Hanyoyin Kyautata Yadda Muke Yin Wa’azi—Yadda Za Mu Soma Taɗi da Burin Yin Wa’azi

Abin da Ya Sa Yake da Muhimmanci: A yawancin lokatai, ba ma samun mutane a gida sa’ad da muke wa’azi gida-gida. Amma, mukan haɗu da su sa’ad da muke motar haya ko asibiti ko sa’ad da muka fita shan iska a wurin aiki ko a makaranta da dai sauransu. Jehobah yana so mu ba waɗannan mutanen damar jin saƙon Mulkinsa. (1 Tim. 2:3, 4) A yawancin lokatai, wajibi ne mu soma taɗi da su idan muna so mu yi musu shelar bishara.

Yadda Za Mu Iya Yin Hakan:

Ku yi zaɓi. Mutumin mai fara’a ne da zai so ku yi taɗi da shi? Za ku iya tattaunawa da kyau a yanayin wurin kuwa? Da farko wasu masu shela sukan kalli mutumin da suke so su yi masa magana, sa’an nan su yi murmushi. Idan shi ma ya yi murmushi, sai su soma taɗi da shi.
Idan ba ku da gaba gaɗin yin magana, ku yi gajeriyar addu’a a zuci.—Neh. 2:4; A. M. 4:29.
Ku soma da gajeren kalami, kamar gaisuwa. A muhawwarar da Yesu ya yi da wata mace Basamariya, bai soma da zancen Mulkin Allah ba. (Yoh. 4:7) A wani lokaci ma za ku iya soma taɗi da mutum ta wajen yaba masa. Alal misali, kuna iya cewa: “Yaranki suna da hankali!” A wani lokaci kuma, za ku iya somawa da tambaya kamar haka: “Ka saurari labarai jiya da dare kuwa?”
Muddin kun soma tattaunawa, ku nemi hanyar ba da bishara, amma kada ku yi hanzarin yin hakan. Ku ci gaba da tattaunawa har sai kun sami zarafin ba da bishara. Mai yiwuwa ku ta da wani batu mai ban sha’awa da zai sa mutumin ya yi muku tambaya. Alal misali, idan kuna tattauna batun iyali ne, za ku iya cewa, “Na gano wata shawara mai kyau sosai a kan renon yara.” Idan batun da kuke tattaunawa daga kanun labarai ne, za ku iya cewa, “Akasin labarai masu baƙin ciki da muke yawan karantawa a yau, na karanta wani labari mai daɗi kwanan nan.” Kada ku yi sanyin gwiwa idan mutumin ya katse taɗin tun kafin ku yi masa wa’azi.
Ku riƙe warƙoƙi ko kuma wasu littattafan da za ku iya ba wanda yake son saƙon Littafi Mai Tsarki.

Ku Bi Shawarar Nan Wannan Watan:

A kowane mako, ku yi ƙoƙari ku soma taɗi da mutane da burin yin wa’azi a duk inda kuka sami zarafi.