¿Gätä Sribi Ngöbökwe Nuainkäre ye nuaindre ño?
Gätä Sribi Ngöbökwe Nuainkäre yekrä kukwe ükaninte mrä abokän mikata gare nete. “Gätä Sribi Ngöbökwe Nuainkäre yekrä ja tötikadre ño” ye mikani gare Sribi Nikwe Ngöbökrä mayo 2009 yebätä; kukwe ye mikakäre gare bäri kwin, yekrä kukwe mrä mikata gare nete.
◼ Kukwe kädriedre. Kukwe meden kädriedre ye ererebätä ni kukwe kädriekä käkwe blitadre. Ñaka kukwe ngwantaridre nitre ja ükaninkrö yei. Kukwe meden raba konkrekasion dimike ye niedre kwe.
◼ Kukwe ngwantaridre aune nitre käkwe niedre. Ja tötikata La Atalaya yebätä ye erere nuaindre, kukwe ngwantarita párrafo keteitire keteitire yekrä. Kukwe ye kömikakäre bätä mikakäre krüte kukwe niedre kwati kubu jötrö ngwarbe. Kukwe ne tädre nire kisete ye käkwe ñaka blitadre krubäte. Kä rabadrete nuäi, ye ererebätä ñäkädre texto dianinkä yebätä. Akwa texto medenbätä ñäkämananta nie ye erere nikwe nuaindre, ñaka ñäkädre jire párrafo yebätä.
◼ Kukwe kädrieta nitre ja ükaninkrö yebe. Nekänti nitre ja ükaninkrö raba blite arato. Kukwe kädrieta aune kukwe ngwantarita nitre ja ükaninkrö yei.
◼ Kukwe bämikadre aune blitadre ni madabe. Kukwe ükaninte nekänti, kukwe bämikadre niedre angwane ni kukwe kädriekä rabadre ye erere nuainne, akwa niara arabe ñaka käkwe nuaindre. Nitre kukwe driekä tä ja ngwen kwin aune raba kukwe bämike kwin ye erere diandrekä kukwe bämikakäre. Ja kitadre käne ja gwirete kukwe ye bämikakäre. Nitre mrä ñan raba kukwe bämike, akwa raba nemen ni kukwe driekä mada dimike kukwe bämike. Nire nire käkwe kukwe bämikadre ye ñaka raba trö kwite nitre ja ükaninkrö yei. Arato, blitadre ni madabe ye ngwane nuaindre plataforma yekänti aune ñaka täkärä yekänti. Kukwe bämikadre aune blitadre ni madabe ye nuainkäre ja kitadre käne ja gwirete. Ni kukwe kädriekä tätre blite aune minuto jatadre krüte ie, ye ngwane raba kukwe mada tuenmetre, akwa kukwe bämikadre o blitadre ni madabe ye ñaka mikadrete kwe. Ni sribikä konkrekasionte jämi nitre denkä blitakäre o kukwe bämikakäre, ye känenkri blitadre kwe ni gätä nitre umbrekwe köböikitaka (o ni umbre mada) yebe.
Kukwe kädriedre ño ye mikata gare angwane ye erere nuaindre. Nunta tö ngwen kukwe mikata gare nete ye käkwe ni jökrä dimikai “jändrän jökrä [...] [nuainne] kuin era metre jökrä ja täritäri” Gätä Sribi Ngöbökwe Nuainkäre yete (1 Cor. 14:40, Kukwe Kuin Ngöbökwe).