Bem N De Armagedon Zaberɛ La?

Baabule la lebesego

Armagedon zaberɛ la dela ba’asegɔ zaberɛ sɛka ti nɛresaaleba gɔmɛt la Naayinɛ wan zabɛ. Gɔmɛtdoma wa la sɛba n doli ba poore la giisɛ Naayinɛ mɛ hali nananawa doose la bamam n zaɣesɛ ti ba sirege bamesi nam bo Naayinɛ bisega la. (Yooma 2:2) Armagedon zaberɛ la wan sa’am asaala bisega ti la kan le bɔna.​​—Daniel 2:​44.

Yelebire la n de “Armagedon” la boi la zɛ’an kayima ma’a Baabule la poan n de Liligere 16:16. Liligere gɔŋɔ la tɔɣɛ biŋe ti “zɛsɛka ti ba yi’ira Hebru poan ti Armagedon” la n de zɛsɛka ti “tingɔŋɔ wa za’a waabi nadoma” wan ‘laɣesɛ keŋɛ Naayinɛ n de Paŋa Za’adaana la dabeserɛ kãtɛ la zaberɛ la poan.’​​—Liligere 16:14.

Bani n wan zabɛ Armagedon poan? Yezu Krista wan bɔna saazuo lingemadoma la nɛŋan ti ba zabɛ nyaŋɛ Naayinɛ dinedoma. (Liligere 19:11-​16, 19-​21) Dinedoma wa dela sɛba n ka nani Naayinɛ kpe’eŋo ge kɛsera Naayinɛ.​​—Ezekiel 39:7.

Ba wan zabɛ Armagedon zaberɛ la Middle East tiŋa? Aayi. Armagedon zaberɛ la kan bɔna la zɛyiŋa ma’a ge la wan bɔna la tingɔŋɔ wa za’a poan.​​—Yeremia 25:32-​34; Ezekiel 39:17-​20.

Saŋa ase’a ba ni gulesɛ Armagedon yeti “Har–​Magedon” (Hebru Har Meghiddohnʹ), ti la vuurɛ dɛna “Megido Zoore.” Megido yuun dela diimi Israel tiŋa ayima. Diimi yɛla basɛ ti to baŋɛ ti zabɛkãra yuun kɔ zɛ’an wa poan mɛ ti ba gulesɛ basɛba eŋɛ Baabule la poan. (Kema 5:​19, 20; 2 Nadoma 9:​27; 23:29) Ge Armagedon kan ta’an ze’ele bo diimi Megido tiŋa. Zoore kãtɛ ka boi bilam, hali Yazreel Bɔ̃’ɔ la za’a pɔ’ɛ mɛ bo sɛba n yeti ba zabɛ la Naayinɛ la ti ba bɔna bim. Bala la, Armagedon dela tingɔŋɔ wa za’a zaberɛ. Ki’i zaberɛ, ti tisi wan laɣesɛ bamesi ti ba zabɛ giisɛ Naayinɛ bisega.

Yɛla wan ana la wani Armagedon zaberɛ la poan? La boi bim ti to ka mi Naayinɛ n wan dekɛ a paŋa la tum tuuma se’em ge to mi ti a tari zaberɛ lɔɣɔrɔ ti a yuun tabelɛ dekɛ tum tuuma diimi sa. Basɛba dela sakuga, tinmiiŋo, sakãra, bugum la kiila, saa n nyaɣeri tãsera la bã’asi. (Yob 38:22, 23; Ezekiel 38:19, 22; Habakuk 3:​10, 11; Zekaria 14:12) Naayinɛ dinedoma basɛba wan tulege ku taaba ge ba wan ta baŋɛ ti Naayinɛ n zaberɛ giisa ba.​​—Ezekiel 38:21, 23; Zekaria 14:13.

Armagedon wan sa’am to tingɔŋɔ wa? La kan sa’am tinparɛ wa se’ere n sɔi la, tingɔŋɔ wa dela asaala yire n wan bɔna daarewoo. (Yooma 37:29; 96:10; Pa’ala 1:4) Armagedon kan sa’am asaala woo ge la tuɣum yeti la faaɛ ba mɛ, se’ere n sɔi la Naayinɛ yamesi n de “nɛrekuuŋɔ” wan ta vɔna.​​—Liligere 7:​9, 14; Yooma 37:34.

Baabule la san yeti “tingɔŋɔ”, la ta’an ze’ele bo tinparɛ wa. Ge saŋa ase’a me, la ze’ele bo la nɛrebe’ero n giiseri Naayinɛ. (1 Yon 2:​15-​17) Wana wa zuo, Baabule la san yeti Armagedon wan tari “tingɔŋɔ wa ba’asegɔ” wa’ana, la vuurɛ dela be’emdoma la n wan ba’asɛ.​​—Matu 24:3, King James Version.

Wani ma’a ti Armagedon wan wa’ana? Se’em ma’a ti Yezu yuun pa’ala “mɛlesekãtɛ” la ki’ileŋɔ n wan ta dɛna Armagedon la, a yuun yeti: “Nɛra ka mi dabese’ere bii se’em ma’a ti la wan eŋɛ, hali la malesi la n boi saazuo sa la bii Dayɔa la san daɣena Sɔ la ma’a n mi.” (Matu 24:21, 36) Ge Baabule la pa’alɛ ti se’em ma’a ti Yezu wan bɔna a Na’am bisega poan ge ti to ka nyɛta en la, sankaŋa ti Armagedon wan wa’ana. Sankaŋa yuun pɔsɛ la yuun 1914 poan.​​—Matu 24:37-​39.