Hanyoyin Kyautata Yadda Muke Wa’azi—⁠Ka Koya wa Ɗalibanka Yin Nazari

Muhimmancinsa: Idan ɗalibanmu suna so su sami ci gaba, ya kamata su yi nazarin koyarwar Littafi Mai Tsarki masu zurfi, ba masu sauƙi kawai ba. (Ibran. 5:12–6:⁠1) Yin nazari yana bukatar ƙoƙari sosai. Ya ƙunshi haɗa sababbin abubuwan da muke koya yanzu da na dā don mu san yadda za mu yi amfani da su. (Mis. 2:1-6) Idan ɗalibai sun koyi yin bincike da kansu, hakan zai taimaka musu su riƙa yin amfani da littattafanmu don ba da amsa ga tambayoyin da aka musu game da Littafi Mai Tsarki. Idan suka yi iya ƙoƙarinsu don su bi abubuwan da suka koya, hakan zai sa su jimre duk wani gwaji da za su fuskanta a matsayinsu na Kirista.—⁠Luk. 6:47, 48.

Yadda Za Mu Cim ma Hakan:

Ka nanata muhimmancin yin addu’a a duk lokacin da kake so ka soma nazarin.—⁠Yoh. 14:26; 1 Kor. 2:⁠10.
Tun daga farko, ka ƙarfafa shi ya yi shiri kafin a soma nazarin. Ka nuna masa naka littafin, kuma ka koya masa yadda zai ja layi a ƙarƙashin amsar.
Ka taimaka masa ya riƙa amsa tambayoyin yadda ya fahimta. Ƙari ga haka, bai kamata ka sa nazarin ya zama kamar sashen tambayoyi ana ba da amsoshi ba, domin hakan zai iya sa ɗalibin ya riƙa karanta amsar kai tsaye daga littafin.
Ka ƙarfafa ɗalibinka ya riƙa karanta Littafi Mai Tsarki kowace rana. Ka nuna masa yadda zai yi amfani da tsarin karatun Littafi Mai Tsarki a dandalin jw.org. Yin nazarin Littafi Mai Tsarki babu fashi yana bukatar ƙwazo sosai, kuma idan muka yi hakan, kwalliya za ta biya kuɗin sabulu.—⁠Zab. 1:2, 3.
Ka nuna wa ɗalibinka yadda zai sami amsoshin tambayoyin Littafi Mai Tsarki ta wurin yin amfani da Littafin Bincike Don Shaidun Jehobah ko Watchtower Library ko kuma Watchtower ONLINE LIBRARY. Ka taimaka masa ya san alamar da ake saka wa littattafan da muke amfani da su a taronmu.

Ku Bi Shawarar Nan a Wannan Watan:

A ƙarshen kowane kan magana ko babi, ka sa ɗalibinka ya faɗi abin da ya koya. Idan ba ka da ɗalibi, ka taƙaita wasu abubuwan da ka koya daga Littafi Mai Tsarki ko kuma wani sakin layi na Hasumiyar Tsaro don kada ka manta abin da ka karanta.