Muna Bukatar Mu Tsayayya Wa Jaraba

AKWAI wanda ya taɓa gaya maka ka yi abin da ba shi da kyau?— Ya ce maka idan ka isa ka yi mana? Ko kuma dai ya ce ne yana da daɗi kuma ba laifi ba ne idan ka yi?— Idan wani ya yi mana haka, yana ƙoƙari ya jarabe mu ne.

Menene ya kamata mu yi idan aka jarabe mu? Ya kamata ne mu faɗa ciki mu yi abin da yake mugu?— Wannan ba zai faranta wa Jehovah Allah rai ba. Amma ka san wanda zai yi farin ciki?— Shaiɗan Iblis ne zai yi farin ciki.

Shaiɗan abokin gaban Allah ne, kuma Shaiɗan abokin gabanmu ne. Ba za mu iya ganinsa ba domin ruhu ne. Amma yana iya ganinmu. Wata rana Iblis ya yi magana da Yesu, Babban Malami, kuma ya yi ƙoƙari ya jarabe shi. Bari mu ga abin da Yesu ya yi. Da haka za mu san abin da ya dace mu yi sa’ad da aka jarabe mu.

Yesu ko da yaushe yana so ya yi nufin Allah. Ya nuna haka a fili wajen yin baftisma a cikin Kogin Urdun. Bayan da Yesu ya yi baftisma ne Shaiɗan ya yi ƙoƙari ya jarabe shi. Littafi Mai Tsarki ya ce “sammai suka buɗe” wa Yesu. (Matta 3:16) Wannan zai iya nufin cewa Yesu ya fara tuna dukan rayuwarsa ta farko a sama tare da Allah.

Bayan baftismarsa Yesu ya je cikin daji ya yi tunani a kan abubuwa da ya tuna. Kwanaki arba’in da dare arba’in suka shige. A dukan wannan lokacin Yesu bai ci kome ba, saboda haka a lokacin yana jin yunwa sosai. A wannan lokacin ne, Shaiɗan ya yi ƙoƙarin ya jarabi Yesu.

Iblis ya ce: “Idan kai Ɗan Allah ne, ka umurci waɗannan duwatsu su zama gurasa.” Wasu gurasa suna da daɗi ƙwarai! Amma da Yesu zai iya juya duwatsu su zama gurasa?— E, zai iya. Me ya sa? Domin Yesu, Ɗan Allah yana da iko na musamman.

Da za ka mai da dutse ya zama gurasa idan Iblis ya umurce ka ka yi haka?— Yesu yana jin yunwa. Da ba daidai ba ne ya yi shi sau ɗaya kawai?— Yesu ya sani ba daidai ba ne ya yi amfani da ikonsa a wannan hanyar. Jehovah ya ba shi wannan ikon ya jawo mutane ne ga Allah, ba don ya yi amfani da shi ba domin kansa.

To, maimakon haka, Yesu ya gaya wa Shaiɗan abin da yake rubuce a cikin Littafi Mai Tsarki: “Ba da abinci kaɗai ba mutum za ya rayu, amma da kowacce magana da ke fitowa daga bakin Allah.” Yesu ya sani cewa yin abin da zai faranta wa Jehovah rai ya fi samun abinci muhimmanci.

Amma Iblis ya sake ƙoƙari. Ya kai Yesu cikin Urushalima kuma ya sa ya tsaya a gefen haikali da yake da tsawo. Sai Shaiɗan ya ce: ‘Idan kai Ɗan Allah ne, faɗa da kanka: gama an rubuta, mala’ikun Allah za su sa ba za ka ji rauni ba.’

Me ya sa Shaiɗan ya faɗi haka?— Ya faɗa ne domin ya jarabi Yesu ya yi aikin wauta. Amma Yesu bai saurari Shaiɗan ba. Ya gaya wa Shaiɗan: “An kuma rubuta, Ba za ka gwada Ubangiji Allahnka ba.” Yesu ya sani cewa ba daidai ba ne ya gwada Jehovah ta wajen saka ransa cikin haɗari.

Duk da haka Shaiɗan bai gaji ba. Sai ya ɗauki Yesu zuwa wani dutse mai tsawo. A nan ya nuna masa dukan mulkoki, ko kuma gwamnatoci, na duniya da kuma darajarsu. Sai Shaiɗan ya ce wa Yesu: “Dukan waɗannan ni ba ka, idan ka fāɗi, ka yi mini sujjada.”

Ka yi tunanin abin da Iblis ya bayar. Shin dukan waɗannan mulkoki, ko kuma gwamnatocin mutane, da gaske na Shaiɗan ne?— Yesu bai yi jayayya cewa na Shaiɗan ne ba. Da ya yi jayayya da Shaiɗan zai zama ba shi ne mai su ba. Hakika, Shaiɗan da gaske shi ne mai mallakar dukan al’ummai na duniya. Littafi Mai Tsarki ya kira shi “mai-mulkin wannan duniya.”—Yohanna 12:31.

Menene za ka yi idan Iblis ya yi maka alkawarin wani abu don ka bauta masa?— Yesu ya sani cewa ba daidai ba ne a bauta wa Shaiɗan ko da menene zai ba Shi. Saboda haka Yesu ya ce: ‘Ka tafi daga nan, Shaiɗan! Domin Littafi Mai Tsarki ya ce Jehovah Allahnka ne kaɗai za ka bauta’ wa.—Matta 4:1-10; Luka 4:1-13.

Mu ma muna fuskantar jaraba. Ka san wasu daga cikinsu?— Ga wani misali a nan. Mamarka wataƙila ta yi alkaki ko nakiya. Wataƙila ta ce maka kada ka ci har sai lokacin ci ya yi. Amma kuma kana jin yunwa, ka jarabu ka ci. Ka yi wa mamarka biyayya ke nan?— Shaiɗan yana so ka yi mata rashin biyayya.

Ka tuna da Yesu. Shi ma yana jin yunwa sosai. Amma ya sani cewa faranta wa Allah rai ya fi cin abinci muhimmanci. Za ka nuna kana kama da Yesu sa’ad da ka bi abin da mamarka ta ce.

Wataƙila wasu yara za su ce ka sha ƙwaya. Za su ce maka za ta sa ka ji daɗi. Za ta iya kasancewa muguwar ƙwaya. Za su sa ka rashin lafiya ko ma su kashe ka. Ko kuma wasu su ba ka taba, wanda ya ƙunshi ƙwayoyi, kuma su ce, idan ka isa ka sha. Me za ka yi?—

Ka tuna da Yesu. Shaiɗan ya yi ƙoƙarin ya sa Yesu ya saka ransa cikin haɗari, ya gaya masa ya yi tsalle daga saman haikali. Amma Yesu bai yi haka ba. Me za ka yi idan wani ya ce ka yi mugun abu idan ka isa?— Yesu bai saurari Shaiɗan ba. Bai kamata ka saurari wanda yake so ya saka ka yin mugun abu ba.

Za a iya cewa ka yi sujjada ga gunki, abin da Littafi Mai Tsarki ya ce kada mu yi. (Fitowa 20:4, 5) Wataƙila a biki ne a makaranta. Za a iya ce maka idan ka ƙi ba za ka sake zuwa makaranta ba. Me za ka yi?—

Yana da sauƙi mu yi abin da yake da kyau idan wani yana yin haka. Amma zai yi wuya idan wasu suna so mu yi abin da yake mugu. Za su ce abin da suke yi ba shi da laifi sosai. Amma babbar tambaya ita ce, Menene Allah ya ce game da shi? Shi ya fi mu sani.

Saboda haka, ko menene wasu suka ce, kada mu yi abubuwa da Allah ya ce ba su da kyau. A wannan hanyar za mu riƙa faranta wa Allah rai kullum, kuma ba za mu taɓa faranta wa Iblis rai ba.