˗Kawɛ ˗ˈbhɛɛ ˗ˈye zeieghwliɛ ɛˈ ˈsɛ po ˗ɛ?

1-2. Dhɛ Zezi toa ˈo ɔɔˈ ˈkmʋn ˗aaˈ dɩ ɛ, dhɛwɛ˗ ɛ ˈye ˗aʋ ˈˈtun ˗a ˈye nʋn ˗ɛn, ˈˈdhe dhɛɛdɩ˗ ˗ɛ? (2 Kolɛntɩ-Kɔʋn 5:​14, 15) (˗Ŋmʋn foto ˗ˈnɔn jha ˗ke.)

˗BHO ˈˈgbu ˗bhlua˗ ʋn ˈˈdhru ˗wɛeˈ ɲɔn jhi ɔ ˗za ʋn ˈdhe dhɩ ˈzɔn ɔnˈ, ka ɔɔˈ ɲɔn tu ɔɔˈ dɩ aa mun ˗nɩn ˈbhoo˗ ˗gwlɩˈˈ ˗ɛ? ˗Bho ɔ zeie˗ ɲʋn ˗ˈnʋʋn mɔn ˗dhe ɛˈ, ˗man muɔn ˈsɛ˗ ˗po dhɛ ɔ nʋan ʋn ˈˈdhrui ɛɛˈ dɩ.

² ˗Ka ˗a nʋan ɛɛˈ ˈjhe sʋn ˈdhe ˈcɩaandhɛ zia ˈdhi ɛ, ɲɔn ˈye ˗aʋ sʋn bho po ˗wɛeˈ ˗a ˈye ˈe ˈmɛan anˈ ˗kʋɔn˗ kwlaˈ ˈghwlʋ. ˈKlaa ˈsraa˗ Zezi za ˈbhɛɛˈ ɔ ˈyea ˗aʋ zeie˗: (1) Ɔɔ muɛn ˗nʋn ˗aaˈ dhɩsaɩn ˈye ˗gwɛ, (2) ˗a ˈye ˈˈɩ gbaˈ ˈˈdhe (3) ˗a ˗nɩn ˗aa Nʋin˗ Zoova ye jhbhɛɛ˗. Ɛ nʋɛn ˗a ˈbhɛɛˈ ˗a ˈye ˈkmʋn sea ˈˈtianˈ ˈbhle ˈjhe ˈdhe Zoova aˈ ˈkmʋn ˗dhee ˈdhi. Ɛ se doo da ˈbhle, zeieghwliɛ ɛɛ toɛˈ ˗ka Zezi kman ɲʋn anˈ dɩ. Ɲʋndɩkman˗ ɔ ˈbhlea see ˗da ɔ ˈsea da ˈbhlʋa ˈˈkpe ˗jhii ke ˗dhe ɛ. (Prov. 8:​30, 31) Dhbhoi Pɔʋ ˈnaan: “Ɲʋndɩkman˗ Zezi toa a ˈˈtun ˗aʋ ˈmɛn.” (Zro 2 Kolɛntɩ-Kɔʋn 5:​14, 15.) Ɛɛ toɛˈ ˗ka ɲʋndɩkman˗ Zezi toa ˈye ˗aʋ ˈˈtun ˗a ˈyeɔ ˈsɛ po zeieghwliɛ ɛˈ dɩ. ˈˈDhe ˗a ˈse dhɛ ɔ nʋan ˗aʋ ˈˈdhrui bho ˈˈmae˗ dhi ˗flɛ.

3. Ka ˗aa nʋan ˈsɛ ˗po sʋn zeieghwliɛ ɛˈ dɩ ɛ, dhɛɛdɩ ɛ ˗nɩn ˗ka ɲʋn ˗ˈnʋʋn an nʋan ˈbhɛɛ ɛ ˈye ˈˈkpei zela˗ ˗a?

³ Ka ˗man nʋn ˈsɛ ˗po sʋn zeieghwliɛ ɛˈ dɩ ˗ɛ? ˗Ka ˗man nʋan ˈsɛ ˗po sʋn ɛn, ɛ ˈbhɛɛˈ ɛ ˈye ˗ka ɲʋn ˗ˈnʋʋn an nʋan ɛɛˈ ˈsɛ ˗po sʋn ˈye ˈˈkpei zela˗. ˗Bho ˗a ˈyeɛ i ˈŋwɔn ɔnˈ, ɛ nɩn ˗ka ɲʋn taan anˈ muan ˈdhebhaˈ ˗da nɩan dhueˈ ɛ. Ɲʋn nɩan taan se ˗da dhueˈ ˗nɩn. ˗ˈMɛn ʋʋ ˈse ˗jie˗ dhueˈ ˗kpa i kpɔˈˈ kpɔˈˈ. ˗Ka nɩan dhueˈ ˗ke ɛ, ˗bho ˗nɩn: (1) Biiblʋ ˈcɩain, (2) ˗bho ˗jhii ˈˈninzɔnˈ (3) ˗aeˈˈ ˗tɛɛn Zoova aˈ ˗glibha bho ɛˈ, ˗ka ˗man muan zeieghwliɛ ɛˈ ˈsɛ ˗po sʋn nʋn ɛn, ɛ ˈye ɛɛˈ ˗nɛn ka ˗nɩn. ˗Bho ˗nɩn ˈe ɲʋn anˈ kpɛ ˗ˈnʋn anˈ dhueˈ ˈˈklun ɛnˈ, ˗ka ˗ˈyea ˈsɛ ˗po sʋn nʋn zeieghwliɛ ɛˈ dɩ ɛ, ɛmɛn ˗aa mun ˈcɩan˗ ˈnɔn ˈcɩaandhɛ˗ nɛn ˈdhi.

˗BHO ˗NƖN BIIBLƲ ˈCƖAIN

4. ˗Kawɛ Biiblʋ ˈcɩaʋn anˈ dɩ ˗nɩn ˈbho Zoova ˗gwlɩˈˈ ˗ɛ?

⁴ ˗Bho ˗nɩn Biiblʋ ˈcɩain ɛnˈ, dhɛ ˗ˈyea jhibho˗ ˗mɛn ˗nɩn: Dhɛ ˗man ˈcɩan tɔˈdɩ nɩan ˈe Biiblʋ ˈdhi ˗e Zoova aˈ jhibhɛ ɛ, ɛɛ toɛˈ ˗ka Zoova kman ˗man dɩ ˈˈdhe ɔɔ ˈbɔan ˈyea ˈdhe ɔɔˈ jhbhɛɛʋn˗ ˈˈklun ˗nɩn ɛn. (Zan 6:44; Nʋʋdhɩ- 13:48) “Zoova a ˈjhe dhɩ nɩan ˈe ˗manˈ ˗pɛɛ bho ˈmɛn.” Dhɛ ˗ˈmɛn ˈdhaa ˗mɛn ˗nɩn ˈkpɩ ˗man poa ˈe ˗wɛeˈ ˗ˈyeɔ jhibho ɛ, ɔɔ dɩ ˈˈjhriɛ ˈˈkpe ˈˈdhe ˗bho ɔɔ sa ʋn ˈˈjhe ˗man sa dhɩ ˗ˈnɩɩn ˈˈɩ zian ˈdhe ˗manˈ ˈkmʋn ˈdhi ˗wɛeˈ ˗ˈye ˈdhe ɔ ˈˈjhri ˈdhei ˗nmɔn ɔnˈ, ɛɛ poɛ ɔɔˈ ˗pɛɛ ˈmʋnan inˈ. (Prov. 17:3; 27:11) ˈDhe zeieghwliɛ ɛˈ ˈsaa ˈmʋn ɛn, aʋ ˈbhɛɛˈ aʋ ˗nɩn Zoova ˈye jhbhɛɛ˗. (Rɔm. 5:​10, 11) Aʋaˈ ˈˈmae˗ ɛɛˈ dhɛ tu bho ˗dhe.

5. ˗Kawɛ Biiblʋ ˈcɩaʋn˗ ˈbhɛɛ ʋʋ ˈye ˈsrɩn nɩan ˈe Filipʋ˗Kɔʋn 3:16 ˈdhi ˈˈjhriɛ ˈˈdu ˗ɛ?

⁵ ˗Bho ˗nɩn Biiblʋ ˈcɩain ɛnˈ, ˗kawɛ ˗ˈbhɛɛ ˗ˈye ˈsɛ po zeieghwliɛ ɛˈ dɩ ˗ɛ? Ɛɛˈ kpɔ dhueˈ ˗mɛn ˗nɩn ˗ˈye dhɛ Pɔʋ ˈtmʋʋan Filipʋkɔʋn ˈˈjhriɛ ˈˈdu. Ɔ ˈnaan: “˗Ka ˗aaˈ ɲɔnsoadhɛ ˈjhe ɛ kui mɔn ˗dhe ɛˈ, ˗a kpa naanˈ ɲan ˈbho ˗jie˗ nɩan dhueˈ ˈˈkpe.” (Fil. 3:16) ˗Ka Biiblʋ ˗ˈnɩɩn an nʋan Biiblʋ aˈ ˈˈjhriɛ nɛn ˗po sʋn kaˈ ka: “˗A ˈye naanˈ ɲan kpa ˈbho ˗jie nɩan dhueˈ ˈˈkpe.” Dhɛ ˗a ˈyea i ˈŋwɔn ˈdhe ˈsrɩn nɩn anˈ dɩ ˈdhi ˗mɛn ˗nɩn, ˗aaˈ ˈˈtai˗ dhɛ ooˈˈ dhɛ i ˗dhe ɛɛ kaan ˗abʋ jie dhe ˗dhe ˈbho ˈkmʋnɩɛn ɛnˈ jie ˈˈkpe.—Mat. 7:14; Luikɩ 9:62.

6. Dhɛwɛ˗ Biiblʋ ˈcɩaʋn˗ ˈbhɛɛ ʋʋ ˈye nʋn ˗bho dhɩ ˗ˈnɩɩn ʋʋ ˈyea ˈˈɩn zian˗ ˈdhe ʋaˈ ˈkmʋn ˈdhi ˗nɩn ˈkle ˗ɛ? (Deutéronome 30:11-14) (˗Ŋmʋn foto ˗ˈnɔn jha ˗ke.)

⁶ ˈˈDhe ˗bho dhɩ ˗dhee ˈcɩan ˈdhe Biiblʋ ˈdhi aˈ ˈŋwɔɔɛn˗ ˗nɩn ˈkle ˈdhee˗ bho ɛˈ, dhɛwɛ˗ ˗ˈye nʋn ˗ɛn? ˈBɔn dhɛ iˈ ˈŋwɔɛn in ˈdhe ɩanˈ dhɩ tu aˈ dɩ ˈdhi ˈˈdhe bhae˗ Zoova ɔ ˈye ʋn sʋn bho po ˗ˈye dhɛ iˈ ˈŋwɔn. (Ps. 86:11) ˗Bho nʋn ɛnˈ dhɛ tu mɔn ˗wɛeˈ ɛɛˈ i ˈŋwɔɛn˗ ˗kman anˈˈ ke ˗dhe bho ɛˈ, ˗manˈ ˈmɛn ˗e ˈkpɩ i ˗dhe, kpa Biiblʋ ˈcɩan˗ ɲan. ˗Aeˈˈ ɛ nɩn dhɛ ˗ɛ ˗nɩn Biiblʋ aˈ ˈtee aˈ kpa ˗jie dhueˈ ˗man nʋn, ˗ɛɛˈ kwa iˈ ˗zaa kman anˈˈ ˗dhee bho? Dhɛ ˈsea bho ˈˈmae˗ dhi ɛ, ɛmɛn ˗nɩn dhɛ ˗glɔɲiɔn sea ˈˈɩ gbaˈ sea ˈbhɛɛ˗ ɔ ˈyea nʋn ɛn, Zoova se ˈbhɛɛ˗ ɔ ˈyeɔ ɛɛˈ dhɛ tu i dee˗. ˗ˈBhɛɛ ˈye dhɛ ˗ɛɛ nʋɔn ˈtʋn nʋn. (Zro Deutéronome 30:11-14.) ˈˈDhe Zoova cɛn ghwlu ˗ka ɔɔ muan ʋn sʋn bho ˗po ɛ. (Is. 41:​10, 13; 1 Kol. 10:13) ˗Manˈ ˈmɛn ˗e ˈkpɩ i ˗dhe. ˗Manˈ ˈˈdue˗ dhɩ sea nʋanˈ ˈbhɛɛ ɛˈ ˗ˈzɔn ˗dhe. Dhɛ ˗ˈyea nʋn ˗mɛn ˗nɩn dhɩ ˈdhɔɛeˈ Zoova nʋan ʋn ˈˈdhrui ˗ɩn ˈdhe ˈˈklun zeieghwliɛ˗ nɩan, ˈˈdhuo˗ nɔnˈˈ ˈmʋn ˗ˈyɩ tɔˈ ˈˈkpei ˗naan. ˗Ka Zoova aˈ dɩkman an ˈkpa ˈˈkpe ˈdhee˗ ˈmʋn ɛn, ˈkamɔn˗ ˗man muɛn ˈˈkpei ˈjhe˗ ka ‘ɔɔˈ ˈtee aˈ ŋwɔnjheɛ˗ sea ˈˈɩ ˗kman.’—1 Zan 5:3.a

7. Dhɛwɛ˗ ɲʋnjhae˗ ˈbhɔɔa ˈdhe tɔˈdɩ ˈdhi ˈye tɔˈ ˈˈkpei ˗naan ˗an?

⁷ Dhɛwɛ˗ ɲʋnjhae˗ ˈbhɔɔa ˈdhe tɔˈdɩ ˈdhi ˈye tɔˈ ˈˈkpei ˗naan ˗an? Aʋbʋ ˈghwlʋa ˈdhe tɔˈdɩ ˈdhi ɛ, aʋ ˗nɩɛn˗ Biiblʋ ˈcɩaʋn˗ ˗ʋʋ kɔandɩ gblein ˈdhe aʋaˈ ˈcɛ bho. Biiblʋ ˈnaan: “Aʋ ˈkpaa˗ Ɲɔnsoa i, ˗wɛeˈ ɔ ˈye aʋ i ˈkpaa˗ ˗ke.” (Zak. 4:8; 1 Chron. 28:9) ˗Bho aʋa sa ˈo aʋaˈ ˈˈjɛ ˗gwlɩˈˈ za aʋa sa Zoova i ˈkpaa aˈ, ɔɔ muɛn aʋ i ˈkpaa˗ ˗ke. Ɛ se dhɛ ˗ˈghwlʋa ˈdhe tɔˈdɩ ˈdhi ɛɛˈ dɩ Zoova ˈye ʋn i ˈkpaa ˗nɩn. ˈKlaa ɔɔ ˈbɔn ɔ ˈye ʋn i ˈkpaa˗ dhɛ nɩan ˈo ɛ, ɔɔ ˈbɔn ˗ˈye ɔɔˈ dhaiˈˈ ˗nɩn ˗ke. Dhɛwɛ˗ nʋɛn ˗wɛeˈ ˗ˈbhɛɛ ˗nɩn Zoova ˈye jhbhɛɛ˗? Ɛ nɩn ɔɔˈ ˈˈJhu ɔ toa ˈo ˗ɔ ˈmɛan ˗manˈ dɩ, ˗ˈman ˈˈmae˗ ˗baanˈ˗ klaaˈˈ ˗ˈnɔn ɔ nʋan ʋn ˈˈdhrui ɔɔˈ dɩ bho ˗dhe ˗flɛ. (Rɔm. 5:​1, 2) ˗ˈMɛn ˗bho Zezi ɔˈ ˈmɛan anˈ dɩ ˗ˈglʋbhopozɔn˗ nɩan ˈzʋn ˈye ɲnin ɛnˈ, ˈˈdhuo˗ nɔnˈˈ ˈmʋn ˗wɛeˈ ˗ˈye ɲʋndɩkman˗ klaaˈˈ Zoova ˗e Zezi toa ˈdhe ˗manˈ dɩ ˈdhi tɔˈ ˈˈkpei ˗naan. ˗Bho nʋn ɛnˈ dhɛ tu ɛˈ, ɛɛ muɛn ʋn ˈˈtun˗ ˗ˈye ɲan mun ˈdhe ɲɔnsoadhɛ ˈdhi. Ɛɛ muɛn ˗to ˗ka zeieghwliɛ˗ Zoova toa ˈo ˈdhe ɔɔˈ ˈˈJhub ɔˈ ˈsaa ˈmʋn ɛn, ˗man poɔ ɛɛˈ ˈsɛ ɛ.

˗BHO ˗JHII ˈˈNINZƆNˈ

8. ˗Kawɛ ɲɔn ˗jhiia ˈˈninzɔnˈ ɔn nʋn ɛnˈ ˗to sʋn ˗ka ɔ dea zeieghwliɛ˗ ˗gwlɩˈˈ ˗ɛ?

⁸ ˗Bho ˗jhii ˈnɔnzɔnˈ ɔnˈ, toɛˈ ˗wɛ see ˈdhe dhɩ ˗duuˈˈ ˈdhi ˗ka dea zeieghwliɛ˗ ˗gwlɩˈˈ ɛ. Ɩanˈ kpɔ dhueˈ ˗mɛn ˗nɩn, zian˗ dhɩ ˗duuˈˈ ˈdhe ˗manˈ ˈkmʋn ˈdhi ye Zoova i ˈˈkʋaan˗ ˈˈdhe ye ɔɔˈ ˈtee ŋwɔn ˈjhe. ˗Man ˈjheɛ Zezi ŋwɔn ˈbho ˗bobhladhbho˗ ɔ dea ɔɔˈ dhɛcɩaʋn kwa aˈ nʋanˈ. Deɛ ˗manˈ ˈkmʋn Zoova kwa ˗wɛeˈ ˗jhii ˈˈninzɔnˈ. ˈˈDhe ɛgwɛ ˗man ˈjheɛ ˈkledɩ˗ ˈˈjhibhaˈ dhɛ ˗man ˈˈɲɩanˈˈ Zoova ɛɛˈ dɩ. (2 Tim. 3:12) ˈKpɩikpʋɛn˗ ˗man toa ˈdhe dhɛgwlɩdeɛ˗ ˈmʋn ɛn, ɛɛ toɛˈ ˗ka kman Zoova aˈ dɩ ˈˈdhe zeieghwliɛ ɔ toa ˈo ˈdha dhɛ ˈjɛɛn˗ ˈdhee˗ ˈˈjhriɛ ˈdhe ɛ.—Eble. 12:​2, 3.

9. Kwlɛˈˈ ˗wɛ ɲɔn ˗jhiia ˈˈninzɔnˈ ˈye ˗gwlɩˈ i ˈsroo ˗ɛ?

⁹ ˗Bho ˗a ˗jhii ˈˈninzɔnˈ ɛɛ sa ˗zɩn ˗duuˈˈ nʋn mɔn ˗dhe ɛˈ, kwlɛˈˈ dhueˈ ˗nɩn ˈo ˗a ˈye ˗gwlɩˈ i ˈsroo˗. ˗Bho ɛɛ sa ˈo ˈbhɔɔ ɔˈ, zeieghwliɛ˗ ˈbhɛɛˈ ɛ ˈse dhɛ ˈdha i ˈdhe ˗a ˈˈjhriɛ ˈdhe. Dhɛɛdɩ˗ ˗ɛ? ˗Bho ˗a ˈyeɛ i ˈŋwɔn ɔnˈ, ˗a ˈtmʋn kletiɛn ˗ˈˈwe kɔan ɲan ˗ʋʋ nɩan Efɛzɩ ˗dhe ʋaˈ dɩ. Zezi pʋbʋ dɩ bho ˗dhe ʋaˈ ˈkpɩikpʋɛn ɛnˈ dɩ. ˈKlaa ɔ ˈtmʋʋn ʋbʋ ˗ke ɔ ˈnaan: “Dhɛ ˈɩn dea ˈˈjhriɛ ˈˈkpe ˈdhe aʋ bho ˗mɛn ˗nɩn, ɲʋndɩkman˗ aʋ ˈbhlea ˈbho ˗deenanˈ ˗dhe ɛ, aʋ ˈbhɔɛ bho.” (Dhɩ. 2:​3, 4) ˗Ka Zezi nʋan ɛɛˈ ˈtmʋn sʋn ɛn, kletiɛn ˈbhɛɛˈ ɔɔˈ ɲɔnsoadhɛ ˈye ˈghwla ˗mɩɩnˈˈ mɩɩnˈˈ ˈsʋ ɔ seɛˈ ˈˈjhriɛ ˈˈkpe ˗de i. Ɔɔˈ ɲɔn ˗tu ˈbhɛɛˈ ɔ ˈye bhae˗, ɔ ˈye ˈˈdhruigbooɛ˗ ˈmʋn mun, ɔ ˈye bo bhla. ˈKlaa ɛ nɩn dhɩ ɔɔ nʋn kaˈ, ɛ se ɲʋndɩkman an ˈˈtuɔn ˗nɩn. ˗ˈMɛn ˗bho deɛ ˈˈjhriɛ ˈˈkpe ˗ka Zoova aˈ dɩkman˗ ˗cɛn ˈˈkpe ˈdhee˗ ˈmʋn ɛnˈ, dhɛwɛ˗ ˗ˈye nʋn ˗ɛn?

10. ˗Kawɛ aʋ ˈbhɛɛ aʋ ˈye aʋaˈ ɲɔnsoadhɛ ‘i ˗kuu’ ˈˈdhe ɔ ˈye ˈe aʋaˈ ɲɔnsoadhbho ˈˈjhri kpʋn ˗ɛn? (1 Timote 4:​13, 15)

¹⁰ Pɔʋ poɛ Timote ˈkpɩ ɔ ˈye ɔɔˈ ɲɔnsoadhɛ ‘i ˗kuu’ ˈˈdhe ɔ ˈye ˈe ɔɔˈ ɲɔnsoadhbho ˈˈjhri kpʋn. (Zro 1 Timote 4:​13, 15.) ˗Ka nɩan dhueˈ ɛ, dhɛ ˗a ˈyea nʋn ˗wɛeˈ ˗a ˈyea ˈe Zoova aˈ ˈˈɲɩanˈˈ ˈˈjhri kpʋn ɛn, ˗a ˈye ɛɛˈ dɩ tɔˈ i ˗naan. (Rɔm. 12:11; ˗ŋmʋn note dˈétude ˗ɛɛ ˈtmʋan “Débordez de zèle grâce à l’esprit” jha ˗ke.) Ɛgwɛ ˗ˈye nɔnˈˈ ˈmʋn ˈˈdhuo˗ ˗ˈye dhɩ ɲʋn ˈyea ˈcɩan ˈdhe ˈˈdhruigbooɛ˗ ˈmʋn ˈcɩan ˗kajɔɔnka, ɛɛ muɛn ˗nʋn ˗ˈye dhɩ ˗ɩan˗ nʋʋan ˈdhemɔn trɔnˈ ˈdhi ˈjhee˗. Ɛgwɛ ˗da ˗ˈyea mun ˗wɛeˈ ɲʋn ˈseaˈ ˗manˈ ˈˈjhri ˈsɔɔn ˗za i ˈˈdhe ˗ˈyea dhɩ ˗ˈyea ˈcɩan tɔˈ ˈˈkpei ˗naan ˗kajɔɔnka a, ˈbhomɔn˗ ˈye mun. ˗Ka ˗bho ˈse ˈbɔn ˗manˈ nɛn ˈyea ˈmʋn ˗ˈyea ɛɛˈ dɩ ˈˈdu ɛ, ˈkamɔn ˗ke dhɩ Zoova poa kpɔ ˈˈɩ, ˗ɩn ˈdhe ˈˈklun zeieghwliɛ˗ nɩan an, ˗ˈye nɔnˈˈ ˈmʋn ˈˈdhuo˗ ˗ˈyɩ ˈcɩan ˗kajɔɔnka ˗wɛeˈ ɩanˈ ˈtʋn ˈye ˈbhoo˗ ˗gwlɩˈˈ ˗nɩn jheejhee. ˗Bho Zezi ɔˈ ˈmɛan anˈ dɩ ˗ˈglʋbhopozɔn˗ ˗sie˗ ˈdhɔɔ ˈdhueˈ ɛˈ, ˗ˈbhɛɛ ˈye nɔnˈˈ mun ˈˈdhuo˗ ˗wɛeˈ dhɛ nɩan Zoova aˈ ˗Bobhlai dhɩ ˈdhɔɛeˈ ɛɛ nʋan ʋn ˈˈdhrui ɛ, ˗ˈyɩ tɔˈ ˈˈkpei ˗naan. Ɛɛˈ dhɛ tu ɛɛ muɛn ʋn sʋn bho ˗po ˗wɛeˈ zeieghwliɛ˗ ˗ɛ nʋɛn ˈˈdhe ˗ˈbhɛɛa ˗nɩn Zoova ˈyea jhbhɛɛ ɛ, ˗ˈye ɛɛˈ ˈsɛ po.

11-12. ˗Bho ɲɔn ˈmɛn ˈkpɩ i ˈdhe ɲɔnsoadhɛ ˈdhi ɛˈ, ˗ˈmɛn ɔ se Ɲɔnsoa aˈ ˗zuu ˈbhle ˈbhodhe? Zelɛ ˈˈkpei. (˗Ŋmʋn foto ˗ˈnɔn jha ˗ke.)

¹¹ ˗ˈMɛn ˗bho ˗ˈmɛn ˈkpɩ i ˈdhe ɲɔnsoadhɛ ˈdhi ɛˈ, ˗ˈbhɔ ka nʋʋɛn ˗ Ɲɔnsoa aˈ ˗zuu se ˈo ˈˈkpe ˗nɩn ˗dheeˈ ka. Dɩ dhbhoi Pɔʋ ˈtmʋʋan kletiɛn ˗ˈˈwe nɩan Kolɛntɩ ˈdhe ɔɔˈ ˗bobhladhbho ɔˈ dɩ ˈdhi ɛ, pʋɩ ˗glʋˈ bho. Ɔ ˈnaan: “˗Bho ɔɔˈ ˗pɛɛ ˈseɔˈ nʋn mɔn ˗dhe ɛˈ, ɔɔ kpʋɛn ˈdhe ɔ ˈˈjhri, dhɛ nɩan ˈo ɛ, ɛmɛn˗ ɔ ˈye nʋn.” (1 Kol. 9:17) Dhɛwɛ˗ ɛɛ tɔɔn ˗abʋ ˗ɛ?

¹² Pɔʋ ɔɔ ˈmɛn ˈkpɩ i ˗ke ˗zɔn ˗ˈnɔɔn ˗bo bhla dɩ ˗dhe. ˗Ka dɩ ɔ nɩan ˈe ˈdhi ˈjhe ɩn ˗nɩn mɔn ˗dhe ɛˈ, ɔɔ kpa ɔɔˈ ˗bobhladhbho ɔˈ ˈˈjhri ˗kpʋɛn˗ ɲan. ˗A ˈbhɛɛˈ ˗a ˈye dhɛ nɩan dhueˈ nʋn. ˗Bho dhɛjɛɛn ɛnˈ ˈtʋn se ˈbho ˗a ˗gwlɩˈˈ ˗nɩn mɔn ˗dhe ɛˈ, ˗a po ˈe ˈkpɩ ˗a ˈyeɛ nʋn. Bhae˗ Zoova ˗wɛeˈ ɔ ˈye ʋn ‘ɛɛˈ nʋanˈ anˈ ˈtʋn ˗e ˈkpɩ ˈˈɲɩn.’ (Fil. 2:13) Kpʋn ˈe ˗manˈ ɲɔnsoadhbho ˈˈjhri. Deɛ ˗gwlɩˈˈ ˗ka ˗bho ɛɛ sa ˈo ˈbhɔɔ ɔˈ, Zoova aˈ dɩkman an muɛn ˈˈkpe ˈkpa˗ ˗kenɛnˈ ˈdhee˗ ˈmʋn.

13. ˗Kawɛ ˗a ˈbhɛɛ ˗a ˈye ˗aaˈ ˈˈjɛ i ˈdɩn ˗wɛeˈ ˗bho ˗a ˗nɩn ˈe ‘dhɛgwlɩdeɛ˗ ˈdhi’ ˗a ˈyeɛ jhibho˗ ˗ɛ?

¹³ Ɛ ˗kɔndɩ ˗a ˈye nɔnˈˈ ˈmʋn ˈˈdhuo˗ ˗zɔn ˗ˈnɔɔn ˗a ˈye ˈsrɩn nɩan ˈe 2 Kolɛntɩ-Kɔʋn 13:5 ˈdhi tɔˈ ˈˈkpei ˗naan. Ɛ ˈnaan: ‘Aʋ ˈdɩn aʋaˈ ˈˈjɛ i, aʋ ˗ŋmʋn ˈe aʋaˈ ˈˈjɛ ˈmʋn jheejhee ˗wɛeˈ ˗bho aʋ ˗nɩn ˈe dhɛgwlɩdeɛ˗ ˈdhi aʋ ˈyɩ jhibho˗.’ ˗A ˈye ˈo nɔnˈˈ ˗za ˗zɔn ˗ˈnɔɔn ˗wɛeˈ ˗a ˈye ˗aaˈ ˈˈjɛ dɩ nɩn i dee˗: ‘ˈMan kɔɔn ˈBheɔglɔ ɔˈ dɩ ɲan ˈmɛn ˈdhe ˈman ˈkmʋn ˈdhi?’ (Mat. 6:33) ‘Dhɩ ˈman zaa ˈplʋ ˈˈjhrii ɛ, ɩanˈ toɛˈ ˗ka ˈɩn ˈɲɩanˈ dhɛsaʋn ˈmʋn ɛn?’ (Ps. 97:10) ‘ˈMan nʋɛnˈ ˈflɛ ˗e ghwluiŋwɔɛn ɛnˈ yea ˈdhe ɲɔnsoagbu ˈdhi nɩn?’ (Efɛ. 4:​2, 3) Zezi ɔˈ ˈmɛan anˈ dɩ ˗ˈglʋbhopozɔn ɔnˈ nɔnˈˈ ˗nɩɛn˗ nɔnˈˈ ˈdhɔɛeˈ ˗ɔ ˈdhe ˈdhi ˗a ˈye dɩ nɩn tɔˈ ˈˈkpei ˗naan. ˗Bho ˗aa sa dhɛ Zoova ˗e Zezi nʋan tɔˈ ˈˈkpei naan anˈ, ˗aa ˈbɔn ˗a ˈyeɛ ˗to ˗ka ˗a sea ˈkmʋn ˗nɩn ˗aaˈ ˈˈjɛ ɛˈ dɩ, ˈklaa ˗a nɩan ˈkmʋn Zezi Klisɩ ɔˈ dɩ ˗ka Pɔʋ nʋan.

ƝƲN ˗TƐƐAN TƆˈDƖ BHO

14. Dhɛɛdɩ˗ ˈdhoudhi ˗ˈˈwe ˗ˈnʋʋn ˈbhɔ ˈˈdhruigbooɛ˗ ˈmʋn jhi dɩ ˗ɛ?

¹⁴ ˈDhoudhi ˗ˈˈwe ˗ˈnʋʋn kpʋn ˈo Zoova ˈˈbun in ˈdhe ˈcɩ ˗aeˈˈ ˗zɩn ˗duuˈˈ ˈdhi ˗wɛeˈ ˗ʋʋ ˈbhɔ ɔɔˈ ˈˈɲɩn dɩ. Dhɛɛdɩ˗ ˗ɛ? ˈKmʋn nʋn anˈ ‘˗ˈzɔndɩ˗ ˈˈjriɛˈˈ ʋaˈ ˗ˈnʋʋn ˈˈdhru.’ (Luikɩ 21:34) Dhɩ ˈdhoudhi ˗ˈˈwe ˗ˈnʋʋn nʋan ˗aeˈˈ ʋʋ ˈtmʋan an, ɩmɩn˗ nʋɛn ˗wɛeˈ ˗ˈnʋʋn gaˈ i. (Zak. 3:2) Ɲʋn ˗ˈnʋʋn ˈkpa ˈe dhɩsaɩn klaeˈˈ ˈdhi ˈˈdhe ʋʋ ˈse sʋnbhopoɛ˗ i dee˗. Dhɛ nɩan ˈo ˗wɛeˈ ˗tɛɛan tɔˈdɩ bho ˗ka ɛ ˈjhe ɛ ˗nɩn ɛnˈ, dhɛwɛ˗ ˗ˈye nʋn ˗wɛeˈ ˗ˈye ˈe tɔˈdɩ ˈdhi dhejhi ˗ɛ? Dhɛwɛ˗ zeieghwliɛ˗ ˈbhɛɛ ɛ ˈye ʋn ˈˈtun ˗ˈye nʋn ˗ɛn?

15. ˗Ka Zoova a ˈˈduaˈˈ ɲʋn ˗tɛɛan tɔˈdɩ bho ʋaˈ dɩ ɛ, ka ɔɔ nʋn ɛnˈ ˗to sʋn ˗ɛn? (Ézéchiel 34:​11, 12, 16)

¹⁵ ˗Ka Zoova a nʋan ɲʋn ˗tɛɛan tɔˈdɩ bho aˈ ˈjhe sʋn ɛn, ˗nɛɛn tɔˈ ˈˈkpei. Ɔ ˈsʋbʋ ˈbhɔ. Ɔɔ ˈbɔɛnˈ ɔɔˈ bhlaeˈ ˗ˈˈmaan in. Ɔɔ ˈˈduɛˈˈ ɩanˈ dɩ ˗wɛeˈ ɩn ˈye ˈdhe ɔ bho dhejhi. (Zro Ézéchiel 34:​11, 12, 16.) Zoova ˈbhɛɛ ɔ ˈye dhɛ nɩan dhueˈ nʋn ˈdhe ˗manˈ dɩ ˈdhi? Ɛɛn. Dhɛ ˗man zro ˈcɩaandhɛ nɛn ˈdhii ɛ, ɛɛ toɛˈ ˗ka kman ˈˈɩsreɛ ɛˈ dɩ ɛ. ˗Ka Zoova ŋmʋan ˈdhe ˗manˈ ˗pɛɛ bho ˗wɛeˈ ɔ jria ʋn ˈdhe ɔ bho ɛ, ˈkamɔn˗ ɔɔ jri ʋn ˗ke ˗wɛeˈ ˗ˈye ˈe tɔˈdɩ ˈdhi dhejhi.

16. Dhɛwɛ˗ ˈbhɛɛ ˗ɛ ˈye ˈdhoudhi ˗tɛɛan tɔˈdɩ bho sʋn bho po ˗wɛeˈ ɔ ˈye dhejhi ˗ɛ? (˗Ŋmʋn foto ˗ˈnɔn jha ˗ke.)

¹⁶ ˗Aaˈ ˈsɛɛ˗ Reviens à Jéhovah ˈnaan: “Deɛ ˗gwlɩˈˈ ˗ka ˗bho jhi dhe ɛˈ, Zoova a muan ʋn sʋn bho ˗po ɛ. Ɔɔ muɛn ʋn sʋn bho ˗po ˗ˈye ˈmʋnan inˈ ˗nɩn, ˗manˈ ˗pɛɛ ˈye jha jhi ˈˈdhe ˗ˈye ˗glʋˈ ˈjɛʋn ˈbhle. Ɛɛ muɛn ˗nʋn ˗ˈye ˈdhe ˗manˈ ˈdhoudhi ˗ˈwe ˈˈklun ˈkpa ʋʋ ˗nɩn ˗ˈye Zoova ˈˈɲɩn.” ˗Manˈ ˈˈmaeˈ ˗dhe ˗ke ˗ka, ɲankɔʋn an ˈbɔan ˈjɛɛn˗ ʋʋ ˈyea ʋn sʋn bho po ɛ. ˗Ka ˗da ˗bho ‘ˈpʋʋɔˈ klaaˈˈ aa sa jhi ɲʋn an ˈˈmaan ˗e ˗ka ˗da ˗bho ˈˈnin klaaˈˈ a sa dhbha ɲʋn an ˈghwlaa nɩan, ˈkamɔn˗ ɲankɔʋn an mun ˗nɩn ˈdhe ˗manˈ dɩ ˈdhi.’ (Is. 32:2) ˗Bho ˗ˈye ˈsɛ po zeieghwliɛ ɛˈ dɩ ɛˈ, dee ˗manˈ ˈˈjɛ i: ‘Dhɩwɛ˗ ˈye nʋn ˗kaanbhla ˗wɛeˈ ˈye dhɩ ˈkpa po ˈbho ˈmɔn˗ ˗e Zoova ˈɲnɩn ˗ɛn?’ (Is. 1:18; 1 Piɛ. 2:25) Ɛɛˈ kpɔ dhueˈ ka, ˗ˈbhɛɛ ˗ˈye ˈˈdhruigbooɛ˗ ˈmʋn mun ˈdhe ˈˈdhruigboo˗ gbu dhi? ˗ˈBhɛɛ ˗ˈye ɲankɔin˗ dhueˈ i ˈkpaa˗ ˗wɛeˈ ˗ˈyeɔ ˈtmʋʋn˗ ˗ka ˗man ˈbɔan ɲʋn ˈyea ʋn sʋn bho po ɛ, ɛ ˈbhɛɛˈ ɛ ˈye Biiblʋ ˈcɩan˗ ˗nɩn. ˈKpɩ ˗man muan ˈe ˗po ˗wɛeˈ ˗ˈyeɛ ˗to ˗ka zeieghwliɛ˗ ˈdha dhɛ ˈdhee˗ ˈˈjhriɛ ˈdhe ɛ, deɛ ˗gwlɩˈˈ ˗ka Zoova a muɩn ˈˈniman ˗po ɛ.

DHƐWƐ˗ ˗MAN MUN ˗NƲN ˗ƐN?

17-18. ˗Bho nɔnˈˈ ˗dhɛ ˈˈzaan ˗si ˈo ˗wɛeˈ Zezi ɔˈ ˈmɛan anˈ dɩ ˗ˈglʋbhopozɔn˗ ˈye ˗nʋʋɛn ɛnˈ, dhɛwɛ˗ ˗a ˈye ˈe ˈkpɩ po ˗a ˈye nʋn ˗ɛn?

¹⁷ Zezi ˈnaan, zeieghwliɛ˗ ˗tooɛ˗ ˈbho ˈmɛn ˗wɛeˈ ‘ɲʋn ˗ʋa˗ muɔn ˗gwlɩˈˈ ˗de ɛ, ʋʋ ˈse i ˗zaa i, ˈklaa ʋa muɛn ˈkmʋn sea ˈˈtianˈ ˈbhle ˈjhe˗.’ (Zan 3:16) Zeieghwliɛ˗ ˗mɛn Zoova a jhii dhi ˗wɛeˈ ɔɔ zeie ˗aʋ ˈdhe dhɛsaʋn ˗e ˈmɛan ˈkwa. ˗Ka ɛ kɔandɩ ˗aaˈ klɛɛ ˈyea ˈsɛ po ˗baanˈ ˗ˈnɔn ɔnˈ dɩ ɛ, ˗a ˈseɛˈ bho ˈˈmae˗ dhi. (Rɔm. 3:​23, 24; 2 Kol. 6:1) ˗Bho nɔnˈˈ ˗dhɛ ˈˈzaan ˗si ˈo ˗wɛeˈ Zezi ɔˈ ˈmɛan anˈ dɩ ˗ˈglʋbhopozɔn˗ ˈye ˗nʋʋɛn, ˈˈdhuo˗ nɔnˈˈ ˈˈdhe ˗naan ɲʋndɩkman˗ Zoova ˗e Zezi toa ˈdhe ˗a bho tɔˈ ˈˈkpei ɛɛ muɛn ˗aʋ ˈˈtun˗ ˗a ˈye dhɛ ʋʋ nʋan ˗aʋ ˈˈdhrui ɛɛˈ ˈsɛ po.

¹⁸ Dhɛwɛ˗ ˈsraa˗ Zezi za ˈye ʋn ˈˈtun ˗ˈye nʋn ˗ɛn? Dhɛ ˗man muan ˈo ˗za ˗ˈyea nʋn ɛn, ɛ ˈbhɛɛˈ ɛ ˗nɩn ɲʋn ˗ˈnʋʋn anˈ ˗nɛn ˈye ˈˈkpei zela˗. Ɲʋn anˈ mliɔn ˗ʋa˗ ˈˈɲɩanˈˈ Zoova, ˗ʋʋ sea ˈkmʋn ˗nɩn ʋaˈ ˈˈjɛ ɛˈ dɩ, ˈˈdhe ʋʋ nɩan ˈkmʋn ɲɔn ˈmɛan ʋaˈ dɩ ɛ, ˈkpɩ ʋaˈ muan ˈe po ˗wɛeˈ aʋ ˈyea ˈe ʋbʋ ˈˈklun ˈkpa aˈ, aʋ deɛ ˗gwlɩˈˈ ˗ka Zoova a muɩn ˈˈniman ˗po ɛ.—2 Kol. 5:15.