Kukwe kwetre mikata gare

Nitre jökrä mikadre tuin bobre jai ye köböire kukwe kwin tä nemen nikwe

Bati meri testiko iti käi Nueva Zelanda yekwe video Preocupémonos unos por otros ye tuani, yete blitata Jehovata ni mike tuin bobre jai aune ye erere tä bämike yebätä (Is. 63:​7-9). Ye ngwane ja töi mikani kwe kukwe ruäre nuainne aune nitre mada dimike. Köbö ye ngwane nikani jondron kökö jai aune meri iti jutuabare ie ji ngrabare, ye kräke ja töi mikani kwe mrö kökö. Meri yekwe kani ngäbiti ie. Meri testiko ye jataninta mrö ngwena ngwane, kukwe driebare kwe meri ye ie täräkwata chi ¿Kukwe tare ye diainkä aune ni ñaka rabaira ja tare nike? Yebiti.

Meri ye nikani muen. Meri ye ririabare mräkätre kukwebätä ngätäite, akwa kä nikanina kabre ta niarakwe kä mikaninkä konkrekasionbätä niebare kwe ie. Niara nämäne kärere Jehovai rabadre dimike näinta kokwäre niebare kwe ie. Meri testiko yekwe Biblia biani ie biti kukwe ükaninte kwe ja tötikakäre ben.a

Jehová erere ni raba nitre mada mike tuin bobre jai. Ñodre, ni mräkätre aune ja mräkätre konkrekasionte. Arato kukwe ne ni raba bämike nita niken kukwe driere ye ngwane.