Kɔ’ɔn Basɛ Ti Yehowa Pa’ala Hɔ

1. Bem n pakɛ nɛresaaleba? (Matu 5:3)

YEHOWA naam asaaleba ge bo ba la sɛla n pakɛ ba. Makerɛ, la nari ti to tara dia, lɔɣɔyɛɛtɔ la gã’aregɔ zɛ’an ta’an vɔna. To san ka tara lɔɣɔtuna wa, to ta’an ki bii la wan kpe’em bo to. Yehowa mi yelese’ere n le pakɛ asaaleba. A naam to mɛ ti to bɔta ti to baŋɛ en ge me dekɛ tomea delum en ti a pa’ala tɔ. (Kaalɛ Matu 5:3.) To san bɔta ti to tara pupeelum, la nari ti to nyɔɣɛ en zɔtɔ ge dekɛ tomea delum en.

2. Sodeni poan ti to bɔŋa la ana wuu zusa?

² Greek yelebire la ti ba lerege yeti ‘eeri’ la, ani wuu zusa n eeri soŋerɛ. Makɛ bisɛ ti zusa n yɛ lɔɣedɛ̃ɣerɔ ge me ka tara dia. A ni zi’a la wuntɛɛŋa poan. Yu’uŋɔ me ɔɔrɔ n ni tara en. Eŋa n ani se’em la zuo nɛreba ka lɛni en. A ni kɔ’ɔn taregɛ mɛ ge me ka tara pupeelum. Zusa wa mi ti a eeri la nɛreba soŋɛ en ti a ta’an vɔna ge me tara paŋa. Bala mea nɔɔ ti sɛba n eeri Naayinɛ la, me nara ti ba zusa en ge me kɛlesa en ti a soŋɛ ba.

3. To wan sɔsɛ la bem zaseŋɔ wa poan?

³ Zaseŋɔ wa poan, to wan bisɛ sɛla ti to wan ta’an zamesɛ Foenisia pɔka la zɛ’an se’em ma’a ti a yuun belum Yezu ti a soŋɛ en la. Pɔka wa yele la basɛ ti to baŋɛ la hala atã ti sɛba n eeri Naayinɛ la nara ti ba tara. To wan le sɔsɛ tuntuna Peter, Paul la Naba David n yuun eŋɛ pa’alɛ ti ba dekɛ bamea delum Yehowa la yele.

TO NARI TI TO SIREGERA TOMEA, KƆ’ƆN ZUSA NAAYINƐ GE ME TARA SAKERƐ

4. Foenisia pɔka la yuun eeri la bem Yezu zɛ’an?

⁴ Daarɛ deyima ti Foenisia pɔka yuun keŋɛ Yezu zɛ’an. A yuun yeti; “bonbe’a n tare n pɔyɔa nameha.” (Mt. 15:​21-28) Pɔka wa yuun kpa la duma Yezu nɛŋan ge belum en ti a soŋɛ en. Basɛ ya ti to bisɛ ya sarɔtɔ tutã poan ti to wan ta’an tɔɣesa pɔka wa.

5. Bem hala ti pɔka la yuun tara ge Yezu yuun eŋɛ la bem? (Bisɛ foote la.)

⁵ Foenisia pɔka la yuun sirege la amea. Beni n sɔi ti to yele bala? Se’ere n sɔi la, a sunsɔa yuun ka nyie la Yezu n yuun dekɛ en makɛ la babila la, dunsɛka ti sɛba n yuun daɣɛ Yudadoma ugera ba yɛa poan la. La yuun san deni la hon, hon wan eŋɛ la wani? Ho sunsɔa wan nyie ti ho gɛ̃ ti ho ka le ɛɛra a soŋerɛ? Foenisia pɔka la yuun ka eŋɛ bala. A yuun sirege la amea ge me kɔ’ɔn bɛlena Yezu ti a soŋɛ en. Beni n sɔi ti a eŋɛ bala? Eŋa n yuun tari sakerɛ bɔ’ɔra Yezu la zuo. Yezu n yuun nyɛ pɔka wa n tari sakerɛ se’em la ti a bɔta ti a soŋɛ en. La boi bim ti Yezu yuun yeti ba tum eŋa la “Israel piise’ehe n bɔregɛ la zen’en ma’an” ge a yuun sa’ɛ kolekpabɛ’ɛsi la, pɔka wa pɔyua la poan.

6. To zamesɛ la bem Foenisia pɔka la yele la poan?

⁶ Tomam me san bɔta ti to ɛ Naayinɛ, la nari ti to tɔɣesa pɔka wa. La nari ti to siregera tomea, kɔ’ɔn zusa Naayinɛ ge me tara sakerɛ. Se’em n siregeri amea wan kɔ’ɔn bɛlena Naayinɛ ti a soŋɛ en. La nari ti to tara sakerɛ bɔ’ɔra Yezu ge me dekɛ tomea delum sɛba ti a dɔla ba poan pa’ala to la. (Mt. 24:​45-47) Yehowa la a Dayɔa la puurɛ pee mɛ ti ba soŋɛ sɛba n tari halɛ aŋa la. (Dekɛ makɛ Yames 1:​5-7.) Nananawa, basɛ ya ti to bisɛ ya Yehowa n doli sarɔse’a poan pa’ala tɔ ge me bɔ’ɔra tɔ yelese’a n pakɛ tɔ ti to tara pupeelum. To wan le bisɛ to wan ta’an tɔɣesa tuntuna Peter, Paul la Naba David se’em ti la soŋɛ tɔ.

TƆƔESA PETER GE KƆ’ƆN ZAMESA NAAYINƐ YELESUM LA

7. Yezu yuun yele Peter ti a eŋɛ la bem ge Peter me yuun nari ti a eŋɛ la wani? (Hebru 5:14–6:1)

⁷ To geele ya tuntuna Peter yele la bisɛ. A yuun baŋɛ ti Yezu n de Mɛzaaya la, se’em ti Yehowa dɔla a poan pa’ala nɛreba “vom sebo n ka tare ba’ahegɔ.” (Yon 6:​66-68) Yezu n yuun yeti a lebe saazuo la, a yuun yele Peter ti: “Gura n piihe wa.” (Yon 21:17) Peter me yuun sirum eŋɛ la bala ti Yehowa yuun basɛ ti a gulesɛ la Baabule gɔnɔ toyi. Ge la yuun nari ti Peter mea zamesɛ Naayinɛ Yelesum la. Makerɛ, a yuun zamesɛ la tuntuna Paul n yuun puɣum gulesɛ gɔnseto la. Peter yuun yeti Paul n gulesɛ yelese’a la, toseto “bɔkerɛ kpe’em” mɛ. (2 Pe. 3:​15, 16) Ge Peter yuun kelum zamesa mɛ ge me yuun tara sakerɛ ti Yehowa wan soŋɛ en ti a bɔkɛ yelese’a n ‘kpe’em’ ti Paul gulesɛ la.—Kaalɛ Hebru 5:14–6:1.

8. Peter yuun eŋɛ la bem, maleka la n yuun lilige sɛla pa’alɛ en la?

⁸ Peter n yuun tari sakerɛ n kpe’em la zuo ti a yuun nana Yehowa pa’alegɔ. Makerɛ, Peter n yuun boi Yoppa tiŋa la, a yuun nyɛ la liligere ti maleka yele en yeti a ku dunse’a ti Moses Lɔɔ la yuun ka bo yɔ’ɔ ti Israeldoma la ɔbera la. Peter n yuun de Yuda nɛra la yuun bisɛ ti la dela kisego ti a eŋɛ sɛla ti maleka la yele en la. Yia la, Peter yuun yeti: “Aai, n Daana, mam nan ka tabelɛ di sɛla n de ganleŋɔ bonɔ.” Ti maleka la le yele en yeti: “Sɛla te mam yete la nare te ho di da tɛn’ɛha te la ka nare te ho di.” (Tm. 10:​9-15) Peter yuun bɔkɛ ya. To eŋɛ la wani baŋɛ bala? Eŋa n yuun ta nyɛ liligere la ba’asɛ la, nɛreba batã n yuun keŋɛ Peter yire. Ba yuun yeti Kornelius n de ba daana la n boti a nyɛ Peter. La yuun san daɣɛ Peter n nyɛ liligere la zuo, a yuun kan sakɛ keŋɛ ta kɛ̃ se’em n daɣɛ Yuda nɛra yire. Yudadoma la yuun bisɛ ti sɛba n daɣɛ Yudadoma la dela dɛ̃ɣerɔdoma. (Tm. 10:​28, 29) Ge Yehowa n yuun yele Peter ti, eŋa boti la nɛra woo wum yelesoma la, Peter yuun eŋɛ la kalam tee a puti’irɛ nam Yehowa. (Mag. 4:18) Peter yuun mɔɔlɛ bo Kornelius la a yidoma ti ba za’a tara sakerɛ bɔ’ɔra Yezu ge ti zilam vo’osum la yuun sige ba zuo ti ba muse ko’om.—Tm. 10:​44-48.

9. To san kɔ’ɔn zamesa yelese’a n kpe’em Baabule la poan, to wan nyɛ nyuurɔ sugumnɔɔrɛ buyi la wani?

⁹ Wuu Peter la, la nari ti to nyɛta nɛŋa zamesa Naayinɛ Yelesum la. Saŋa zo’e zo’e to ni nɔŋɛ la to zamesa yelese’a bɔkerɛ n ka ba’ɛ kpe’em la. Ge la me nari ti to zamesa Baabule yelese’a n kpe’em la. La nari ti to tiregɛ nyɛta nɛŋa zo’e zo’e zamesa Baabule la, ta’an bɔkɛ yelese’a n kpe’em la. Bem zuo? Sɛla n sɔi la to wan nyɛ nyuurɔ sugumnɔɔrɛ buyi: Yia, to wan zamesɛ baŋɛ Yehowa ti la basɛ ti to tara nɔŋerɛ la gilema zo’e zo’e bɔ’ɔra en. Yi’i, to me san zamesɛ baŋɛ Yehowa yelese’ere ti to ka mina, bala wan kɛ̃ to suure ti to kɔ’ɔn bɔta ti to tɔɣera to saazuo Sɔ la yɛla bɔ’ɔra nɛreba. (Arom 11:33; Lil. 4:11) Peter yele la, le pa’alɛ to la sɛla: Ba san malum demese Baabule pa’alegɔ yɛla ase’a, la nari ti to me eŋɛ kalam tee to puti’irɛ ge sakɛ dɔla. To san ita bala, Yehowa wan kɔ’ɔn pa’ala tɔ ti to ta’an pu’usa en soŋa.

TƆƔESA PAUL TA’AN TARA HALESE’A N WAN BASƐ TI NAAYINƐ PUURƐ PEE

10. Wuu Kolose 3:​8-10 n pa’alɛ se’em la, la nari ti to eŋɛ la bem ti Yehowa puurɛ pee?

¹⁰ Yehowa me le pa’ala tɔ to wan eŋɛ se’em ta’an tara halesoma n wan basɛ ti a puurɛ pee. Tuntuna Paul yuun yeti, ‘yɛɛ halɛ kɛka la’ ge dekɛ ‘halɛ paalega la’ yɛ. (Kaalɛ Kolose 3:​8-10.) La dela to tiregɛ ta’an tara halesonɛ n wan basɛ ti Naayinɛ puurɛ pee. To geele Paul yele la bisɛ. Eŋa n yuun de bunbilipaalega la, a yuun kɔ’ɔn tiregɛ mɛ tuna ti a basɛ ti Naayinɛ puurɛ pee. (Ga. 1:14; Flp. 3:​4, 5) Ge a yuun ka mi eŋa n wan pu’usa Naayinɛ soŋa se’em. A yuun ka mi yelese’a ti Krista yuun pa’ala la, bala basɛ ti a yuun zɛkera la amea ge me ka tara halese’a n peeri Naayinɛ puurɛ. Paul yeti, eŋa dela mina n yuun ‘toori’ nɛreba.—1 Tim. 1:13.

11. Bem n yuun soŋɛ Paul ti a kelum tiregera ti a tara halesonɛ? Tɔɣɛ pa’alɛ.

¹¹ Paul n yuun nan daɣɛ Kristabia la, a yuun tari la sunsɔa. Tooma gɔŋɔ la yeti Paul sunsɔa n yuun nyie la Yezu podɔleba ti a “zegera te a ko” ba. (Tm. 9:1) Paul n yuun ta dɛna Kristabia la, a yuun tiregɛ yɛɛ a halɛ kɛka la basɛ mɛ. (Ep. 4:​22, 31) Hali la bala za’a, Paul la Barnabas sunsɔa n yuun nyie la taaba ti ba “ŋmɛ nɔkpe’ene.” (Tm. 15:​37-39) Paul yuun nyɔsegɛ mɛ ge bala ka basɛ ti a giila kɔ’ɔsɛ. Ge a yuun kɔ’ɔn tiregera ti a dɛna la mina ti Yehowa puurɛ wan pee la en.—1 Ko. 9:27.

12. Bem n yuun soŋɛ Paul ti a yɛɛ a halɛ kɛka la basɛ?

¹² Paul n yuun siregeri amea la zuo ti a tiregɛ tee a halɛ la. (Flp. 4:13) Wuu Peter la, Paul yuun dekɛ amea delum la “paŋsɛka te Na’ayenɛ [bɔ’ɔra la].” (1 Pe. 4:11) Ge saŋa ase’a, Paul yuun ni kelum tue mɛ ti a giila kɔ’ɔsɛ. A giila san ni kɔ’ɔsɛ, a ni ti’isa la Yehowa n iti yelese’a bɔ’ɔra en la ti la soŋera en ti a kɔ’ɔn ita teere.—Arom 7:​21-25.

13. To wan eŋɛ la wani ta’an tɔɣesa Paul?

¹³ Hali to san puɣum pu’usa Yehowa ti la paɛ yuuma zo’e zo’e, la dela ti to kelum tiregera ita teere. To tuuri mɛ. Makerɛ, to sunsɔa ta’an nyie ti to tɔɣɛ sɛla n ka nari. To san eŋɛ bala, to da ti’isa ti to kan malum eŋɛ sɛla pee Yehowa puurɛ. Ge la nari ti to tuɣum ita teere to yetɔɣum la to itigɔ poan. (Arom 12:​1, 2; Ep. 4:24) La nari ti to tɛ̃ra yelese’ere n pakɛ wa: La dela to bɔkɛ Yehowa n boti to eŋɛ sɛla ta’an kɔ’ɔn ita teere.

TƆƔESA DAVID GE BASƐ TI YEHOWA TE’ELE HO

14-15. Yehowa te’eli a nɛreba la wani? (Yooma 27:5) (Bisɛ foote.)

¹⁴ To san bɔta ti to tara pupeelum to vom poan, la nari ti to kɔ’ɔn basɛ ti Yehowa tɛ’ɛla tɔ. Yehowa ni te’ele to la wani ge tomam me wan eŋɛ la wani kɔ’ɔn basɛ ti a tɛ’ɛla tɔ?

¹⁵ Naba David yuun tari suure lua ti Yehowa wan te’ele en biɣi biɣi saŋa poan. (Kaalɛ Yooma 27:5.) Yehowa te’eli a nɛreba yɛsera la yelese’a n wan ta’an sa’am ba sakerɛ la. Yehowa te’eli a nɛreba la wani zina beere wa? Yehowa yeti, zaberɛ lɔɣeseko woo ti ba maalɛ ti ba dekɛ zabɛ la a nɛreba la kan ta’an ze’ele la ba. (Ym. 34:7; Isa. 54:17) La boi bim ti Sitaana la a nɛreba tari paŋa ge Yehowa tari paŋa gana ba. Hali ba san puɣum ku tɔ, Yehowa wan isige to. (1 Ko. 15:​55-57; Lil. 21:​3, 4) Yehowa soŋeri to mɛ putɛyiila san tara tɔ la wan eŋɛ se’em ti to kelum pu’usa en. (Mag. 12:25; Mt. 6:​27-29) To saazuo Sɔ la doli la mabiisi la keendoma poan soŋera tɔ ge me kpɛmesa to giila. (Isa. 32:​1, 2) To san kena zamesegɔ, to wan zamesɛ baŋɛ sarɔtɔ se’a poan ti Yehowa dɔla soŋera ge tɛ’ɛla tɔ.—Heb. 10:​24, 25.

16. Yehowa yuun te’ele David la wani?

¹⁶ David n yuun nam Yehowa nɔɔrɛ la, Yehowa yuun soŋɛ en mɛ ti a kɔ’ɛ a puti’irɛ soŋa ge me tara pupeelum. Bala yuun basɛ ti Yehowa te’ele en mɛ. (Dekɛ makɛ Magaha 5:​1, 2.) Ge David n yuun zaɣesɛ Yehowa nɔɔrɛ la, Yehowa yuun ka te’ele en la yelese’a n wan paɛ en la. (2 Sa. 12:​9, 10) Saŋa ase’a, nɛreba yuun ni ita David la sɛla n ka nari ti la wuna en. David yuun ni yese la a suuren zusɛ Yehowa, ti Yehowa me te’ele en. Yehowa yuun ni eŋɛ la wani eŋɛ bala? A yuun kpemese la David giila ge yele en ti a wan bisera en ge soŋera en. Yehowa me yuun basɛ ti a baŋɛ ti a nɔŋɛ en.—Ym. 23:​1-6.

17. To wan ta’an tɔɣesa David la wani?

¹⁷ Tomam me ta’an tɔɣesa David to san zusɛ Yehowa ti a soŋɛ tɔ ti to ta’an kɔ’ɛ to puti’irɛ soŋa. La nari ti to tɛ̃ra ti saŋa ase’a wuŋerɛ san paɛ tɔ, la daɣɛ ti Yehowa ka te’ele to mɛ ge la dela ton ka kɔ’ɛ to puti’irɛ soŋa la zuo. (Ga. 6:​7, 8) Yeletooro san paɛ tɔ ti la daɣena tomea n ta’asɛ, to yese to suuren zusɛ Yehowa ge tara puti’irɛ ti a wan buɣelɛ to suure ti to ta’an ŋmibe yele la poan.—Flp. 4:​6, 7.

KELUM DEKƐ HOMEA DELUM YEHOWA TI A PA’ALA HƆ

18. Nɛreba zo’e zo’e geele Naayinɛ pa’alegɔ la wani ge to wan eŋɛ la wani ti Naayinɛ kɔ’ɔn pa’ala tɔ? (Bisɛ fɔɔra la.)

¹⁸ To yuun 2026 yetɔɣum la zuo yeti: ‘Sɛba n eeri Naayinɛ wan tara pupeelum.’ La yele pakɛ mɛ zina beere wa ti to ita Yezu n yele n sɛla la ge me dekɛ tomea delum Yehowa ti a pa’ala tɔ. Bem zuo? Sɛla n sɔi la, zina beere wa nɛreba zo’e zo’e ka nani Naayinɛ pa’alegɔ. Nɛreba basɛba me sakɛ ti Naayinɛ boi ge ba pu’useri en la bamam n boti se’em. Basɛba me dekɛ la bamea delum nɛresaaleba. Bala n sɔi ti ba ka tara pupeelum la. La ka nari ti to tɔɣesa ba. To wan eŋɛ la wani ta’an dekɛ tomea delum Yehowa? La nari ti to kɔ’ɔn zamesa Yehowa Yelesum la, tara halese’a n wan basɛ ti a puurɛ pee, nana en ge me basɛ ti a tɛ’ɛla tɔ.