pehala raja

2 jab daavid ki maut kareeb thi to usne apne bete sulaiman ko ye hidaytein di: 2 “dekh, ab main zyada din nahin jeeunga.* isliye tu himmat se kaam lena+ aur hausla rakhna.+ 3 tu hamesha yahova ki batayi raah par chalna. usne moosa ke kaanoon mein jo vidhiyaan, aagyayen, nyay-siddhaant aur yaad dilanevali hidaytein likhvayi hain un sabka tu paalan karna. is tarah tu apna farz nibhana.+ tab tu jo bhi kaam kare aur jahaan bhi jaaye, tu kaamyab hoga.* 4 aur yahova apna yah vaada nibhayega jo usne mere baare mein kiya tha, ‘agar tere bete mere saamne poore dil, poori jaan aur poori vafadari se sahi raah par chalte raheinge aur is tarah apne chaalchalan par dhyan deinge,+ to aisa kabhi nahin hoga ki israel ki raajgaddi par baithne ke liye tere vansh ka koi aadmi na ho.’+

5 tu yah bhi achhi tarah jaanta hai ki sarooyah ke bete yoab ne mere saath kya kiya tha. usne israel ke do senapatiyon ko yaani ner ke bete abner+ aur yeter ke bete amasa ko maar daala.+ usne yuddh ke samay nahin balki shaanti ke samay unka khoon bahaya.+ aisa karke usne apne kamarband aur jooton par khoon ka daag lagaya. 6 tu apni buddhi se kaam lena aur use aisi maut marne mat dena jaisi sab insanon par aati hai.*+

7 magar tu gilad ke rehnevale barjillai+ ke beton par kripa* karna. woh teri mez se khaaya karein kyonki jab main tere bhaai abshalom se bhaag raha tha+ to unhonne mera saath diya tha.+

8 aur tere pados mein bahooreem ka jo shimi rehta hai, binyameen gotra ke gera ka beta, use mat chhodna. jis din main mahnaim jaa raha tha,+ us din usne mujhe shaap diya tha, bade teekhe shabdon se mujh par vaar kiya tha.+ baad mein jab woh yardan ke paas mujhse milne aaya tha, tab haalanki mainne yahova ki shapath khaakaar usse kaha tha, ‘main tujhe talvar se nahin maar daaloonga,’+ 9 magar ab tu use saza diye bina mat chhodna.+ tu buddhiman aadmi hai aur jaanta hai ki uske saath kya kiya jaana chahiye. tu use maut ki saza dena taaki woh budhape mein shaanti se na mar sake.”*+

10 iske baad daavid ki maut ho gayi* aur use daavidpur mein dafnaya gaya.+ 11 daavid ne israel par 40 saal raaj kiya tha, 7 saal hebron+ mein rehkar aur 33 saal yarooshalem mein rehkar.+

12 fir sulaiman ne apne pita ki raajgaddi sambhali aur uska raaj dinon-din mazboot hota gaya.+

13 kuch samay baad haggeet ka beta adoniyah, sulaiman ki maa batsheba ke paas aaya. batsheba ne usse poochha, “tu nek irade se hi aaya hai na?” adoniyah ne kaha, “haan, main nek irade se hi aaya hoon.” 14 fir usne kaha, “main tujhse kuch kehna chahta hoon.” batsheba ne kaha, “bol, kya kehna chahta hai.” 15 usne kaha, “tu achhi tarah jaanti hai ki raajgaddi mujhe milni thi aur poora israel bhi yahi ummeed lagaye tha* ki main raja banoonga.+ magar raajgaddi mere haath se nikaal gayi aur mere bhaai ko mil gayi. khair koi baat nahin. yahova ki yahi marzee thi ki raajgaddi use mile.+ 16 magar ab main tujhse bas ek guzarish karna chahta hoon. tu inkar mat karna.” batsheba ne kaha, “bol, kya guzarish hai.” 17 usne kaha, “meharbani karke raja sulaiman se keh ki woh shoonem ki abeeshag+ mujhe de de, main use apni patni banana chahta hoon. woh teri baat nahin taalega.” 18 batsheba ne kaha, “theek hai. main teri taraf se raja se baat karoongi.”

19 tab batsheba adoniyah ki taraf se baat karne raja sulaiman ke paas gayi. jaise hi woh raja ke saamne aayi, raja apni raajgaddi se utha aur jhukkar use pranam kiya. fir woh apni raajgaddi par baith gaya aur raajmata ke liye ek aasan mangvaya taaki woh uske daayin taraf baithe. 20 fir batsheba ne kaha, “main ek chhoti-si guzarish lekar aayi hoon. tu inkar mat karna.” raja ne kaha, “maa, tujhe jo guzarish karni hai kar. main inkar nahin karoonga.” 21 batsheba ne kaha, “tu apne bhaai adoniyah ko shoonem ki abeeshag de de taaki woh use apni patni bana sake.” 22 raja sulaiman ne apni maa se kaha, “tu adoniyah ke liye sirf shoonem ki abeeshag hi kyon maang rahi hai? uske liye poora raajpat maang le!+ woh mera bada bhaai jo hai+ aur yaajak abiyatar aur sarooyah ka beta yoab+ bhi uski taraf hain.”+

23 iske baad raja sulaiman ne yahova ki shapath khaakaar kaha, “adoniyah ko is guzarish ki keemat apni jaan dekar chukani padegi. agar mainne use maut ke ghaat na utara to parmeshvar mujhe kadi-se-kadi saza de. 24 yahova ke jeevan ki shapath, jisne apne vaade ke mutabik mujhe mere pita daavid ki raajgaddi par bithaya, mera raaj mazbooti se kaayam kiya+ aur mere liye ek raaj-gharana taiyar kiya,+ aaj adoniyah ko maut ke ghaat utara jaayega.”+ 25 aisa kehne ke fauran baad raja sulaiman ne yahoyada ke bete banayah+ ko bheja jisne jaakaar adoniyah par vaar kiya aur woh mar gaya.

26 aur yaajak abiyatar+ se raja ne kaha, “tu anatot mein apne khet laut jaa!+ vaise to tu maut ki saza ke laayak hai, magar main aaj tujhe nahin maar daaloonga kyonki toone mere pita daavid ke saath rehte saare jahan ke maalik yahova ka sandook uthaya tha+ aur toone mere pita ke dukhon mein uska saath diya tha.”+ 27 sulaiman ne abiyatar ko yaajakpad se hata diya taaki woh ab se yaajak ke naate yahova ki seva na kare. is tarah usne yahova ki woh baat poori ki jo usne sheelo+ mein eli ke gharane ke khilaf sunayi thi.+

28 jab ye saari khabar yoab tak pahunchi, to woh bhaagkar yahova ke tamboo+ mein gaya aur usne vedi ke sing pakad liye. usne bhale hi abshalom ka saath nahin diya tha,+ magar usne adoniyah ka saath diya tha.+ 29 raja sulaiman ko bataya gaya ki yoab bhaagkar yahova ke tamboo mein gaya hai aur vedi ke paas khada hai. tab sulaiman ne yahoyada ke bete banayah ko yah kehkar bheja, “jaa, use khatm kar de!” 30 banayah yahova ke tamboo mein gaya aur usne yoab se kaha, “raja ka hukm hai, ‘tu baahar aa!’” magar yoab ne kaha, “nahin, main yahin maroonga.” banayah ne vaapas aakaar raja ko bataya ki yoab ne aisa-aisa kaha hai. 31 raja ne kaha, “theek hai. woh jaisa kehta hai vaisa hi kar. use vahin maar daal aur uski laash le jaakaar dafna de. usne begunahon ka khoon bahakar mujh par aur mere pita ke gharane par jo dosh lagaya hai use door kar.+ 32 yahova uske khoon ka dosh usi ke sir daale kyonki usne israel ke senapati abner+ ko aur yahooda ke senapati amasa+ ko maar daala aur mere pita ko is baare mein koi khabar nahin thi. ner ka beta abner aur yeter ka beta amasa, donon usse zyada nek aur bhale aadmi the, usne un donon ko talvar se maar daala.+ 33 un donon ke khoon ke liye yoab aur uske vanshaj sada doshi raheinge.+ magar daavid aur uske vanshajon ko, uske gharane aur uske raaj ko sada tak yahova ki taraf se shaanti mile.” 34 iske baad yahoyada ke bete banayah ne jaakaar yoab ko maar daala aur uski laash veerane mein uske ghar ke paas dafna di. 35 fir raja ne yahoyada ke bete banayah+ ko yoab ki jagah senapati thehraya aur saadok+ ko abiyatar ki jagah yaajak thehraya.

36 fir raja ne shimi+ ko bulvaya aur usse kaha, “tu yarooshalem mein apne liye ek ghar bana aur yahin reh. tu yah shehar chhodkar kahin nahin jaa sakta. 37 jis din tu shehar se baahar niklega aur kidron ghaati paar karega,+ us din tu zaroor maar daala jaayega. tera khoon tere hi sir padega.” 38 shimi ne raja se kaha, “mere maalik raja, tera yah faisla sahi hai. toone jaisa kaha hai, tera yah daas vaisa hi karega.” isliye shimi yarooshalem mein rehne laga aur kaafi samay tak vahin raha.

39 magar teesre saal ke aakhir mein shimi ke daason mein se do aadmi bhaag gaye aur gat ke raja aakeesh+ ke paas chale gaye, jo maaka ka beta tha. jaise hi shimi ko bataya gaya, “dekh, tere daas gat mein hain,” 40 usne fauran apne gadhe par kaathi kasi aur apne daason ko dhoondhne aakeesh ke paas gat gaya. jab shimi apne daason ko lekar vaapas aaya, 41 to sulaiman ko khabar di gayi ki shimi yarooshalem chhodkar gat gaya tha aur ab laut aaya hai. 42 tab raja ne shimi ko bulvaya aur usse kaha, “kya mainne tujhe yahova ki shapath nahin dharayi thi aur tujhe khabardar nahin kiya tha ki jis din tu yah shehar chhodkar kahin aur jaayega, us din tu zaroor maar daala jaayega? aur kya toone nahin kaha tha ki mera faisla sahi hai aur tu meri baat maanega?+ 43 to fir toone kyon apni baat nahin rakhi jo toone yahova ki shapath khaakaar kahi thi? aur mainne tujh par jo paabandi lagayi thi woh toone kyon nahin maani?” 44 raja ne shimi se yah bhi kaha, “tu khud achhi tarah jaanta hai ki toone mere pita daavid ke saath kitna bura kiya tha.+ ab yahova tujhe us burai ka fal dega.+ 45 magar raja sulaiman ko aasheesh milegi+ aur daavid ka raaj yahova ke saamne hamesha tak mazbooti se kaayam rahega.” 46 yah kehkar raja ne yahoyada ke bete banayah ko hukm diya ki woh shimi ko maar daale. banayah ne jaakaar use maar daala.+

is tarah israel par sulaiman ka raaj mazbooti se kaayam ho gaya.+