Kpa ˗manˈ “ɲɔnsoadhɛ” ɛˈ dɩ ˈˈduɛ˗ ɲan

1. Dhɩwɛ˗ ˗kpan ˗glɔɲiɔn ˈˈbhli ˗ɛ? (Matie 5:3)

ZOOVA jhibho˗ dhɩ kman ˗glɔɲiɔn ˈˈbhli ˈmɛn. Ɛɛˈ kpɔ dhueˈ ka, ˗bho ˗a ˈye ˈkmʋn ˗nɩn ɛnˈ, ˗a ˈye dhɛ dhi, ˗a ˈye dhɛ ˈmʋn ˗paa ˈˈdhe ˗a ˈye ˈdhipɛn gbu ˈbhle. ˗Bho ˗a se dhɩ ˗ˈnɩn anˈ dhueˈ ˈbhle ɛˈ, ˗a ˈbhɛɛ ˗a ˈye ˈmɛn ˗aeˈˈ ˈkmʋn ˈye ˗aʋ kwai ˈkpa. Zoova jhibhiˈ ˗ka dhɛ ˗ˈnɛɛn ˗nɩn ˈo ˗ɛɛˈ dɩ kman ˗aʋ ˈbhli. Ɛmɛn ˗nɩn ˗a ˈyeɔ jhibho˗ ˈˈdhe ˗a ˈyeɔ i ˈˈtai˗ ɔ ˈye ˗aʋ jiebho po. (Zro Matie 5:3.) ˗Bho ˗a ˈye ˈmʋnan inˈ ˗nɩn ˈjɛɛn ɛnˈ, ˗a ˈyeɛ ˈˈɩ jhibho˗ ˗ka ɛ kɔan dɩ ɔ ˈyea ˗aʋ jiebho po ˈˈdhe ˗a ˈye ɔɔˈ ˗ˈˈgwlɩ ˗deɛ ɲan kpa.

2. ˗Bho ɲɔn ˈnaan “ɲɔn jhibhi ˗ka ɛ kɔandɩ Ɲɔnsoa ˈyeɔ jie bho po” ɛˈ, dhɛwɛ˗ ɛ ˈdha ˗a? ˗Poo dɩ ˈˈɩ.

² ˗Bho ɲɔn ˈnaan “ɲɔn jhibhi ˗ka ɛ kɔandɩ Ɲɔnsoa ˈyeɔ jie bho po” ɛˈ, dhɛwɛ˗ ɛ ˈdha ˗a? ˈDhe Glɛkɩ ghwlu ˈdhi ɛ, dhɛ ghwlu ˗ˈnʋn ˈdhaa ˗mɛn ˗nɩn ɲɔn ˗ɔɔ zroa ˈdhe ɲɔnsoadhɛ ˈdhi ɛ. Aʋ ˗naan ɲɔn ˗ɔɔ zroa aˈ dɩ tɔˈ i keaˈ. Ɔɔˈ ˈmʋnpaadhɩ ˈˈzraanˈ ˈˈdhe ɔ ˗deɛi ˈbho ˈˈkwiglɔ ɔˈ ˗jie ˈˈŋwɛn. Ɔɔˈ ˈjhe dhɛ ˈˈkai ɔɔˈ dhi, ˈjhru aˈ nɛn ɛn ˈkpɔ i, ˈˈcɛ ɛɛ ˈpɔ ˈˈmaʋn ˈˈdhe ɲʋn an pleeɔ i ɔɔˈ ˗nɩnsʋn anˈ dɩ. Ɔ jhibhiˈ ˗ka ˗bho ɔ ˈye dhɛ ˈjhe ɔ ˈye dhi ˈˈdhe ɔ ˈye ˈkmʋn ˗sie ɛˈ, ɛ kɔandɩ ɲʋn ˈyeɔ sʋn bho po ɛ. ˗Ka nɩan dhueˈ ɛ, ɲʋn ˗ʋa˗ zrɔa ˈdhe ɲɔnsoadhɛ ˈdhi ɛ, ɛ nɩn ɲʋn ˗ʋʋ jhibhi ˗ka ɛ kɔandɩ Ɲɔnsoa ˈyʋbʋ jie bho po ɛ. ˗ˈMɛn ɲɔnsoadhiidhɛ˗ Zoova a ˈˈɲɩanˈˈ ɲʋn kman ɔɔˈ dɩ ɛ, ʋa poɛ ˈe ˈkpɩ ʋa yeɛ trɔnˈ ˈdhi ˈjhee.

3. Dhɛwɛ˗ ˗aa mun ˈcɩan˗ ˈnɔn ˈcɩaandhɛ nɛn ˈdhi ˗ɛ?

³ ˈNɔn ˈcɩaandhɛ nɛn ˈdhi ɛ, Fenesi ˗ɲnʋnkpaoˈ ˗ʋn bhaea Zezi i ˗wɛeˈ ɔ ˈyʋ sʋn bho po ɛ, ʋmʋn ˗ʋanˈ dɩ ˗aa mun ˈtmʋn˗ ke tɛnˈˈ. Kplɩn taan ɲʋn ˗an ˈbɔan Zoova ˈyʋbʋ jie bho ˈyea ˈbhle ɛ, ɩmɩn˗ ˗aa mun ˈcɩan˗ ˈnɔn ˗bo nɔn ˈdhi. ˈBho ɛ ˈdhe ɛ, gɔˈ ˈdhɔɛeˈ Piɛɛ ˗e Pɔʋ ˗e ˈBheɔ Davidɩ toa ˈo ɛ, ˗aa mun ɔnˈ dɩ ˈtmʋn˗.

ƲN ˗JHA ƲANˈ ˈˈJƐ JHA, ƲN KPA SƲNBHOPOƐ˗ I ˗DEEƐ˗ ƝAN ˈˈDHE ƲN TOƐ˗ DHƐGWLƖDEƐ˗

4. Dhɛwɛ˗ Fenisi ˗ɲnʋnkpaoˈ a ˈbɔn Zezi ˈye nʋn ˗dhe ˗ɛ?

⁴ ˗Zɔn dhueˈ ˈɲnʋnkpaoˈ dhueˈ ˈghwlʋaˈ Fenisi ˈkpaa˗ Zezi i. ˗Zuu ˗saʋn ˗an ˈˈdu ʋanˈ ˈˈjhu ˈkle ˗dhe. (Mat. 15:21-28) ˈƝnʋnkpaoˈ ˗ˈnʋn ˈghwlʋaˈ ˈkɔi glu ˈˈdhe ʋn bhaeɛ˗ Zezi i ɔ ˈye ʋanˈ ˈˈjhu sʋn bho po. Kplɩn taan ˗a ˈbhɛɛa ˗a ˈyea ˈcɩan ˈdhe ˈɲnʋnkpaoˈ ˗ˈnʋn anˈ bo ˈdhi ɛ, ˗a ˈtmʋn ɩanˈ dɩ.

5. Kplɩn ˗wɛ Fenisi ˗ɲnʋnkpaoˈ ˗to ˗ɛ, ˈˈdhe ˗kawɛ Zezi nʋn ˗ɛn? (˗Ŋmʋn foto ˗ˈnɔn jha ˗ke.)

⁵ Fenisi ˗ɲnʋnkpaoˈ ˗ˈnʋn ˗toɛ˗ ˈˈjɛjhajhaa˗ ˈjɛɛn˗. Dhɛɛdɩ˗ ˗aa ˈdha kaˈ ˗a? Dhɛ nɩan ˈo ˗mɛn ˗nɩn ˗da Zezi ˗pooʋ gbe ˗jhu ˈˈɩ ɛ, ʋn ˈse ˈcɛn ˈkpa. Ɛgwɛ dhɛ ɲʋn sea Zuifʋ ˗nɩn kman gbe ɲnun anˈ dɩ ˈˈdhe ʋa ˈbhlɩ ˈbho ʋbʋ ˈˈŋwɛn ɛn, ɛɛˈ dɩ Zezi ˗pooʋ gbe jhu ˈˈɩ. ˗Bho ɛ ˗nɩn ˗mɔn Zezi ˗ghwlu ˈe ˈˈjhri kaˈ ˗dhe ɛˈ, ka ˗ˈye nʋn ˗ɛn? ˗ˈYe ka nʋn ɔ ˈˈjree˗ mʋn ˈmɛn ˈˈdhe ˗ˈye ˈo ˈkpa ˗ˈye mun? Fenisi ˗ɲnʋnkpaoˈ ˈse kaˈ nʋn. Ʋn ˗jha ʋanˈ ˈˈjɛ jha ˈˈdhe ʋn toɛˈ ˗ka ʋan kpʋan ˈe dhɛ ˈˈjhri ɛ. Dhɛ ˗ɛɛ toɛ ˗mɛn ˗nɩn ʋn kpa Zezi ɔˈ sʋnbhopoɛ˗ i deeɛ˗ ɲan. Dhɛwɛ˗ ˈˈtun ˗wɛeˈ ʋn nʋn kaˈ ˗a? Ʋn deɛ Zezi ˗gwlɩˈˈ. ˈƝnʋnkpaoˈ ˗ˈnʋn anˈ dhɛgwlɩdeɛ˗ ˈˈtun Zezi ˈmɛn ɔ yʋ sʋn bho po. ˗Bho Zezi ˗ghwlu ˈdhe ʋn bho ɔ ˈnaan ɲʋn dhbhoɔˈ ˈdhe Israɛ ɛˈ ˈˈɲnuun˗ sia kwlaˈ bho mɔn ˗dhe ɛˈ, ɔ ˗za ˗zuusaʋn ˈdhe ʋanˈ ˈˈjhu ˈmʋn ˈmɛn.

6. ˈSrɩn ˗wɛ ˗aa za ˈe Fenisi ˗ɲnʋnkpaoˈ aˈ bo ˈdhi ˗ɛ?

⁶ ˗Bho ˗a ˈye ˗aaˈ ɲɔnsoadhɛ ɛˈ dɩ ˈˈdu ɛˈ, ˗a ˈye kplɩn nɩan dhueˈ ˈbhle. ˗A ˈye ˗aaˈ ˈˈjɛ jha ˗jha ˗a ˈye sʋnbhopoɛ˗ i dee˗ ɲan kpa ˈˈdhe ˗a ˈye dhɛgwlideɛ˗ ˈbhle. -A ˈye ˗aaˈ ˈˈjɛ jha ˗jha ˈˈdhe ˗a ˈye Ɲɔnsoa ˗bhaeɛ ɲan kpa ˗wɛeˈ ɔ ˈye ˗aʋ sʋn bho po. ˗A ˈye Zezi ˗e ɲʋn ɔɔ jhiia i ˗wɛeˈ ɔɔ poa ˗aʋ jie bho ˗gwlɩˈˈ de. (Mat. 24:45-47) ˗Bho ˗aa sa ˗aaˈ ˈˈjɛ jha jha ˈˈdhe ˗aa sa sʋn bho ˗poɛ i deeɛ˗ ɲan kpa aˈ, ɛɛ nʋɛn Zoova ˗e Zezi ˈtʋn. (˗Ŋmʋn Zakɩ 1:5-7 jha ˗ke.) ˗Kaanbhla a, ˗ka Zoova a nʋan ˗aʋ sʋn bho ˗po sʋn ˗e ˗ka ɔɔ nʋan ˗aʋ dhɩ kman ˗aʋ ˈˈbhli ˗wɛeˈ ˗a ˈyea ˈmʋnan inˈ ˗nɩn ˈˈɲɩn sʋn ɛn, ˗a ˈtmʋn ɩanˈ dɩ. ˈBho ˗ˈmɛn ˈdhe ɛ, ˗ka ˗a ˈye Piɛ ˗e Pɔʋ ˗e ˈBheɔ Davidɩ ˗sraan an, ˗aa muɛn ɛnˈ dɩ ˈtmʋn ˗ke.

˗KA PIƐƐ NƲAN, KPƲN ˈE ƝƆNSOA Aˈ GHWLU ˈCƖAN˗ ˈˈJHRI

7. Dhbho ˗wɛ Zezi de Piɛɛ kwa ˗dhe ɛ, ˈˈdhe dhɛwɛ˗ Piɛɛ ˈye nʋn ˗wɛeˈ ɔ ˈye dhbho ˗ˈnɔn ˈˈjhriɛ ˈˈdu ˗ɛ? (Eble ˈˈwe 5:14–6:1)

⁷ ˗A ˈtmʋn dhbhoi Piɛɛ ɔɔˈ dɩ. Ɲʋn kɔan ɲan ˗ʋʋ jhibhɛˈˈ ˗ka Zezi nɩan ɲʋnpʋʋi ɛ, ɔ nɩɛn ʋaˈ dhueˈ. Ɔ jhibhɛˈˈ ˗ke ˗ka Zoova a jhiia Zezi i ɔɔ ˈyea ɲʋn “dhɛ tɔɔn ˈdhe ˈkmʋn sea ˈˈtianˈ ˈbhle” aˈ dɩ ˈdhi. (Zan 6:66-68) Zezi ˈyea ˈe jhaʋn ˈdhi mun ɛn, ɔ ghwluɛ ˈe Piɛɛ bho ɔ ˈnaan, “˗ˈˈɲɩn ˈman ˈbhlaeɲnun dhiidhɛ.” (Zan 21:17) Piɛɛ kpʋɛn ˈe dhbho ˗ˈnɔn ˈˈjhri ɔ ˈyeɔ nʋn ˈˈdhe Zoova poɔ sʋn bho ɔ ˈye ˈsɛɩ ˈsɔɔn ˈcre ˈdhe Biiblʋ aˈ ˈsɛɩ ˈˈklun. ˗Bho ɛ ˗nɩanˈ mɔn ˗dhe ɛˈ, Piɛɛ ɛˈ ˈˈjɛ ˈye Ɲɔnsoa aˈ ghwlu ˈcɩan. Ɛɛˈ kpɔ dhueˈ ka, Ɲɔnsoa Ghwlu aˈ ˈfɛ ˗ˈnɩɩn Pɔʋ ˈcrea ˗dhe ɛ, ɔ ˈcɩn ˈdhii. Ɔ jhibhɛ ˈˈɩ ˗ka ɩanˈ i ˈŋwɔan ˗kman anˈˈ. (2 Piɛ. 3:​15, 16) ˈKlaa Piɛɛ kpa ɩanˈ ˈcɩan an ɲan. Ɔ deɛ ˗gwlɩˈˈ ˗ka Zoova a muɔn sʋn bho ˗po ɔ ˈyɩ i ˈŋwɔn ˈˈdhe ɔ ˈyɩ ˈˈjhriɛ ˈˈdu ɛ.—Zro Eble ˈˈwe 5:14–6:1.

8. Zoova zian˗ dhɩ ˗ˈnɩɩn ˈˈɩn ˈdhe ɔɔˈ ˈˈɲɩnsʋn anˈ dɩ ˈdhi ɛ, ka Piɛɛ nʋn ɩanˈ kpʋn sʋn ˗ɛn?

⁸ Piɛɛ toɛˈ ˗ka ɔ dea Zoova ˗gwlɩˈˈ ˈbho dhbho ɲʋn deɔ kwa aˈ nʋanˈ. Ɛɛˈ kpɔ dhueˈ ka, ˗zɔn dhueˈ ɛ, dhbhoozuu˗ dhueˈ ˗ghwluɛ ˈe Piɛɛ bho ʋn ˈnaan ɔ dhi nmiin Moizɩ ɔˈ ˈtee ˈnaan Zuifʋ ˗ˈˈwe aˈ dhi ˗dhe ɛ. Piɛɛ ˗ɔ ˈjhea Moizɩ ɔˈ ˈtee ŋwɔn ˈdhe ɔɔˈ ˈkmʋn anˈ klɛɛ ˈdhi ɛ, ɔ ˈnaan ɛɛˈ dhɛ tu ɛˈ nʋanˈ ˗nɩɛn˗ dhɛ ˗saʋn. ˈBho ˗deenanˈ ɔ ˈnaan: “ˈˈƖɩn˗ ˈdhe ˈman ˈbhlei˗, ˈɩn ˈseanˈ dhɩ nɩn ˗ɩn sea i ˗gwɛ dhi kpɔ dhueˈ ˈdhe ˈman ˈkmʋn ˈdhi.” ˈSʋ dhbhoozuu˗ ˗ghwluɛ˗ ˈdhe ɔ bho ʋn ˈnaan: “Dhɩ Ɲɔnsoa za ˗ˈˈvlɛn in ɛn, ˗ˈbhʋɩ dhɩ sea i ˗gwɛ ˈdhaa˗ dɩ.” (Nʋʋdhɩ- 10:9-15) Piɛɛ ˗ˈŋwɔɔn˗ ˈbho ˈmɛn ˈˈdhe ɔ zian˗ ɔɔˈ dhɩjhesʋn ɩnˈˈ. Ka ˗a nʋn ɛnˈ jhibho˗ sʋn ˗ɛn? Ɔ ˗nɩn dhbhoozuu gwɛa ghwluaˈ a, ɛ ˈse ˈo ˗gwle ˈsʋ ɲʋn taan ye ˈdhe ɔ bho jhi. Ʋʋ ˈnaan, ʋaˈ dhbhojhei˗ Kɔɔnɛi ɔɔ ˈdha Piɛɛ ˈmɛn ɔ ˈye ˈdhe ɔ ˈˈŋwɛn mun. See ˗dhe ɛ, Piɛɛ ɛˈ ˗ˈŋwɔɔn˗ ˈdhe ɲʋn sea Zuifʋ ˗nɩn bho ˈˈgbu ˗pa dɩ. Zuifʋ ˗ˈwe ˈnaan ɲʋn sea Zuifʋ ˗nɩn se i ˗gwɛ. (Nʋʋdhɩ- 10:​28, 29) Zoova poa Piɛɛ sʋn bho ɔ ˈŋwɔɛn in ˗ka ɲʋn anˈ klɛɛ ˈyea ˗bɔyaˈˈ bo ˈŋwɔn ɔn, Piɛɛ ˈŋwɔɔn˗ ˈbho ˈmɛn. (Prov. 4:18) Piɛɛ bhla bo ˈdhe Kɔɔnɛi ˗e ɔɔˈ ˈˈgbuzɔncɛ bho. Ʋʋ deɛ Zezi ˗gwlɩˈˈ, Ɲɔnsoa aˈ ˗zuu jhiɛ ˈo ʋbʋ ˈˈkpe ˈˈdhe ʋʋ ˗jhiiɛ ˈˈninzɔn.—Nʋʋdhɩ- 10:44-48.

9. ˗Bho ˗aa sa dhɩ ˗ɩanˈ i ˈŋwɔan nɩan ˈkle ˈcɩan anˈ, dhɩjɛɩn ˗wɛ ˗aa ˈjhee ˈbho ˗ɛ?

⁹ ˗Ka Piɛɛ nʋan, ˗a ˈye Ɲɔnsoa aˈ Ghwlu ˈdhii zro jheejhee ˈˈdhe ˗a ˈye dhɩ ˗ɩanˈ i ˈŋwɔan sea ˈˈɩkman˗ ˈcɩan. ˈBho ˗ˈmɛn ˈdhe ɛ, ˗a ˈye dhɩ ˗ɩanˈ i ˈŋwɔan kman anˈˈ ˈdhe Ɲɔnsoa Ghwlu ˈdhi ˈcɩan ˗ke. ˗A ˈye nɔnˈˈ ˈmʋn ˈˈdhuo˗ ˗a ˈye Ɲɔnsoa aˈ Ghwlu ˈcɩan ˈˈdhe ˗a ˈyʋ i ˈŋwɔn. ˗Bho ˗a nʋɛn ɛnˈ, ˗aa muɛn ˈo dhɛjɛɛn ˈjhee˗. Dhɛɛdɩ˗ ˗ɛ? Ɛɛ nʋɛn aʋ dhɩjɛɩn anˈ kpɛ ˈsɔɔn ˈˈdhrui: Ɩanˈ kpɔ dhueˈ ˗mɛn ˗nɩn ɩan poɛ Zoova aˈ dɩkman ˗e ɔɔˈ ŋwɔnjheɛ˗ ˈˈkpe ˈdhe ˗a ˈmʋn. Ɛɛˈ ˈsɔɔn ˗nɛn ɛn, ɛɛ ˈˈɲɩɛnˈˈ ˗aʋ ˈkpɩ ˗aa yea ˗aaˈ ˈˈBho nɩan ˈe jhaʋn ˈdhi ɔɔˈ dɩ ˈtmʋn ˈdhe ɲʋn bho. (Rɔm. 11:33; Dhɩ. 4:11) ˈSrɩn ˗ˈnɩɩn ˗aa za ˈdhe Piɛɛ ɛˈ bo ˈdhi ɛ, ɩn ka: ˗Bho ɲʋn zian˗ dhɩ ˈˈɩ ˈdhe Ɲɔnsoa aˈ Ghwlu aˈ i ˈŋwɔn sʋn anˈ dɩ ˈdhi ɛˈ, ˗a ˈye ˈdoo˗ ˗a ˈye ɛɛˈ dɩ ˈŋwɔɔn˗. ˗Bho ˗a nʋɛn ɛnˈ, ˗aaˈ ɲɔnsoadhɛ ɛɛ muɛn i ˗ku ˈˈdhe ˗aa muɛn Zoova aˈ ˈˈɲɩanˈˈ ɲan ˗kpa.

˗KA PƆƲ NƲAN, ˈCƖAN KPLƖN ˗ƖAN˗ NƲAN ƝƆNSOA ˈTƲN

10. Dhɛwɛ˗ ɲɔnsoadhɛ ɛˈ ˈmʋnpaadhɩ ˈmʋn ˗paa ˈdha ˗a? (Kolɔsɩ-Kɔʋn 3:8-10)

¹⁰ ˗Bho ˗a ˈye ˈe Ɲɔnsoa ˈˈjhri ˈdhei ˗nmɔn ɔnˈ, ˗a ˈye ˗aaˈ ɲɔnsoadhɛ ɛˈ ˈmʋnpaadhɩ ˈdhe po. Dhɛwɛ˗ ˗ˈmɛn ˈdha ˗a? Dhbhoi Pɔʋ ˈnaan ˗a ˈye “˗nɩnsʋn ˗soa˗” i ˗za ˈˈdhe ˗a ˈye “˗nɩnsʋn ˗dhee” ˈdhe po. (Zro Kolɔsɩ-Kɔʋn 3:8-10.) Ɛɛˈ nʋanˈ an deeɛ ˈkpɩ i. ˗A ˗naan Pɔʋ ɔˈ dɩ tɔˈ i keaˈ. ˗Ɛ ˈghwlʋa ˈdhe ɔɔˈ ˈˈzaan˗ nɔnˈˈ ɔn, ɔ poɛ ˈe ˈkpɩ ɔ ˈye ˈe Ɲɔnsoa ˈˈjhri ˈdhei ˗nmɔn. (Gal. 1:14; Fil. 3:​4, 5) ˈKlaa ˗ka ɔ ˈyea Ɲɔnsoa aˈ ˈˈɲɩn sʋn nʋn ˗kajɔɔnka a, ɔ seɛ jhibho˗ ˗dhe. Ɔ se tɔˈdɩ jhibho˗ ˗ke ˗dhe ˈdhe Zezi ɔˈ dɩ ˈdhi. Ɔɔ ˈbhɛɛ ɔɔˈ ˈˈjɛ ˈˈɩ ˈjɛɛn ˗dhe. Ɔ ˈnaan, ɔ “˗ɲniɛn˗ ˈŋwɔn in”.—1 Tim. 1:13.

11. Dhɩwɛ˗ Pɔʋ ˈye ˈˈɩ zian˗ ˗dhe ˗ɛ?

¹¹ ˗Da Pɔʋ ˈsea kletiɛn ˗nɩn ke ˗dhe ɛ, ɔɔ ˈˈdooˈ ɔɔ yea ˈcɛn ˈkpa. ˗Bo dhueˈ nɩan ˈe Nʋʋdhɩ aˈ ˈsɛɛ ˈdhi ˈnaan Pɔʋ ˈɲɛn Zezi ɔˈ dhɛcɩaʋn˗ ˈmʋn ˗dhe ˈjɛɛn ˈsʋ ɔɔ ˈbɔn ɔ ˈyʋbʋ dhbhaˈ. (Nʋʋ. 9:1) Ɔ ˈkpa kletiɛn ɛn, ɔ poɛ ˈe ˈkpɩ ɔ ˈye ɔɔˈ ˗nɩnsʋn soa ˗ˈnʋn i ˗za. (Efɛ. 4:22, 31) ˗Bho ɛ ˗nɩanˈ mɔn ˗dhe ɛˈ, Pɔʋ ɔɔ ˈkpa ˈcɛn ˈmɛn ˗zɔn ˗ˈnɔɔn. ˗Da ɔ ˗nɩn Banabe ˈsea ghwlu iˈ ˈŋwɔɔn˗, ɔ ˈkpa ˈcɛn ˗dhe ˈjɛɛn˗. (Nʋʋ. 15:37˗39) Ɛ kpʋɛn Pɔʋ ˗glʋˈ ˗dhe ˈjɛɛn˗ ˈklaa ɔ ˈse ˈkpɩ i ˈmɛn. ˗Ka Ɲɔnsoa a ˈbɔan ɔ ˈyea ˗nɩn ɛn, ɔ ˈseanˈ ˗nɩn ˗dhe. ˈKlaa ɔ kpa ˈe ˈkpɩ ˗pooɛ ɲan ˗wɛeˈ ɔ ˈye ˈe Ɲɔnsoa ˈˈjhri ˈdhe i ˗nmɔn.​—1 Kol. 9:27.

12. Dhɛwɛ˗ po Pɔʋ sʋn bho ˗wɛeˈ ɔ kpa ɔɔˈ kplɩn anˈ ˈˈɩ zian˗ ɲan ˗an?

¹² Pɔʋ ˈbhɛɛ ɔ ˈye ɔɔˈ kplɩn ˈˈɩn zian˗ ˗dhe, dhɛ nɩan ˈo ɛ, ɔɔ jha ɔɔˈ ˈˈjɛ jha. (Fil. 4:13) ˗Ka Piɛɛ nʋan an, Pɔʋ deɛ ˈkpɩ Ɲɔnsoa a ˈˈɲɩanˈˈ ɲɔn ˗gwlɩˈˈ. (1 Piɛ. 4:11) Pɔʋ ɔɔ nʋn dhɛ sea ˈo ˗kɔn ˈmɛn ˗ke ˗zɔn ˗ˈnɔɔn ˈˈdhe ɛɛ dhbhɔˈ ˈkpɩ i ˗dhe. ˗Bho ɔ ˈmɛn ˈkpɩ i ɛˈ, ɔɔ naan dhɩ ˈdhɔɛeˈ ɔɔˈ ˈˈBho nɩan ˈe jhaʋn ˈdhi nʋan ˈdhe ɔɔˈ ˈkmʋn ˈdhi tɔˈ ˈˈkpei. Ɛɛˈ nʋɛnˈ ɔɔ ˈyea ɔɔˈ kplɩn ˈˈɩn zian˗ ɲan kpa ˗wɛeˈ ɔɔ ˈye ˈe Zoova ˈˈjhri ˈdhei nmɔn. —Rɔm. 7:21-25.

13. ˗Kawɛ ˗a ˈbhɛɛ ˗a ˈye Pɔʋ ˗sraan ˗an?

¹³ ˗Ka Pɔʋ nʋan, ˗a ˈyeɛ ˈˈɩ jhibho˗ ˗ka ɛ kɔandɩ ˗a ˈyea ˈe kpɩ po ˗a ˈyea kplɩn ˈˈɩ zian˗ ɲan kpa ˈˈdhe ˗a ˈyea ˈe ˗nɩnsʋn ˗dhee po ˗bho ˗a ˗gwle ˈe tɔˈdɩ ˈdhi mɔn ˗dhe ɛˈ. ˗A ˈbhɛɛˈ ˗a ˈye dhɛ sea ˈo ˗kɔn nʋn, ˗ka ˈcɛn ˈkpaa˗ ˗aeˈˈ dhɛ sea ˈˈjhriinmɔn ɔnˈ ˈtmʋan nɩan. ˗Bho ɛ ˗nɩn kaˈ mɔn ˗dhe ɛ, ˗a kpa ˈe ˈkpɩ ˗poɛ˗ ɲan ˗wɛeˈ ˗a ˈye ˈe Ɲɔnsoa ˈˈjhri ˈdhei ˗nmɔn. (Rɔm. 12:​1, 2; Efɛ. 4:24) ˗Bho ˗aa sa ˈbɔn ˗a ˈye ˗aaˈ kplɩn ˈˈɩn zian˗ ɲan kpa aˈ, dhɛ ɛˈ kpɔ dhueˈ ˗nɩn ˈo ˗a ˈye i ˈŋwɔn. ˗A ˈye Zoova i ˈˈtai˗ ɔ ˈye ˗aʋ dhɛ ˗tɔɔn ˗wɛeˈ ˗a ˈyeɔ jhibho˗ ˗kajɔɔnka.

˗SRAAN DAVIDƖ ˗ˈMƐN ˈˈTAI˗ ZOOVA I Ɔ ˈYE ƲN ˈDHEI ˗FUO˗

14-15. ˗Kawɛ Zoova a nʋn ɔnˈ dhbhonʋʋn˗ ˈdhei ˗fuo˗ sʋn ˗ɛn? (Psaume 27:5) (˗Ŋmʋn foto nɩan ˈo ˈˈkpe jha ˗ke.)

¹⁴ ˗Bho ˗a ˈye ˈmʋnan inˈ ˗nɩn ˈjɛɛn ɛnˈ, ɛ se ˗aaˈ ɲonsoadhɛ ɛˈ dɩ ˈˈduɛ ˗e kplɩn anˈ ˈˈɩn zian anˈ ˈsʋ ˗a ˈye nʋn ˗nɩn. ˗A ˈye Zoova aˈ ɲʋndheifuɛ˗ ˈbɔn. ˗Kawɛ Zoova a nʋn ˗aaˈ ˈdhei ˗fuo˗ sʋn ˈˈdhe ˗ka ˗a ˈye ɛɛˈ ˗to sʋn nʋn ˗ka ˗aa ˈbɔan ɔ ˈyea ˗aʋ ˈdhei ˗fuo˗ ˗ɛ?

¹⁵ ˈBheɔ Davidɩ deɛ ˗gwlɩˈˈ ˗dhe ˗ka Zoova a muɔn ˈdhei ˗fuo˗ ˈdhe ˈkledɩ ˈdhi ˗ɛ. (Zro Psaume 27:5.) Zoova a fuɛ ɔɔˈ ˈcɛ ˈdhei ˗wɛeˈ dhɛ ooˈˈ dhɛ ˗aeˈˈ ɲɔn ooˈˈ ɲɔn ˈse ʋaˈ dhɛgwlɩdeɛ˗ ˈkɔɔ˗ i. ˗Kawɛ Zoova a nʋn ɔɔˈ ˈcɛ ˈdhei ˗fuo˗ sʋn ˈzian ˗an? Ɔ cɛn ghwlu ɔ ˈnaan, ˗ka dhɛsaʋn˗ ɲʋn an mubʋ ˈˈdrui ˗nʋn ˈjhe ɛ ˗nɩn mɔn ˗dhe ɛˈ, ɛ ˈse ˈo dhɛ ˗po i. (Ps. 34:7; Is. 54:17) Satan ˗e ɔɔˈ ˗ziisaɩn, ɛmɛn ˗e ɲʋn ˗an vɔan ˗aʋ bho kman anˈˈ ʋʋ ˈye ˗aʋ ˗zii. ˈKlaa Zoova ˈsʋbʋ i ˈˈtai˗ dhi ˗flɛ ˗wɛeˈ ʋʋ ˈye ˗aʋ dhɛsaʋn˗ ˈˈdhrui ˗nʋn. ˗Bho ʋʋ dhbhaˈ ˗aʋ mɔn ˗dhe ɛˈ, Zoova a muɛn ˗aʋ ˈkmʋn dhe ˗jha ˈbho ɔɔ ɲʋn anˈ ˈˈkuɲinɔnˈ za aˈ. (1 Kol. 15:55-57; Dhɩ. 21:​3, 4) Dhɩ ˗ˈnɩɩn ˗ɩan˗ ˈˈzrua ˗abʋ ˗ke ɛ, Zoova a muɛn ˗aʋ sʋn bho ˗po ˈdhe ɩanˈ dɩ ˈdhi ˗wɛeˈ ˗a ˈye ɔɔˈ ˈˈɲɩanˈˈ ɲan kpa. (Prov. 12:25; Mat. 6:27-29) Zoova ˈˈɲɩanˈˈ ˗aʋ ˈdhoudhi ˗ɲmai ˗e ˈdhoudhi ˗ɲnʋnkpaeˈ ˈdhe ɔ bho ˈˈgbuzɔnˈ ˗ʋa˗ po ˗aʋ sʋn bho ˈdhe ˗aaˈ ˈkledɩ ˈdhi. ˈˈDhe ɔ de ˈo ɔ ˈˈɲɩn ˗aʋ ɲankɔʋn˗ ˗ʋa˗ ˈˈdu ˗aaˈ dɩ. (Is. 32:​1, 2) ˈBho ˗ˈmɛn ˈdhe ˗ke ɛ, Zoova a jhiiɛ ˗aaˈ ˈˈdhruigbooɛ˗ ˗mɩɩnˈˈ ˗e ˈklaeˈˈ dhi ɔɔ yea ˗aʋ sʋn bho po.—Eble. 10:​24, 25.

16. ˗Kawɛ Zoova nʋn Davidɩ ɔˈ ˈdhei ˗fuo˗ sʋn ˗dhe ˗ɛ?

¹⁶ Dhɛ Davidɩ ɔɔ ˈjhea Zoova ŋwɔn ˗dhe ɛ, ɛɛ nʋɛnˈ Zoova a poɔ sʋn bho ɔɔ yea ˈo dhɛjɛɛn za ɔɔ ˈyea nʋn, ɛɛˈ dhɛ tu ɛɛ poɛ Davidɩ ˈmʋnan inˈ. (˗Ŋmʋn Proverbes 5:​1, 2 jha ˗ke.) Davidɩ ˗bhlaa Zoova aˈ ghwlu ŋwɔn ɔn, ɔ ˈjheɛ ˈkledɩ˗ ˗duuˈˈ ˈˈjhibhaˈ ˈˈdhe Zoova ˈse ˈkledɩ˗ ˗ˈnɩn jie ˗kaan. (2 Sam. 12:​9, 10) ˈˈDhe ˗da Davidɩ ˈsea dhɛ nʋn ˗wɛeˈ ɲʋn ˗ˈnʋʋn an ˈˈduɔˈˈ ˈkle ˈdhe? Davidɩ bhaeɛ˗ Zoova ɔ yeɔ dɩ nɩan ˈbho ɔ ˗gwlɩˈˈ ˈtmʋʋn ˈˈdhe Zoova nʋɛnˈ Davidɩ yeɛ ˗gwlɩˈˈ de ˗ka ɔ kman ɔɔˈ ˈdɩ ˈˈdhe ɔɔ muan ɔɔˈ dɩ ˈˈdu ɛ.—Ps. 23:1-6.

17. ˗Kawɛ ˗a ˈbhɛɛ ˗a ˈye Davidɩ ˗sraan ˗an?

¹⁷ ˗A ˈbhɛɛ ˗a ˈye Davidɩ ˗sraan ˈbho Zoova aˈ bhae nanˈ ˗e ˈbho ɔɔˈ ˈsrɩn i dee˗ ˗nanˈ. Dhɛ ˗a ˈsea bho ˈˈmae dhi ˗mɛn ˗nɩn, ˗bho ˗a se Zoova aˈ ˈsrɩn ˈˈjhriɛ ˈˈdu ɛˈ, ˗a ˈbhɛɛ ˗a ˈye ˈo ˈkledɩ ˈjhee˗. (Gal. 6:​7, 8) ˗Bho ˗aa sa Zoova ŋwɔn ˈjhe mɔn ˗dhe ɛˈ, ˗zɔn ˗ˈnɔɔn, dhɩ ˗ˈnɩɩn ˗ɩan˗ ˈˈdu ˗aʋ ˈkle. ˗Bho ɛ ˗nɩn kaˈ aˈ, ˗a ˈye dɩ nɩan ˈdhe ˗aaˈ ˗pɛɛ bho Zoova ˈtmʋʋn˗ ˈdhe bhaeghwlu ˈdhi, ɔɔ muɛn ˗aʋ dɩ ˗ˈgwlɩ i ˈˈdu.—Fil. 4:​6, 7.

KPA ˗MANˈ ƝƆNSOADHƐ Ɛˈ DƖ ˈˈDUƐ˗ ƝAN

18. ˗Kawɛ ɲʋn jhia ˗aʋ ˈdhei a ˈjhe Ɲɔnsoa aˈ ˈsrɩn ˗ɛn, ˈˈdhe ka ˗a ˈye nʋn ˗wɛeˈ ˗a ˈye Ɲɔnsoa aˈ ˈsrɩn ˈˈjhriɛ ˈˈduɛ˗ ɲan kpa ˗a? (˗Ŋmʋn fete ˗ˈnɩn jha ˗ke.)

¹⁸ 2026 zʋn anˈ Biiblʋ aˈ ˈˈjhriɛ˗ ˈnaan: “ˈˈNiman kpʋn ɲʋn ˗ʋʋ jhibhi ˗ka ɛ kɔandɩ Ɲɔnsoa ˈyea ʋaˈ ˈkmʋn jie bho po ɛ.” Dɩ ˗ˈnɩn Zezi ˈtmʋan, ɩanˈ ˈˈjhriɛ ˈˈduɛ˗ ˗kɔndɩ ˈjɛɛn˗ ˈnɔn ˗aaˈ nɔnˈˈ. Dhɛɛdɩ˗ ˗ɛ? Dhɛ nɩan ˈo ˗mɛn ˗nɩn, ˈzɩan an, ɲʋn anˈ ˗da ˗duuˈ ˈnaan ʋʋ ˈse ˈbɔn Ɲɔnsoa ˈyʋbʋ jie bho po. ˗ˈNʋʋn ˗nɩn ˈo ˗ʋʋ de Ɲɔnsoa ˗gwlɩˈˈ, ˈklaa ˗ka ʋa ˈbɔan an, ˈkamɔn˗ ʋa ˈˈɲɩɔn. ˗ˈNʋʋn ˗ke ɛ, ˗glɔɲiɔn ɔnˈ ˈsrɩn ˗ɩan˗ pʋbʋ jie bho, ɛɛ nʋɛnˈ ʋaˈ klɛɛ se ˈmʋnan inˈ ˗nɩn. ˗Aaˈ sraan ʋbʋ ˗dhe. ˗ˈMɛn ka ˗a ˈye nʋn ˗wɛeˈ ˗a ˈye Zoova aˈ ˗gwlɩˈˈ ˗deɛ ɲan kpa ˗a? ˗A ˈye Zoova aˈ Ghwlu ˈcɩan an ɲan kpa, ˗a ˈyeɔ ˗gwlɩˈˈ de jheejhee ˈˈdhe ˗a ˈyeɔ i ˈˈtai˗ ɔ ˈye ˗aʋ jie bho po.