Jehovah nọ fakọna mẹhe to awufiẹsa mẹ lẹ bosọ nọ miọnhomẹna yé. Nawẹ mí gán hodo apajlẹ Jehovah tọn bo nọ tindo numọtolanmẹ awuvẹmẹ tọn na mẹdevo lẹ bosọ nọ hẹn kọgbọ wá na yé gbọn? Aliho dopo nado wàmọ wẹ nado nọ wleawuna jẹhẹnu he na gọalọna mí nado nọ tindo numọtolanmẹ awuvẹmẹ tọn na mẹdevo lẹ bosọ nọ miọnhomẹna yé. Etẹwẹ yin delẹ to jẹhẹnu ehelẹ mẹ? Etẹwẹ na gọalọna mí nado hẹn owanyi he mí do hudo etọn nado “to homẹmiọnna ode awetọ zọnmii” go? (1 Tẹs. 4:18) Mí dona wleawuna jẹhẹnu dagbe delẹ taidi mẹtọnhopọn, owanyi mẹmẹsunnu tọn po homẹdagbe po. (Kol. 3:12; 1 Pita 3:8) Nawẹ jẹhẹnu ehelẹ na gọalọna mí gbọn? Eyin numọtolanmẹ awuvẹmẹ tọn po jẹhẹnu he tindo kanṣiṣa hẹ ẹ lẹ po lẹzun apadewhe gbẹtọ-yinyin mítọn tọn, mí na nọ do ojlo sinsinyẹn nado gọalọna mẹhe to awufiẹsa mẹ lẹ. Dile Jesu dọ do: “Sọn susugege nuhe tin to ahun mẹ lẹ tọn mẹ wẹ onù nọ dọtọ́n. Mẹdagbe nọ de nudagbe lẹ tọ́n sọn adọkunnu dagbe etọn lẹ mẹ.” (Mat. 12:34, 35) Homẹmimiọnna mẹmẹsunnu po mẹmẹyọnnu mítọn he to nuhudo mẹ lẹ po yin aliho titengbe de he mẹ mí nọ do owanyi he mí tindo na yé hia te. w23.11 10 huk. 10-11

Mí dona biọ alọgọ eyin mí jlo na mọnukunnujẹ dọdai Biblu tọn lẹ mẹ. Lẹnnupọndo nuyijlẹdonugo ehe ji. Mí ni dọ dọ a to lẹdo he a ma jẹakọ hẹ de dlapọn, amọ́ bọ họntọn he zọnhẹ we de yọ́n filọ ganji. E yọ́n fihe mì te na taun tọn, podọ fihe ali dopodopo nọ planmẹ yì. Ayihaawe matin dọ homẹ towe na hùn dọ họntọn towe hodo we! Mọdopolọ, Jehovah taidi họntọn dagbe enẹ. E yọ́n sọgodo mítọn ganji. Enẹwutu nado mọnukunnujẹ dọdai Biblu tọn lẹ mẹ, mí dona nọ gbọn whiwhẹ dali biọ alọgọ Jehovah tọn. (Dan. 2:28; 2 Pita 1:19, 20) Taidi mẹjitọ dagbe lẹpo, Jehovah jlo dọ ovi etọn lẹ ni do sọgodo dagbe de. (Jel. 29:11) Amọ́ to vogbingbọn mẹ na mẹjitọ gbẹtọvi lẹ, Jehovah gán dọ nuhe na jọ to sọgodo po gbesisọ mlẹnmlẹn po. E hẹn ẹn diun dọ dọdai lẹ yin kinkan do Ohó etọn mẹ na mí nido plọnnu gando nujijọ titengbe delẹ go whẹpo yé nido jọ.—Isa. 46:10. w23.08 8 huk. 3-4

Jiwheyẹwhe ko na huhlọn Jesu nado didẹ nuhahun gbẹtọvi lẹ tọn lẹpo. Gbọn azọ́njiawu Jesu tọn lẹ gblamẹ, e dohia dọ emi tindo huhlọn nado duto nuhahun he mí ma gán didẹ na míde gbede lẹ ji. Di apajlẹ, e tindo huhlọn nado tún mí dote sọn nuhe yin adọ̀ nuhahun gbẹtọvi lẹ tọn lẹ tọn si, enẹ wẹ ylando he mí dugu etọn po kọdetọn etọn lẹ po, yèdọ awutu po okú po. (Mat. 9:1-6; Lom. 5:12, 18, 19) Azọ́njiawu etọn lẹ dohia dọ e gán hẹn awutu “wunmẹ lẹpo” gbọ bo tlẹ fọ́n oṣiọ lẹ sọnku. (Mat. 4:23; Joh. 11:43, 44) Humọ, e tindo huhlọn nado doalọtena yujẹhọn sinsinyẹn lẹ bosọ duto gbigbọ ylankan lẹ ji. (Malku 4:37-39; Luku 8:2) Lehe e vọ́ jidenamẹ do sọ nado yọnẹn dọ Jehovah ko na huhlọn mọnkọ Visunnu etọn! Mí gán kudeji mlẹnmlẹn dọ dona sọgodo tọn he Ahọluduta Jiwheyẹwhe tọn na hẹnwa lẹ na wá dandan. Azọ́njiawu he Jesu wà taidi gbẹtọvi de to aigba ji lẹ plọn mí nuhe e na wà to obá he gbloada hugan de mẹ to sọgodo whenue e na yin Ahọlu Ahọluduta Jiwheyẹwhe tọn to olọn mẹ. w23.04 3 huk. 5-7