YELESE’A N PA’ASƐ 3
Ton Wan Eŋɛ Se’em Ta’an Dekɛ Tara Vom Somɔ Daarewoo! Gɔŋɔ La Zamesa La Nɛreba
Mabiisi la daa zusɛ mɛ ge viisɛ yɛla soŋa soŋa ta’an gulesɛ Tara Vom Somɔ Daarewoo! gɔŋɔ la. Ho san bɔta ti ho tara gɔŋɔ wa pa’ala soŋa, doose pa’alegɔ la n boi tiŋanɔɔrɛ wa ta’an zamesa nɛreba Baabule la.
Ge ti ya pɔsɛ zamesegɔ la
1. Maasum soŋa soŋa. Ho san maasena, ti’isa yelese’a n pakɛ ho zamesegɔdaana la, a bɔŋa n ani se’em, la eŋa n sakɛ bo yelese’a. Ti’isɛ bisɛ yelese’a n ta’an kpe’em bo en ti a bɔkɛ bii a ta’an dekɛ tum tuuma. Geele bisɛ yelese’a n boi “Ɛ Bisɛ” bɔberɛ la n wan ta’an soŋɛ ho zamesegɔdaana la se’em ge sɔsɛ de yele ya zamesegɔ la poan, la san nara.
Ya san bɔna bim zamesa
2. Ho zamesegɔdaana la san sakɛ, ni zusɛ ti ya pɔsɛ ge me zusɛ ti ya ki’ilum.
3. Da tɔɣera zɔ’ɔra. Sɔsera yelese’a n boi gɔŋɔ la poan ge basɛ ti zamesegɔdaana la tɔɣera sɛla n boi a suuren.
4. Ya san yeti ya pɔsɛ bɔberɛ sɛka zamesegɔ, kaalɛ bɔberɛ kaŋa yelekpine la ge sɔsɛ bɔberɛ la zaseŋɔ ase’a yele.
5. Ya san zamesɛ bɔberɛ sɛka ba’asɛ, sɔsɛ ya bɔberɛ kaŋa tiisegɔ sokere yɛla la ti la soŋɛ ho Baabule zamesegɔdaana la ti a tɛ̃ra yelese’a ti a zamesɛ la.
6. Hon la ho zamesegɔdaana san bɔna bim zamesa:
a. Kaalɛ sɛla n boi gɔŋɔ la poan la.
b. Kaalɛ gulesegɔ se’esi woo ti ba daalɛ yeti “Kaalɛ” la.
d. Ho san bɔta, ya ta’an kaalɛ gulesegɔ ase’a n boi gɔŋɔ la poan la.
e. Ho san tara vidiyodoma la woo ti ba yeti ya “Ŋmɛ” la, ni tiregɛ ŋmɛ ba.
ɛ. Soke ho zamesegɔdaana la sokere woo n boi gɔŋɔ la poan.
f. Basɛ ti ho zamesegɔdaana la bisɛ fɔɔra la n boi “Viisɛ Pa’asɛ” bɔberɛ la poan ge pa’alɛ eŋa n nyɛ sɛla.
g. Dekɛ “Mam Boti N Eŋɛ Sɛla” daka la soŋɛ ho zamesegɔdaana la ti a baŋɛ eŋa n nyɛti nɛŋa tɔlega se’em. Ho ta’an kpemese a giila ti a dekɛ sɛla n boi “Mam Boti N Eŋɛ Sɛla” daka la poan la tum tuuma. Amea me ta’an loe yelese’a ti a bɔta ti a dekɛ tum tuuma pa’asɛ.
h. Soke ho zamesegɔdaana la baŋɛ vidiyo sɛka bii zaseŋɔ yele sɛka n boi “Ɛ Bisɛ” bɔberɛ la n kɛ̃ a suure, se’em ma’a ti a boi ni bim maasena zaseŋɔ la.
i. Ni tiregɛ zamesɛ zaseŋɔ la ba’asɛ buyina.
Ya san zamesɛ ba’asɛ
7. Kɔ’ɔn ti’isa ho zamesegɔdaana la yele. Zusɛ Yehowa ti a soŋɛ ho Baabule zamesegɔdaana la ti a nyɛta nɛŋa tɔlega ge me bo ho yɛm ti ho mina hon wan soŋera ho zamesegɔdaana la se’em.