Vlavo a ko pehẹ nukundiọsọmẹ sọn hagbẹ whẹndo tọn towe lẹ dè, kavi vlavo a ko yí yanwle agbasa tọn delẹ do sanvọ́ nado ze Ahọluduta lọ do otẹn tintan mẹ. (Mat. 6:33) Eyin mọ wẹ, a gán deji dọ Jehovah doayi azọ́n nugbonọ-yinyin tọn towe lẹ go. (Heb. 6:10) E yọnbasi dọ a ni ko do numimọ nugbo-yinyin hogbe Jesu tọn ehelẹ tọn dọmọ: “Mẹdepope ma tin he jo owhé kavi nọvisunnu lẹ kavi nọviyọnnu lẹ kavi onọ̀ kavi otọ́ kavi ovi lẹ kavi aigba lẹ do, na yẹn tọn podọ na wẹndagbe lọ tọn wutu he ma na mọ donu 100 to ojlẹ ehe mẹ todin—owhé lẹ, nọvisunnu lẹ, nọviyọnnu lẹ, onọ̀ lẹ, ovi lẹ po aigba lẹ po, gọna homẹkẹn lẹ—podọ ogbẹ̀ madopodo to titonu he ja mẹ.” (Malku 10:29, 30) Na nugbo tọn, dona he a ko mọyi lẹ ma sọgan yin yiyijlẹdo avọ́sinsan he a basi lẹ go.—Salm. 37:4. w24.03 9 huk. 5

Whenue Klistiani Jude tọn lẹ jiya huvẹ sinsinyẹn de tọn, mẹmẹsunnu he to agun Antioku Silia tọn mẹ lẹ “magbe, yèdọ mẹdopodopo sọgbe hẹ nuhe go e pé, nado do alọgọ kọgbọ tọn hlan mẹmẹsunnu he nọ nọ̀ Jude lẹ.” (Owalọ 11:27-30) Dile etlẹ yindọ fie mẹmẹsunnu he to oyà huvẹ lọ tọn ji lẹ te dẹn do yé, Klistiani Antioku tọn lẹ magbe nado gọalọna yé. (1 Joh. 3:17, 18) To egbehe mílọsu gán do awuvẹmẹ hia, eyin mí sè dọ sinsẹ̀n-basitọ hatọ mítọn lẹ jiya nugbajẹmẹji de tọn. Mí nọ yinuwa to afọdopolọji, vlavo bo nọ kanse mẹho agun tọn lẹ eyin mí gán nọgodona tito de, nọ basi nunina na azọ́n lẹdo aihọn pé tọn lọ, kavi nọ hodẹ̀ do mẹhe jiya nugbajẹmẹji lọ tọn lẹ tamẹ. Mẹmẹsunnu po mẹmẹyọnnu mítọn lẹ po gán sọ do hudo alọgọ tọn nado mọ dandannu gbẹ̀mẹ tọn lẹ. Whenue Ahọlu mítọn Klisti Jesu na wá nado hẹn whẹdida ṣẹ̀, mì gbọ e ni mọdọ mí to awuvẹmẹ dohia, podọ ewọ na basi oylọna mí nado “dugu Ahọluduta lọ tọn.”—Mat. 25:34-40. w23.07 4 huk. 9-10; 6 huk. 12

Jesu hodo apajlẹ lẹnpọn dagbenọ-yinyin tọn Jehovah tọn. E yin didohlan aigba ji nado dọyẹwheho na “lẹngbọ owhé Islaeli tọn he bu lẹ.” Amọ́, e do lẹnpọn dagbe hia whenue e to azọ́ndenamẹ ehe hẹndi. To gbèdopo, yọnnu he ma yin Islaelivi de vẹ̀ ẹ nado gbọazọ̀nna viyọnnu etọn he ‘gbigbọ aovi tọn to yasana sinsinyẹn.’ Jesu gbọn awuvẹmẹ dali wà nuhe nawe lọ biọ, bo hẹnazọ̀ngbọna viyọnnu etọn. (Mat. 15:21-28) Pọ́n apajlẹ devo. Jesu ko dọ jẹnukọn to lizọnyizọn etọn mẹ dọmọ: ‘Mẹdepope he mọ́n mi, yẹn na mọ́n ẹn ga.’ (Mat. 10:33) Amọ́ be e gbẹ́ Pita dai, whenue e mọ́n ẹn whla atọ̀n wẹ ya? Lala. Jesu mọdọ Pita ko lẹnvọjọ podọ e tindo yise. To fọnsọnku etọn godo, Jesu sọawuhia Pita podọ e yọnbasi taun dọ e ni ko hẹn ẹn deji dọ emi ko jona ẹn bo gbẹ́ sọ yiwanna ẹn. (Luku 24:33, 34) Jehovah Jiwheyẹwhe po Jesu Klisti po yin lẹnpọn dagbenọ. Bọ mílẹ lo? Jehovah nọ donukun dọ mí ni yin lẹnpọn dagbenọ. w23.07 21 huk. 6-7