŋmɛ kusebego fii ge me ze’ele wuntɛɛŋa poan. Wana wan basɛ ti ho tara imma’asum.
Basɛ Ti Ho Suure Kɛ̃ Vom N De Naayinɛ Bo’olum La
6 La boi bim ti Baabule la daɣɛ imma’asum bii dia yɛla gɔŋɔ ge ku pa’alɛ to la Yehowa puti’irɛ n de se’em yele ana poan. Makerɛ, Yehowa kpemese to giila ti to ‘yese yeledaaŋɔ woo’ n wan ta’an sa’am to inya la basɛ. (Pa. 11:10) Da dita dia zo’e zo’e bii nyuura daam zo’e zo’e. Yele ana ta’an basɛ ti to kan tara imma’asum. Hali la ta’an ku tɔ. (Mag. 23:20) Yehowa boti la to nyɔkera tomea, dia la daam nyua poan.—1 Ko. 6:12; 9:25.
7 To ta’an kɔ’ɛ to puti’irɛ tum tuunɛ ti la pa’alɛ ti to puurɛ pee la Naayinɛ bo’olum n de vom la. (Ym. 119:99, 100; kaalɛ Magaha 2:11.) Makerɛ, to wan bisa tomea soŋa la ton diti sɛla. To san nɔŋɛ disɛka, ti dia la ni basɛ ti to bɛ̃’ɛra, yɛm boi bim ti to da di ka. To wan eŋɛ pa’alɛ ti to tari yɛm to san gisera zɔ’ɔra, kpɛmesa giila saŋa woo ge basɛ ti to inya la to yɛa ana filam.
‘Tara Naayinɛ Yelesum La Tuna Tuuma’
2 Yehowa nɛreba tari la pupeelum. Beni n sɔi? Yɛla zo’e zo’e n sɔi ge sɛla n gani za’a dela ton kaali Naayinɛ Yelesum la daarewoo ge me tara de tuna tuuma la.—Kaalɛ Yames 1:22-25.
3 To san ‘tara Naayinɛ Yelesum la tuna tuuma’ to nyɛti la nyuurɔ zo’e zo’e. Yehowa puurɛ ni pee mɛ to san tara a Yelesum la tuna tuuma, bala me n ni basɛ ti tomam me tara pupeelum. (Pa. 12:13) To san tara ka’aŋɔ la n boi Baabule la poan tuna tuuma, la ni basɛ ti to tara la bɔnsoŋa la to yidoma la to mabiisi. Wana wa kɔ’ɔn dɛna la yelemɛŋɛrɛ. La ni gu’ura to mɛ ti yeledaaŋɔ se’a n paari sɛba n ka dole Yehowa pa’alegɔ la ka paara tɔ. Yele wa kɔ’ɔn makɛ mɛ la Naba David n yuun yele sɛla la. Se’em ma’a ti a yuun tɔɣɛ Yehowa lɔɔ, a nɔya, la a tontɔɔ gãkerɛ yele la, a yuun nyaa ki’ilum a yetɔɣum la yeti: “Hom se’em n dole a, ho wan nyɛ yɔɔrɛ se’ere n kanregɛ.”—Ym. 19:7-11.
Vo’osum Poan Yɛla
Hon Sakɛ Ti Baabule La N Yele Sɛla La Dela Yelemɛŋɛrɛ?
Baabule la tari la “yelemɛŋɛrɛ yɛla.” (Pa’ala 12:10) Ku tɔɣɛ la yelese’a n tabelɛ eŋɛ la nɛreba yɛla. (Kaalɛ Luke 1:3; 3:1, 2.) Nɛresɛba n zamesɛ diimi yɛla, la sɛba n tu’uri tiŋa viisa diimi yɛla basɛ ti la niɛ peelum ti, dabesa poan yɛla, nɛreba yɛla, zɛse’esi la yelese’a ti Baabule la tɔɣɛ la dela yelemɛŋɛrɛ.