Yehowa Sɛɛradoma balɛ ti hon mina? To sɛba dela ya yikpɛ’ɛsi, dɛna ya tuuma bii sukuu tadaandoma. Daanse’ere to sɛba daa tɔɣɛ Baabule yele bo ho. To tuɣum dɛna la ­nɛrebani wana mɔpi? Beni n sɔi ti to ɛɛra tɔɣera Baabule ­yɛla bɔ’ɔra nɛreba?

To dela nɛreyɔna. To yese la buuri tɔka tɔka ge me ka zona taaba. To sɛba daa boi la pu’usegɔ to seto poan, ti sɛba me daa ka sakɛ ti Naayinɛ boi. Ge to za’a waabi daa viisɛ Baabule pa’alegɔ la mɛ soŋa ge nyaa dɛna Yehowa Sɛɛradoma. (Tooma 17:​11) To daa nam sɛla ti to zamesɛ la mɛ ge nyaa loe ti to wan pu’usa la Yehowa Naayinɛ.

To nyɛti nyuurɔ Baabule zamesegɔ poan. Wuu nɛresaala woo n ani se’em la, to me tari yeledaaŋɔ la tɔregɔ yɛla n pakɛ tɔ. Ge to mɔɔri tara Baabule naresum yɛla tuna tuuma to vom poan la, basɛ ti to tara la vom n ani soŋa to zi’irego poan. (Yooma 128:​1, 2) Bala n sɔi ti to tɔɣera ­yelesoma la ti to zamesɛ Baabule la poan bɔ’ɔra nɛreba.

To vɔi la Naayinɛ n pa’alɛ to se’em la. Pa’alegɔ ana wa n boi ­Baabule poan la n basɛ ti to tara tomea soŋa, tara hala n de wuu birikinte la itisoŋɔ ge bɔ’ɔra nɛreba gilema. Baabule naresum yɛla wa basɛ ti nɛreba n boi zɛ’an woo tara la bɔnsoŋa ge ti deodoma me tara nɔyinɛ la sarum soŋɔ. To mi soŋa soŋa ti “[Naayinɛ] ete nɛra woo la boyena.” To dela mabiisi n boi teŋgɔŋɔ wa za’a waabi poan ka yelesa nɛreba ge me ka basɛ ti buuri bii paati yɛla yelesa tɔ. La boi bim ti to dela nɛreyɔna ge to nɔɔ boi la to to’ore.​—Tooma 4:​13; 10:​34, 35.

• Yehowa Sɛɛradoma la nɛra woo de buyina la wani?

• Bem sakerɛ yɛla ti Yehowa Sɛɛradoma zamesɛ baŋɛ Baabule la poan?

Nɛreba zo’e zo’e ti’isɛ ti Yehowa Sɛɛradoma dela pu’usegɔ saaŋa kayima yu’urɛ. Yuun 2,700 n tole la, Naayinɛ yuun yi a ­yamesi ti ba dela a ­“seradoma.” (Isaiah 43:​10-12) Ba yuun yi’iri to la Baabule Zamesegɔdoma ta paɛ yuun 1931. Beni n sɔi ti to yi’ira tomea Yehowa Sɛɛradoma?

La pa’alɛ la to pu’usɛ Naayinɛ mina. Daami gulesegɔ la poan, Naayinɛ yu’urɛ n de Yehowa la boi Baabule la poan la tusa tusa. Leregere gulesegɔ zo’e zo’e poan, ba tee yu’urɛ wa mɛ ge gulesɛ a na’asegɔ yu’ura n de wuu Daana bii Naayinɛ. Ge yelemɛŋɛrɛ Naayinɛ yuun ­basɛ ti Moses baŋɛ a yu’urɛ la n de Yehowa la mɛ yɛta yeti: “N yu’urɛ en bala yɛ’ɛha.” (Yɛhega 3:15) Wana wa poan ti a niɛ a mea pa’alɛ ti a boi la a to’ore la pumpɔreŋɔ yina la. To zuo zɛkɛ mɛ la to tari zilam Naayinɛ yu’urɛ wa la.

La pa’alɛ la to tari tuunse’ere. Daami nɛreba, kɔ’ɔn ­pɔsɛ tontɔɔ nɛra Abel yuun eŋɛ pa’alɛ ti ba tari sakerɛ bɔ’ɔra Yehowa. Yuun kɔbesi n tole la, Noah, Abraham, Sarah, Moses, David la basɛba yuun laɣum pa’asɛ “[nɛrekuuŋɔ]” wa poan mɛ. (Hebru 11:4–12:1) Wuu nɛra n ni ta di sɛɛra kootin poan bo nɛra n ka tari taalɛ se’em la, to kɔ’ɔn lu to suure mɛ ti to basɛ ti nɛreba baŋɛ yelemɛŋɛrɛ Naayinɛ la.

To tɔɣeseri la Yezu. Baabule la yi’iri en ti “yelemɛŋɛrɛdaana ge seren tɔgɔra la sɛla te a nini nyɛ.” (Liligere 3:14) Yezu mea yuun yeti, eŋa ‘basɛ ti nɛreba baŋɛ Naayinɛ yu’urɛ la mɛ’ ge kɔ’ɔn ‘di sɛɛra pa’ala yelemɛŋɛrɛ’ Naayinɛ n de mina. (Yon 17:26; 18:37) ) Krista yelemɛŋɛrɛ podɔleba dela ba tara Yehowa yu’urɛ la ge basɛ ti nɛreba baŋɛ dɛ. Bala ti Yehowa Sɛɛradoma mɔɔra ita.

• Beni n sɔi ti Baabule Zamesegɔdoma la yi’ira bamea Yehowa Sɛɛradoma?

• Yehowa tari sɛɛradoma teŋgɔŋɔ wa ti la yue la wani?

• Yehowa Sɛɛra n gaŋɛ za’a dela ani?

Baabule la tɔɣebiŋɛ ti Krista kum pooren, pumpɔreŋɔ pa’alegɔdoma wan ze’ele Kristakɔma la poan na burum yelemɛŋɛrɛ la n boi Baabule la poan. (Tooma 20:​29, 30) La yuun ka yue ti wana wa sirum eŋɛ. Ba dekɛ Yezu pa’alegɔ la mɛ gɛregɛ la baɣa kaabegɔ yɛla ti nigum nigum nyaa kɔ’ɔn bɔna Krista pu’usegɔ la poan. (2 Timoti 4:​3, 4) To wan eŋɛ la wani baŋɛ ti zina to tari bɔkerɛ la Baabule la n sirum pa’alɛ sɛla la?

Saŋa yuun paɛ ti Yehowa lilige yelemɛŋɛrɛ la. A yuun yeti, ‘ba’ahegɔ la saŋa la mi’ilum wan malum pa’aha.’ (Daniel 12:4) Yuun 1870 poan la, nɛresɛba n boti yelemɛŋɛrɛ la fii wa yuun viisɛ baŋɛ ti pu’usegɔ zo’e zo’e pa’alegɔ ka doli Gulesegɔ la n yele se’em la. Bala la, ba yuun kɔ’ɔn pɔsɛ mɛ viisa ti ba bɔkɛ Baabule pa’alegɔ la n de se’em la, ti Yehowa nyaa kã bo ba ti ba ti’isɛ nyɔkɛ dɛ.

Putɛsonɛdoma n ma’ɛ bamea viisɛ Baabule La. Baabule Zamesegɔdoma sɛba n yuun deŋɛ to nɛŋa la, yuun doose la sore deyima poan zamesa wuu to iti se’em zina wa. Ba yuun zamesɛ la yelezura Baabule la poan. Ba yuun san ni ta nyɛ zɛsɛka Baabule la poan n kpe’em ti ba ka bɔkɛ, ba ni bisɛ la zɛse’esi n pa’alɛ dɛ. Ba san ku nɔyinɛ ti la doose Gulesegɔ la n pa’alɛ se’em la, ba ni gulesɛ mɛ biŋe. Ba iti wana wa basɛ ti Baabule la mea n niɛra yɛla pa’ala, ti ka malum viisɛ nyɛ yelemɛŋɛrɛ n de wuu Naayinɛ yu’urɛ la a Na’am, eŋa n tari puti’irɛ se’em bɔ’ɔra asaala la teŋgɔŋɔ wa, kum n ani se’em la beere kum isigere puti’irɛ. Ba viisegɔ la basɛ ti ba yese la bamea pumpɔreŋɔ pa’alegɔ la ka tuuma poan.​—Yon 8:31, 32.

Yuun 1879 sa la, Baabule Zamesegɔdoma bɔkɛ ti la nari ti yelemɛŋɛrɛ la paɛ zɛ’an woo. Yuun kaŋa poan la, ba yuun pɔsɛ gulesa The Watchtower Announcing Jehovah’s Kingdom ti to kelum gulesa zina wa la. Nananawa to tɔɣeri Baabule yelemɛŋɛrɛ la bɔ’ɔra nɛreba, yetɔɣum n de wuu 700 la tisi n de 239 poan. Yelemɛŋɛrɛ mi’ilum ka tabelɛ zo’e wuu la ani se’em zina beere wa!

• Krista n yuun ki la, bem n yuun eŋɛ Baabule yelemɛŋɛrɛ la?

• Bem n soŋɛ tɔ ti to malum nyɛ yelemɛŋɛrɛ Naayinɛ Yetɔɣum la poan?

Yuuma zo’e zo’e poan ti Yehowa Sɛɛradoma maalɛ, ge tɔ̃rɛ Baabule n boi tɔka tɔka zɛ’an woo. Ba yuun bisɛ ti la nari ti ba lerege Baabule paalega n wan ta’an basɛ ti ­nɛreba ‘zamesɛ nyɛ yelemɛŋɛrɛ la,’ sɛla ti Naayinɛ bɔta ti nɛra woo baŋɛ n bala. (1 Timoti 2:3, 4) Dene zuo, yuun 1950 poan ti to pɔsɛ leregera New World Translation la, tomam zina beere yetɔɣum poan Baabule la, bɔba a se’a. Ba kɔ’ɔn lerege de mɛ ma’a ma’a ti la gaŋɛ yetɔɣum 130.

Ba yuun eeri la Baabule sɛka bɔkerɛ n ka tɔi. Yetɔɣum teeri mɛ saŋa woo poan, bala Baabule leregere zo’e zo’e boi mɛ ka niɛ peelumi ti nɛreba wan ta’an bɔkɛ. Leyɛ’ɛsa, daami gulesegɔ boi mɛ kɔ’ɔn dɛna ma’a wuu la yuun de se’em de beere la ti ba malum nyɛ a, nyaa bɔkɛ Baabule gulesegɔ yetɔɣum la n de Hebrew, Aramaic la Greek.

Ba yuun eeri la leregere se’ere n tari Naayinɛ yelemɛŋɛrɛ yetɔɣum la. Baabule leregeredoma nari ti ba dɔla daami gulesegɔ la nima nima ge daɣɛ ba ŋmɛresɛ Naayinɛ gulesegɔ la bamea n boti se’em. Baabula zo’e zo’e poan Naayinɛ yu’urɛ, Yehowa, ka boi Zilam Gulesegɔ la poan.

La yuun nari ti Baabule bɔna pɛɣera ka Daana. (2 Samuel 23:2) Wuu foote la n boi teŋa nɔɔrɛ wa la, ba dekɛ Yehowa yu’urɛ la n yese 7,000 daami Baabule la poan la, le malum gulesɛ de mɛ eŋɛ New World Translation Baa­bule la poan. (Yooma 83:18) Yuuma zo’e zo’e ti ba tiregɛ bamea viisɛ Baabule la se’em la, basɛ ti ku kaalegɔ kɔ’ɔn niɛ Naayinɛ puti’irɛ mɛ ge dɛna naana. Ho tari New World Translation la ho yetɔɣum poan bii ho ka tari woo, to wan bɔta ti ho kpeŋe homea ge kaala Yehowa Yetɔɣum la daarewoo.​—Yosua 1:8; Yooma 1:2, 3.

• Beni n sɔi ti to bisɛ ti la nari ti to lerege Baabule paalega?

• Bem ti la nara ti nɛra ita a san bɔta ti a zamesɛ Naayinɛ Yetɔɣum la?