2 | Ƙarfafa Daga Kalmar Allah

LITTAFI MAI TSARKI YA CE: “Duk abin da aka rubuta tun dā a cikin Rubutacciyar Maganar Allah an rubuta ne domin a koyar da mu, domin mu zama da sa zuciya ta wurin jimrewa da ƙarfafawa waɗanda Rubutacciyar Maganar Allah sukan ba mu.”—ROMAWA 15:4.

Abin da Hakan Yake Nufi

A cikin Littafi Mai Tsarki za mu sami abubuwan da za su ƙarfafa mu idan muna yawan tunani da bai kamata ba. Saƙon da ke cikin Littafi Mai Tsarki yana sa mu kasance da bege cewa abin da ke sa mu baƙin ciki ba za su ƙara kasancewa ba.

Yadda Yin Hakan Zai Taimaka

Dukanmu mukan yi baƙin ciki a wasu lokuta, amma waɗanda suke ciwon baƙin ciki ko tsananin damuwa suna iya yin fama da wannan abu a kowace rana. Amma ta yaya Littafi Mai Tsarki zai taimaka mana?

Akwai abubuwa da yawa a Littafi Mai Tsarki da za su ƙarfafa mu kuma su sa mu daina baƙin ciki. (Filibiyawa 4:8) Za su sa mu kasance da kwanciyar hankali kuma za su taimaka mana mu kame kanmu.—Zabura 94:18, 19.
Littafi Mai Tsarki zai taimaka mana mu kawar da raꞌayi cewa ba mu da amfani.—Luka 12:6, 7.
Ayoyi da yawa a cikin Littafi Mai Tsarki sun tabbatar mana cewa Allah Mahaliccinmu yana tare da mu kuma ya fahimci yadda muke ji.—Zabura 34:18; 1 Yohanna 3:19, 20.
Littafi Mai Tsarki ya yi mana alkawari cewa Allah zai kawar da dukan abubuwan da suka faru da mu da suke sa mu baƙin ciki. (Ishaya 65:17; Ru’uyar da Aka Yi wa Yohanna 21:4) Saꞌad da muke fama da waɗannan abubuwan, alkawuran da ke Littafi Mai Tsarki za su ƙarfafa mu mu jimre.

Yadda Littafi Mai Tsarki Yake Taimakawa Jessica

Yadda Ciwon Baƙin Ciki Ya Shafe Ni

“Saꞌad da nake ꞌyar shekara 25, na soma damuwa sosai kuma da aka kai ni asibiti, an gano cewa ina da ciwon baƙin ciki mai tsanani. Abubuwan da suka faru da ni a dā sukan sa ni baƙin ciki sosai. Likitoci sun taimaka mini in fahimci cewa abubuwa da suka faru da ni a dā ne suke sa ni baƙin ciki sosai. Ban da magunguna da aka ba ni, nakan je asibiti don a taimaka mini in gano irin tunanin da bai dace ba kuma in daina yin su.”

Yadda Littafi Mai Tsarki Ya Taimaka Min

“Saꞌad da nake fama da irin wannan baƙin ciki, hakan na sa ni fargaba da tsananin damuwa da kuma rashin barci. Da dare nakan yi tunani sosai kuma ba na iya dainawa. Kamar yadda aka nuna a Zabura 94:19, Allah zai iya taꞌazantar da mu kuma ya ƙarfafa mu saꞌad da matsaloli suka yi mana yawa. Nakan ajiye Littafi Mai Tsarki da littafin rubutu da ke ɗauke da nassosi masu ban ƙarfafa kusa da gadona. A duk lokacin da na kasa barci sai in karanta wasu ayoyin Littafi Mai Tsarki don hakan yana taimaka mini.

“Littafi Mai Tsarki ya ƙarfafa mu mu daina tunanin da bai jitu da raꞌayin Allah ba. A dā na tabbatar wa kaina cewa ba ni da amfani kuma ba mai ƙaunata. Amma na koyi cewa hakan bai jitu da abin da ke cikin Littafi Mai Tsarki ba, wanda ya nuna cewa Allah mai ƙauna ne da kuma Uba mai jin tausayin kowannenmu. A hankali, a hankali sai na daina tunanin da bai dace ba. Na soma ganin kaina yadda Allah yake ganina. Hakan ya taimaka mini sosai in daina ganin kaina yadda bai dace ba.

“Ina ɗokin ganin lokacin da za a kawar da dukan abubuwan da ke sa mu yi tunanin da bai dace ba. Na san cewa a nan gaba ba za a sami mutane da suke da matsalar ƙwaƙwalwa ba. Hakan yana taimaka mini in jimre a yanzu kuma in sa rai cewa a nan gaba ba za a ƙara yin ciwon baƙin ciki mai tsanani ba.”